BUSENTI Heowá lun gebegi lan darangilaü woun ani lun wáfaagun lun wibihini. Dan le wadügüni ítara, anihein saragu darangilaü wadan keisi kristiánugu inarünitiña. Barüti darangilaü le saragu gürigia lidoun damuriguaü kristiánu.

Kéiburi aban gabiñarahati subudiwati Madagascar, aba taweiridun lanigi luagu darangilaü le hádanbei gefentiña luagu Heowá. Aba lasaminarun: “Anhein lun lubéi nanúadirun aban relihión somu dan, anihánba le nanúadira”. Lau lásügürün dan, aba lígiruni abiñarahani, sügüti saragu hati aransehei luáguti lamarieidun lun úara lan luma le tariñagubei Bíbülia ani aba aban lan gefenti luagu Heowá, le lubungiute darangilaü.

Ítara kei gabiñarahati ligía, sagü irumu darí hamuti saragu milu gürigia darangilaü le habusenrubei lidan damuriguaü kristiánu. Gama lumoun, ígiratu Bíbülia furangu gayarati lan ladügün gimugaü luma lirahüñü turóbuli lidan damuriguaü lun lagumuchagun umadaguaü ani lun ñein lan magundani (Sant. 3:14-16). Rutu giñe Bíbülia adundehani buiti le íderagubaliwa lun magubuhan wamá turóbuli ani lun wáluahani darangilaü. Ariha waméi ida liña lan hafalaruni fiú gürigia adundehani burí le.

“Mabuidunti meha nanaagun nungua luma aban íbiri le meha nadagimeinbei numa. Aban weyu, dan le wagúarahaña lan wóuniwagua, aba hebelurun bián gürigia ani aba harihiniwa éreragua” (CHRIS).

“Aban íbiri to meha úmaboun napurichiha saragu, sódini aba máfuridunharu lan numa, ani aba giñe mayanuhan tan nun. Ibidiñeti meha nun ka lan uagu” (JANET).

“Wayanuhaña meha luagu gágamuru ǘrüwagua lidan aban. Aba lawisahan aban wádangiñe luagu masigirun haali lan ayanuha, ábati nasaminarun luagu dagagüda laali lan gágamuru. Aba nayanuhan wuriba luagu lun le úmabei nayanuha. Gama lumoun, madagaragüdün lágili buga le aban gágamuru, ani aba laganbuni sun le nariñagubei” (MICHAEL).

“Gaturobulintiña bián prekursora ha lídangiñetiña damuriguaü hámagua. Aba tagumeserun aban hádangiñe adeinha tun to aban sun oura. Aba ladügün wuribu le hádanbei lun heferidiruni ha híbiri haguraasun (GARY).

Gayarati larihín turóbuli burí le kamá masudininti. Ani le linarün katei, gayarati ladügün katei burí le saragu dañu houn ha gaturobulinbalin ani gayarati hamuga giñe ladügün lun ua lan darangilaü lidan damuriguaü. Gama lumoun, gúndaatiwa luagu falá hamani sun íbirigu ha tadundehan Bíbülia ani ibihatiña lunya ñein lan darangilaü. Ka burí san adundehani tídangiñeti Bíbülia íderagubaliña?

“Midin humatia ageindagueina luagu üma” (Agu. 45:24). Hosé meha íchugubalin eweridihani le houn líbirigu lubaragiñe hagiribudun lumoun  háguchi. Ma lubuidun burí dimurei! Anhein siñá lubéi lárügüdagun aban gürigia lungua ani aba lagañidun luagu furumiñeguarügü katei, gayarabei ladügün lun giñe hagañidun amu. Ruti Chris fe luagu íñugu lan ani hénrengu lan lun lánharun lun adundehani le híchugubei amu lun. Kei le busén lan meha lasansirun, aba lamuriahan ferudun luma íbiri le buga úmabei léreragua ani aba láfaagun saragu lun lagidaruni luriban igaburi luáriua. Dan le larihinbalin íbiri ligía áfaaguni le ladügübei Chris lun lasansirun, aba giñe ladügüni ligiaméme. Guentó, gúndaatiña ani seriwitiña lun Heowá lidan úarani.

“Dan le ua lan álügüdahani, wuribati aransehani” (Ari. 15:22). Aba tíchugun Janet fe luagu mosu lan tafalaruni adundehani le, ligía aba lubéi desidírü tan tayanuhan tuma íbiri tugía. Dan le hayanuhaña lan, aba tálügüdünu Janet íbiri tugía ka lan uagu tagañida. Furumiñe, hénrenguti yanu ligía, gama lumoun aba lasansirun katei dan le hayanuhanbei luagu turóbuli ligía lau darangilaü. Aba tíchugun íbiri tugía fe wuribarügü liña lan gunfuranda tan aban katei ani madurun tan Janet lidan katei ligía, ani aba tamuriahan ferudun tuma. Guentó seriwiyaaña lun Heowá úara.

