1, 2. ა) ნამ სუმ სულიერ განძი მუჩეს იეჰოვაქ? ბ) მუს გენიფხილენთ თე სტატიას?

იეჰოვა არძაშ უმოს მდიდარ რე მთელ სამყაროს (1 მატ. 29:11, 12). ჩქინ ხეგოფაჩილ მუმა არძას არზენს სულიერ სიმდიდრეს, მიდგა აფასენს თის. მარდულ ვორეთ, ნამდა იეჰოვაქ მუჩეს სულიერ საგანძურ, ნამდგაშა მიშურს 1) ღორონთიშ სამეფო, 2) მსახურება დო 3) ბიბლიურ ჭეშმარიტება. ფრთხილას ვეპჸით-და, შილებე ვადვაფასათ თე განძი დო გვალო მივოდინუათ თინა. თაშ ვამოხვადასინ თიშგურშენ, ჯგირო ოკო გეგმიბრინუათ თე განძი დო უმოსო ქიპჸოროფუათ თინა. იესოქ თქუ: „სოდეთ განძი გიღუნან, თქვან გური ხოლო თექ იჸი“ (ლუკ. 12:34).

² თე სტატიას გუვარჩიენთ, მუჭო შემლებნა გუვამანგარათ ჩქინ ჸოროფა დო დუვაფასათ სამეფო, მსახურება დო ჭეშმარიტება. თე საკითხეფიშ გარჩიებაშ დროს დეფიქრით, პირადო თქვა, მუჭო შეილებნა გამანგარათ სულიერ განძიშ ჸოროფა.

3. მუშ კეთებაშო რდუ მზათ დიდვაჭარ, ნამდა ძვირფას მარგალიტ ქიჸიდკონ? (ქოძირით სურათი თე გვერდის).

³ წეკითხით მათე 13:45, 46. * იესოქ მიჸონ მაგალით დიდვაჭარშენ, ნამუთ მარგალიტეფს გორუნდ. მუშო ოკო რაგად, წანეფიშ დინახალე, თე ვაჭარი ჸიდულენდ დო გუმოჩანდკონ იჸიდ ოშობით მარგალიტის. არჩა თიქ ქოძირ თიცალ ძვირფას მარგალიტ, ნამუშ ძირაფაშ დროს გურქ ხიოლით გეიაფშუ. მარა თე მარგალიტ ქიჸიდკონ თიშენ, ირფელ ოკო გეგმოჩუკო, მუთ უღუდუნ. ქუგაფნანო წარმოდგენილ, მუ ძვირფას რდუ თე მარგალიტ თიშო?

4. მუშ კეთებაშო იპჸით მზათ, დიდვაჭარს უჸორდ მარგალიტინ თეშ, ღორონთიშ სამეფო ქომიჸორა-და?

⁴ მუს ბგურაფლენთ თავრეშე? ღორონთიშ სამეფოშ გურშენ ჭეშმარიტება გუ თე ძვირფას მარგალიტის. მუჭოთ დიდვაჭარს უჸორდ მარგალიტინ თეშ, ჭეშმარიტება ჩქი ხოლო ქომიჸორა-და, ირფელს დაფთმენთ, ნამდა ქიპჸუათ დო ქუდოფსკიდათ სამეფოშ ქვეშევრდომო (წეკითხით მარკოზი 10:28—30). * გენიფხილათ ჟირ პიროვნებაშ მაგალით, ნამუთიქ თაშ მიქცუ.

5. მუჭო ოძირუ ზაქექ, ნამდა აფასენდ ღორონთიშ სამეფოს?

