JEHOVÁ yom chaʼan mi lac chaʼlen wersa lac sʌclan jiñi ñʌchʼtʌlel yicʼot mi laj qʼuel ti ñuc. Mi cheʼʌch mi lac mel, jiñi isujm bʌ xñoptʼañonbʌla mi caj lac taj cabʌl lac ñʌchʼtʌlel. Iliyi mi caj i lʌcʼtesan cabʌl wiñicob xʼixicob (quixtañujob) yaʼ ti congregación.

Jumpʼejl ejemplo, juntiquil xwujt wen cʌmbil bʌ ti Madagascar tsiʼ wen mulaj cheʼ jiñi i testigojob Jehová añob ti ñʌchʼtʌlel. Tsiʼ ñaʼta: «Mi ti jumpʼejl bʌ qʼuin mic ñaʼtan majlel ti jumpʼejl ñopbalʌl, jiñʌch mic yajcan iliyi». Ti wiʼil, tsiʼ cʌyʌ jiñi wujt, cabʌl uw tsiʼ chaʼle wersa i tojʼesan i ñujpuñel cheʼ bajcheʼ miʼ yʌl jiñi Biblia i tsaʼ sujti tiʼ testigo Jehová, jiñi Dios muʼ bʌ i yʌcʼ ñʌchʼtʌlel.

Ti jujumpʼejl jab, yonlel quixtañu miʼ tajob i ñʌchʼtʌlel ti jiñi congregación, cheʼ bajcheʼ tsiʼ taja jiñi xwujt. Pero jiñi Biblia jamʌ tsiquil miʼ yʌl chaʼan jiñi i tsʌytsʌyñʌyel lac pusicʼal yicʼot leto (aʼleya tʼan) yaʼ ti congregación miʼ mejlel i tʼox jiñi hermanojob yicʼot miʼ tech wocol tac (Stg. 3:14-16). Pero jiñi Biblia miʼ yʌqʼueñonla wem bʌ ticʼojel tac muʼ bʌ i coltañonla chaʼan maʼañic mi lac taj jiñi wocol tac yicʼot chaʼan chʌn an ñʌchʼtʌlel. Laʼ laj qʼuel bajcheʼ chaʼtiquil uxtiquil quixtañu an i jacʼʌyob ili ticʼojel tac.

«Mach utsʼatic tsaʼ j qʼuele c bʌ yicʼot yambʌ hermano tsaʼ bʌ i chaʼle eʼtel yicʼoton. Ti jumpʼejl bʌ qʼuin, tsaʼ cʼoti chaʼtiquil quixtañu ti lon queʼtel i tsiʼ qʼueleyob cheʼ bʌ woli (choncol) c wen aʼlen lon c bʌ» (CHRIS).

«Juntiquil hermana muʼ bʌ i wen chaʼlen subtʼan tsiʼ cʌyʌ i piʼleñon ti subtʼan, i maʼañix tsaʼ caji i pejcañon. Maʼañic tsaʼ c ñaʼta chucoch» (JANET).

«Cheʼ bʌ woliyon (yʌquelon) ti tʼan ti teléfono yicʼot chaʼtiquil hermanojob, juntiquil tsiʼ cʌyʌ tʼan i tsaʼ c ñaʼta chaʼan tsaʼix i yʌpʌ i teléfono. Cheʼ jiñi, mach utsʼatic chuqui tsaʼ caji cʌl tiʼ tojlel. Pero jiñi hermano tsiʼ luʼ ubi tsaʼ bʌ cʌlʌ come maʼañic yʌpʌl i chaʼan i teléfono» (MICHAEL).

«Ti jumpʼejl tsaʼ tejchi wocol tiʼ tojlel chaʼtiquil precursorajob. Juntiquil ti bele ora tsaʼ caji ti aʼleya. Tiʼ caj jiñi, jiñi yambʌ hermanojob tsiʼ tajayob i chʼijiyemlel» (GARY).

