JEHOVÁ ningo oipota umi oservíva chupe oiko pyʼaguapýpe. Avei haʼe oipota isiervokuéra oñehaʼã oiko porã oñondive. Péicha oĩta pyʼaguapy kongregasiónpe, ha heta hénte ohecháva upéva oñemoag̃uiséta Jehováre.

Por ehémplo, peteĩ makumbéro oikóva Madagascárpe ohechakuaa pe pyʼaguapy oĩva Jehová puévlope, upévare opensa: “Sapyʼarei aiporavótarõ che rrelihionrã, aelehíta kóva”. Tiémpo rire, haʼe oheja pe espiritísmo, ojapo tekotevẽva guive omoĩ porã hag̃ua imatrimónio ha oñepyrũ oadora Jehovápe, Ñandejára omeʼẽva pyʼaguapy.

Ko kuimbaʼe ojapo haguéicha, káda áño heta hénte otopa kongregasiónpe pe pyʼaguapy ohekaite vaʼekue oikóvo. Upéicharõ jepe, la Biblia heʼi oĩramo envídia ha joavy kongregasiónpe, ikatuha omoñepyrũ provléma ha ohundi umi amista (Sant. 3:14-16). Péro la Biblia omeʼẽ avei konsého iporãva ikatu hag̃uáicha ñamboyke umi provléma ha akóinte jaiko pyʼaguapýpe ñane ermanokuérandi. Jahechamína koʼã konsého oipytyvõva unos kuánto ermánope ojecha vaʼekue koʼãichagua situasiónpe.

Chris heʼi: “Noroñontendéi peteĩ ermánondi, ha hiʼarive rombaʼapo oñondive. Peteĩ díape rojoguerosapukái javete, oike mokõi persóna ha ohendupaite la oikóva”.

Janet omombeʼu: “Pyʼỹinte asẽ apredika peteĩ ermánandi, péro upéi nosẽveiete chendive ha noñeʼẽvéi chéve. Ndaikuaái mbaʼépa ojehu chupe”.

Michael heʼi: “Roñemongetárõ guare por teléfono éntre tres, peteĩva ojedespedi, upévare apensa okortáma hague. Upémarõ añepyrũ añeʼẽ vai hese. Péro aviasído ndokortái gueteri raʼe, ha ohendupaite la haʼéva hese”.

Gary heʼi: “Mokõi prekursóra ore kongregasiongua iprovléma oñondive. Peteĩva ojaʼo jepi voi pe ótrape. Ko situasión omokangy umi ermánope”.

Koʼã provléma ningo haʼetévaicha la vyroreínteva. Péro umi situasión ningo ikatu omoñeñandu vai heta tiémpore umi oiko vaívape, ha ombyai pe trankilida oĩva kongregasiónpe. Upévare, javyʼa jaikuaávo koʼã ermáno ojapo hague la Biblia heʼíva ha oiko porã jey hague oñondive. ¿Mbaʼe konsého bíblicopa oipytyvõ chupekuéra?

“Aníkena peiko vai ág̃a tapére” (Gén. 45:24, TNM). José omeʼẽ vaʼekue ko konsého iñermanokuérape oho jeýtarõ guare hikuái itúa rendápe. Peteĩ persóna ndojejokokuaáirõ ha ipochyrei ombotuichave reíta umi provléma ohasáva. Avei ikatu ombopochy ótrope. Chris  ohechakuaa ijehe naiñumildeiha ha ijetuʼuha chupe ojapo hag̃ua la ótro heʼíva. Haʼe okambiase ha upéicha rupi ojediskulpa pe ermáno oiko vaívandi. Upe rire oñehaʼãmbaite ojejoko hag̃ua. Pe ermáno ohechámarõ mbaʼeichaitépa Chris oñehaʼã, haʼe avei osegi iñehémplo. Koʼág̃a haʼekuéra oiko pyʼaguapýpe ha oservi Jehovápe oñondive.

“Ndaiporihápe oguapýva oñemongeta porã mbaʼeve nosẽporãi” (Prov. 15:22, TNM). Janet amíga noñeʼẽvéimarõ chupe, haʼe osegi ko konsého bíblico ha oho oñemongeta hendive. Janet oporandu pe ermánape noiméipa ojapo raʼe algúna kósa omoñeñandu vaíva chupe. Ñepyrũrã ijetuʼu kuri, péro upéi oñemongetáma hikuái pyʼaguapýpe. Pe ermána ohechakuaa ontende vai hague peteĩ mbaʼe oiko vaʼekue, ha avei Janet ndojapói hague mbaʼeve ombopochy vaʼerã chupe. Haʼe ojerure diskúlpa Janétpe, péicha oñoamíga jey hikuái ha oservi oñondive Jehovápe.

