JEHOVA ALA b’a fɛ a sagokɛlaw ka kɛ hɛɛrɛ la ani u ka hɛɛrɛ ɲini u ni ɲɔgɔn cɛ. N’u b’o kɛ, hɛɛrɛ be kɛ kerecɛn kafo kɔnɔ. O be kɛ sababu ye, mɔgɔ minw b’a fɛ ka kɛ hɛɛrɛ la, olu be na fara an kan.

Filabɔla dɔ tun be Madagasikari ani a tɔgɔ tun bɔra kosɔbɛ. Ale y’a kɔrɔsi ko Jehova Seerew kaan bɛnnin lo. A y’a fɔ a yɛrɛ kɔnɔ ko: “Ni n’ b’a fɛ ka don diinan dɔ la loon dɔ, n’ bena don o diinan lo la.” Wagati dɔ nana se, a y’a ka lagwɛri, subagaya n’a ɲɔgɔnnakow dabila. A ye kalo caaman ta k’a ka furuko ɲɛnabɔ ka kɛɲɛ ni Bibulu ka sariyaw ye. O kɔ, a kɛra Jehova, Hɛɛrɛtigi Ala batobaga dɔ ye.

I k’o cɛɛ, saan o saan mɔgɔ waa caaman be fara an kan. U tun be hɛɛrɛ min ɲinina ka dɛsɛ, u b’o sɔrɔ kerecɛn kafo kɔnɔ. Bibulu b’a fɔ ko ni “kɔnɔnajuguya ni keliya” be kafo kɔnɔ, o be se ka teriyaw tiɲɛ ani ka na ni bɛnbaliya ye (Zaki 3:14-16). Nka, Bibulu be ladili ɲumanw di an ma k’a yira cogo min na an be se k’an yɛrɛ tanga o gwɛlɛyaw ma ani ka hɛɛrɛ sabati. An k’a filɛ o ladiliw ye mɔgɔ dɔw dɛmɛ cogo min na ka gwɛlɛya dɔw ɲɛnabɔ.

CHRIS ko: “Ne ni balimacɛ dɔ be baara kɛ ɲɔgɔn fɛ ani bɛɛn tun t’an ni ɲɔgɔn cɛ. Loon dɔ, an tun be sɔgɔnra ɲɔgɔn kan ani mɔgɔ fila y’an ye.”

JANET ko: “Ne ni balimamuso dɔ tun be to ka waajuli kɛ ɲɔgɔn fɛ. Nka, an tun ye labɛn minw kɛ waajuli kama, a barila ka daan sigi u la. O kɔ, a y’a daa tigɛ n’ na. N’ m’a lɔn fɛɛn min kama a y’o kɛ.”

MICHAEL ko: “Ne ni mɔgɔ fila tun be kumana ɲɔgɔn fɛ telefɔni na. U kelen y’a fɔ ko bye bye ani n’ y’a miiri ko a tɛ an ka kuma mɛnna tugun. O kɔ, n’ y’a daminɛ k’a kɔrɔfɔ telefɔni na ni tɔɔ kelen ye. Nka, o tigi tun b’an ka kuma mɛnna.”

GARY ko: “An ka kafo kɔnɔ, bɛnbaliyako dɔ tun be yen piyɔniye fila cɛ. Tɔɔ kelen tun be to k’a tɔɲɔgɔn jalaki. U ka sɔsɔlikow tun be kafoden tɔɔw fari fagara.”

N’a sɔrɔ i bena a miiri k’o koow tɛ gwɛlɛyabaw ye. Nka, o koo kelen kelen bɛɛ tun be se k’o tigiw hakili ɲagami ani k’u ka Alako nagasi wagatijan kɔnɔ. A bena diya i ye k’a lɔn k’o balimaw sera ka bɛɛn sigi u ni ɲɔgɔn cɛ sabu u bɛɛ ye Bibulu ka ladiliw sira tagama. E ka miiri la, Bibulu ka ladili jumanw lo y’u dɛmɛ k’u ka gwɛlɛyaw ɲɛnabɔ?

