SI Jehova nga Diyos nag-awhag sa mga Kristohanon nga pabilhan ang kalinaw, ug magkinabuhing malinawon. Kay makigdaiton, ang matuod nga mga magsisimba nagatagamtam ug kalinaw. Tungod niini, daghang tawo nga dili gustog samok ang nadani sa Kristohanong kongregasyon.

Pananglitan, usa ka iladong tambalan sa Madagascar ang nakaobserbar sa panaghiusa sa mga Saksi ni Jehova. Giingnan niya ang kaugalingon, ‘Engkasog mopili kog relihiyon, mao niy akong sudlan.’ Ngadtongadto, iyang gibiyaan ang espiritismo. Pipila ka bulan pod niyang giasikaso ang iyang kaminyoon aron malegal kini, ug siya nahimong magsisimba ni Jehova​—ang Diyos sa kalinaw.

Sama nianang tawhana, libolibo ang midangop sa Kristohanong kongregasyon kada tuig ug ilang nakaplagan ang kalinaw nga ilang gipangandoy. Apan sumala sa Bibliya, kon dunay “naghambin ug mapait nga pangabugho ug pagkamatigion” diha sa kongregasyon, kana makabungkag sa panaghigalaay ug mahimong hinungdan sa away. (Sant. 3:14-16) Ikalipay kay ang Bibliya nagtaganag maayong tambag aron malikayan ang maong mga problema ug mapalambo ang kalinaw. Aron mahimo kana, atong konsiderahon ang pipila ka tinuod nga situwasyon.

“Lisod ikasinabot ang brader nga kauban nako sa trabaho. Kas-a dihang nagsiningkahay mi, duha ka tawo ang miabot ug nasaksihan ang among paglalisay.”​—CHRIS.

“Usa ka sister nga kanunay nakong mapartner sa sangyaw kalit lang nga dili na makig-uban nako. Dayon wala ko niya tinggi. Ambot, ngano.”​—JANET.

“Tulo mi nga nag-estoryahay sa telepono. Ang usa miingon ug babay, ug abi nakog gibutang na niya ang telepono. Dayon misulti kog dili maayo bahin niya ngadto sa usa pa nga kaestorya nako sa telepono, pero naa pa diay sa linya tong usa nga miingog babay.”​—MICHAEL.

“Sa among kongregasyon, duha ka payunir ang wala magkasinabot. Nangasaba ang usa. Ang ilang paglalisay nakapandol sa uban.”​—GARY.

Tingali hunahunaon nimo nga ginagmay lang kana nga mga problema. Pero, ang matag usa niana lagmit magpahinabog dumalayong kadaot sa emosyon ug espirituwalidad niadtong naapil sa problema. Apan, malipay ka sa pagkahibalo nga nagkauli ra ang maong mga igsoon kay ilang gigamit ang Bibliya ingong giya. Unsa kahang mga prinsipyo sa Bibliya ang nakatabang nila?

 “Ayaw pagkalagot sa usag usa diha sa dalan.” (Gen. 45:24) Kana ang gitambag ni Jose sa iyang mga igsoon dihang namauli na sila. Pagkamaalamon niana! Kon ang usa dili makakontrolar sa iyang pagbati ug dali rang masuko, mahimong maaghat niya ang uban nga masuko usab. Nakita ni Chris nga kahuyangan niya ang pagkagarboso ug ang dili pagsunod sa instruksiyon. Kay gustong magbag-o, nangayo siyag pasaylo sa brader nga iyang kalalis ug naningkamot siya sa pagkontrolar sa iyang kasuko. Kay nakita ang pagbag-o ni Chris, ang kauban niya sa trabaho nagbag-o pod. Karon, malipayon silang nag-alagad kang Jehova nga magkauban.

“Mapakyas ang mga plano kon walay . . . panagsultihanay.” (Prov. 15:22) Si Janet nakadesisyon nga mas ipadapat ang iyang nakat-onan. Midesisyon siyang ‘makigsulti,’ o makig-estorya, sa nakigbungol nga sister. Sa ilang panag-estorya, mataktikanhong giawhag ni Janet ang maong sister nga isulti ang tinuod nga pagbati niini. Sa sinugdan, morag tensiyonado ang ilang panag-estorya, pero miarang-arang ang panag-estorya dihang kalmado nilang gihisgotan ang ilang dili pagsinabtanay. Nahibal-an sa sister nga nasaypan lang niyag sabot ang usa ka hitabo nga wala gani maglangkit kang Janet. Ang sister nangayog pasaylo, ug kanunay na pod silang magkauban sa pag-alagad kang Jehova.

