TAQENIMPIS sum apassna, jan waltʼayasiñanak askichañatakis chʼamachassna ukwa Jehová Diosajj muni. Ukham lurañänejja, sumankañaw congregacionan utjani. Uk uñjasasti yaqhanakas jutañ munapjjarakiniwa.

Madagascar markankir mä layqa jaqejja, Jehová Diosan Testigonakapar jupanakkam sum apasipjjatap uñjasajj muspharänwa. Ukatsti akham sänwa: “Mä religión ajlliñajäspajja, Testigonakaruw ajllirista” sasa. Tiempompejja, layqasiñanak apanukjjänwa, matrimoniopansa Biblian siski ukarjam sarnaqañatakiw walja phajjsinak chʼamachasiwayi. Jichhajj sumankañ utjayir Jehová Diosan Testigopäjjewa.

Taqenimpis suman jakasiñ muniri jaqenakat waljaniw uka layqa chachjamajj Diosan markapan suman jakasjjapjje. Kunjamtï Biblian siskejja, congregacionantï envidiasiñanakasa jiskhisiñanakasa utjaspajja, jachjayasiñanaka, llakinakaw utjaspa (Sant. 3:14-16). Ukhamar jan purtʼasiñatakisa, sumankañ utjañapatak yanaptʼañatakis Bibliaw yanaptʼistaspa. Yaqhep jilat kullakanakarojj Biblian kawkïr ewjjtʼanakapas sumankañatak yanaptʼäna uk uñjañäni.

“Trabajojan trabajir mä jilatampiw jan sum apasipkayätti. Mä urojja, toqesisipkayäta ukhamaruw paninejj mantanipjjäna, istʼapjjarakitänwa” (CHRIS).

“Mä kullakampejj juntupuniw yatiyir sarapjjerïta, ukampis akatjamatakwa nayamp sarañ jan munjjänti, janiw parljjetänsa. Janiw kunat coleratätapsa amuyirïkti” (JANET).

“Kimsaniw telefonot parlasipkayäta. Maynejj ‘jikisiñkama’ sasaw säna, ukatwa telefonop jiwtʼayasjjpachaw sasin amuyasajj jupat jan wal maynir parlayäta. Ukampis janiw jiwtʼayaskataynati, kuntï siskayäta uksa sum istʼaskatayna” (MICHAEL).

“Precursora pä kullakanakaw congregacionan jan waltʼayasipjjäna. Maynejj sapa kutiw maynir toqerïna. Ukham uñjasasti jilat kullakanakajj llakisipjjänwa” (GARY).

Ukham jan waltʼayasiñanakajj janis kunäkaspa ukhamwa awisajj amuysna. Ukampis ukham jan walinakan uñjasirinakajj aynachtʼapjjaspawa, congregacionansa sumankañajj chhaqtarakispawa. Parlaniwayktan uka jilat kullakanakajja, Biblian ewjjtʼanakapar istʼasaw jan waltʼayasiñanakap askichapjjäna. ¿Kawkïr textonakas yanaptʼpachäna?

“Janiw thakin jumanakkama [toqesipjjätati]” (Gén. 45:24). Tatapan ukar janïr  sarapkipanwa, Joseajj jilanakapar ukham ewjjtʼäna. Uka ewjjtʼapajj wali askiwa. Maynitï coleramp atipayasiri, jankʼak chuym ustʼayasiri ukhamäspajja, mayninakampis jachjayasispawa. Chris jilatajja, jachʼa jachʼa tukurïtapa, ewjjtʼatäñsa jan munirïtapwa amuyasïna. Jupajj janiw ukhamäñ munjjänti ukatwa jilatat perdón mayisïna, llampʼu chuymanïñatakiw wal chʼamachasirakïna. Mayni jilatajj ukham chʼamachasitap uñjasajja, llampʼu chuymanïñatakiw chʼamachasirakïna. Jichhajj kusisitäjjapjjewa, mayachtʼataw Jehová Diosar servisipkaraki.

“Kunapachatejj jan jisktʼasiñajj utjki ukkhajj, amtäwinakajja aynachtʼiwa” (Pro. 15:22). Janet kullakajj uka ewjjtʼarjam lurañ wakisitapwa amuyäna, ukatwa coleratäki uka kullakamp parltʼir saräna. “¿Kunatsa coleratäjjta?” sasaw Janetajj jisktʼäna. Qalltanjja toqesisjamaw parlapjjäna, qhepatsti llampʼu chuymampiw parltʼasjjapjjäna. Janet kullakat jan wal amuykäna ukajj jan cheqätap yatjjasajja, perdón mayisïna. Jichhajj mayachtʼataw Jehová Diosar servisipki.