“Anhein banüga bidewese luagun lani Bungiu latarü, bau ñein aba baritaguni luagu anihein lan katei lidan furumiñeguarügü gürigia bubá, ígirabei le lunbei bedewehani ñein ligibugiñe latarü, ábame bidin arandara luma gürigia ligía” (Mat. 5:23, 24). Háfuga haritagua wamani adundehani le líchugubei Hesusu lidan Serumu luagu Wübü le. Sandiguati Michael lungua wuriba dan le líchugunbei fe luagu magudemehabu lan luma luagu lóuseruni íbiri ligía wuriba. Gama lumoun, desidírühali meha láfaagun lun larandarun luma íbiri ligía. Ǘnabuguti ani ayanuhati luma íbiri ligía lun lariñagun lun luagu sarí lani. Ka resultóubei? Ariñagati Michael: “Aba feruduna lánina níbiri tídangiñe sun lanigi”. Ábaya gamadagua hamá.

“Gaguraasun humá hubaruagua, ferudunagua huguyame húmawagua” (Kol. 3:12-14). Haritaguagidün san hawagun bián prekursora ha gaturobulinbaña hámagua? Íderagua lumutiña aban wéiyaali lidan afiñeni lun híchugun fe hadügüña lan lun hasandiragun amu houngua wuriba. Ani aba lálügüdüniña anhein le lubéi lúgubu siñá lan gaguraasun hamá habaruagua, lun hakipuruni darangilaü lidan damuriguaü. Ánhatiña íbirigu hagía lun ladundehan wéiyaali lidan afiñeni ani aba hadügüni le lariñagubei houn. Buíduhali hanaagun biángubei hagía houngua ani añaheingua apurichihei uganu buiti úara.

Adundehani le waliihabei lidan Kolosana 3:12-14, gayarati líderaguniwa anhein adüga somu gürigia dañu woun. Gíbeeña gürigia íchugutiña fe dan le lan ǘnabugu hamá gayarati lan feruduna hamá amu ani bulíei haméi sun katei. Gama lumoun, ánhawa ariha siñá lan wadügüni katei le, gayarati wafalaruni adundehani le lídanbei Matéu 18:15. Íbini  layanuhaña lan meha Hesusu lidan bérusu le luagu le lunbei ladügüni aban gürigia dan le ladügün aban figóu wéiriti kóntüra amu, huuti giñe dan le gaturobulin wamá luma somu íbiri. Arufudarügü wamá ǘnabuguni luma gamadouni, ábame wayanuhan luma wíbiri lun waransehani turóbuli.

Inarüni anihein lan saragu amu adundehani buiti tidan Bíbülia. Gama lumoun, lun lahuudun woun lunti warufuduni igaburi le líchugubei sífiri: “Ínsiñehabuni,ugundani, darangilaü, gaguraasuni, areiduni, lubuidun igaburi, úaraguni, ǘnabuguni, ragüguaü unguaü” (Gal. 5:22, 23). Ítara kei leseriwidun agülei lun buidu lan tawadigimaridun aban máhina, ídehati igaburi burí le lun buidu lan wanaagun woungua hama amu.

Ámuñegueinarügüti wagaburi kada aban wádangiñe. Anihein ámuñegueinarügü igaburi buiti luagu kada aban wádangiñe ani ámuñegueinarügüti giñe wasaminan luma ligaburi wayanuhan. Adügati le lun wadarirun umadagu buítiña. Gama lumoun, gayarati giñe ladügün katei le lun ñein lan turóbuli. Ariñagati aban wéiyaali lidan afiñeni le lǘhali eseriwida: “Aban gürigia le haburiti gayarati wuriba lan lidin lun luma aban gürigia le wéiriti furangu lan. Íbini genege lan ua lan súdini lan katei le, gayarati lanügün turóbuli wéinamuti”. Mini lan san le siñati lan buidu lan hanaagun bián gürigia houngua ladüga ámuñegueinarügü lan hagaburi? Samina wamá hawagun bián hádangiñe lani Hesusu apostolugu: Féduru luma Huan. Luagu le waliihabei tidan Bíbülia, saminatiwa luagun Féduru kei aban gürigia le furanguti ani héreguti. Ani dan le wasaminarun luagun Huan, aba wasaminarun luagun aban wügüri hínsiñehabuti ani saminati buidu lubá layanuhan. Ámuñegueinarügüti meha hagaburi bián apostolugu ha, gama lumoun, nadagimeintiña meha úara (Adü. 8:14; Gal. 2:9). Arufuda lumuti hani hénpulu gayarati lan giñe wawadigimaridun úara keisi kristiánugu, íbini ámuñegueinarügü lan wagaburi.

