CI YIHOFA KAWAS palimoˈotay to Krisciyang misalimla to rihaday, mararihaday to tamdaw i nokaˈorip. Midokoay to Kawas a tamdaw ano misaˈicel mitafo to rihaday, mamatomes ko rihaday itini i kasakopang, mamasolot ko maolahay to rihaday a tamdaw tayra.

Itini i Matakaska, o cecay miˈedaway tamdaw maˈaraw ko nika rarihaday no Misawacayay Tamdaw ni Yihofa, sanay a miharateng i falocoˈ: “Ano hacowaay sapicomodaw kako to pihakelongan i, o mamiteko kako cangranan.” Ikor, cowato pitefing cingra tono kaloykoy a demak, pinaay folad cingra misalof to raramod a mitoor to palinian no Fangcalay Cudad, saikor mala Krisciyangayto cingra, midoko to rihadayay a Kawas ci Yihofa.

Matira tora faˈinayan i fafekang, to mihecahecaan ˈalomanay a tamdaw, itiniay i kasakopang no Krisciyang a mahela ko rihaday. Kawra o sowal no Fangcalay Cudad, ilalomaˈ no kasakopang ano ira ko maˈinapay, ciˈintelay, misatekeday i, o mamirepat to kalawidang, mafekad ko pasangar. (Yakop 3:14-16) Ngaˈay yaca, adihayay ko sapaini a sowal i Fangcalay Cudad padama kitanan a micowat to rihaday, miliays to kalacongis ato tamdaw. Dotoc i, nengnengen ita, o safalod no Fangcalay Cudad mamisamaan padama kitanan a misaysay to pasangar i kalalaˈed ato tamdaw.

“Mala cafayay kako to cecay salikaka matayal, kawra cowa ka malangaˈay kami. Kinacecayay malapoyiˈay kami, maˈaraway no roma tatosaay tamdaw.”​—KERIS.

“Marariday kako malacafay mitosil to cecay fafahiyan salikaka, kawra fahar sanay cowato piata takowanan, cowato misacaciyaw takowanan. Cowa ka fanaˈ kako to manan ko raraw ako.”​—CINAH.

“Matatingwaay kami tatolo a tamdaw, o cecay sahatira hanto ita saan ko sowal, nao awaayto i tingwa cingra sa kako, pasowalay kako to tatiihay a sowal pakayra i cingranan, ˈarawhan mitengilayho to tingwa cingra.”​—MAYKO.

“Itini i kasakopang niyam, iraay ko tatosa cowa ka malangaˈay cangra, o cecay marariday a mikapoyiˈ to cecay. Ora katatiih nangra mifiyoray to salikaka i kasakopang.”​—KALI.

Cowa ko manan koni, mimingay aca demak wa saan kiso alatek, kawra midokaˈay to falocoˈ ato noˈadingoan nangra, latek mamirepat to rihaday no kasakopang. Kasayaran no falocoˈ i, kalasaka dademakan nangra ko safalod no Fangcalay Cudad misaysay to pasangar, miliyaw a malangaˈay ato tao. O manan sinael no Fangcalay Cudad ko padamaay cangranan hani?

 “Aka ka cacolicoli i lalan.” (Satapangan 45:24) ˈAyaw no maminokay ko kakakaka ni Yosif tayra i wamaan i, mihaenan ni Yosif pasowal cangra. Oni sowal tada o citanengay! Ano caka ˈemeten no tamdaw ko falocoˈ i, narikayay a maketer, mifirang to tao. Ikor mahapinangay ni Keris to maritaˈangay ko niyah, cowa kakahi a micada to sakayat no tao. Sapisalofaw cingra toni dangoc no niyah, tayra malaliˈay toya sakalapoyiˈ ningra, misaˈicelay cingra a miˈemet to keter. Maˈaraw ko nika pisaˈicel ni Keris, mafalicay koya roma salikaka. Nohatini mahemekayto cangra mala cafay a midoko ci Yihofaan.

“Ano milayap to ciepocay a sowal i, caay ka eca ka laheci ko demak.” (Taneng 15:22) Mahapinangay ni Cinah to mamisaˈicel cingra mikalasaka dademak toni sinael, saka tayra sanay masasowal tora salikaka. Mikangodoan ni Cinah papisowal to lalangian ningra a maketer. Saˈayaˈayaw cowaho ka ngaˈay ko kasasowal nangra, tano kaepeday a masasowal cangra ikor, idahiyayto. ˈArawhan mararaway ko piharateng nora salikaka, cowa ka pilingat ci Cinahan koni demak. Liˈayan ningra ci Cinah, telocto, miliyaway a makala ngaˈay cangra, mala cafay a matayal ci Yihofaan.

