1, 2. 1) ¿Máakalmáak le óoxpʼéel ayikʼaliloʼob u tsʼaamajtoʼon Jéeobaoʼ? 2) ¿Baʼax ken k-xakʼalt teʼ xookaʼ?

MIX máak maas ayikʼal tiʼ Dios, tumen tuláakal baʼax yaneʼ u tiaʼal (1 Cró. 29:11, 12). Letiʼeʼ juntúul Taatatsil jach uts, le oʼolal ku tsʼáaik yaʼabkach ayikʼalil tiʼ le máaxoʼob u yaabiltmoʼob le baʼaxoʼob ku tsʼáaikoʼ. Jujunpʼéel tiʼ le ayikʼaliloʼob ku tsʼáaiktoʼonoʼ yaan yil yéetel 1) le Reinooʼ, 2) le kʼaʼaytajoʼ yéetel 3) u jaajil yaan teʼ Bibliaoʼ. ¿Máasaʼ jach kiʼimak k-óol yoʼolal le baʼaloʼobaʼ? Chéen baʼaleʼ wa maʼ k-kanáantik baʼaxoʼob k-beetkeʼ jeʼel u xuʼulul k-ilik bey koʼoj u tojoloʼobeʼ yéetel jeʼel tak u xuʼulul k-yaabiltikoʼobeʼ. Utiaʼal maʼ u yúuchul lelaʼ unaj k-ilik k-jóoʼsik u yutsiloʼob yéetel k-maas yaabiltikoʼob. Le oʼolal Jesuseʼ tu yaʼalaj: «Tuʼux yaan a ayikʼalileʼexeʼ tiʼ yaan xan a puksiʼikʼaleʼexiʼ» (Luc. 12:34).

² Koʼoneʼex ilik bix jeʼel u seguer k-eʼesik k-yaabiltmaj le Reinooʼ, le kʼaʼaytajoʼ yéetel le u jaajil ku taal teʼ Bibliaoʼ. Le táan k-xakʼalxoktikoʼ unaj k-tuklik bix jeʼel k-maas yaabiltikoʼobeʼ.

3. ¿Baʼax anchaj u beetik juntúul j-koonol utiaʼal u manik junpʼéel perla jach koʼoj u tojol? (Ilawil le dibujo yaan tu káajbal le xookaʼ.)

³ (Xok Mateo 13:45, 46.) Jesuseʼ tu tsikbaltaj baʼax tu beetaj juntúul j-koonol ku máan u kaxt perlaʼob u mane. Juntúul máak beyaʼ yaʼab perlaʼob tsʼoʼok u manik yéetel tsʼoʼok u konik. Baʼaleʼ junpʼéel kʼiineʼ le máakoʼ tu kaxtaj junpʼéel perla jach táaj jatsʼuts, mix juntéen u yile. Utiaʼal u manikeʼ anchaj u konik tuláakal baʼaxoʼob yaantiʼ. Le oʼolal jeʼel u páajtal k-aʼalik jach tu jaajil utschaj tu yicheʼ.

4. ¿Baʼax ken k-beet wa jach koʼoj k-ilik u Reino Dios jeʼex le j-koonol kaxt le perlaoʼ?

⁴ ¿Baʼaxten maʼalob ka k-xakʼalxokt le tsikbalaʼ? Tumen le u jaajil yoʼolal u Reino Diosoʼ ku keʼetel yéetel junpʼéel perla jach koʼoj u tojol. Wa koʼoj k-ilik jeʼex le j-koonoloʼ, yaan k-pʼatik tuláakal baʼax yaantoʼon utiaʼal u páajtal k-antal yáanal le Reinooʼ (xok Marcos 10:28-30). Koʼoneʼex ilik bix úuchik u beetik kaʼatúul máak.

5. ¿Baʼax tu beetaj Zaqueo yoʼolal le Reinooʼ?

⁵ Zaqueoeʼ juntúul máak ku kʼamik kaʼach impuestoʼob, letiʼeʼ jach ayikʼal tumen yaʼab u yoklik le máakoʼoboʼ (Luc. 19:1-9). Chéen baʼaleʼ le ka tu yuʼubaj u tsikbaltaʼal le Reino tumen Jesusoʼ, tu tsʼáaj cuenta maas koʼoj u tojol tiʼ le baʼaxoʼob yaantiʼoʼ. Le oʼolal tu yaʼalaj: «Yuumtsil, ¡ile!, táanchumuk tiʼ le baʼaxoʼob yaantenoʼ kin tsʼáaik tiʼ le óotsiloʼoboʼ, yéetel tuláakal le baʼax tin woklaj tiʼ wa máax ikil aʼalaʼabik junpʼéel tuus tu contraeʼ, kin sutik kantéen u maas yaʼabil tiʼ». Jeʼex k-ilkoʼ Zaqueoeʼ tu yaʼalaj yaan u sutik tuláakal le taakʼin u yokoltmajoʼ yéetel xuʼul u tsʼíiboltik ayikʼaliloʼob.

