YÉHÔVA ZAMBE a jô Bekristen na be nye’e mvo’é, be bo na mvo’é é bi beta ngap ényiñe jap. Mvo’é é ne mfi asu bebo bisaé bé. Ja bo na abui bôt e zu nyiin akônda été.

Tame yen éve’ane beta mbo mengañ ya Madagascar. A nga nyoñ éyoñe ya fombô mvo’é é ne zañe Bengaa be Yéhôva. A mbe a jô’ô émiene na, ‘Nge ma yiane nyiine ñyebe éziñ, mé ke nyiine ve ñyebe Bengaa be Yéhôva.’ Mvuse ya valé, a nga jô’é ésaé mengañ a mbe a bo’ok, a late alu’u dé, a bo fe mbo ésaé Yéhôva, Zambe ya mvo’é.

Aval ane môt ate, betoyini be bôte ba nyiin akônda mbu ôse, ba koone mvo’é ba to be jeñek. Ve Kalate Zambe a liti ne sañesañe na, “mesengan a metyama’ane” bi ne ndaman abui memvôé, a soo jo’ojo’o akônda été. (Jc. 3:14-16) Mbamba jam a ne na, Kalate Zambe a ve fe bia mbamba melebe me ne volô bia na, bi sa’ale mejô, a ba’ale mvo’é. Asu ya na bi bo de, bia zu yene bité biziñe ya ényiñ.

“Me nga bi mejô a mojañ éziñ bia nye bi mbe bi saék, môs éziñ bôte bebaé be nga yen ane bia wôman.”—CHRIS.

“Me nga teme môs éziñe na, sita bia nye bi wô’ô kui nkañete mvo’é mvo’é, a nga bene kui a ma. A nga bene bene fe laan a ma. Me nji be me yeme ajô e mbe zañe bia nye.”—JANET.

“Bia be bôte bebaé bi mbe bi laane téléfôn, ane wua a nga ya’ane bia, me nji be me yeme na, a nji dime téléfône wé. Nde me nga taté na ma so’o nye be môte mbok, me teke yeme na a wôk.”—MICHAEL.

“Akônda dangan, bepkwa’a mefane bebaé be nga bi mejô, ane be nga taté na ba wôman. Mômane mete me nga te’e bôte bevo’o nyul.”—GARY.

Ô ne nyoñe mam mete égbwemese. Môt ase ya bôte ba, a nga bo nyi mbo’o abé mimfa’a mibaé: nlem, a nsisim. Ve mbamba jam a ne na, be nga mane kôme mejô map, bese be nga tôñe melebe me ne Kalate Zambe. Melebe mevé me nga volô be na, be kôme mejô map?

“Te mia bo mintañete zen.” (Met. 45:24, Mfefé Nkôñelan) Joseph a nga ve bobenyañe bé melep éyoñe be nga  bulane b’ésa wop. A mbe fo’o mbamba melep! Éyoñe môt a nji jôé émien, a éyoñ a ji’a wô’ô ôlun, a ne tindi bôte bevo’o na be bo avale da. Chris a nga su’ulane yeme na a yiane juane fulu mebun, a fulu ya bene vô’ôlô melep. A nga ji’a ke sili mojañ ate njaman, a nga jeñe fe a mezene mese na a jôé émien. Mojañe ba nye be mbe be saék, nye fe a nga tyendé amu a nga yene ngule Chris a nga ve na a tyendé. Éyoñe ji, ba kañe Yéhôva fufulu meva’a été.

“Vôm mbôdane fe’ ô ne momo, mam nlem w’akômbô bo me ne te tôban.” (Min. 15:22) Janet a nga su’ulane yene na, a yiane bo aval éfuse ji ja jô. A nga nyoñe ntyi’ane ya ‘bôndé fek,’ a nga ke laan a sita mbok. Nté be mbe be laan, Janet a nga jô sita ate a mbamba nleme na, a kate nye jôm a wô’ô ôlun. Éyoñe be nga taté na ba laan, môt ase a mbe a wô’ô nyi mbok ôlun. Ve nté minlañe mi mbe mi kele ôsu, ôlune fe ô mbe ô sise. Sita ate a nga su’ulane yeme na, sa ke Janet nnye a mbe ajô. A nga sili nye njaman, a be nga beta taté na ba kañe Yéhôva fufulu.