“Nan, kon ikaw nagadala sa imong gasa ngadto sa halaran ug didto mahinumdom ka nga ang imong igsoon may butang nga batok kanimo, biyai ang imong gasa didto atubangan sa halaran, ug lakaw; pakigdait una sa imong igsoon.” (Mat. 5:23, 24) Imo tingaling mahinumdoman ang gihatag nga tambag ni Jesus sa Wali sa Bukid. Puwerteng guola ni Michael dihang iyang naamgohan kon unsa siya ka dili mahunahunaon ug walay batasan. Naningkamot siyang mapasig-uli ang kalinaw. Mapainubsanon siyang nangayog pasaylo sa brader nga iyang nasultihag sakit. Unsay resulta? Si Michael miingon, “Gipasaylo gyod ko sa akong igsoon.” Nagkasuod silag balik.

“Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.” (Col. 3:12-14) Sa kahimtang sa duha ka dugay nang payunir, usa ka mabinationg ansiyano ang mitabang nila nga pamalandongon kining pangutanaha: ‘May katungod ba mi nga pandolon ang uban tungod sa dili namo pagsinabtanay? Makapadayon ba mi sa pag-alagad kang Jehova nga malinawon kon dili mi magpinasayloay?’ Ilang gidawat ug gipadapat ang tambag sa ansiyano. Karon, maayo na ang ilang relasyon samtang nagsangyaw sa maayong balita.

 Ang instruksiyon sa Colosas 3:12-14 puwedeng maoy una nimong buhaton kon may nakapasakit nimo. Uban ang pagpaubos, nakita sa daghan nga maayong magpasaylo ug kalimtan ang nahitabo. Kon nahimo na ang tanan unya wala gihapon masulbad ang problema, makatabang kaha ang prinsipyo sa Mateo 18:15? Kini nga tambag ni Jesus naghisgot sa mga tikang nga himoon sa usa nga nakahimog seryosong sala batok sa lain. Pero mahimo sab nimong sundon kining prinsipyoha. Personal nga estoryaha ang igsoon, unya mabination ug mapainubsanong hisgoti ug husaya ang problema.

Siyempre, ang Bibliya nagtaganag uban pang praktikal nga mga sugyot. Panguna niana mao ang pagpakita sa “bunga sa espiritu . . . gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Gal. 5:22, 23) Sama sa aseite nga makapahanoy sa andar sa makina, ang maong mga hiyas makapadali sa paghusay sa dili pagsinabtanay.

Ang atong personalidad gilangkoban ug lainlaing hiyas ug kini nakapalahi nato sa usag usa. Ang magkalahing personalidad makahatag ug kaayohan sa panaghigala. Kini mahimong hinungdan sab sa dili pagsinabtanay. Usa ka dugay nang ansiyano ang mihatag ini nga pananglitan: “Ang maulawon malisdan tingaling makig-uban niadtong mahigalaon kaayo. Gamay ra seguro nâ nga butang; pero mahimong moresulta nâ sa seryosong problema.” Pero, para nimo, kanunay ba gyong magkabingkil ang mga tawong magkalahig personalidad? Aw, konsideraha ang duha ka apostoles. Unsay personalidad ni Pedro? Tingali mahunahunaan nimo siya nga prangka ug madalidalion. Unya si Juan? Tingali mahunahunaan nimo siya nga mahigugmaon ug sagad mag-amping sa iyang sinultihan ug binuhatan. Lagmit naa tay pipila ka basehanan sa paghunahuna nga ingon ana sila. Ug morag magkalahi silag personalidad. Bisan pa niana,  malipayon silang nag-alagad nga magkauban. (Buh. 8:14; Gal. 2:9) Busa, posible gyod nga magkauban sa pag-alagad ang mga Kristohanon nga magkalahig personalidad.