6. ¿Baʼax tu beetaj Rose, yéetel baʼaxten?

⁶ Juntúul koʼolel ken k-tsʼáa u kʼaabaʼt Roseeʼ kajakbal kaʼach yéetel uláakʼ juntúul koʼolel yéetel letiʼ kaʼach u nojchil le organización ku tʼaan tu favor le homosexualoʼoboʼ. Junpʼéel kʼiineʼ tu yuʼubaj u maʼalob péektsilil le Reinooʼ. Le ka tu xokaj le Bibliaoʼ, tu kanaj yaʼab baʼaxoʼob jatsʼutstak yoʼolal u Reino Dios, le oʼolal tu chʼaʼtuklaj u kʼexik yaʼab baʼaloʼob ichil u kuxtal (1 Cor. 6:9, 10). Péeksaʼab tumen u puksiʼikʼal u pʼat le meyaj ku beetik kaʼachoʼ yéetel tu pʼataj le koʼolel kajakbal kaʼach tu yéeteloʼ. Letiʼeʼ okjaʼanaj tu jaʼabil 2009. Ka máan junpʼéel añoeʼ káaj u beetik u precursora regularil. U yaabilaj tiʼ Jéeoba yéetel tiʼ le Reinooʼ maas yanchaj u muukʼ tiʼ u kʼaakʼas tsʼíibolaloʼob (Mar. 12:29, 30).

7. ¿Tiʼ baʼaxoʼob unaj k-kanáantikba utiaʼal maʼ u xuʼulul k-eʼesik k-tsʼáaikba tu tséel u Reino Dios yéetel tuláakal k-puksiʼikʼal?

⁷ Yaʼab tiʼ toʼoneʼ tsʼoʼok u beetik nukuch kʼeexoʼob ichil u kuxtal utiaʼal u tsʼáaikuba yáanal u nuʼuktaj u Reino Dios (Rom. 12:2). Chéen baʼaleʼ láayliʼ yaan baʼaxoʼob unaj u seguer k-beetkeʼ. Kʼaʼabéet k-kanáantikba utiaʼal maʼ k-tsʼíiboltik ayikʼaliloʼob mix k-tsʼíiboltik u yantal baʼax k-il yéetel máax maʼ k-núupiʼ, beyoʼ maʼ kun xuʼulul k-tsʼáaikba tu tséel le Reinooʼ (Pro. 4:23; Mat. 5:27-29). Jéeobaeʼ u tsʼaamajtoʼon uláakʼ ayikʼalil utiaʼal maʼ u xuʼulul k-yaabiltik u Reino yéetel tuláakal k-puksiʼikʼal.

8. 1) ¿Baʼaxten Pabloeʼ tu yaʼaleʼ le kʼaʼaytajoʼ bey ‹tsʼaʼanoʼob tiʼ nuʼukuloʼob de kʼateʼ›? 2) ¿Bix úuchik u yeʼesik Pablo jach uts tu yich u kʼaʼaytaj?

⁸ Kʼaʼajaktoʼoneʼ Jesuseʼ tu kʼubéentajtoʼon ka k-kʼaʼayt yéetel ka k-kaʼans u maʼalob péektsilil u Reino Dios (Mat. 28:19, 20). Apóstol Pabloeʼ tu yileʼ u meyajtaʼal Dioseʼ jach koʼoj u tojol, le oʼolal tu yaʼaleʼ «le koʼokoj baʼaloʼobaʼ tsʼaʼantoʼon tiʼ nuʼukuloʼob de  kʼat» (2 Cor. 4:7; 1 Tim. 1:12). Kex kʼebanoʼon yéetel beyoʼon nuʼukuloʼob de kʼateʼ, le baʼax k-kʼaʼaytikoʼ jeʼel u tsʼáaiktoʼon kuxtal minaʼan u xuuleʼ bey xan tiʼ le máaxoʼob uʼuyikoʼ. Le oʼolal Pabloeʼ tu yaʼalaj: «Tuláakal le baʼaloʼob kin beetkoʼ kin beetik tu yoʼolal le maʼalob péektsiloʼ, utiaʼal ka páajchajak in kʼaʼaytik tiʼ uláakʼ máakoʼob» (1 Cor. 9:23). Letiʼeʼ jach uts tu yich u kʼaʼaytaj, le oʼolal tu tsʼáaj u yóol u kaʼans uláakʼ máakoʼob (xok Romailoʼob 1:14, 15 yéetel 2 Timoteo 4:2). Tsʼoʼoleʼ jach uts tu yich u kʼaʼaytik kaʼach le maʼalob péektsiloʼ, le oʼolal chúukpaj u yóol u beet kex jach chʼaʼpachtaʼabi (1 Tes. 2:2). ¿Bix jeʼel k-beetik jeʼex tu beetiloʼ?