“Ajô te, nge wo ave Zambe jôm ô ye’e bôé je autel, a simesane wôé na, monyoñ a bili wo ajô, li’i jôme jôé wôé fefel autel, ô ke taté late monyoñ ñbwa.” (Mt. 5:23, 24) Éko éziñe na, wo fe wo yeme melebe mete. Michael a mbe a wô’ô émien éngôngol éyoñ a nga yeme na, jam a nga bo e mbe abé. A nga nyoñe ntyi’ane ya kôm ajô ete. A nga ke koone mojañ ate nda jé, nde a nga sili nye njaman a nleme wé ôse. Ajô ete e nga man aya? Michael a jô na, “Monyañe wom a nga jamé ma a nlem ôse.” Be nga beta bo bemvôé.

“Wua a jibi’i nyô mbok, a wua a jamé’é nyô mbok, nge môt éziñ a bili nyô mbo’ ajô.” (Beco. 3:12-14) Mvendé é nga volô bepkwa’a mefane ba bebaé na be fase minsili mi: ‘Ye mbôle bi bili mejô, nde bôte bevo’o ba yiane jañele meva’a map ya kañe Yéhôva? Ye bi bili beta amu ya bo teke kôme mejô mangan, mfa’a ya ke ôsu a kañe Yéhôva mvo’é été?’ Be nga yebe a tôñe melebe me mvendé éte. Éyoñe ji, ba nyiñe mvo’é, be kele fe ôsu a kañete mbamba foé.

 Éyoñe wo tôñe melebe me ne kalate Becolossien 3:12-14, wé yeme jam wo yiane bo nge môt a soñe wo. Bôt abui be yeneya na, jam ba yiane bo e ne ve na, be jamé a vuan. Ve nge wo yene na, ngule wo ve é nji yian, ye kalate Matthieu 18:15 a ne volô wo? Melebe me Yésus mete ma fombô beta be mam ya bo, éyoñe môt a te bo nyô mbo’o beta nsem. Ve ô ne fe tôñe melebe mete. Kele yene monyañe wôé, a mbamba nlem, jeñe na mia nye mi mane kôm ajô.

pKalate Zambe a ve melebe mefe. A jô na wo yiane liti ‘ébuma ya nsisim . . . nye’an, mevak, mvo’é, évôvoé njiban, mvam, zôsô, mbunan, nje’eban nleme si, njôan nlem.’ (Beg. 5:22, 23) Aval ane mbon wo bo na minsini a wulu mvo’é, mbamba mefulu ba bo na, mvo’é é bo akônda été.

Môt ase ya be bia a bili mefulu mé, jam ete e ne bo na bi bi abui bemvôé. Ve mefulu mete me ne fe soo mejô. Mvendé éziñe ja nyoñ éve’ane ji: “Môt a ne évôvoé a ne yen ayaé ya nyiñ a môt a vuñ abui. Bi ne biasé nsela’ane ate; ve a ne soo beta mejô.” Ve ye wo simesane na, bôte be bili mefulu mevale meval, ba yiane bo kom ése be bili mejô? Tame yen éve’ane minlômane mibaé mi. Pierre a mbe avale môt avé? Ô ne jô na, a mbe a kate bôte mam ne bôsa, a na, a mbe a ji’a wô’ô ôlun. Jean ki a mbe avale môt avé? Ô ne jô na, a mbe mbamba nlem, a na, a mbe a taté’é fas ôsusua na a kobô, nge bo jam éziñ. E ne fo’o bo nalé. Ve be nga ke ôsu a saé fufulu. (Mam. 8:14; Beg. 2:9) Nalé a liti bia na, Bekristen ya  melu ma be ne saé fufulu akusa bo be bili mefulu mevale meval.