Pananglitan, naglagot ka sa sinultihan ug linihokan sa usa ka igsoon sa inyong kongregasyon. Bisan pa niana, imong napamalandong nga si Kristo namatay para nianang igsoona ug kinahanglan kang magpakitag gugma. (Juan 13:34, 35; Roma 5:6-8) Busa, imbes dili makighigala o likayan ang maong igsoon, pangutan-a ang kaugalingon: ‘May nahimo ba ang maong igsoon nga klarong supak sa Bibliya? Gituyo ba niyang maglagot ko? O magkalahi lang gyod mig personalidad?’ Labaw sa tanan, ang labing importanteng pangutana mao: ‘Unsa sa iyang maayong mga hiyas ang masundog nako?’

Importante ang kataposang pangutana. Kon ang maong igsoon estoryador unya ikaw hilomon, hunahunaa kon unsa ka sayon para niya ang pagsugod ug panaghisgot diha sa ministeryo. Puwede nimo siyang hangyoon nga ipartner, ug obserbahi kon unsay imong makat-onan niya. Kon siya manggihatagon unya ikaw tihikon, nakita ba nimo ang kalipay sa paghatag ngadto sa mga tigulang, masakiton, o nanginahanglan? Ang punto mao nga bisag magkalahi mog personalidad, ikaw ug ang imong igsoon mahimong magkasuod kon magpokus mo sa positibong mga hiyas. Bisag dili gyod mo magkasuod pag-ayo, makatabang nâ nga magkahigalaay mo ug mapalambo nimo ang kalinaw​—tali ninyong duha ug sa kongregasyon.

Si Euodia ug Sintique lagmit magkalahig mga pamaagi o personalidad. Pero gidasig sila ni apostol Pablo “sa pagbaton ug samang kaisipan diha sa Ginoo.” (Filip. 4:2) Gipaningkamotan ba nimong mahimo kana ug ingong resulta mapalambo nimo ang kalinaw?

Sama sa sagbot nga manurok diha sa kabulakan, ang kahiubos motubo ug molambo kon dili ta maningkamot nga lukahon kini. Kon  mapunog kalagot ang atong kasingkasing, makaapektar kini sa kongregasyon. Kon gihigugma nato si Jehova ug ang mga igsoon, buhaton nato ang tanan aron dili tugotan ang magkalahi natong personalidad nga makatugaw o makawala sa kalinaw sa katawhan sa Diyos.

Kon atong husayon ang dili pagsinabtanay uban ang tumong nga makig-uli, lagmit masorpresa ta sa maayong mga resulta. Konsideraha ang eksperyensiya sa usa ka sister: “Gibati nako nga gitratar ko sa usa ka sister nga mora kog bata. Natugaw gyod ko ini. Samtang nag-anam kog kalagot, wa nay tahod ang akong tinubagan niya. Naghunahuna ko, ‘Kay wala man ko niya tahora, dili sab nako siya tahoron.’”

Kini nga sister misugod paghunahuna sa iyang kaugalingong linihokan. “Nakita nako ang akong mga apan, ug naglagot ko sa akong kaugalingon. Akong naamgohan nga kinahanglan nakong usbon ang akong panghunahuna. Human kana iampo kang Jehova, gipalitan nako ang sister ug gamayng regalo ug gihatagan siyag kard diin nangayo kog pasaylo sa akong dili maayong tinagdan niya. Naggaksanay mi ug nakahukom nga kalimtan ang nangagi. Sukad niadto, wala na miy problema.”

Pangandoy gyod sa tawo ang kalinaw. Pero, dihang mameligro ang ilang posisyon ug matandog ang ilang garbo, daghan ang mogawi sa paagi nga dili makigdaiton. Ingon niana ang daghang dili magsisimba ni Jehova. Pero para sa mga alagad ni Jehova, prayoridad ang kalinaw ug panaghiusa. Iyang giinspirar si Pablo sa pagsulat: “Ako . . . nangaliyupo kaninyo sa paglakaw nga takos sa pagtawag nga alang niana kamo gipanagtawag, uban ang bug-os nga pagpaubos sa hunahuna ug kalumo, uban ang hataas-nga-pailob, nga mag-inantosay sa usag usa diha sa gugma, sa matinuoron manlimbasog nga mosunod sa pagkausa sa espiritu sa nagahiusang bugkos sa pakigdait.” (Efe. 4:1-3) Bililhon kaayo kanang “nagahiusang bugkos sa pakigdait.” Palig-onon nato kana ug magmadeterminado nga husayon ang atong dili pagsinabtanay.