9. ¿Baʼaxoʼob jeʼel k-beetik utiaʼal k-eʼesik jatsʼuts k-ilik k-kʼaʼaytajeʼ?

⁹ Pabloeʼ tu yeʼesaj jach uts tu yich u kʼaʼaytaj, le oʼolal tu tsikbaltaj le maʼalob péektsil tiʼ tuláakal súutukiloʼ. Jeʼex tu beetil le apostoloʼob yéetel uláakʼ máaxoʼob meyajt Dios teʼ yáax siglooʼ, toʼon xaneʼ k-kʼaʼaytaj kex maʼ le jokʼaʼanoʼon k-beetiʼ, k-kʼaʼaytaj tuʼux ku máan yaʼab máak bey xan joonaj joonajil (Bax. 5:42; 20:20). Unaj k-ilik k-kʼaʼaytaj tiʼ le bukaʼaj máakoʼob ku páajtaleʼ. Wa ku béeytaleʼ maʼalob ka k-beet k-precursor auxiliaril wa regularil, k-kanik uláakʼ idioma wa k-bin kʼaʼaytaj tuláakʼ kaaj wa tuláakʼ luʼumil (Bax. 16:9, 10).

10. ¿Baʼax utsiloʼob tu taasaj le baʼax tu beetaj Irene utiaʼal u kʼaʼaytik le maʼalob péektsiloʼ?

¹⁰ Tuukulnakoʼon tiʼ Irene, juntúul kiik maʼ tsʼokaʼan u beel kajaʼan Estados Unidosiʼ, letiʼeʼ taakchaj u kʼaʼaytik le maʼalob péektsil tiʼ le máaxoʼob tʼanik rusooʼ. Ka káaj u beetik tu jaʼabil 1993, chéen kex veinte j-kʼaʼaytajoʼob yaan teʼ chan grupo tʼanik ruso yaan tu kaajil Nueva Yorkoʼ. Kex tsʼoʼok u máan veinte años joʼopʼok u kanik rusoeʼ, ku yaʼalikeʼ láayliʼ maʼ béeychajak u tʼanik tubeeliʼ. Chéen baʼaleʼ Jéeobaeʼ tsʼoʼok u bendecirtik ikil u tsʼáaik u yóol u kane bey xan le u maasil sukuʼunoʼob táan u kankoʼoboʼ. Bejlaʼeʼ yaan seis múuchʼuliloʼob tʼanik ruso tu kaajil Nueva York. Quince máaxoʼob xooknajoʼob yéetel Ireneeʼ okjaʼanajoʼob, yanoʼobeʼ ku meyajoʼob Betel, precursoroʼob wa ancianoʼob. Letiʼeʼ ku yaʼalik: «Yaan kʼiineʼ kin tuukul tiʼ uláakʼ baʼaxoʼob jeʼel u páajtal kaʼach in beetkeʼ, chéen baʼaleʼ jach in wojel mix junpʼéel jeʼel u beetik u jach kiʼimaktal in wóoleʼ». Lelaʼ ku yeʼesiktoʼoneʼ jach uts tu yich u kʼaʼaytaj.

11. ¿Baʼax utsiloʼob ku taasik k-kʼaʼaytaj kex táan k-chʼaʼpachtaʼal?