⁵ ზაქე ოგაფურეფიშ მაშაყარალ რდუ. თინა ხალხის აღორენდ, ფარას გიწოტყურუნდ დო თეგვარო გემდიდრუ (ლუკ. 19:1—9). მუჟამსით თე უპატიოსნო კოჩიქ სამეფოშ გურშენ იესოშ ქადაქება ქიმირჩქილუნ, ქიმეხვად, მუ ძვირფას რდუ, მუთ გეგუნ თინა დო ხეთეშე მოქმედება ქიდიჭყუ. თიქ თქუ: „აჸ უფალი, ჩქიმ ქონებაშ გვერდის ღარიბეფს ვარზენქ დო მუთ შხვაშა ტყურაშ ეკობრალებათ მიდამღალუნ, ოთხმაგო ვურთინუანქ“. თიქ ხიოლით დართინუ ფარა, ნამუთ სწორ შარათ ვაფუდ შიებულ დო ჰარამობას დუდ დანებ.

6. მუ თირუ ართ ოსურქ მუშ ცხოვრებას ღორონთიშ სამეფოშ გურშენ დო მუშენ მიქცუ თაშ?

⁶ ართ ლესბოსელ ოსურქ სამეფოშ გურშენ სახიოლო ამბე ქიმირჩქილუ. თინა ჰომოსექსუალეფიშ უფლებეფიშ დამცველ ორგანიზაციაშ პრეზიდენტი რდუ. მარა მუჟამსით ბიბლიაშ გურაფა ქიდიჭყუნ, ქოძირ, მუ ძვირფას რდუ ჭეშმარიტება ღორონთიშ სამეფოშ გურშენ. თიქ ქიმეხვად, ნამდა ბრელ მუთუნ აჸიდ ოთირალ მუშ ცხოვრებას (1 კორ. 6:9, 10). თე ოსურქ ქიდიტუ მუშ სამუშა დო მიოტუ ჯვეშ ცხოვრებაშ წესი. 2009 წანას დინათ დო ართ წანაშა პიონერო მსახურება ხოლო ქიდიჭყ. იეჰოვაშა დო სამეფოშა თიშ ჸოროფა უმოს მანგარ რდუ, ვინემ ხორციელ კორნებეფი (მარ. 12:29, 30).

7. მუჭო შემლებნა მთელ გურით მიჸორდან ღორონთიშ სამეფო?

⁷ ჩქინდე ბრელქ მთლიანო დოთირუ მუშ ცხოვრება, ღორონთიშ სამეფოშ ქვეშევრდომო გინორთედკონ თიშენ (რომ. 12:2). მარა თეთ ირფელ ვეთებუ. კურცხას ოკო ვორდათ, ნამდა ჩქინ გური ვედეკინას ხორციელ კორნებეფქ, მუნერით რე მატერიალურ ნივთეფიშ ჸოროფა დო სექსუალურ უზნეობა (იგავ. 4:23; მათ. 5:27—29). იეჰოვაქ შხვა ძვირფას განძი ხოლო მუჩეს, ნამუთ მიმეხვარებნა, მთელ გურით მიჸორდან ღორონთიშ სამეფო.

8. ა) მუშენ თქუ პავლექ ქადაქებაშენ, ნამდა თინა რდუ განძი „თიხაშ ჭურჭელს“? ბ) მუჭო ოძირანდ პავლე, ნამდა აფასენდ მსახურებას?

⁸ იესოქ დუმავალეს, იფქადაქათ დო ვოგურუათ ხალხის სახიოლო ამბე სამეფოშ გურშენ (მათ. 28:19, 20). პავლეს არჩქილედ, მუ ძვირფას რდუ მსახურება. თიქ ქადაქებაშენ თქუ, ნამდა თინა რდუ განძი „თიხაშ ჭურჭელს“ (2 კორ. 4:7; 1 ტიმ. 1:12). მართალ რე, ჩქი არასრულყოფილ თიხაშ ჭურჭელ ვორეთ, მარა სახიოლო ამბეს, ნამუსით ფქადაქენთინ, მარადიულ სიცოცხლე  მოუღ მუჭოთ ჩქინო თეშ, თინეფშო ხოლო, მიდგას ვუქადაქენთ. პავლეს უჩქუდ თენა, ათეშგურშენ თქუ: „ირფელს სახიოლო ამბეშ გურშენ ვორთუქ, ნამდა შხვეფს გეგნოფჩე თინა“ (1 კორ. 9:23). პავლეს უჸორდ მსახურება, ათეშგურშენ ოგურუანდ შხვეფს (წეკითხით რომაელები 1:14, 15; 2 ტიმოთე 4:2). * მსახურებაშ ჸოროფაქ მეხვარ თის, გურზუკო თხოზინს (1 თეს. 2:2). მუჭო შემლებნა ვოძირათ ჩქი, ნამდა მიჸორა მსახურება?

