珍视上帝赐俾你嘅“财宝”
“你哋嘅财宝喺边度，你哋嘅心亦都喺边度。”——路加福音12:34
唱诗153，104首
1，2． （甲）耶和华赐俾我哋边三样属灵嘅财宝？（乙）我哋会喺呢篇文章讨论啲乜嘢？
耶和华上帝系全宇宙最富有嘅嗰一位。（历代志上29:11，12）人睇出嚟自上帝嘅财宝系价值非凡嘅，我哋慷慨嘅天父会好乐意同佢哋分享。我哋好感激耶和华赐下呢啲属灵财宝，包括（1）上帝嘅王国，（2）救生嘅传道工作，（3）我哋喺佢话语入面揾到嘅宝贵真理！如果我哋唔留心，就会失去对呢啲属灵财宝嘅体会，好似将佢哋揼咗一样。我哋需要善用呢啲属灵财宝，不断加深对呢啲财宝嘅爱，噉先至唔会轻易放弃。耶稣话:“你哋嘅财宝喺边度，你哋嘅心亦都喺边度。”（路加福音12:34）
2 我哋会考虑吓点样培养、保持对上述三方面嘅热爱，同埋点样养成体会嘅心。我哋要沉思一下，自己可以点样加深对属灵财宝嘅热爱。
上帝嘅王国就好似无价嘅珍珠
3． 耶稣比喻入面嘅商人为咗得到无价嘅珍珠，佢甘愿点样做呢？（请睇吓课文开头嘅图片）
3 请读马太福音13:45，46。耶稣讲过一个比喻，系同商人寻找珍珠有关嘅。咁多年嚟，呢个商人肯定买卖过唔少珍珠。而家，佢终于揾到一粒又精致又贵重嘅珍珠，佢一睇见呢粒珍珠就好开心。不过，为咗买到呢粒珍珠，佢甘愿卖晒所有嘢。你可唔可以想象到，呢粒珍珠对佢嚟讲系几咁宝贵呢？
4． 如果我哋爱上帝王国嘅真理，好似商人爱嗰粒珍珠一样，我哋会点样做呢？
4 我哋从中学到乜嘢呢？上帝嘅王国就好似呢粒无价嘅珍珠。如果我哋爱上帝嘅王国，好似商人爱嗰粒珍珠一样，我哋会愿意放弃一切去成为上帝王国嘅一份子，仲会努力持守呢个身份。（请读马可福音10:28-30）请睇吓以下两个例子。
5． 撒该点样表明佢决心进入上帝嘅王国呢？
5 撒该系个税务长，佢通过敲诈而变得富有。（路加福音19:1-9）但系当呢个不义嘅人听到耶稣传讲王国好消息嗰时，佢睇出呢个好消息嘅非凡价值，愿意立刻采取行动。佢大声噉讲:“主啊，我要将我财物嘅一半分俾穷人；我敲诈过边个，就要还翻四倍俾佢。”佢唔再贪图物质，甘心乐意放弃不义之财。
6． 为咗成为上帝王国嘅一分子，罗兹做咗乜嘢改变？佢点解会噉做呢？
6 好几年前，有个女同性恋者叫做罗兹，当时，佢喺一个争取同性恋者权益嘅组织入面做会长。后来，佢听到上帝王国嘅消息。通过研读圣经，罗兹睇出上帝王国真理嘅非凡价值。佢意识到自己要作出重大嘅改变。（哥林多前书6:9，10）真理推动佢辞去会长一职，仲同佢嘅同性伴侣断绝关系。罗兹喺2009年受浸，跟住喺2010年开始做正规先驱。佢对耶和华同埋王国嘅爱，使佢战胜咗错误嘅欲望。（马可福音12:29，30）
7． 乜嘢会妨碍我哋维持对上帝王国嘅热爱呢？
7 毫无疑问，为咗成为上帝王国嘅一份子，我哋当中有好多弟兄姊妹都作出重大嘅改变。（罗马书12:2）即使系噉，我哋仍然需要继续努力。我哋要保持警醒，同我哋嘅个人欲望搏斗，例如，对物质嘅渴求，或者任何性不道德嘅欲望等等。（箴言4:23；马太福音5:27-29）为咗帮助我哋维持对上帝王国嘅热爱，耶和华赐俾我哋另一样无价嘅属灵财宝。
救人生命嘅传道工作
8． （甲）点解使徒保罗将传道工作描述为“呢个珍宝，系放喺瓦器入面”？（乙）使徒保罗点样表明佢珍视传道工作呢？