“Regueraha jave nde jopói pe altárpe nemanduʼáramo ne ermáno ipochyha nderehe, eheja nde jopói pe altár renondépe, ha tereho eñemoĩ porã raẽ ne ermánondi” (Mat. 5:23, 24). Jesús omeʼẽ vaʼekue ko konsého ojapórõ guare pe Sermón del Mónte. Michael oñeñandu vaieterei oñemeʼẽ rire enkuénta ojapo vai hague oñeʼẽ vaívo iñermánore. Upévare, ojedesidi ojapotaha tekotevẽva guive oiko porã jey hag̃ua hendive. Haʼe iñumílde ha oho heʼi chupe ombyasyetereiha la oiko vaʼekue. ¿Mbaʼépa oiko upe rire? Michael heʼi: “Che ermáno cheperdona ipyʼaite guive”. Haʼekuéra opyta jey oñoamígo.

“Pesegíkena peñoaguanta ha peñoperdona pende pyʼaite guive, pejapo upéva oĩramo jepe penembopochýva” (Col. 3:12-14). ¿Nemanduʼápa umi mokõi prekursórare pyʼỹinte oiko vai vaʼekue predikasiónpe? Peteĩ ansiáno mborayhúpe oipytyvõ koʼã ermánape ohechakuaa hag̃ua omoñeñandu vaiha umi ótro ermánope. Haʼe omomanduʼa chupekuéra ipasiensiave vaʼerãha ojuehe ha oñehaʼãmbaite vaʼerãha ikatu hag̃uáicha oipytyvõ oĩ hag̃ua pyʼaguapy kongregasiónpe. Koʼã ermána oasepta umi konsého ha oñehaʼã osegi. Koʼág̃a haʼekuéra ojogueraha porã ha osegi opredika oñondive.

Colosenses 3:12-14-pe heʼíva ñanepytyvõ avei ikatu hag̃uáicha ñaneumílde, ñaperdona umi ofallávape ñanendive ha anivéma hag̃ua ñapensa umi mbaʼe oiko vaʼekuére. Péro, ¿mbaʼépa ikatu jajapo ñañehaʼãramo ñaperdona ha ndaikatúi? Mateo 18:15 heʼíva ikatu ñanepytyvõ. Upépe ningo Jesús heʼi mbaʼépa ojejapo vaʼerã oĩ jave opeka vaíva hapicha kóntrape. Péro ñanemboʼe avei mbaʼépa  jajapo vaʼerã ñaneprovléma jave ñane ermánondi: tekotevẽ ñaneumílde, ñaneamávle ha ñañeʼẽ hendive ñasolusiona hag̃ua upe provléma.

La Bíbliape oĩ hetave konsého iporãva. Péro ideprovécho hag̃ua ñandéve ñañehaʼã vaʼerã jahechauka ñande rekovépe umi mbaʼe porã oúva espíritu sántogui. Umíva haʼe hína “mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, pochyʼỹ ha jejokokuaa” (Gál. 5:22, 23). Ñapensamína ko mbaʼére: peteĩ mákina ojeaseita porãva ningo katuete ombaʼapo porã, péicha avei pe espíritu sánto ñanepytyvõ ikatu hag̃uáicha ñambaʼapo porãmba oñondive ha jaiko pyʼaguapýpe.

Enterovéva ningo ñanediferénte. Por ehémplo, jareko diferénte kualida ha nañapensái peteĩchapa. Koʼã mbaʼe oipytyvõ javyʼave hag̃ua ñane amigokuérandi. Péro avei ikatu jajoavy térã nañaĩri de akuérdo ñanediferénte haguére ojuehegui. Peteĩ ansiáno orekómava heta experiénsia heʼi: “Peteĩ persóna iñotĩva ikatu ohasa asy hína peteĩ persóna naiñotĩriva ykére. Haʼetéramo jepe vyroreiha upe diferénsia oĩva, ikatu hína ogueru tuicha provléma”. Upéicharõ, ¿ikatúpa jaʼe umi persóna idiferénteva ojuehegui ndaikatumoʼãiha ojogueraha porã arakaʼeve? Ñanemanduʼamína apóstol Pedro ha apóstol Juan rehe. Ñañeʼẽramo Pédrore, ikatu ou ñane akãme haʼe hague peteĩ persóna siémpre heʼíva la opensáva. Ha ñañeʼẽramo Juánre, ikatu ou ñane akãme haʼe hague peteĩ ermáno oporohayhukuaáva ha siémpre opensa porãva oñeʼẽ térã ojapo mboyve peteĩ mbaʼe. Koʼã apóstol idiferénteramo jepe ojuehegui, oservi porã vaʼekue oñondive Jehovápe (Hech. 8:14; Gál. 2:9). Ko ehémplo ohechauka ñandéve kristianokuéra ikatuha avei ombaʼapo porã oñondive Jehová servísiope, idiferénteramo jepe ojuehegui.

 Ikatu ningo oĩ peteĩ ermáno térã ermána ñane kongregasiónpe heʼíva térã ojapóva peteĩ mbaʼe ñanembopochýva. Péicha jave iporã ñanemanduʼa Cristo omano hague ñanderehehápe ha avei pe ermáno térã ermána rehehápe, ha oipotaha jahayhu chupe (Juan 13:34, 35; Rom. 5:6-8). Upévare, jaiko rangue ñamboyke chupe térã ñapensa arakaʼeve ndaikatumoʼãiha jaiko oñoamígoramo, iporã ñañeporandu: “¿Oñemoĩpa Jehová Léire la ojapóva che ermáno? ¿Oñehaʼã voi piko cheperhudika, térãpa ikarákter diferéntente chehegui? ¿Ikatúpa aaprende chugui algúna kósa?”.