“Aw kana bila ɲɔgɔn na sira kan.” (Zɛnɛzi 45:24). Yusufu y’o ladili di a balimaw ma u kɔsegitɔ u facɛ fɛ. O  tun ye ladili ɲuman ye dɛ! Ni mɔgɔ t’a dusukunnakow kɔrɔsi ani a be dimi joona, o tigi be se ka tɔɔw kɔnɔ gwan. Chris nana a faamu ko tuma dɔw la, a ka gwɛlɛ ale ma k’a majigi ani ka sɔn tɔɔw k’a ɲɛminɛ. A tun b’a fɛ k’a sɔɔn yɛlɛma. O kama, bɛnbaliya tun b’ale ni balima min cɛ, a y’o deli ko a ka yafa ale ma. A ye jijaliw kɛ fana walisa ka se a dusu kɔrɔ. A ka jijaliw y’a to ale ni balimacɛ min tun be baara kɛ ɲɔgɔn fɛ, ale fana y’a ɲini ka yɛlɛmaniw kɛ. Sisan, u be Jehova batora ɲɔgɔn fɛ ninsɔndiya la.

“Ladilibaga tanya kosɔn, koo be cɛn.” (Talenw 15:22). Janet nana a faamu ko ale ka ɲi k’a janto kosɔbɛ o ladili la. A y’a latigɛ ka kuma n’a balimamuso ye u ka gwɛlɛya koo la. Baro kɛtɔ, Janet y’a ɲini balimamuso fɛ nɛmɛnɛmɛ a k’a kɔnɔkow fɔ. A daminɛ na, u ka baro gwanna dɔɔni. Nka baro kɛtɔ ni dususuman ye, koow tora ka fisaya. Balimamuso nana a ye ko ale tun ma koo dɔ lo faamu ka ɲɛ ani ko Janet niin tun t’o koo la. A ye Janet deli ko a ka yafa ale ma. U y’a daminɛ ka to ka waajuli kɛ ɲɔgɔn fɛ tugun.

“N’i b’i ka saraka bɔ Ala ye, n’i hakili jigira a la ko i balima dɔ diminin be i kɔrɔ, i k’i ka saraka bila fɔlɔ ka taga yafa daali a fɛ.” (Mat. 5:23, 24). Yezu y’o ladili di tuma min na a tun be mɔgɔw kalanna kulu kan. N’a sɔrɔ i hakili b’o ladili la. Michael dusu tiɲɛna tuma min na a y’a faamu ko ale ye min fɔ a balimacɛ koo la, o bɛnnin tɛ. A tun jijanin lo k’a seko kɛ walisa ka bɛɛn sigi u ni ɲɔgɔn cɛ. A ye balimacɛ min kɔrɔfɔ, a y’a yɛrɛ majigi ka taga bɔ a ye ani k’a deli ko a ka yafa ale ma. Mun lo sɔrɔla o la do? Michael ko: “N’ balimacɛ y’a kɔnɔ gwɛ ka yafa ne ma.” U kɛra teriw ye tugun.

“N’a sɔrɔla ko dɔ ye koo dɔ kɛ min ma bɛn a tɔɲɔgɔn ma, aw ka yafa ɲɔgɔn ma tuma bɛɛ ka ɲɔgɔn dɛmɛdɛmɛ.” (Kɔlɔs. 3:12-14). Bɛnbaliya tun be piyɔniye minw cɛ, diinan mɔgɔkɔrɔ dɔ y’u dɛmɛ ni ɲumanya ye. A y’u lasun u k’u yɛrɛ ɲininga ko: “Yala joo b’an fɛ k’an balimaw dusu tiɲɛ an ka bɛnbaliya kosɔn wa? Yala kuun b’a la an k’a to koo dɔ k’an bali ka muɲu ɲɔgɔn kɔrɔ ani ka baara kɛ Jehova ye hɛɛrɛ la wa?” U sɔnna diinan mɔgɔkɔrɔ ka ladili ma ani u y’a sira tagama. Sisan u kaan bɛnnin lo ani u be kibaro diiman fɔ ɲɔgɔn fɛ.

Ni mɔgɔ dɔ donna i gasi la, Kɔlɔsikaw 3:12-14 ka ladili be se k’i dɛmɛ i k’i yɛrɛ majigi, ka yafa o tigi ma ani ka ɲinɛ o koo kɔ. N’i tɛ sera ka yafa o tigi ma do? Sariyakolo min be sɔrɔ Matiyo 18:15 kɔnɔ, o be se k’i dɛmɛ. Tiɲɛn lo ko Yezu tun b’a fɔra  le an ka ɲi ka min kɛ ni dɔ ye jurumuba kɛ. Nka, i be se k’o ladili sira tagama n’i ye gwɛlɛya o gwɛlɛya sɔrɔ n’i balimaw ye. I be se k’o kɛ cogo di do? I k’i yɛrɛ majigi ka taga bɔ i balima ye ani k’a ɲini k’o koo ɲɛnabɔ ni ɲumanya ye.