“Ano pacakat kiso to sapaini i Kawas i pipacakatan i, ano maharateng iso itiya ko nika tatiih no harateng no salikaka i tisowanan i, teli hanho i kaˈayaw noya pipacakatan koya sapaini iso. Ta tayraho toya salikaka a malaliˈay.” (Matay 5:23, 24) O nano sowal ni Yis toya “ilotokay a kimad” ningra koni, palimoˈot kitanan. Maharateng ni Mayko ko nika caka pikihar to harateng no tao, midokaˈ ko sowal, pacekosay ko falocoˈ ningra, tayra sanay malaliˈay tora salikaka, saan ko sowal ningra: “Sidaˈitay ko salikaka a misodod takowanan.” Teloc i, miliyawayto malaka ngaˈay toya salikaka.

“Kasasi solol kamo. Ano iraira ko katatiihan no falocoˈ no nima namo i cimaanan i, kasasi hepol.” (Kolosay 3:12-14) Maharatengayho koya saˈayaway a tatosa a misakafahay han? O cecay cisidaˈitay a malohemay malitengay papiharatengan cangra: ‘Iraay ko fadangalan ako tona caka lecad ko harateng niyam a pasomaden cingra han? Soˈlinay ira ko lalangian ako, caka pisolol cingranan, caka piteko cingranan a midoko ci Yihofaan han?’ Tengilan noni tatosa misakafahay ko sapaini a sowal no malohemay malitengay, telocto i, mala cafayayto mitosil cangra, rihaday a makakapot.

Ano ira ko pasomaday kitanan i, tanamen mikalasaka dademak ko safalod no Kolosay 3:12-14 a misalof to kalalaˈed ita. Mahapinangay no ˈalomanay, ano makahi a misapoener ko niyah i, matawalto ko raraw no tao, misolol  cangranan. Kawra ano caka walawal no falocoˈ i, tanamen mikalasaka dademak ko safalod no Matay 18:15 a misaysay to demak. Soˈlin oniya sinael, o pakayniay i karetengay a raraw no Krisciyang, midokaˈ to roma Krisciyang, kawra ngaˈayay haenen tora pakayraan, mikiˈayaw a mikilim tora salikaka, sapoeneren a kaeped ko waywayan a milengo tora pasangar a misaysay to demak.

Manaokaniw, adihayay ko ngaˈayay sapaini hapakayraan i Fangcalay Cudad, papaihekalen ita ko minaroan no fangcalay saocor, matiya o “olah, lipahak, rihaday, kodait, siniˈada, ngaˈayay, soˈlinay a falocoˈ, damsayay, pakaˈmetay to tireng.” (Kalatiya 5:22, 23) Mahaen o simal mingaˈay to nika romakat no kikay, o minaroan no fangcalay saocor mahecaday to simal, parihadayay to kalalaˈed no salikaka.

Kahacecay ita iraay ko mikiriwiˈay a pinangan, mankora ciwidangay kita to masasi romaromaay a tamdaw. Manaokaniw, masasi romaromaay a pinangan pairaay to sakacacoli no tamdaw. O cecay halafinayto mala malohemay malitengay nasanay ko sowal: “O maomoyay tamdaw alatek cowa ka dolo a mikala cafay to tawlikay a tamdaw. Cowa ka taˈangay ko kapifiyor wa saan kita alatek, kawra nolatekay pairaay to taˈangayay a pasangar.” Hay, masasi romaay ko pinangan a tamdaw cowa ko mamala ngaˈay cangra o sanay han? Haratengen ita ko tarokos ci Yohani aci Pitiro. O masamaanay tamdaw ci Pitiro hani? O macoheday patitakay ko sowal ningra wa saan kiso, ci Yohani i, o iraay ko maolahay falocoˈ, ano papasowal i, misaharateratengay to hasowal a tamdaw. Oni tatosa tarokos taˈangayay ko kasasi roma no pinangan, kawra kamayanay ngaˈay cangra mala cafay a matayal. (Dmak 8:14; Kalatiya 2:9) Misahatiraay haw i, o aniniay Krisciyang soˈlinto caka hecad ko pinangan, o ngangaˈay makakelec a matayal.