Éko éziñe mam monyoñe ya akônda a jô, nge bo, ma ndeñele wo. Wo yiane yeme na Krist a nga wu fe asu dé, ajô te, wo yiane nye’e nye. (Jn. 13:34, 35; Bero. 5:6-8) Ô nji yiane sa’ale nye, ve wo yiane sili womiene na: ‘Ye monyañe wom, a te tyame metiñe me Yéhôva? Ye a te vañe jeñe na a bo ma jam e ne abé? Nge ke na a ne fo’o ve amu na mefulu mangan ma selan?’ Nde fe, beta nsili a ne na: ‘Mbamba mefulu bevé a bili be ne ma bo mfi?’

Nsili wo su’ulan ô ne mfi abui. Nge môt a nye’e nkobô, a to ke na, ô nji nye’e nkobô, fasek aval a wô’ô laan a bôte nkañete. Ô ne kañete a nye, a yé’é abui mam. Nge monyoñ a ne akap, a to ke na ô nji dañe bi fulu akap, nga ô ne yé’é na wo fe ô bo akap a bemvendé, a minkôkon, nge ke a bôte befe? Ñye’elan ô ne na, to’o mia monyoñe mia selane mefulu, ô ne subu nye bebé nge wo fombô mbamba mefulu a bili. Nalé a nji tinane na, mia nye mia ye bo beta bemvôé, ve mvo’é ja ye bo zañe jenan, a zañe bôte bese ya akônda.

Évodie ba Syntyche be mbe be sela’ane mefulu. Ve nlômane Paul ô nga ve be ngule nyule “na be bo ôsimesane via be Tate.” (Beph. 4:2) Ye wo fe wo ye fo’o jeñ a ngule jôé ése na, mvo’é é bo akônda été?

Mbia b’asimesan a lat a bôte bevok be ne ane mbia élok a yametan afup. Ajô te, bia yiane jeñ a ngule jangan ése na, bi vaa mbia b’asimesane bete nlem été. Ngumba akônda ô ne juk, fo’o ve amu na, môt a jalé nleme wé a ôlun. Nge bia  nye’e Yéhôva a bobejañ, bia ye ve ngul ése na, mejô me ne zañe jangan me bo teke ndeñele, nge sé’é mvo’é bebo bisaé be Yéhôva be bili zañe jap.

Mejô ma kômban éyoñe bia jeñe na, bi kôme me a nsôñane ya bo mvo’é. Tame yene jam e nga kui sita éziñ. A jô na: “Sita éziñe ya akônda a nga nyoñe ma ane mone mongô. Jam ete e nga bo ma mintaé nlem. Ôlune wom ô nga taté na wo bet, jam ete e nga bo na me sa’ale nye. Me mbe me jô’ô mamiene na, ‘A nji semé ma, nde ma fe me nji yen amu jé ma yiane semé nye.’”

Sita a nga taté na a fase mimboane mié. A jô na: “Me nga taté na ma yene na ma ma ku, a me nga wô’ô ôson. Me nga yene na ma yiane tyendé mfasane wom. Éyoñe me nga mane ye’elane Yéhôva a lat a ajô ete, nde me nga ke yene sita ate me bili mone kalate, a mon atôm na, ma sili nye njaman amu mbia mboane wom. Bi nga wuban, nde bi nga jô na bia zu vuan ajô ete. Teke fe ajô zañe jangan.”

Bôte ba jeñe mvo’é a mezene mese. Ve éyoñe ba bo be mam ma taé be nlem, abui e wô’ô taté belane mezene ma tyame mvo’é. Bôte be nji kañe Yéhôva mbe ba bo nalé, ve mvo’é a élat bia yiane bo zañe bebo bisaé be Yéhôva. Paul a nga tili na: “Me aye’elane mia na, mi wulu ane de ayian nloen ñwô ôte mi nga loban, a nje’ebane minlem ôse a a évôvoé ése, a ôtete’e ya yaa, miabebien mi jiba’an a nye’an; mi tuka’a ve’ele ba’ale ntaban nleme wua ya nsisim nlatane ñbwa été.” (Beép. 4:1-3) “Nlatane ñbwa” ôte ô ne nya mfi. Enyemeta’ané mvo’é jangan, a enyoñané ntyi’ane ya kôme mejô mese me ne bo zañe jangan.