¹¹ Wa k-yaabiltmaj le meyaj u tsʼaamajtoʼon Diosoʼ maʼ kun xuʼulul k-kʼaʼaytaj kex ka chʼaʼpachtaʼakoʼon, jeʼex tu beetil Pablo ka chʼaʼpachtaʼabeʼ (Bax. 14:19-22). Tu jaʼabiloʼob 1930 tak tu yookbal 1940, le  sukuʼunoʼob kajaʼanoʼob Estados Unidosoʼ jach chʼaʼpachtaʼaboʼob. Chéen baʼaleʼ maʼ tu xulaj u kʼaʼaytajoʼob jeʼex tu beetil Pabloeʼ. Utiaʼal maʼ u luʼsaʼal u derechoil u kʼaʼaytajoʼobeʼ yaʼab u téenel binoʼob tu táan le tribunaloʼoboʼ. Tu jaʼabil 1943, le sukuʼun Nathan Knorroʼ tu yaʼalaj yoʼolal junpʼéel juicio tu ganartoʼob teʼ Tribunal Supremo tiʼ Estados Unidosoʼ: «Le baʼax úuchaʼ béeychaj ta woʼolaleʼex. Wa ka xuʼuluk kaʼach u kʼaʼaytaj le sukuʼunoʼoboʼ, bejlaʼa minaʼan mix baʼal k-bis tu táan le Tribunal Supremooʼ. Xuʼul k-chʼaʼpachtaʼal yoʼolal le baʼax ta beeteʼexoʼ, teʼex ka kʼaʼaytajeʼex tiʼ tuláakal yóokʼol kaabeʼ, maʼ xuʼuluk a kʼaʼaytajeʼexiʼ yéetel mix bikʼin a xulikeʼex. Le baʼax tu chʼaʼtuklaj le Tribunaloʼ béeychaj yoʼolal le meyaj ku beetik u kaajal Yuumtsiloʼ». Yoʼolal le meyaj ku beetik le sukuʼunoʼoboʼ tsʼoʼok u ganartaʼal yaʼab juicioʼob tiʼ jejeláas luʼumiloʼob. Jeʼex k-ilkoʼ, wa uts tu yich máak le kʼaʼaytajoʼ yaan u seguer u beetik kex ka chʼaʼpachtaʼak.

12. ¿Baʼax tsʼoʼok k-chʼaʼtuklik k-beetik?

¹² Wa k-ilik le meyaj u tsʼaamajtoʼon Jéeoba bey junpʼéel baʼal jach koʼoj u tojoloʼ, maʼ ken k-il k-beetik chéen «yaʼab horaʼob teʼ kʼaʼaytajoʼ». Baʼaxeʼ yaan k-beetik tuláakal le ku páajtal utiaʼal «[k-]chúukaʼan kʼaʼaytik u maʼalob péektsilil u nojoch utsil Dios» (Bax. 20:24; 2 Tim. 4:5). Baʼaleʼ ¿baʼax ken kaʼans ken kʼaʼaytajnakoʼon? Koʼoneʼex ilik uláakʼ junpʼéel baʼax koʼoj u tojol u tsʼaamajtoʼon Dios.

13, 14. 1) ¿Tiʼ baʼax ayikʼaliloʼob tʼaanaj Jesús teʼ Mateo 13:52? 2) ¿Bix jeʼel k-yaʼabkuntikeʼ?

¹³ Le u jaajil tsʼoʼok u kaʼansiktoʼon Jéeoba, u Diosil le jaajoʼ, letiʼe u yóoxpʼéel baʼax koʼoj u tojol ken k-xakʼalt beoraaʼ (2 Sam. 7:28; Sal. 31:5). Letiʼeʼ juntúul Taatatsil uts, le oʼolal ku kaʼansik u jaajil tiʼ le máaxoʼob yaabiltmiloʼ. Desde ka tsikbaltaʼabtoʼon u jaajileʼ, maʼ xuʼuluk k-kanik u jaajil ken k-xok le Bibliaoʼ yéetel le publicacionoʼoboʼ, ken xiʼikoʼon teʼ asambleaʼoboʼ yéetel teʼ muchʼtáambaloʼoboʼ. Desde teʼ kʼiin jeʼeloʼ tsʼoʼok u yantaltoʼon ayikʼaliloʼob túumbentak yéetel úuchbentak jeʼex tu yaʼalil Jesuseʼ (xok Mateo 13:52). Jéeobaeʼ yaan u yáantkoʼon utiaʼal ka maas yaʼabchajak le baʼaxoʼob koʼojtak u tojol yaan teʼ Biblia wa ku seguer k-kaxtikoʼob bey baʼaloʼob koʼojtak taʼakaʼanoʼobeʼ (xok Proverbios 2:4-7). ¿Bix jeʼel k-kaxtikoʼobeʼ?