Itini ilalomaˈ no kasakopang, alatek iraay ko cima salikaka somowalay anca midemakay  to manan a midokaˈ kitanan, kawra kinafalahay ci Kristo to ˈorip saki cingranan, mankora oha papadotocen ita patahekal ko olah i cingranan. (Yohani 13:34, 35; Loma 5:6-8) Ciharateng to sapiliyasaw cingranan, mamaan haenen milicay ko niyah: “Misafelitay cingra to palinian no Fangcalay Cudad han? Padeteng sanay cingra mirengat to keter ako han? Anca tona caay ka lecad ko pinangan niyam han?” Sakalimlaan i, haratengen koni: ‘Iraay ko manan makapahay capeling ningra to hangangaˈay a todongen ako han?’

Ora salikoray a salicay o masaka limlaan. Tinakoen ano cowa ka kalicaciyaw kiso, kawra ora midokaˈay kisowanan, kalacaciyaway a tamdaw, maedeng madoloay cingra misacaciyaw to cilomaˈay itini pitosilan. Mamaan ataen cingra mitosil, minanam i cingranan aki? Alatek halipaladaˈay ko cima a Krisciyang, kiso cowa ka hatira, ngaˈayay nengnengen iso cingra, misamaanay mipadang to matoˈasay, ciadadaay anca cisaaliay a tamdaw milifok to hemek. Ora kalimlaan i, soˈlinto masasi romaay kita to roma Krisciyang, kawra misinanot to makapahay a capeling nangra, o papangata to kalalaˈed i cangranan. Soˈlin cowa ko mamala ngaˈayay a widang cingra ano saan, kawra mihaen to demak papadama kitanan rihaday ato salikaka, hanaca o dadipayal ko falocoˈ ita, mitafo to kakelec no kasakopang.

Isaka cecay hahekalan ci Luotia aci Sintiki, cowa ka lecad ko pinangan nangra, kawra kamayanay pakalaloken ni Pawlo cangra, “palacecayen ko falocoˈ namo a mitoor to Tapang.” (Filipi 4:2) O ngangaˈay kiso mitoor toni patosokan, mikiemel a mararihaday ato salikaka han?

Ano caka mikiemel kita mifalah to tatiihay no kapinengneng to tao i, mahecaday pakihater han a paresap ko semot i pahanahanaan. Ano malengaw ko tatiihay harateng i falocoˈ i, o mamifiyor to kararihaday no kasakopang.  Ano maolahay kita ci Yihofaan ato salikaka i, o mamikiemel a eca pakihater han mirepat ko rihaday no tamdaw no Kawas.

Ano ciharatengay kiso to sapicowataw to rihaday a misaysay to lacongis, latek wa ira ko ngaˈayay a minaroan. Nengnengen ko tinakoan no cecay fafahiyan salikaka, sanay ko sowal ningra: “Itiyaho, sano kaemangay hananay no cecay fafahiyan salikaka kako a minengneng, sanay kako a miharateng, cowa ka hemek kako, maketer maketer kako, misatatiihan ako cingra. Ano caay kangodo takowanan, cowa ko kakangodoen ako cingra.

Ikor, misinanotay to niyah koni salikaka. Sanay ko sowal: “Mahapinangay ako ko dangoc no pinangan ako, masomaday ko harateng. Mafanaˈay kako to mamifalic kako. Tolon hananay ako ci Yihofa, halo miˈacaay to mimingay a sapaamid pafeli tora salikaka, halo mitilidan i kalidokap miliˈay to nika tatiih ako. Salikor, matatakecay kami, cisowal to tatawalen ko itiyaay a tatiihay demak. Mikitiya misatapang, makaka ngaˈayayto kami.”

O rihaday hananay, o masaka limlaan to cecacecay a tamdaw. ˈArawhan, ano misatatiih ko tao to saaroˈan no tamdaw i, kahenayay a midemak to mirepatay to rihaday a demak. Itini i cowa pidoko to Kawas a tamdaw matenakay koni, kawra ilalomaˈ no tamdaw no Kawas o papatahekal to makelecay a rihadayay. Papitilidan ni Yihofa ci Pawlo: “Nanay, madoedo namo ko falocoˈ no mitahidangay tamowanan a Kawas. Kararid kamo a misapoener to falocoˈ a damsay a kodait. Kasasiolah, kasasipaˈayaw kamo. Kao rihadayay a falocoˈ namo ko sakakakafit namo. Kararid a misaˈicel a maˈimer to nipipalacecay no [fangcalay saocor] i tamowanan.” (Ifiso 4:1-3) Mipairaan no rihaday a noka kelec tada ciepocay, mamisetek to falocoˈ kita a misaysay to lacongis, mikiemel a micowat to rihaday.