珍視上帝賜俾你嘅“財寶”
“你哋嘅財寶喺邊度，你哋嘅心亦都喺邊度。”——路加福音12:34
唱詩153，104首
1，2． （甲）耶和華賜俾我哋邊三樣屬靈嘅財寶？（乙）我哋會喺呢篇文章討論啲乜嘢？
耶和華上帝係全宇宙最富有嘅嗰一位。（歷代志上29:11，12）人睇出嚟自上帝嘅財寶係價值非凡嘅，我哋慷慨嘅天父會好樂意同佢哋分享。我哋好感激耶和華賜下呢啲屬靈財寶，包括（1）上帝嘅王國，（2）救生嘅傳道工作，（3）我哋喺佢話語入面揾到嘅寶貴真理！如果我哋唔留心，就會失去對呢啲屬靈財寶嘅體會，好似將佢哋揼咗一樣。我哋需要善用呢啲屬靈財寶，不斷加深對呢啲財寶嘅愛，噉先至唔會輕易放棄。耶穌話:“你哋嘅財寶喺邊度，你哋嘅心亦都喺邊度。”（路加福音12:34）
2 我哋會考慮吓點樣培養、保持對上述三方面嘅熱愛，同埋點樣養成體會嘅心。我哋要沉思一下，自己可以點樣加深對屬靈財寶嘅熱愛。
上帝嘅王國就好似無價嘅珍珠
3． 耶穌比喻入面嘅商人為咗得到無價嘅珍珠，佢甘願點樣做呢？（請睇吓課文開頭嘅圖片）
3 請讀馬太福音13:45，46。耶穌講過一個比喻，係同商人尋找珍珠有關嘅。咁多年嚟，呢個商人肯定買賣過唔少珍珠。而家，佢終於揾到一粒又精緻又貴重嘅珍珠，佢一睇見呢粒珍珠就好開心。不過，為咗買到呢粒珍珠，佢甘願賣晒所有嘢。你可唔可以想象到，呢粒珍珠對佢嚟講係幾咁寶貴呢？
4． 如果我哋愛上帝王國嘅真理，好似商人愛嗰粒珍珠一樣，我哋會點樣做呢？
4 我哋從中學到乜嘢呢？上帝嘅王國就好似呢粒無價嘅珍珠。如果我哋愛上帝嘅王國，好似商人愛嗰粒珍珠一樣，我哋會願意放棄一切去成為上帝王國嘅一份子，仲會努力持守呢個身份。（請讀馬可福音10:28-30）請睇吓以下兩個例子。
5． 撒該點樣表明佢決心進入上帝嘅王國呢？
5 撒該係個税務長，佢通過敲詐而變得富有。（路加福音19:1-9）但係當呢個不義嘅人聽到耶穌傳講王國好消息嗰時，佢睇出呢個好消息嘅非凡價值，願意立刻採取行動。佢大聲噉講:“主啊，我要將我財物嘅一半分俾窮人；我敲詐過邊個，就要還翻四倍俾佢。”佢唔再貪圖物質，甘心樂意放棄不義之財。
6． 為咗成為上帝王國嘅一分子，羅兹做咗乜嘢改變？佢點解會噉做呢？
6 好幾年前，有個女同性戀者叫做羅兹，當時，佢喺一個爭取同性戀者權益嘅組織入面做會長。後來，佢聽到上帝王國嘅消息。通過研讀聖經，羅兹睇出上帝王國真理嘅非凡價值。佢意識到自己要作出重大嘅改變。（哥林多前書6:9，10）真理推動佢辭去會長一職，仲同佢嘅同性伴侶斷絶關係。羅兹喺2009年受浸，跟住喺2010年開始做正規先驅。佢對耶和華同埋王國嘅愛，使佢戰勝咗錯誤嘅慾望。（馬可福音12:29，30）
7． 乜嘢會妨礙我哋維持對上帝王國嘅熱愛呢？
7 毫無疑問，為咗成為上帝王國嘅一份子，我哋當中有好多弟兄姊妹都作出重大嘅改變。（羅馬書12:2）即使係噉，我哋仍然需要繼續努力。我哋要保持警醒，同我哋嘅個人慾望搏鬥，例如，對物質嘅渴求，或者任何性不道德嘅慾望等等。（箴言4:23；馬太福音5:27-29）為咗幫助我哋維持對上帝王國嘅熱愛，耶和華賜俾我哋另一樣無價嘅屬靈財寶。
救人生命嘅傳道工作
8． （甲）點解使徒保羅將傳道工作描述為“呢個珍寶，係放喺瓦器入面”？（乙）使徒保羅點樣表明佢珍視傳道工作呢？