Ladili ɲuman wɛrɛw be sɔrɔ Bibulu kɔnɔ. Walisa k’u sira tagama, hakili “senuman be fɛɛn minw di,” olu ka ɲi ka sɔrɔ i la: “kanuya, nisɔndiya, hɛrɛ, muɲuli, ɲumanya, hinɛ, tilenninya, sabali, ni yɛrɛminɛ.” (Gal. 5:22, 23). Turu b’a to mansin mɔtɛri be baara kɛ koɲuman. O cogo kelen na, jogo minw bɔra Ala yɔrɔ, olu be se k’i dɛmɛ ka bɛɛn sigi n’i balimaw ye cogo nɔgɔman na.

An kelen kelen bɛɛ n’an sɔɔn lo. An jogow, an ka koow filɛcogo ani an kumacogo tɛ kelen ye. O be se ka dɔ fara an ka teriya diya kan. Komi an sɔɔn tɛ kelen ye, o be se k’a to fana an be don ɲɔgɔn gasi la. Diinan mɔgɔkɔrɔ kolɔnbaga dɔ ye ɲɛyirali dɔ fɔ k’a yira o be se ka kɛ cogo min na. A ko: “Kuma man di mɔgɔ min ye, a be se ka gwɛlɛya o tigi fɛ ka jɛnɲɔgɔnya kɛ ni mɔgɔ dɔ ye, kuma ka di min ye. An be se k’a miiri k’o tɛ kooba ye, nka o be se ka na ni gwɛlɛyabaw ye.” Yala o kɔrɔ ko mɔgɔ minw sɔɔn tɛ kelen ye, olu tɛ se ka bɛn wa? An ka ciden fila ka koo lajɛ. Piyɛri tun ye mɔgɔ sifa juman ye? Piyɛri tun t’a kɔnɔnako dogo. Nka ciden Zan do, ale tun ye mɔgɔ sifa juman lo ye? Ale tun be koow kɛ ni kanuya ye ani a tun b’a ka kumaw n’a ka kɛwalew kɔrɔsi. Tiɲɛn na, a be komi o ciden fila sɔɔn tun tɛ kelen ye. Nka o bɛɛ n’a ta, u ye baara kɛ ɲɔgɔn fɛ koɲuman (Kɛw. 8:14; Gal. 2:9). U ka koo b’a yira ko kerecɛn minw sɔɔn tɛ kelen ye, olu fana be se ka baara kɛ ɲɔgɔn fɛ bi.

I ka kafo kɔnɔ, n’a sɔrɔ balima dɔ ka kumaw n’a ka kokɛcogow b’i kɔnɔ gwan.  Nka, i b’a faamu ko Krista sara ale fana kosɔn ani ko i ka ɲi k’o tigi kanu (Zan 13:34, 35; Ɔrɔm. 5:6-8). O kama, sanni i k’a ɲini k’aw ka teriya sa wala k’i mabɔ a la, i yɛrɛ ɲininga ko: “Yala n’ balima be koo dɔ lo kɛra min bɛnnin tɛ Bibulu ka sariya ma wa? Koo minw man di n’ ye, a be tugura le k’u kɛ wa? Wala an sɔɔn lo tɛ kelen ye?” Ɲiningali nin fana kɔrɔtanin lo: “Yala jogo ɲuman dɔw b’a la, ne b’a fɛ ka minw ladegi wa?”

An k’a filɛ fɛɛn min kama o ɲiningali kɔrɔtanin lo. Ɲɛyirali fɛ, a be se ka kɛ ko an ye mɔgɔ sumanin ye ani kuma ka di o tigi ye. An ka miiri k’a filɛ a ka nɔgɔ a ma cogo min na ka baro dadon waajuli la. I be se k’a ɲini ka waajuli kɛ n’a ye ani k’a filɛ i be se k’a ladegi cogo min na. Wala a be se ka kɛ k’o tigi tɛgɛ labilanin lo ka mɔgɔw sɔn k’a sɔrɔ ele man teli k’o kɛ. Komi o tigi be mɔgɔkɔrɔbaw, banabagatɔw ani dɛsɛbagatɔw dɛmɛ, mun na i t’a ɲini k’a lɔn a be ninsɔndiya min sɔrɔ o la? I ka ɲi ka min faamu, o ye ko hali ni ele ni mɔgɔ dɔ sɔɔn tɛ kelen ye, aw be se k’aw koo diya ɲɔgɔn ye n’aw be miiri aw ka jogo ɲumanw na. Hali n’aw ma kɛ teri sɔbɛw ye, o be se k’aw dɛmɛ k’aw magwɛrɛ ɲɔgɔn na. O be se k’a to fana bɛɛn be kɛ aw ni ɲɔgɔn cɛ ani kafo kɔnɔ.