“Jumatejj altarar mä ofrenda apkasina jilatamajj juma conträtap amtassta ukhajja, uka ofrendam altar nayraqatar jaytasin jilatamar thaqtir saram. Jupampi nayraqat sumankthapinim” (Mat. 5:23, 24). Jesusajj Qollun Yatichkäna ukhaw ukham ewjjtʼäna, inas uk amtstan. Michael jilatajja, mayni jilatat jan wal parlatapajj jan walïtapwa amuyasïna. Ukatwa sumankthapiñatak chʼamachasiñ amtäna. Altʼat chuymampiw jilatampi parlir saräna, perdón mayisirakïna. Michael jilatajj akham siwa: “Jilajajj taqe chuymaw perdonitäna” sasa. Jichhajj wasitatwa amigöjjapjje.

“Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim” (Col. 3:12-14). Precursorjam walja maranak Diosar serviri, toqesipkäna uka kullakanakarojj mä jilïr irpiriw munasiñampi ewjjtʼäna, ukatsti akham jisktʼasaw amuytʼayarakïna: ‘¿Mayni jilat kullakanakar llakisiyapjjatamajj walikïskpachati? ¿Janit pacienciampi uñjasiñatakisa, sumankthapiñatakis chʼamachasipkasma?’ sasa. Uka kullakanakajj jilatan ewjjtʼaparjam lurañatakiw chʼamachasipjjäna. Jichhajj sum apasjjapjje, Diosan arunakapsa yatiyasipkakiwa.

Colosenses 3:12-14 liytʼawayktan uka textonjja, maynejj chuym ustʼaykistaspa  ukhaw yanaptʼistaspa. Kunjamtï waljanejj sapkejja, humilde jaqejj perdoniwa, jan wal luratajj armjjarakiwa. Jan ukarjam lurañ puedkstanjja, Mateo 18:15 texton siski ukarjam lurañatakiw chʼamachassna. Jachʼa juchanakar purtʼasisajj kunanaksa lurañasa ukatsa Jesusajj parlaskchïnjja, mä kullakampi jan ukajj mä jilatampi jan waltʼayasktan ukhaw uka qellqatajj yanaptʼarakistaspa. Taqeniw humilde jaqëñasa, munasiñampi parltʼañasa, jan waltʼayasiñanak askichañatakis parltʼañasarakiwa.

Biblian walja ewjjtʼanakaw utji. Yanaptʼayasiñ munstanjja, espíritu santon achupaw chuymasan utjañapa, ukajj akanakawa: “Munasiña, kusisiña, sumankaña, paciencianïña, khuyapayasirïña, suma chuymanïña, Diosar confiyaña, llampʼu chuymanïña, munañasampi jan apnaqayasiña” (Gál. 5:22, 23). Kunjamtï aceitejj mä maquinan sum funcionañapatak yanaptʼkejja, ukhamarakiw suma chuymanïñajj taqenimpi sumankañatak yanaptʼistani.

Janiw taqenejj mä kikpa chuymanïktanti, amuyunsa parlatansa mayj mayjarakïtanwa. Ukaw mayninakamp sum apasiñatak yanaptʼistaspa. Awisajj ukham mayj mayja jaqëtas laykuw jan waltʼayasiñanakajj utjaspa. Walja maranak Diosar serviri mä jilïr irpiri jilatajj akham siwa: “Mä ajjsariri amuki sarnaqerimpi, wali parlirimpejj janiw waltʼayasipkaspati. Ukham jaqëñajj walikjamäkchisa, jan waltʼayasiñanak utjayaspa” sasa. Ukhamajja, ¿jan mä pachpa amuyunïpki ukanakajj janipunit sum apasipkaspa? Janiw uk sañ munkiti. Apóstol Pedrompita apóstol Juanampit parltʼañäni. Amuyatajja, Pedrojj jan ajjsartʼas qhana arunakampi parlirïnwa. Apóstol Juanasti, munasiri, sum amuytʼas parlir jaqerakïnwa. Ukham mayj mayja chuymanïpkchïnsa, mä wawakiw Diosar servipjjäna (Hech. 8:14; Gál. 2:9). Ukhamasti, janis mä pachpa amuyunïkstanjja, Diosar mayachtʼataw serviraksna.

 Inas mä jilatan parlatapasa luratapasa chuym usuychistu. Ukhampachas munasiñampi uñjañasawa, Jesucristojj jupa laykuw jiwarakïna (Juan 13:34, 35; Rom. 5:6-8). Jitheqtjjañat sipansa, janiw amigopäkiristti sañat sipansa, akham jisktʼasiñasawa: “¿Bibliarjamajj jan walïki ukanakti luraski? ¿Jan wal lurañti munitu? ¿Jan ukajj mayj mayja chuymanïpjjtcha? ¿Kuna askinaksa jupat yateqasiristjja?” sasa.