9. მუჭო შემლებნა ვოძირათ, ნამდა ვაფასენთ მსახურებას?

⁹ პავლე არძა საშვალებას გიმირინუანდ, უქადაქუკო შხვეფს დო თეთ ხოლო ოძირანდ, ნამდა აფასენდ მსახურებას. მოციქულეფ დო ადრეიან ქრისტიანეფცალო ჩქი ხოლო ფქადაქენთ ირნერ სიტუაციას, სახალხოთ დო კარდოკარ (საქ. 5:42; 20:20). მდგომარეობა საშვალებას ქუმარზენან-და, ვოცადუთ მეტ გუვაკეთათ, მაგალთო იმსახურათ დამხმარე პიონერო ვარდა სრულ დროთ პიონერო. თეშ გარდა, შემლებნა ქიდიბგურუათ ახალ ნინა, გეგნოფრთათ ჩქინ ქიანას შხვა ტერიტორიაშა, ვარდა შხვა ქიანაშა (საქ. 16:9, 10).

10. მუჭო აკურთხ იეჰოვაქ ირენიშ მონდომა, იქადაქუკო სახიოლო ამბე შხვა ტერიტორიას?

¹⁰ ართ დაუქორწინებელ და ირენს, ნამუთ შეერთებულ შტატეფს ცხოვრენს, მანგარო ოკოდ უქადაქუკო რუს ემიგრანტეფს. 1993 წანას, მუჟამსით თიქ რუსულ ტერიტორიას ქადაქება დიჭყუნ, ქალაქ ნიუ-იორკის რუსულ ჯგუფის ხვალე 20 მაუწყებელ რდუ. ირენი სოდგარენ 20 წანაშ დინახალე მონდომებულო ქადაქენდ თე ტერიტორიას. თინა იჩიებ: „ამდღა ხოლო ვამიჩქ ჯგირო რუსულ“. მარა იეჰოვაქ აკურთხ თიშ დო შხვეფიშ მონდომა ხოლო, მით ირენცალო ოცადუდ, იქადაქუკო შხვა ტერიტორიას. ამდღა ამშვი რუსულ კრება რე ნიუ-იორკის. 15 პიროვნებაქ, მიდგას ირენი ბიბლიას ოგურუანდუნ, დინათ. ნამთინე ბეთელს მსახურენს, შხვეფ პიონერეფ დო უხუცესეფ რენა. ირენი იჩიებ: „დარწმუნებულ ვორექ, შხვა მიზნეფი ვამომღანდ თიცალ ხიოლს, მუჭოთ თეცალ მსახურება“. ნამდვილო, თინა აფასენს მსახურებას!

11. მუ ჯგირ შედეგეფ მოჸუნს თხოზინიშ უმკუჯინუო ქადაქებას?