Mach wen tsʌtsic yilal ili wocol tac. Pero tiʼ sujm, mucʼʌch i mejlel i ticʼlan yambʌ hermanojob yicʼot miʼ jisan jiñi ñʌchʼtʌlel am bʌ ti congregación. Utsʼat cheʼ jiñi hermanojob tsaʼʌch i jacʼʌyob jiñi ticʼojel tac am bʌ ti Biblia yicʼot tsaʼ ajñiyob ti ñʌchʼtʌlel. ¿Baqui tac bʌ ticʼojel tsiʼ coltayob?

«Tsajiletmela ame mi laʼ michʼlen laʼ bʌ ti bij» (Gn. 45:24). Ili ticʼojel jiñʌch tsaʼ bʌ i yʌqʼue José jiñi i yerañob cheʼ bʌ chaʼ sujtelix  mucʼob baʼan i tat. ¡Wen ñucʌch i cʼʌjñibal tsaʼ bʌ i yʌlʌ! Juntiquil maʼañic bʌ miʼ mejlel i ticʼ i bʌ yicʼot orajach bʌ yujil michʼ, miʼ mejlel i michʼesan yambʌlob. Chris tsiʼ cʌñʌ chaʼan miʼ chanʼesan i bʌ yicʼot wocol miʼ yubin chaʼan miʼ jacʼben i tʼan yambʌlob. Jin chaʼan, tsiʼ cʼajtibe jiñi yambʌ hermano chaʼan miʼ ñusʌben i tsiʼ chaʼle wersa chaʼan miʼ ticʼ i bʌ come yom i qʼuextan i melbal tsiʼ yubi. Cheʼ bʌ jiñi yambʌ hermano tsiʼ qʼuele chaʼan Chris woli ti wersa i qʼuextan i melbal, cheʼʌch tsiʼ mele jaʼel. Wʌle, tijicña woliʼ lajal melbeñob i yeʼtel Jehová.

«Machic miʼ temob i tʼan winicob cheʼ jach miʼ toʼol jilel chuqui miʼ ñaʼtañob i mel» (Pr. 15:22). Janet tsaʼ cʼoti i ñaʼtan chaʼan yom miʼ yʌcʼ ti ñuc ili ticʼojel, jin chaʼan tsiʼ pejca jiñi hermana, i tsiʼ cʼajtibe chucoch tsaʼ michʼa. Ti ñaxan, mero michʼ tsiʼ techeyob tʼan, pero tsaʼ ñumen weñʼa cheʼ bʌ tsaʼ cajiyob ti tʼan ti yutslel. Jiñi hermana tsaʼ cʼoti i chʼʌmben isujm chaʼan toʼol jach tsaʼ michʼa yicʼot Janet i tsiʼ cʼajti i ñusʌbentel. Ili ora, chaʼ temelix woliʼ melbeñob i yeʼtel Jehová.

«Cheʼ wolaʼ wʌqʼuen i majtan Dios tiʼ yajñib, mi tsaʼ cʼajtiyi a chaʼan an chuqui tsaʼ chaʼle tiʼ contra a piʼʌl, cʌyʌ i majtan Dios tiʼ tʼejl i yajñib. Cucu, ñaxan mele a bʌ a wicʼot a piʼʌl» (Mt. 5:23, 24). Tajol la cujil chaʼan ili ticʼojel jiñʌch tsaʼ bʌ i yʌcʼʌ Jesús ti jiñi i Cʌntesa yaʼ ti Bujtʌl. Cheʼ bʌ Michael tsiʼ ñaʼta chaʼan mach weñic bajcheʼ tsiʼ chaʼle tʼan tiʼ tojlel jiñi hermano, tsiʼ wen ubi i chʼijiyemlel. Pero tsiʼ chaʼle wersa chaʼan miʼ chaʼ taj jiñi ñʌchʼtʌlel. Tsiʼ pʌsʌ i pecʼlel i tiʼ sube jiñi hermano chaʼan mach tijicñayic miʼ yubin i bʌ chaʼan tsaʼ bʌ i yʌlʌ. ¿Chuqui tsaʼ ujti? Michael miʼ yʌl: «Ti jumpʼejl i pusicʼal tsiʼ ñusʌbeyon». Tijicña tsaʼ chaʼ ajñiyob.