N’a sɔrɔ Evɔdi ani Sɛtisi sɔɔn tun tɛ kelen ye. Nka, ciden Pol y’u jija “k’u ka bɛn . . . Matigi kosɔn.” (Filip. 4:2). An fana b’a fɛ ka Jehova bato ɲɔgɔn fɛ n’an balimaw ye ani k’an jija bɛɛn ka to kafo kɔnɔ.

An be ni miiriya jugu minw ye an balimaw koo la, mun na an ka ɲi ka teliya k’u bɔ an kɔnɔ? O miiriya juguw be i n’a fɔ biin jugu, foro ɲuman kɔnɔ. N’an m’u bɔn ka bɔ yen joona, u ka teli ka fa foro kɔnɔ. O cogo kelen na, an be ni miiriya jugu minw ye an balimaw koo la, u be se ka nɔɔ jugu to kafodenw bɛɛ kan. Nka n’an be Jehova n’an  balimaw kanu, an bena an seko bɛɛ kɛ walisa hɛɛrɛ ka to kafo kɔnɔ.

N’an b’a ɲini ka bɛnbaliyakow ɲɛnabɔ walisa hɛɛrɛ ka kɛ, an bena nafa min sɔrɔ o la, o bena an kabakoya. An ka balimamuso dɔ ka koo lajɛ. Ale ko: “A tun be ne ɲɛɛ na ko balimamuso dɔ be ne jati denmisɛn ye. O tun be ne dusu gwan. O koo tora ka n’ dusu gwan minkɛ, n’ y’a daminɛ ka kuma gwɛlɛw fɔ a ma. N’ tun b’a miiri ko ‘komi a tɛ n’ bonya, ne fana tɛna a bonya.’”

O balimamuso y’a daminɛ ka miiri a ka kɛtaw la. A ko: “N’ y’a daminɛ ka n’ yɛrɛ ka fiɲɛw ye ani o y’a to n’ dimina n’ yɛrɛ kɔrɔ kosɔbɛ. N’ y’a faamu ko n’ ka ɲi ka n’ ka miiriyaw yɛlɛma. N’ ye Jehova deli kosɔbɛ o koo la. O kɔ, n’ ye kado fitinin dɔ san o balimamuso ye ani ka lɛtɛrɛ dennin dɔ sɛbɛ walisa k’a deli a ka yafa n’ ma n’ ka kɛwale jugu kosɔn. An melekera ɲɔgɔn na ani an sɔnna ka yafa ɲɔgɔn ma. Kabi o wagati, gwɛlɛya si t’an ni ɲɔgɔn cɛ tugun.”

Mɔgɔw mako gwɛlɛ be hɛɛrɛ la. Nka, koo nunu be se k’a to u b’a daminɛ ka koow kɛ cogo dɔ la min be se ka hɛɛrɛ nagasi: kuncɛbaya wala n’u be siran ko mɔgɔ dɔ k’u nɔɔ ta. Mɔgɔ minw tɛ Jehova bato, olu lo ka teli k’o ɲɔgɔn kɛ. Nka, bɛɛn ni hɛɛrɛ ka kan ka sɔrɔ Jehova batobagaw cɛ. Jehova ye ciden Pol lasun k’a sɛbɛ ko: “Ne b’aw daali . . . ko aw taamacogo ka bɛn n’aw welekun ye, k’aw yɛrɛ majigi koo bɛɛ la ka kɛ mɔgɔsabalininw ye, ka muɲuli kɛ, ka ɲɔgɔn dɛmɛdɛmɛ kanuya la. Bɛɛn min be sɔrɔ Nii Senuman fɛ, aw ka banba ka to o la hɛrɛ kosɔn.” (Efɛz. 4:1-3). “Bɛɛn min be sɔrɔ” an ni ɲɔgɔn cɛ, o nafa ka bon kosɔbɛ. O kama, bɛɛn min b’an ni ɲɔgɔn cɛ, an k’an jija o kana nagasi. An be se k’o kɛ n’an b’an jija ka bɛnbaliya sifa bɛɛ ɲɛnabɔ an ni ɲɔgɔn cɛ.