Ko última pregúnta ningo iñimportánte. Por ehémplo oiméramo nde nekirirĩeterei ha pe ótra persóna katu iñeʼẽngatu, ¿mbaʼérepa neresẽi hendive predikasiónpe ha ehecha mbaʼépa ikatu reaprende chugui? Térã ipojeravérõ ndehegui, ¿ikatúpa reaprende chugui ha revyʼa reipytyvõvo umi ijedávape, hasykatúvape ha ambue oikotevẽvape? Jahechaháicha, ñanediferénteramo jepe ojuehegui ikatúnte avei jajesareko umi mbaʼe porã ojapóvare ñane ermanokuéra. Ha ndahaʼemoʼãiramo jepe ñane amigoite, ikatu ñañemoag̃uive hese. Péicha jajogueraha porãvéta, ñanetrankilovéta ha ñaipytyvõta oĩ hag̃ua pyʼaguapy kongregasiónpe.

Síglo primérope oĩ vaʼekue mokõi ermána hérava Evodia ha Síntique. Amalisia koʼã ermána idiferentete vaʼekue ojuehegui. Péro apóstol Pablo omokyreʼỹ chupekuéra “opensa hag̃ua peteĩcha oservívo ñande Ruvichápe” (Filip. 4:2). Ñande avei jaservise Jehovápe oñondivepa ha jajapose opa ikatúva oĩ hag̃ua pyʼaguapy kongregasiónpe.

Oimérõ ñandepyʼaro ñande rapicháre, ¿mbaʼérepa pyaʼe voi jaipeʼa vaʼerã ñandejehegui upéva? Umi mbaʼe vai ñañandúva ikatu ñambojoja umi ñana osẽvare peteĩ yvotyty neporãvape. Nañamondoróiramo umi ñana, osegíta okakuaa. Péicha avei, umi mbaʼe vai  ñañandúva oĩramo ñande pyʼapýpe, tuicha ikatu operhudika kongregasiónpe. Péro jahayhúramo Jehovápe ha ñane ermanokuérape, jajapóta ikatúva guive ojeiko hag̃ua pyʼaguapýpe kongregasiónpe.

Heta mbaʼe ningo ikatu jahupyty ñañehaʼãramo jaiko pyʼaguapýpe ñane ermanokuérandi. Ñapensamína ohasa vaʼekuére peteĩ ermána. Haʼe heʼi: “Añandu peteĩ ermána chetrataha mitãicha, ha upéva chemorrenegaiterei. Upéicha rupi añepyrũ atrata vai chupe. Che apensa voi: ‘Haʼe ndacherrespetáirõ, che ndarrespetamoʼãi avei chupe’”.

Upéi ko ermána opensa la ojapóvare ha heʼi: “Añepyrũ ahechakuaa ajavy hague ha añeñandu vai. Añemeʼẽ enkuénta akambia vaʼerãha apensa lája. Upémarõ añemboʼe Jehovápe ha amombeʼu chupe la che provléma. Upe rire ajogua peteĩ rregalíto pe ermánape ha askrivi chupe peteĩ notaʼípe ambyasyetereiha la ajapóva. Upéi roñoañuã ha rodesidi oreresaraitaha la oiko vaʼekuégui. Upe guive naoreprovlemavéiva”.

Entéronte ñaikotevẽ pyʼaguapy. Péro heta persóna ndaipyʼaguapýi, tahaʼe oñemombaʼeguasu rupi, okyhyjégui ojepeʼárõ g̃uarã chugui peteĩ mbaʼe térã openságui ótro ikatuha ojapo hese ivaíva. Añetehápe koʼã mbaʼe oiko meme ko múndope, péro Jehová puévlope ndaupéichai vaʼerã, upéva rangue oĩ vaʼerã pyʼaguapy ha unida. Ñandejára espíritu rupive, Pablo oskrivi: “Ajerure jey jey peẽme penderekoporã hag̃ua, ikatu hag̃uáicha pehechauka pemereseha Ñandejára penerenói. Akóintekena peñemomirĩ, ha ani pendepochy rei, penepasiénsiakena, ha mborayhúpe peñoaguanta oñoermánoicha. Peikókena pyʼaguapýpe oñondivepa ha peñehaʼãmbaite akóinte peime hag̃ua peteĩ ñeʼẽme espíritu sánto rupive” (Efes. 4:1-3). Upéicharõ, jajapókena ikatúva guive ñasolusiona hag̃ua umi provléma jarekóva ñane ermánondi, ha péicha jaiko “pyʼaguapýpe oñondivepa”. Añetehápe upéva iporãiterei Jehová puévlope g̃uarã.