¹¹ მსახურებას ქუვაფასენთ-და, თხოზინიშ უმკუჯინუო, პავლეცალო ჩქი ხოლო ვამვოტალენთ ქადაქებას (საქ. 14:19—22). 1930-იან დო 1940-იან წანეფიშ დაჭყაფუს ჩქინ ჯიმალეფს მანგარო თხოზუდეს შეერთებულ შტატეფს. მარა თინეფ პავლეცალო უშკურანჯუო აგრძელენდეს ქადაქებას. მუნეფიშ უფლებეფი ქიდეცვესკონ თიშენ,  თინეფქ ბრელშა მიშიღეს სასამართლოშა საქმე. 1943 წანას შეერთებულ შტატეფს უზენაეს სასამართლოს ართ-ართ საქმეშ მოგებაშ უკულ, ჯიმა ნეითან ნორქ თქუ: „თე მოგებეფი თქვან ბრძოლაშ შედეგ რე. მაქადაქებელეფს მსახურება ვაგუგრძელებდესკონ, ნამთინ საქმე ვეჸიდ უზენაეს სასამართლოს; მარა თე თხოზინს ზუსტას თიშ გურშენ ვორჯგინით, ნამდა თქვა, ჯიმალეფი მთელ მსოფლიოს დუც ვადვანთ დო აგრძელენთ მსახურებას. ღორონთიშ ხალხიშ თეშნერ სიმტკიცეს საბოლათ თავისუფლება მოუღ“. შხვა ქიანეფს ხოლო ჩქინ ჯიმალეფ ზუსტას თაშ იქციებუნან თიშ გურშენ, იგენა სასამართლო საქმეეფს. ნამდვილო, ჩქი მიჸორა მსახურება, ათეშგურშენ თხოზინიშ უმკუჯინუო ვაგრძელენთ თის.

12. მუს ოკო მიაქცაუთ ყურადღება მსახურებას?

¹² მსახურებას ქუვაფასენთ-და, ჩქინო ხვალე თინა ვეჸი მნიშვნელოვან, მუსხი საათის იფქადაქენთ. ჩქინო მთავარ იჸი გუვაკეთათ ირფელ, ნამდა „კილკილშა დუვამოწმათ სახიოლო ამბე“ (საქ. 20:24; 2 ტიმ. 4:5). მარა მუ ოკო ვოგურუათ შხვეფს? გენიფხილათ ხოლო ართ განძი, ნამუთ ღორონთიქ მუჩეს.

13, 14. მუ რე თი „საგანძურ“, ნამუთ იესოქ მიშინუ მათეშ 13:52-ის დო მუჭო ევოფშათ თინა?

¹³ ხოლო ართ სულიერ განძი, ნამუთ იეჰოვაქ მუჩეს, ბიბლიურ ჭეშმარიტება რე (2 სამ. 7:28; ფსალმ. 31:5). ჩქინ ზეციერ მუმა იეჰოვა ბიბლიურ ჭეშმარიტებას ოგებაფუანს თინეფს, მიდგას თიშ შიშ უღუ. თიმ დროშე მოჸუნაფილ, მუჟამსით პირველო გებგით ჭეშმარიტება, მიღუნა საშვალება უმოს მეტ რჩქინა მიბღათ ბიბლიაშე, ჩქინ პუბლიკაციეფშე, კონგრესეფშე დო კრებეფშე. დროშ მიკულაწკუმა ართო, მუჭოთ იესოქ თქუნ, ჩქინ სულიერ „საგანძურს“ ირიათო აძინუ (წეკითხით მათე 13:45, 46). * ჭეშმარიტებას მუჭოთ ჩუალირ განძის თეშ ქობგორუნთ-და, იეჰოვა მიმეხვარებნა ჩქინ „საგანძურქ“ გეიფშას (წეკითხით იგავები 2:4—7).* მუჭო რე თენა შეიოლებერ?

¹⁴ ჩქი ოკო მიღუდან პირად გურაფაშ ჯგირ ჩვევა დო ტომბაშე ოკო გემიბრკუათ ღორონთიშ სიტყვა დო ჩქინ პუბლიკაციეფი. თენა მიმეხვარებნა, ქიგებგათ მუდგარენ ახალ, ნამუთ თეიშახ ვამჩქუდეს (იეს. 1:8, 9; ფსალმ. 1:2, 3). თე ჟურნალიშ პირველ გიშაშკუმალას, ნამუთიქ 1879 წანაშ კვირკვეს გიშართ, ჭარუდ: „ჭეშმარიტება გუ ჭიჭე ყვავილს, ნამუთ ღვანძგილეფს რე მიშატყობინაფილ. მუჟამსით ქოძირუნქინ, თოლ ოკო ვაჩუთხინუე თის . . . წილუა ქუგოკონ-და, თუდო ოკო გეგმიკინე. ვეგეჯერდა ჭეშმარიტებაშ ხვალე ართ ყვავილს . . . გაგრძელ გორუა დო დოშაყარე უმოს მეტ“. ნამდვილო, ირიათო ოკო გუვახვეიანათ ჩქინ საგანძურ ბიბლიურ ჭეშმარიტებათ.