8 耶穌委派我哋去傳講同埋教導人上帝王國嘅好消息。（馬太福音28:19，20）使徒保羅意識到傳道工作有幾寶貴。佢將所有同新約有關嘅工作描述為“呢個珍寶，係放喺瓦器入面”嘅。（哥林多後書4:7；提摩太前書1:12）雖然我哋係卑微嘅人，但係我哋傳講嘅信息，就能够為我哋同願意聽嘅人帶嚟永生。諗到呢一點，保羅話:“為咗好消息，我願意做任何事，可以向其他人傳講好消息。”（哥林多前書9:23）毫無疑問，保羅對傳道工作嘅熱愛推使佢成為一個積極嘅傳道員，幫助其他人成為門徒。（請讀羅馬書1:14，15；提摩太後書4:2）呢種態度幫助佢忍受猛烈嘅迫害。（帖撒羅尼迦前書2:2）我哋可以點樣效法佢，熱愛傳道工作呢？
9． 我哋點樣做去表明自己珍視傳道工作？
9 保羅把握唔同機會向人傳道，證明佢重視傳道工作。我哋都要效法使徒同早期嘅基督徒，逐家逐户同埋以其他方式向人傳道。（使徒行傳5:42；20:20）情況容許嘅話，我哋會擴大服務，例如做輔助先驅或者正規先驅。又或者我哋可以學習其他語言，搬去較大需要嘅地區服務。（使徒行傳16:9，10）
10． 伊雷妮決心努力傳道，噉為佢帶嚟乜嘢福分？
10 我哋會留意伊雷妮嘅經驗。佢係一個美國嘅獨身姊妹，佢好想向講俄文嘅人傳道。喺1993年嘅時候，紐約嘅俄語小組只有大約20個傳道員。超過20年時間，伊雷妮喺外語地區努力噉傳道，不過佢話:“我而家講俄語都唔係好流利。”雖然係噉，耶和華上帝都祝福佢同其他熱心嘅傳道員。今日紐約市有六群俄語會衆。其中15位係伊雷妮嘅學生，而且已經受咗浸。今日，佢哋有啲係伯特利成員，有啲係先驅，有啲就做咗長老。伊雷妮話:“我諗翻喺以往可以追求嘅所有目標當中，冇一個比傳道帶嚟嘅快樂更加多！”佢的確係珍視傳道工作！
你每星期嘅時間安排，有冇反映出你珍視傳道工作，視佢為屬靈財寶呢？（請睇第11，12段）
11． 即使面對迫害，仍然繼續傳道帶嚟乜嘢美好嘅結果？
11 如果我哋珍視傳道工作，就會好似使徒保羅噉，即使面對迫害都繼續傳道。（使徒行傳14:19-22）喺1930至1940年代初期，美國嘅弟兄面對嚴峻嘅考驗。不過，佢哋好似保羅一樣堅守立場，繼續傳道。我哋嘅弟兄打咗好多場官司，目的係為咗爭取我哋傳道嘅權利。諾爾弟兄喺1943年評論到有關我哋喺美國最高法院得到嘅勝訴，佢話:“因為你哋努力不懈，所以我哋取得勝利。如果傳道員冇堅持傳道嘅話，根本唔會有最高法院嘅訴訟，但正因為你，因為傳道員，因為全球嘅弟兄姊妹堅持不懈噉傳道，所以我哋可以戰勝呢啲迫害。呢一場係上帝子民嘅勝利，由於我哋堅持不懈，最終可以得到勝訴！”喺其他國家，弟兄姊妹堅定嘅立場亦都帶嚟同樣嘅勝利。冇錯，我哋對傳道工作嘅熱愛可以戰勝迫害。
12． 對於傳道工作，你決心點樣做呢？
12 當我哋將傳道工作視為耶和華俾我哋嘅無價之寶，我哋就唔會只係為咗“計時間”而傳道。相反，我哋會竭盡全力“為上帝分外恩典嘅好消息徹底作見證。”（使徒行傳20:24；提摩太後書4:5）噉我哋會教人乜嘢呢？而家睇吓嚟自上帝嘅另一樣屬靈財寶。
屬靈寶庫嘅真理
13，14． 耶穌喺馬太福音13:52所講嘅“寶庫”係乜嘢？我哋點樣加添我哋嘅屬靈財寶？
13 第三樣屬靈財寶就係我哋可以明白唔同嘅真理。耶和華係啟示真理嘅上帝。（撒母耳記下7:28；詩篇31:5）我哋慷慨嘅天父將真理賜俾敬畏佢嘅人。從我哋認識真理開始，我哋就有機會從唔同方面學習上帝嘅話語，包括聖經、基督徒刊物、大會，同埋每星期嘅聚會。隨住時間過去，我哋就好似耶穌所描述嘅噉，建立一個屬靈“寶庫”，將新同舊嘅真理放喺“寶庫”入面。（請讀馬太福音13:52）如果我哋積極尋找呢啲隱藏嘅財寶，上帝會幫助我哋將呢啲發掘到嘅財寶放入我哋嘅“寶庫”。（請讀箴言2:4-7）噉我哋可以點樣做呢？