¹⁴ Unaj u suuktal k-xakʼalxoktik le Biblia yéetel u maasil publicacionoʼoboʼ. Beyoʼ yaan k-kanik túumben kaʼansajoʼob maʼ k-ojel kaʼachiʼ (Jos. 1:8, 9; Sal. 1:2, 3). U yáax revistail U Pʼíich Tulumil Kanan jóoʼsaʼab tu mesil julio tiʼ 1879, tu yaʼalaj: «Le u jaajiloʼ bey jeʼex junpʼéel chan lool yaan tu chúumuk junpʼéel desiertoeʼ, pechʼaʼan yéetel taʼaytak u kíimsaʼal tumen u kʼaakʼas xíiwil le kaʼansajoʼob maʼ jaajtakoʼ. Wa taak a wilik tuʼux yaan le chan looloʼ, jach kʼaʼabéet a tsʼáaik a wóol a kaxte. [...] Wa a kʼáat a tʼokeʼ kʼaʼabéet a chinkaba a chʼaʼe. Maʼ a tʼokik chéen junpʼéel u loolil le jaajoʼ. [...] Ilawil a tʼokik yaʼabiʼ, maʼ u xuʼulul a kaxtik». Lelaʼ ku yeʼesikeʼ unaj k-tsʼíiboltik k-kanik u maasil baʼaxoʼob ku kaʼansik le Bibliaoʼ.

15. 1) ¿Máakalmáak le «úuchben» baʼaloʼob t-kanoʼ? 2) ¿Máakalmáak maas utschaj ta wichiʼ?

¹⁵ Le ka káaj k-xokik le Bibliaoʼ yaʼab baʼaxoʼob jatsʼutstak t-kanaj. Jeʼel u páajtal k-aʼalikeʼ «úuchbentak», tumen letiʼe baʼaxoʼob t-yáax kanaj yéetel jatsʼuts t-uʼuyiloʼ. T-kaneʼ Jéeoba beetoʼon yéetel yaan baʼax oʼolal tu tsʼáajoʼon way yóokʼol kaabeʼ. T-kanaj xaneʼ jach u yaabiltmoʼon, le oʼolal tu tsʼáaj u kuxtal u Hijo utiaʼal u salvartikoʼon tiʼ le kʼeban yéetel tiʼ le kíimiloʼ. Tsʼoʼoleʼ kaʼansaʼab xan toʼoneʼ le Reinooʼ yaan u  xuʼulsik le muʼyajil utiaʼal u páajtal k-kuxtal minaʼan u xuul ich kiʼimak óolal yéetel ich jeetsʼelileʼ (Juan 3:16; Apo. 4:11; 21:3, 4).

16. ¿Baʼax unaj k-beetik ken kʼeʼexek bix u naʼataʼal junpʼéel baʼax ku kaʼansik le Bibliaoʼ?

¹⁶ Yaan kʼiineʼ tsʼoʼok u kʼaʼabéettal u kʼeʼexel bix u naʼataʼal junpʼéel profecía wa u jaats tiʼ le Bibliaoʼ. Ken úuchuk lelaʼ kʼaʼabéet k-jóoʼsik tiempo utiaʼal k-xakʼalxoktik yéetel k-tuukul tiʼ le baʼax ku tsoʼololoʼ (Bax. 17:11; 1 Tim. 4:15). Maʼatech k-ilik k-naʼatik chéen le baʼaxoʼob maas nuuktak tiʼ le baʼaxoʼob ku tsoʼololoʼ, baʼaxeʼ tak le baʼaxoʼob mejentak yéetel túumbentak ku jel tsoʼololoʼ. Ken k-beet beyaʼ k-táakbesik túumben kaʼansajoʼob ichil le baʼaxoʼob k-ojloʼ. ¿Baʼaxten maʼalob ka k-beet beyaʼ?

17, 18. ¿Bix u yáantkoʼon le kiliʼich muukʼoʼ?