«Cuchben laʼ bʌ laʼ sajtemal. Ñusʌben laʼ bʌ laʼ mul mi an laʼ contrajintel» (Col. 3:12-14). ¿Cʼajal baʼ chaʼan jiñi chaʼtiquil precursora mucʼoʼ bʌ ti leto? Juntiquil anciano tsiʼ subeyob chaʼan jiñi i melbalob woliʼ ticʼlan yambʌ hermanojob. Tsaʼ cʼajtibentiyob mi maʼañic bajcheʼ to miʼ mejlel i ñusʌbeñob i bʌ chaʼan jiñi congregación miʼ chʌn ajñel ti ñʌchʼtʌlel. Jiñi hermanajob tsaʼʌch i jacʼʌyob jiñi ticʼojel. Chaʼ utsix miʼ qʼuelob i bʌ yicʼot chʌn woliyob ti subtʼan.

Jiñi ticʼojel am bʌ ti Colosenses 3:12-14, miʼ mejlel i coltañonla cheʼ bʌ an majqui miʼ lowonla. An cabʌl muʼ bʌ i yʌlob chaʼan cheʼ mi lac pʌs lac pecʼlel miʼ mejlel lac ñusan yicʼot lac ñajʌtesan cheʼ an chuqui mi lac tumbentel. Pero miʼ maʼañic mi lac mejlel mi la cubin, miʼ mejlel lac mel muʼ bʌ i yʌl Mateo 18:15. Anquese Jesús tsiʼ taja ti tʼan chuqui yom mi lac mel cheʼ bʌ an majqui miʼ mel tsʌts bʌ mulil tiʼ tojlel  yambʌ, jiñi ticʼojel miʼ cʼʌjñibʌyel jaʼel cheʼ bʌ an lac wocol la quicʼot juntiquil hermano. Chaʼan miʼ mejlel lac lajmesan jumpʼejl wocol, yom jach mi lac pʌs lac pecʼlel yicʼot la cutslel, i la lac chaʼlen tʼan la quicʼot jiñi hermano.

Jiñi Biblia mucʼʌch i chʼʌm tilel cabʌl ticʼojel. Pero chaʼan miʼ cʼʌjñibʌyel, yom an lac chaʼan i yʌcʼbal jiñi espíritu: «Laj cʼuxbiya, i tijicñʌyel lac pusicʼal, i ñʌchʼtʌlel lac pusicʼal, lac pʼʌtʌlel tiʼ cuchol wocol, yicʼot pʼuntaya, coltaya, i xucʼtʌlel lac pusicʼal, la cutslel, yicʼot i ticʼol lac pusicʼal» (Gá. 5:22, 23). Cheʼ bajcheʼ jiñi aceite wen jach bʌ miʼ yʌcʼ ti eʼtel jumpʼejl máquina, ili melbalʌl tac miʼ yʌcʼ chaʼan wen jach mi la cajñel la quicʼot la quermañojob.