8 耶稣委派我哋去传讲同埋教导人上帝王国嘅好消息。（马太福音28:19，20）使徒保罗意识到传道工作有几宝贵。佢将所有同新约有关嘅工作描述为“呢个珍宝，系放喺瓦器入面”嘅。（哥林多后书4:7；提摩太前书1:12）虽然我哋系卑微嘅人，但系我哋传讲嘅信息，就能够为我哋同愿意听嘅人带嚟永生。谂到呢一点，保罗话:“为咗好消息，我愿意做任何事，可以向其他人传讲好消息。”（哥林多前书9:23）毫无疑问，保罗对传道工作嘅热爱推使佢成为一个积极嘅传道员，帮助其他人成为门徒。（请读罗马书1:14，15；提摩太后书4:2）呢种态度帮助佢忍受猛烈嘅迫害。（帖撒罗尼迦前书2:2）我哋可以点样效法佢，热爱传道工作呢？
9． 我哋点样做去表明自己珍视传道工作？
9 保罗把握唔同机会向人传道，证明佢重视传道工作。我哋都要效法使徒同早期嘅基督徒，逐家逐户同埋以其他方式向人传道。（使徒行传5:42；20:20）情况容许嘅话，我哋会扩大服务，例如做辅助先驱或者正规先驱。又或者我哋可以学习其他语言，搬去较大需要嘅地区服务。（使徒行传16:9，10）
10． 伊雷妮决心努力传道，噉为佢带嚟乜嘢福分？
10 我哋会留意伊雷妮嘅经验。佢系一个美国嘅独身姊妹，佢好想向讲俄文嘅人传道。喺1993年嘅时候，纽约嘅俄语小组只有大约20个传道员。超过20年时间，伊雷妮喺外语地区努力噉传道，不过佢话:“我而家讲俄语都唔系好流利。”虽然系噉，耶和华上帝都祝福佢同其他热心嘅传道员。今日纽约市有六群俄语会众。其中15位系伊雷妮嘅学生，而且已经受咗浸。今日，佢哋有啲系伯特利成员，有啲系先驱，有啲就做咗长老。伊雷妮话:“我谂翻喺以往可以追求嘅所有目标当中，冇一个比传道带嚟嘅快乐更加多！”佢的确系珍视传道工作！
你每星期嘅时间安排，有冇反映出你珍视传道工作，视佢为属灵财宝呢？（请睇第11，12段）
11． 即使面对迫害，仍然继续传道带嚟乜嘢美好嘅结果？
11 如果我哋珍视传道工作，就会好似使徒保罗噉，即使面对迫害都继续传道。（使徒行传14:19-22）喺1930至1940年代初期，美国嘅弟兄面对严峻嘅考验。不过，佢哋好似保罗一样坚守立场，继续传道。我哋嘅弟兄打咗好多场官司，目的系为咗争取我哋传道嘅权利。诺尔弟兄喺1943年评论到有关我哋喺美国最高法院得到嘅胜诉，佢话:“因为你哋努力不懈，所以我哋取得胜利。如果传道员冇坚持传道嘅话，根本唔会有最高法院嘅诉讼，但正因为你，因为传道员，因为全球嘅弟兄姊妹坚持不懈噉传道，所以我哋可以战胜呢啲迫害。呢一场系上帝子民嘅胜利，由于我哋坚持不懈，最终可以得到胜诉！”喺其他国家，弟兄姊妹坚定嘅立场亦都带嚟同样嘅胜利。冇错，我哋对传道工作嘅热爱可以战胜迫害。
12． 对于传道工作，你决心点样做呢？
12 当我哋将传道工作视为耶和华俾我哋嘅无价之宝，我哋就唔会只系为咗“计时间”而传道。相反，我哋会竭尽全力“为上帝分外恩典嘅好消息彻底作见证。”（使徒行传20:24；提摩太后书4:5）噉我哋会教人乜嘢呢？而家睇吓嚟自上帝嘅另一样属灵财宝。
属灵宝库嘅真理
13，14． 耶稣喺马太福音13:52所讲嘅“宝库”系乜嘢？我哋点样加添我哋嘅属灵财宝？
13 第三样属灵财宝就系我哋可以明白唔同嘅真理。耶和华系启示真理嘅上帝。（撒母耳记下7:28；诗篇31:5）我哋慷慨嘅天父将真理赐俾敬畏佢嘅人。从我哋认识真理开始，我哋就有机会从唔同方面学习上帝嘅话语，包括圣经、基督徒刊物、大会，同埋每星期嘅聚会。随住时间过去，我哋就好似耶稣所描述嘅噉，建立一个属灵“宝库”，将新同旧嘅真理放喺“宝库”入面。（请读马太福音13:52）如果我哋积极寻找呢啲隐藏嘅财宝，上帝会帮助我哋将呢啲发掘到嘅财宝放入我哋嘅“宝库”。（请读箴言2:4-7）噉我哋可以点样做呢？