15. მუშენ შილებე გუვოდვათ ნამთინე ბიბლიურ გურაფას „ჯვეშ“ დო თავრეშე თქვა ნამუს აფასენთ არძაშ უმოსო?

¹⁵ ბიბლიურ ჭეშმარიტებაშ გურშენ ჭიჭე მუდგარენ თიმწკუმა გებგით, მუჟამსით ღორონთიშ ხალხწკუმა დიბჭყით ურთიერთობა. თე რჩქინას შილებე „ჯვეშ“ ქიგვოდვათ, მუშენდა თინა თიმწკუმა მიბღით, მუჟამსით ქრისტიანულ შარას გივოდირთით. მუ მიშურს თი ძვირფას რჩქინაშა, ნამუთ პირველაშო მიბღით? ჩქი ქიგებგით, ნამდა იეჰოვა რე ჩქინ გუმაჭყაფალ, ნამუთიქ სიცოცხლე მუჩეს. ჩქი თინა ხოლო გებგით, ნამდა თის უღუ განზრახვა, ნამუთ დედამიწას ოხუ. თეშ  გარდა, მიჩქუნა, ნამდა ღორონთიქ ჸოროფა გიმირჩქინ დო მუშ სქუაშ სიცოცხლეშ შეწირუათ, ქომჩეს საშვალება, ცოდა დო ღურაშე გეფთავისუფლათ. თინა ხოლო ქიგებგით, ნამდა ღორონთიშ სამეფო ბოლოს მუღენს ირნერ ტანჯებას დო მაღვენუნა საშვალება, მარადიულო იფცხოვრათ მშვიდ გარემოს დო ბედნერეფ ვორდათ ღორონთიშ მართველობაშ თუდო (იოან. 3:16; გამოცხ. 4:11; 21:3, 4).

16. მუ ოკო ბღოლუათ, მუჟამსით ნამთინე გაგება ითირუ?

¹⁶ მინშა შილებე ოთირალქ მაჸუან ჩქინ გაგებაქ, ნამთინე ბიბლიურ წინასწარმეტყველებაშენ ვარდა ბიბლიურ მონაკვეთშენ. მუჟამსით გაგებეფ ითირუნ, ჩქი დრო ოკო გეგმურთათ თის, ნამდა გეგმიბრკუათ თე ინფორმაცია დო დეფიფქრათ თიშე (საქ. 17:11; 1 ტიმ. 4:15). ჩქი ხვალე თის ოკო ვევეცადათ, ნამდა ქიგებგათ ძირითად განსხვავება ჯვეშ დო ახალ გაგებეფ შქას; დებინტერესათ ოკო დეტალეფით დო ჭიჭე განსვხავებეფით ხოლო. თაშ ქიმიფქციებუთ-და, შემლებნა დარწმუნებულ ვორდათ, ნამდა ჩქინ საგანძურს ახალ რჩქინათ გევოფშანთ. მუშენ უღუ აზრი ჩქინ მონდომას?

17, 18. მუჭო მიმეხვარებნა წმინდა შური?