Ti lac pejtelel añʌch bajcheʼ yilalonla. Mach junlajalic bajcheʼ yilal lac melbal, chuqui mi lac ñaʼtan yicʼot bajcheʼ la cujil tʼan. Ili miʼ coltañonla lac taj wem bʌ la camigojob. Pero mucʼʌch i mejlel ti tejchel wocol cheʼ qʼuexel tac bajcheʼ yilalonla. Juntiquil anciano wen am bʌ i ñaʼtʌbal tsiʼ yʌlʌ: «Juntiquil ñʌchʼʌl jach bʌ tajol mach tijicñayic miʼ ñusan cheʼ an yicʼot yambʌ wen jamʌ tsiquil bʌ yujil tʼan. Anquese mach ñuquic i cʼʌjñibal yilal, jiñi qʼuexel tac bʌ ti lac tojlel mucʼʌch i mejlel i tech tsʌts tac bʌ wocol». Cheʼ jiñi, mi chaʼtiquil quixtañu mach lajalic miʼ tajob i bʌ ti bajcheʼ yilalob, ¿mach ba muqʼuic i mejlelob ti ajñel ti wen? Laʼ lac ñaʼtan tiʼ tojlel jiñi apóstol Pedro yicʼot Juan. Cheʼ mi lac pejcan yaʼ ti Biblia, ti bele ora mi lac ñaʼtan chaʼan Pedro jamʌ tsiquil chuqui miʼ yʌl yicʼot maʼañic miʼ ñaxan wen ñaʼtan chuqui miʼ mel. I cheʼ mi lac ñaʼtan tiʼ tojlel Juan, miʼ tilel ti lac jol juntiquil uts bʌ wiñic yicʼot tsajal bʌ. Mach lajalobic tiʼ chaʼticlel, pero temel tsiʼ chaʼleyob eʼtel (Hch. 8:14; Gá. 2:9). I melbal ili chaʼtiquil apóstolob miʼ pʌsbeñonla chaʼan temel miʼ lac mejlel ti eʼtel jaʼel, anquese mach junlajalic bajcheʼ yilalonla.

 Tajol yaʼ ti congregación an juntiquil hermano muʼ bʌ i yʌl o miʼ mel maʼañic bʌ mi lac mulan. Pero la cujil chaʼan Cristo tsiʼ yʌcʼʌ i cuxtʌlel tiʼ caj, i yomʌch mi laj cʼuxbin (Jn. 13:34, 35; Ro. 5:6-8). Jin chaʼan, mach yomic mi lac tsʼaʼlen o miʼ lac ñaʼtan chaʼan maʼañic ba ora mi caj i sujtel ti la camigo, laʼ laj cʼajtiben lac bʌ: «¿Am ba chuqui woliʼ mel jiñi hermano jamʌ tsiquil bʌ miʼ yʌl yaʼ ti Biblia chaʼan mach utsʼatic? ¿Yom ba i mel mach bʌ utsʼatic tic tojlel? ¿O tiʼ cajach ba chaʼan qʼuexel bajcheʼ yilalon lojon? ¿Am ba chuqui miʼ mejlel j cʌn ti jiñi wen tac bʌ i melbal?».

Wen ñuc i cʼʌjñibal jiñi cojix bʌ cʼajtiya. Mi an majqui miʼ wen mulan tʼan, pero joñonla mach cheʼoñicla, miʼ mejlel lac ñaʼtan chaʼan jiñi yambʌ mach wocolic miʼ yubin chaʼan miʼ tech subtʼan. Miʼ mejlel lac suben chaʼan miʼ loqʼuel ti subtʼan yicʼotonla i mi laj qʼuel chuqui miʼ mejlel laj cʌmben. Mi ñumen uts bajcheʼ joñonla, ¿muʼ ba i mejlel lac lajiben i melbal i mi laj coltan jaʼel añobix bʌ i jabilel, jiñi cʼamoʼ bʌ o yomoʼ bʌ coltʌntel? Jiñi ñuc bʌ i cʼʌjñibal cheʼ mi laj qʼuel chuqui wen tiʼ tojlel la quermaño anquese machʌch junlajaloñicla, jiñʌch cheʼ ñumen temel mi la cajñel. Ili miʼ mejlel i coltañonla chaʼan ñumen utsʼat mi la cajñel la quicʼot, chaʼan tijicñayonla yicʼot ti ñʌchʼtʌlel miʼ yajñel jiñi congregación anquese maʼañic miʼ sujtel ti ñumen wem bʌ la camigo.

Chaʼtiquil hermana tsaʼ bʌ chumleyob ti wajali jiñʌch Evodia yicʼot Síntique. Tajol wen qʼuexelʌch bajcheʼ yilalob. Pero jiñi apóstol Pablo tiʼ subeyob: «Yom jumpʼejl laʼ pusicʼal ti lac Yum» (Fil. 4:2). ¿Cheʼʌch ba mi caj lac mel jaʼel chaʼan jiñi congregación miʼ yajñel ti ñʌchʼtʌlel?