Háfuga anihein lan somu íbiri lidan damuriguaü  le ariñagubei o le adügübei katei le agañidagüdübaliwa. Íbini ítara, subudi wamuti hilati lan Kristu luagu ani lunti lan hínsiñe lan woun (Huan 13:34, 35; Rom. 5:6-8). Ligíati, lubaragiñe wadisedun luéi o wasaminarun siñabei lan gamadagua wamá luma, álügüdagua wamá woungua: “Ladügüña san íbiri le aban katei le furanguti kóntüra lan luagu le tarufudahabei Bíbülia? Láluguña san ladügün dañu nun? Odi ámurügüti ligaburi nuéi? Ani le súdinitimabei, gayarati san nafurendeirun lídangiñe igaburi burí buiti le luágubei?”.

Súdiniti lagumuhóun álügüdahani le. Anhein weiri lubéi línsiñe lun aban gürigia layanuhan, ánheinti wagía mayanuhantiwa saragu, samina wamá luagun lumenrengun lun gürigia ligía lagumeserun ayanuha hama gürigia lidan apurichihani. Háfuga gayara lan wamuriahan luma lun láfuridun wamá apurichiha lun warihini kaba lan wafurendeira lúmagiñe. Anhein gíchigaditima lubéi íbiri ligía wawéi, gayarati san wafurendeirun lúmagiñe lun wasandiruni ugundani le lanügübei híderawagun gürigia wéiyaaña, sánditiña hama ha gudemebaña? Le súdinibei ya íbini lan ámuñegueinarügü lan wagaburi, gayarati yarafaguatima wamá hama wíbirigu ánhawa etenira lun katei buiti le hawagubei. Háfuga machülübei lan dan lun íbiri lan ligía besi wamada, gama lumoun líderagubadiwa katei le lun buídutima lan wanaagun woungua luma, lun darangilu wamá luma lun wéiritima lan darangilaü lidan damuriguaü.

Bián meha kristiánugu ha awinwandubaña lidan furumiñeti sígulu Ewodía tuma Síntike. Háfuga ámuñegueinarügü lan meha hagaburi. Íbini ítara, ínchaha lumutiña meha apostolu Pábulu lun “harandarun hámagua keisi iduheñu luéigiñe Kristu” (Fili. 4:2). Wadügübei san ligiaméme lun wídehan lun ñein lan darangilaü lidan damuriguaü?

Gayarati konpararua lan katei wuribati le wasandirubei hawagu amu gürigia luma híduru wuribati le áhüchüti lidan aban fuluri-agei, laweiriduba anhein máhulun wamá. Ítarameme, dan le laweiridagun katei wuribati le lasandirubei aban gürigia  tidan lanigi, gayarati lasufurirun sun damuriguaü. Gama lumoun, anhein hínsiñe lubéi Heowá hama wíbirigu woun, wadügübei sun wayaraati lun madügün lan ámuñegueinarügü igaburi lun ua lan darangilaü lidan damuriguaü.

Ánhawa áfaagua lun waransehani turóbuli lun gayara lan ñein lan darangilaü, gayarati taweiridun wanigi lau resultóu. Samina wamá luagun tásügürün kristiána to: “Aba nasandirun tóuseruñadina lan aban íbiri kamá hamuga aban irahü nuguya, ani mínsiñeti meha katei ligía nun. Kei le eibu lan dan ábatima nasafaragun, aba nagumeserun óuseroun wuriba. Aba nasaminarun: ‘Minebentina tun, menebenboun giñe nun’”.

Lárigiñe, aba tagumeserun kristiána to asaminara luagun le tadügübei: “Aba nagumeserun arihei luriban nigaburi, aba nasafaragun númagua. Aba níchugun fe mosu lan nasansiruni ligaburi nisaminan. Aba nafurieidun lun Heowá luagu katei ligía. Lárigiñe, aba nagañeihan aban liraüraü idewesei tun íbiri tugía ani aba nabürühan aban tiraüraü gárada tun amuriaha ferudun luagu luriban nigaburi. Aba nóuburunu, ani hóubura tana ani aba desidírü wamá wabulieiduni turóbuli ligía. Masuseredunyagili amu turóbuli wadan”.

Busentiña gürigia darangilaü lau lóufudagun. Gama lumoun, gíbetiña gürigia móuseruntiña lau darangilaü, híbiri ladüga íñugu hamá ani híbiri ladüga sandí hamá luagu busén hamá amu hadügün dañu houn. Kamaniti igaburi le ubouagu, ánheinti hadan lumutuniña Heowá lunti ñein lan darangilaü luma úarani. Íderagua lumuti Heowá Pábulu lun labürühan: “Ligía namuriahabei huma, [...] lun hóuseragun hungua kei lunti lan hadügüni ha únbaña wáhali lan Bungiu lun lánigu hamá kei lagúarun hun. Ǘnabugu humá, hínsiñehabu, gaguraasun humá, areida huguyame houn híbirigu. Houcha humá lun lidan humá aban súnwandan lau lídehan Sífiri, lidan darangilaü le óundarubaliwa súngubei” (Efe. 4:1-3). Wéiriti lebegi “darangilaü le”. Ligíati, desidírü wamá waganwoundagüdüni lau waransehani sun turóbuli le asusereduti waganagua.