¹⁷ Jesuseʼ tu yaʼaleʼ u kiliʼich muukʼ Dioseʼ jeʼel u yáantkoʼon k-kʼaʼajs le baʼaxoʼob tsʼoʼok k-kanikoʼ (Juan 14:25, 26). ¿Bix u yáantik «tuláakal máax ku kaʼansaj»? Koʼoneʼex ilik baʼax úuch tiʼ Peter tu jaʼabil 1970, letiʼeʼ yaan 19 años tiʼ yéetel maʼ úuch káajak u meyaj tu Betelil Gran Bretañaiʼ. Junpʼéel kʼiin táan u kʼaʼaytajeʼ tʼaanaj yéetel juntúul máak yaan kex 50 años tiʼ yéetel piim u meʼex. Petereʼ tu kʼáatajtiʼ wa u kʼáat u kan u maasil tiʼ le Bibliaoʼ. Le máakoʼ juntúul maestro judío, le oʼolal jaʼakʼ u yóol ka tu yuʼubaj taak u kaʼansaʼaltiʼ baʼax ku yaʼalik le Biblia tumen juntúul táankelem paaloʼ. Utiaʼal u yilik wa u kʼaj óol le Bibliaoʼ tu kʼáatajtiʼ: «Xiʼipal, ¿a wojel wa tiʼ baʼax idiomail tsʼíibtaʼab u libroil Daniel?». Petereʼ tu yaʼalajtiʼeʼ yaan jujunpʼéel jaatsoʼobeʼ tsʼíibtaʼaboʼob ich arameo. Petereʼ ku yaʼalik: «Le maestrooʼ jaʼakʼ u yóol ka tu yilaj maʼalob úuchik in núukik tiʼ. ¿Bix béeychajik in núukik tiʼ? Tumen in yáax xokmaj. Ka binen tin wotocheʼ tin xakʼaltaj U Pʼíich Tulumil Kanan yéetel ¡Despertad! maas túumbentakoʼoboʼ, ka tin wilaj junpʼéel xook ku tsolik u libroil Danieleʼ tsʼíibtaʼab ich arameo». Jeʼex k-ilkoʼ, le kiliʼich muukʼoʼ jeʼel u beetik u kʼaʼajaltoʼon le baʼaxoʼob k-xokmaj yéetel k-líiʼsmaj ichil k-tuukuloʼ (Luc. 12:11, 12; 21:13-15).

¹⁸ Wa koʼoj k-ilik le baʼaxoʼob ku kaʼansiktoʼon Jéeobaoʼ, k-puksiʼikʼaleʼ yaan u péeksikoʼon k-tsʼíibolt k-kanik u maasil baʼaloʼob. Yaan u maas utstal t-ich k-xook utiaʼal k-kanik u maasil tiʼ Dios, lelaʼ yaan u yáantkoʼon utiaʼal u béeytal k-kaʼansik tubeel u maasil.

19. ¿Baʼaxten unaj k-kanáantik le baʼaloʼob koʼojtak u tsʼaamajtoʼon Diosoʼ?

¹⁹ Satanás yéetel u kʼasaʼan yóokʼol kaabeʼ jach táan u yilkoʼob ka xuʼuluk k-yaabiltik le baʼaxoʼob koʼojtak tsʼoʼok k-ilik teʼ xookaʼ. Wa maʼ k-kanáantikbaeʼ jach séeb jeʼel u káajal k-tsʼíiboltik u yantaltoʼon taakʼineʼ wa ka kuxlakoʼon ich ayikʼaliloʼob. Apóstol Juaneʼ ku yaʼalikeʼ le yóokʼol kaabaʼ táan u bin u xuʼulul tiʼ bey xan le baʼaxoʼob ku tsʼíiboltikoʼ (1 Juan 2:15-17). Le oʼolal jach unaj k-kanáantik maʼ u xuʼulul k-yaabiltik le baʼaxoʼob koʼojtak ku taaloʼob tiʼ Jéeobaoʼ.

20. ¿Baʼax tsʼoʼok a chʼaʼtuklik a beetik utiaʼal a kanáantik le baʼaxoʼob koʼojtak u tsʼaamajtech Diosoʼ?

²⁰ Ilawil a pʼatik tuláakal baʼal jeʼel u beetik u xuʼulul a yaabiltik u Reino Dioseʼ. Maʼ u xuʼulul a tsʼáaik a wóol kʼaʼaytaj yéetel kiʼimak óolal. Xooknen mantatsʼ utiaʼal a kanik le baʼaxoʼob yaan teʼ Bibliaoʼ. Beyoʼ yaan a muchʼkíintik ayikʼalil teʼ kaʼanoʼ, teʼeloʼ «maʼ tu yokol mix juntúul j-ookoliʼ mix xan tu jaantaʼal tumen kʼamas». Wa ka beetik beyaʼ, yaan a wilik jaaj le baʼax tu yaʼalaj Jesusaʼ: «Tuʼux yaan a ayikʼalileʼexeʼ tiʼ yaan xan a puksiʼikʼaleʼexiʼ» (Luc. 12:33, 34).