Cheʼ mach weñic bajcheʼ mi la cubin tiʼ tojlel yambʌlob cheʼʌch miʼ yujtel bajcheʼ jiñi jam am bʌ tiʼ pat la cotot, mi maʼañic mi lac boc loqʼuel, mi caj i bej colel. Lajalʌch miʼ yujtel jaʼel  cheʼ an chuqui mach utsʼatic mi la cubin, miʼ qʼuextan lac pusicʼal, i tiʼ pejtelel jiñi hermanojob miʼ mejlel i tajtʌlob ti wocol. Pero cheʼ mucʼʌch laj cʼuxbin Jehová yicʼot la quermañojob, mi lac chaʼlen wersa chaʼan jiñi lac melbal maʼañic miʼ jisan jiñi ñʌchʼtʌlel am bʌ ti congregación.

Mi mucʼʌch lac chaʼlen wersa chaʼan mi lac tojʼesan jiñi lac wocol tac chaʼan ñʌchʼʌl mi la cajñel, mi caj lac taj cabʌl lac wenlel. Laʼ lac ñaʼtan tsaʼ bʌ ujti tiʼ tojlel juntiquil hermana, miʼ yʌl: «Juntiquil hermana tsiʼ wen michʼesayon come lajal bajcheʼ alʌ xchʼoc to miʼ mel lon. Tsaʼ caji i ñumen michʼesañon, jin chaʼan mach weñix tsaʼ caji c mel tiʼ tojlel. Tsaʼ c ñaʼta ‹Cheʼ bajcheʼ maʼañic miʼ qʼuelon ti ñuc, maʼañic mi caj qʼuel ti ñuc jeʼel›».

Ti wiʼil, ili hermana tsaʼ caji i chaʼ ñaʼtan i bʌ: «Tsaʼ caji j cʌn chaʼan mach weñic woli bʌ c mel, i tsaʼ cubi c chʼijiyemlel. Tsaʼ j qʼuele chaʼan yom mij qʼuextan bajcheʼ mic ñaʼtan. Tsaʼ c pejca Jehová ti oración. Cheʼ jiñi, tsaʼ c mʌñʌ jumpʼejl majtañʌl chaʼan jiñi hermana yicʼot tsaʼ c tsʼijbube jumpʼejl alʌ jun baqui tsaʼ c sube chaʼan miʼ ñusʌbeñon tsaʼ bʌ c mele tiʼ tojlel. Tsaʼ c meqʼue lon c bʌ i tsaʼ lon j cʌlʌ chaʼan mi lon c ñajʌtesan tsaʼ bʌ ujti. Chaʼ tijicñayix añon lojon».

Jiñi quixtañujob yomob i ñʌchʼtʌlel. Pero tiʼ caj jiñi bʌqʼuen o chaʼan miʼ chanʼesañob i bʌ, cabʌl maʼañic bʌ miʼ sʌclañob. Jiñʌch muʼ bʌ lac wen taj laj qʼuel ili ora, pero yaʼ tiʼ tejclum Jehová, yom juntemel miʼ yajñelob yicʼot ti ñʌchʼtʌlel. Jehová tsiʼ sube jiñi Pablo chaʼan miʼ tsʼijbun: «Ti wocol tʼan mic subeñetla chaʼan mi laʼ wajñel cheʼ bajcheʼ yom Dios, come jini chaʼan tsiʼ pʌyʌyetla. Ajñenla ti pecʼ tiʼ yutslel laʼ pusicʼal. Chʌn cuchbeñob i sajtemal laʼ piʼʌlob ti laʼ cʼuxbiya. Chaʼlenla wersa chaʼan ñʌchʼʌl mi laʼ wajñel ti jumpʼejl jach laʼ pusicʼal ti jini Espíritu» (Ef. 4:1-3). Ñucʌch i cʼʌjñibal cheʼ ñʌchʼʌl mi la cajñel. Jin chaʼan, laʼ lac chaʼlen wersa lac tojʼesan jiñi lac wocol tac chaʼan chʌn ñʌchʼʌl mi la cajñel.