14 我哋要培養好個人嘅研讀習慣，包括細心研讀聖經同埋組織嘅書刊。我哋噉樣做就會發現一啲我哋以前未學過嘅真理，就好似“新”嘅財寶一樣。（約書亞記1:8，9；詩篇1:2，3）喺1879年7月，第一期《守望台》雜誌刊登咗一篇文章，描述“真理好似野地嘅一朵朵小花，而錯誤嘅道理就好似雜草一樣。小花俾好多雜草包圍，幾乎死嘞。我哋要好努力，先至揾到咁寶貴嘅小花……當你揾到又想擁有，就要彎低身去摘。請唔好只係滿足於一朵小花……要不斷噉揾，不斷噉摘。”冇錯，我哋必須積極噉增加我哋嘅屬靈財寶，放喺屬靈寶庫入面。
15． 我哋點解會將一啲聖經真理描述為“舊”嘅財寶呢？你特别珍視邊啲聖經真理呢？
15 當我哋初次同上帝子民接觸嘅時候，我哋就開始發掘到一啲寶貴嘅基本真理。呢啲真理就好似“舊”嘅財寶一樣，從我哋學習聖經開始，就一點一滴噉累積落嚟，係我哋認識同珍視嘅。呢啲寶貴嘅真理包括啲乜嘢呢？例如，耶和華係創造主，係一切生命嘅賜予者。我哋認識到人生嘅真正意義。我哋亦學到，仁愛嘅上帝通過犧牲佢嘅愛子作為贖價，使我哋可以擺脱罪同死。仲有，王國將會終止一切苦難，我哋可以喺王國嘅統治之下享有真正嘅和平同快樂。（約翰福音3:16；啟示錄4:11；21:3，4）
16． 當某啲聖經真理嘅解釋調整咗，我哋要點樣做呢？
16 上帝嘅組織對某啲聖經預言同埋經文嘅理解，有時會作出調整。當我哋聽到一啲新嘅解釋，就應該撥出時間去細心閲讀同沉思呢啲調整。（使徒行傳17:11；提摩太前書4:15）我哋唔單止會努力明白呢啲重要嘅調整，仲會留意新舊理解之間嘅細微差别，呢啲差别有時係唔容易察覺嘅。如果我哋噉做嘅話，我哋就真係將新嘅理解穩妥噉放喺我哋嘅寶庫入面。點解我哋噉做係值得嘅呢？
17，18． 上帝嘅聖靈會點樣幫助我哋呢？
17 耶穌講過，上帝嘅聖靈會使我哋諗翻起一啲以前學過嘅嘢。（約翰福音14:25，26）所以聖靈點樣幫助我哋做一個更好嘅傳道員呢？請留意彼得弟兄嘅經歷。喺1970年嗰陣，佢19歲，啱啱開始喺英國嘅伯特利工作。有一日，佢逐家逐户傳道嗰時，遇到一個成面鬍鬚嘅中年男人。彼得就問佢想唔想學習聖經。呢個男人聽到之後有啲驚訝，因為佢係一個猶太教嘅教士。佢想考吓彼得，問:“後生仔，你知唔知但以理書係用咩語言寫成㗎？”彼得就答佢:“有一部分係用阿拉米語寫嘅。”彼得回憶話:“當時，嗰個猶太教士好驚訝，我竟然知道答案，但其實我自己更加驚訝！點解我會知道答案呢？之後我返屋企，查吓上幾個月嘅《守望台》同《警醒》雜誌，我揾到一篇文章，解釋到但以理書有一部分係用阿拉米語寫成嘅。”（但以理書2:4）冇錯，如果我哋將讀過嘅資料放喺屬靈寶庫入面，喺需要嘅時候，上帝嘅聖靈就會幫我哋記翻起呢啲資料。（路加福音12:11，12；21:13-15）
18 如果我哋珍視嚟自耶和華嘅智慧，我哋嘅心會推使我哋不斷加添“新”同“舊”嘅屬靈財寶，放喺寶庫入面。我哋會越嚟越熱愛同埋欣賞耶和華嘅智慧，噉我哋就能够成為裝備齊全嘅傳道員嘞。
保護你嘅屬靈財寶
19． 點解需要保護我哋嘅屬靈財寶呢？
19 撒但同呢個世界千方百計想削弱，甚至破壞我哋對屬靈財寶嘅重視。冇人可以例外。我哋好容易受到撒但同呢個世界唔同嘅誘惑，包括想名成利就、炫耀財富、過奢侈嘅生活。使徒約翰提醒我哋，呢個世界同世界嘅慾望好快就會過去。（約翰一書2:15-17）所以，我哋要努力增加對屬靈財寶嘅賞識同熱愛，好好保護呢啲屬靈財寶。
20． 你決心點樣做去保護你嘅屬靈財寶呢？
20 要決心擺脱任何妨礙我哋全心愛戴上帝王國嘅嘢。唔好失去對救生工作嘅熱誠，要繼續熱心傳道。要熱切同積極噉發掘聖經嘅真理。如果你噉做嘅話，你就係“喺天上積存永無窮盡嘅財寶。喺嗰度，賊係唔能够接近嘅，蛾亦都唔能够蛀蝕。你哋嘅財寶喺邊度，你哋嘅心亦都喺邊度。”（路加福音12:33，34）