¿Kuna askinaksa jupat yateqasiristjja? sasin jisktʼasiñajj wali askiwa. Ak amuytʼañäni, jiwasatï parlañatak wali ajjsarirïstanjja, jan ajjsaras parliri mä jilatatakejj Bibliat yaqhanakar parlañajj janiw chʼamäkpachati. Inas jupampi yatiyir sarsna, ukhamat jupat yateqasiñataki. Mä jilatatï jiwasat sipansa jukʼamp khuyaptʼayasirïchejja, jupat yateqasisaw chuymaninakaru, usutanakaru, pisinkirinakaru yanaptʼsna, ukhamatwa kusisitarakïsna. Ukhamasti, janis mä pachpa amuyunïkstanjja, kunanakansa jupat yateqassna ukanak lupʼisaw Diosar mayachtʼat sirvsna. Janis wali amigopäkchiñänejja, sum apasiñatakiw yanaptʼistani, congregacionansa sumankañaw utjani.

Evodia kullakampi Síntique kullakampejja, nayra maranakanwa jakapjjäna, jupanakajj inas jan mä pachpa amtanïpkchïnti. Ukhampachasa, apóstol Pablojj ‘mä pachpa amuyunikïpjjañapatakiw chʼamañchtʼäna’ (Fili. 4:2). ¿Janit jupanakat yateqasisajj sumankañ utjañapatak chʼamachaskaraksna?

Mayninakatak coleratäñajja, mä suma jardinankir jan wali qoranakampi sasiwa, jan apskañänejja jilaskakiniwa. Niya ukhamarakiw chuyma ustʼata, colerata sarnaqañajj congregacionan sumankañ chhaqtayaspa. Jiwasatï Jehová Diosarusa jilat kullakanakarus munasstanjja, janis taqenimpi mä pachpa amuyunïkstanjja sumankañ utjañapatakiw chʼamachasiñäni.

 Maynimp jan waltʼayasiñäni ukhajj sumankañ utjañapataki jankʼak askichañänejja, wali askïniwa. Mä kullakat parltʼañäni, jupajj akham siwa: “Mä kullakajj wawarjamas uñjkitaspa ukham amuyasiyäta, ukajj wal colerayitäna. Urut urutjamaw jukʼamp colerjjayäta, ukatwa jupar jan munasiñampi uñjarakiyäta. Ukatsti akham amuyirïta: ‘Jupajj janejjay respetompi uñjkchitutejja, nayajj janirakiw respetkäti’ sasa”.

Tiempompejja, kunanaksa jan wal luraskäna ukanakwa uka kullakajj amuytʼasjjäna, ukatsti akham sarakiwa: “Kunanakansa pantjasiskayäta uk amuytʼasajj llakisirïtwa. Jan wali amuyunakaj apanukuñ wakisitapwa amuyarakiyäta. Ukatwa Jehová Diosar orasirïta. Uka kullakatakejj mä jiskʼa regalo alarapta, ukatsti, mä tarjetaruw jan wal luratajat perdontʼita sasin qellqtʼarakiyäta. Kullakampejj taqe chuymaw sumankthapipjjayäta, chuyma ustʼayasitanak armañwa amtapjjarakiyäta. Jichhakamajj janiw mayampsa chuym ustʼayasjjapjjtti” sasa.

Taqeniw suman jakasiñ wal munapjje. Ukampis jachʼa jachʼa tukusa, mayninakajj jan wal lurañsa munapkaspa ukham amuyasaw chuym ustʼayirjam parlapjje. Akapachanjja, ukhamwa jila parte jaqenakajj lurapjje. Ukampis Jehová Diosan markapanjja sumankaña, mayachtʼat jakasiñaw utjañapa. Diosaw apóstol Pablor akham qellqayäna: “Jumanaka[ruw] ruwtʼanipjjsma, ukhamat kunatak jawsatäpktatejj ukarjam sum sarnaqapjjañamataki, wali humilde chuymampi, llampʼu chuymampi, pacienciampi, maynit maynikam munasiñamp aguantasisa, espíritu santojj mayachtʼat jakasiñ churkistu ukarjam sarnaqañatak wal chʼamachasisa, sumankañan jakasa” sasa (Efe. 4:1-3). ‘Mayachtʼat jakasiñajj’ wali wakiskiriwa. Ukhamasti, mayachtʼat jakasiñataki, jan waltʼayasiñanak jankʼak askichañataki chʼamachasiñäni.