¹⁷ იესოქ თქუ, ნამდა ღორონთიშ წმინდა შურს შეულებ ქუგმოშინან თინა, მუთ იბგურეთ (იოან. 14:25, 26). მუჭო მიმეხვარებნა თენა სახიოლო ამბეშ ქადაქებაშ დროს? გენიფხილათ ართ ჯიმაშ, პეტრეშ მაგალით. 1970 წანას, მუჟამსით თინა 19 წანერ რდუნ, ახალ დოჭყაფილ აფუდ ბრიტანეთიშ ბეთელს მსახურება. კარდოკარ ქადაქებაშ დროს თიქ ქეშეხვად საშვალო ასაკიშ ბჟაკეამ კოჩის. პეტრექ კითხუ თის, ხომ ვაკოდ ბიბლიაშ გურაფა. თე კოჩიქ გაკვირვებულო უპასუხ პეტრეს, ნამდა თინა ებრაელ რაბინ რდუ. უკულ პეტრე ქენაჭკირკონ თიშენ, კითხუ: „ჩქიმ ბოში, აბა ქომწი, მუ ნინაშა იჭარ დანიელიშ წიგნიქ?“. პეტრექ უპასუხ: „წიგნიშ ნაწილქ არამეულ ნინაშა იჭარ“. პეტრე იჩიებ: „რაბინს გუკვირდ, ნამდა თე კითხვაშ პასუხ მიჩქუდ, მარა თიშე უმოს გაკვირვებულ მა ვორდი. სოვრეშე მიჩქუდ თეშ პასუხი? ჸუდეშა ქიმეფრთინ, ბოლო თუთეფიშ ჟურნალეფს ქიგნვოჯინ დო ქობძირ თი სტატია, სოდეთ ჭარუდ, ნამდა დანიელიშ წიგნი არამეულ ნინაშა რდუ ნაჭარა“ (დან. 2:4). თე მაგალითშე ვორწყეთ, ნამდა წმინდა შურს შეულებ ქუგმოშინან თინა, მუდგას პკითხულენთ დო ჩქინ საგანძურს ფჩუანთ (ლუკ. 12:11, 12; 21:13—15).

¹⁸ ღორონთშე მიღებულ სიბრძნეს ქუვაფასენთ-და, მთელ გურით მოკოდან იჸი, გევოფშათ ჩქინ საგანძურ ჯვეშ დო ახალ რჩქინათ. ჭეშმარიტება ქომიჸორა დო ქუვაფასენთ-და, თენა მიმეხვარებნა, უმოს უჯგუშო ვოგურუათ შხვეფს ბიბლიურ ჭეშმარიტება.

19. მუშენ რე ჩქინ სულიერ საგანძურიშ თხილუა საჭირო?

¹⁹ სატანა დო მუშ ქიანა ოცად, მემდინუან ჸოროფა დო ვადვაფასათ სულიერ საგანძურ, ნამუთ თე სტატიას გენიფხილით. თეშე ნამთინ ვა ვორეთ დაზღვეულ. ფრთხილას ვეპჸით-და, შილებე ადვილო დევეთანხმათ კომფორტულ ცხოვრებას დო თიცალ სამუშას, სოდეთ მაღალ ხელფას რე, ვარდა ქონებათ ცქვაფაშ სურვილქ გომრჩქინდან. მოციქულ იოანე მაფრთხილენა, ნამდა გინურს თე ქიანა დო თიშ კორნებეფი ხოლო (1 იოან. 2:15—17). თაშ ნამდა, მორთ, დუვაფასათ ჩქინ სულიერ საგანძური დო დოფთხილუათ თინა.

20. მუ გაფნა გინოჭყივიდილ, ნამდა დოთხილუათ თქვან სულიერ განძი?

²⁰ დეთხინეთ ირფელ, მუთ გეცილებნა, მთელ გურით გიჸორდან ღორონთიშ სამეფო. გაგრძელით მთელ გურით ქადაქება დო დაფასით მსახურება. გაგრძელით ბიბლიურ ჭეშმარიტებაშ გიმორკვიება. თაშ ქიმიქციებუთ-და, დოშაყარანთ „განძის ზეცას, სოდეთ ვართ მახინჯის მიართე დო ვართ კიტიტ ჭკომუნს, მუშენდა სოდეთ განძი გიღუნან, თქვან გური ხოლო თექ იჸი“ (ლუკ. 12:33, 34).