14 我哋要培养好个人嘅研读习惯，包括细心研读圣经同埋组织嘅书刊。我哋噉样做就会发现一啲我哋以前未学过嘅真理，就好似“新”嘅财宝一样。（约书亚记1:8，9；诗篇1:2，3）喺1879年7月，第一期《守望台》杂志刊登咗一篇文章，描述“真理好似野地嘅一朵朵小花，而错误嘅道理就好似杂草一样。小花俾好多杂草包围，几乎死嘞。我哋要好努力，先至揾到咁宝贵嘅小花……当你揾到又想拥有，就要弯低身去摘。请唔好只系满足于一朵小花……要不断噉揾，不断噉摘。”冇错，我哋必须积极噉增加我哋嘅属灵财宝，放喺属灵宝库入面。
15． 我哋点解会将一啲圣经真理描述为“旧”嘅财宝呢？你特别珍视边啲圣经真理呢？
15 当我哋初次同上帝子民接触嘅时候，我哋就开始发掘到一啲宝贵嘅基本真理。呢啲真理就好似“旧”嘅财宝一样，从我哋学习圣经开始，就一点一滴噉累积落嚟，系我哋认识同珍视嘅。呢啲宝贵嘅真理包括啲乜嘢呢？例如，耶和华系创造主，系一切生命嘅赐予者。我哋认识到人生嘅真正意义。我哋亦学到，仁爱嘅上帝通过牺牲佢嘅爱子作为赎价，使我哋可以摆脱罪同死。仲有，王国将会终止一切苦难，我哋可以喺王国嘅统治之下享有真正嘅和平同快乐。（约翰福音3:16；启示录4:11；21:3，4）
16． 当某啲圣经真理嘅解释调整咗，我哋要点样做呢？
16 上帝嘅组织对某啲圣经预言同埋经文嘅理解，有时会作出调整。当我哋听到一啲新嘅解释，就应该拨出时间去细心阅读同沉思呢啲调整。（使徒行传17:11；提摩太前书4:15）我哋唔单止会努力明白呢啲重要嘅调整，仲会留意新旧理解之间嘅细微差别，呢啲差别有时系唔容易察觉嘅。如果我哋噉做嘅话，我哋就真系将新嘅理解稳妥噉放喺我哋嘅宝库入面。点解我哋噉做系值得嘅呢？
17，18． 上帝嘅圣灵会点样帮助我哋呢？
17 耶稣讲过，上帝嘅圣灵会使我哋谂翻起一啲以前学过嘅嘢。（约翰福音14:25，26）所以圣灵点样帮助我哋做一个更好嘅传道员呢？请留意彼得弟兄嘅经历。喺1970年嗰阵，佢19岁，啱啱开始喺英国嘅伯特利工作。有一日，佢逐家逐户传道嗰时，遇到一个成面胡须嘅中年男人。彼得就问佢想唔想学习圣经。呢个男人听到之后有啲惊讶，因为佢系一个犹太教嘅教士。佢想考吓彼得，问:“后生仔，你知唔知但以理书系用咩语言写成㗎？”彼得就答佢:“有一部分系用阿拉米语写嘅。”彼得回忆话:“当时，嗰个犹太教士好惊讶，我竟然知道答案，但其实我自己更加惊讶！点解我会知道答案呢？之后我返屋企，查吓上几个月嘅《守望台》同《警醒》杂志，我揾到一篇文章，解释到但以理书有一部分系用阿拉米语写成嘅。”（但以理书2:4）冇错，如果我哋将读过嘅资料放喺属灵宝库入面，喺需要嘅时候，上帝嘅圣灵就会帮我哋记翻起呢啲资料。（路加福音12:11，12；21:13-15）
18 如果我哋珍视嚟自耶和华嘅智慧，我哋嘅心会推使我哋不断加添“新”同“旧”嘅属灵财宝，放喺宝库入面。我哋会越嚟越热爱同埋欣赏耶和华嘅智慧，噉我哋就能够成为装备齐全嘅传道员嘞。
保护你嘅属灵财宝
19． 点解需要保护我哋嘅属灵财宝呢？
19 撒但同呢个世界千方百计想削弱，甚至破坏我哋对属灵财宝嘅重视。冇人可以例外。我哋好容易受到撒但同呢个世界唔同嘅诱惑，包括想名成利就、炫耀财富、过奢侈嘅生活。使徒约翰提醒我哋，呢个世界同世界嘅欲望好快就会过去。（约翰一书2:15-17）所以，我哋要努力增加对属灵财宝嘅赏识同热爱，好好保护呢啲属灵财宝。
20． 你决心点样做去保护你嘅属灵财宝呢？
20 要决心摆脱任何妨碍我哋全心爱戴上帝王国嘅嘢。唔好失去对救生工作嘅热诚，要继续热心传道。要热切同积极噉发掘圣经嘅真理。如果你噉做嘅话，你就系“喺天上积存永无穷尽嘅财宝。喺嗰度，贼系唔能够接近嘅，蛾亦都唔能够蛀蚀。你哋嘅财宝喺边度，你哋嘅心亦都喺边度。”（路加福音12:33，34）
