GINAPALIG-ON ni Jehova nga Dios ang mga Cristiano nga pabaloran ang paghidait, kag mangin bahin ini sang aton kabuhi. Kon mahidaiton kita, may paghidait sa tunga naton nga matuod nga mga sumilimba. Bangod sini, mahimo maganyat sa Cristianong kongregasyon ang mga tawo nga indi luyag sang kagamo.

Halimbawa, naobserbahan sang isa ka kilala nga babaylan sa Madagascar ang paghidait sa tunga sang mga Saksi ni Jehova. Namensar sia, ‘Kon may entrahan ako nga relihion, amo ini ang pilion ko.’ Sang ulihi, nag-untat sia bilang espiritista, naghimo sia sing pagbag-o sa iya indi Makasulatanhon nga relasyon, kag nangin sumilimba sia ni Jehova, ang Dios sang paghidait.

Pareho sini nga tawo, linibo ang nagasulod sa Cristianong kongregasyon kada tuig kag nakita nila diri ang paghidait nga ginahandum gid nila. Pero, maathag nga ginasiling sang Biblia nga kon may “kahisa kag huyog nga makigbais” ang mga kauturan, mahimo maguba ang pag-abyanay kag magaresulta ini sa kagamo. (Sant. 3:14-16) Pero nalipay kita kay may mga laygay man ang Biblia kon paano naton malikawan ini nga mga problema para indi madula ang paghidait. Binagbinagon naton ang pila ka matuod nga eksperiensia.

“Wala kami nagaintiendihanay sang utod nga upod ko sa trabaho. Isa ka bes, sang magsinggitanay kami, may duha ka tawo nga nagpalapit kag nakita nila ang amon pagbaisay.”—CHRIS.

“Pirme ko upod sa pagbantala ang isa ka utod. Pero hinali lang nga indi na sia mag-upod sa akon sa ministeryo. Dayon wala na niya ako ginaistorya. Wala ako kabalo kon ngaa.”—JANET.

“Tatlo kami nga nagaistoryahanay sa telepono. Nagpaalam ang isa, kag abi ko ginbutang na niya ang telepono. Dayon ginlibak ko sia sa nabilin ko nga kaistorya, pero nagapamati pa gali sia.”—MICHAEL.

“Naglainay ang buot sang duha ka payunir sa amon kongregasyon. Gin-akigan pa gani sang isa ang isa. Makapasandad sa iban ang ila binatabata nga away.”—GARY.

Mahimo makasiling ka nga daw kagamay man lang sini nga mga problema. Pero, mahimo ini magresulta sa madalom nga pilas sa balatyagon kag makadula sang paghidait sa kongregasyon. Maayo lang kay ginsunod sini nga mga utod ang mga laygay sang Biblia, gani nahuptan ang paghidait. Sa banta mo, ano nga mga laygay sang Biblia ang nakabulig sa ila?

 “Indi kamo mag-away sa dalanon.” (Gen. 45:24) Laygay ini ni Jose sa iya mga utod antes sila magbalik sa ila amay. Nagakaigo gid ang iya laygay! Kon indi makontrol sang isa ang iya balatyagon kag dali sia maakig, mahimo nga maakig man ang iban. Narealisar ni Chris nga ang iya kaluyahon amo ang bugal kag indi pagsunod sang mga panuytoy. Gusto niya magbag-o, gani nangayo sia sing pasaylo sa utod nga ginbais niya kag gintinguhaan niya nga kontrolon ang iya kaakig. Nakita sang katrabaho ni Chris ang iya panikasog nga magbag-o, gani amo man sini ang ginhimo niya. Magkaupod sila subong nga nagaalagad kay Jehova sing malipayon.

“Mapaslawan ang mga plano kon wala sing paghambalanay.” (Hulu. 15:22) Narealisar ni Janet nga dapat niya iaplikar ini nga teksto. Nagdesisyon sia nga ‘magpakighambal’ sa utod. Mataktikanhon nga ginpamangkot ni Janet ang utod kon ngaa nagsunggod sia. Sa umpisa, daw nasaw-ahan sila nga duha. Pero bangod kalmado sila, nangin maayo ang ila pag-istoryahanay. Narealisar sang utod nga wala gali sing labot si Janet sa isa ka hitabo nga ginsungguran niya. Nangayo sia sing pasaylo, kag nangin magkaupod sila liwat sa pag-alagad kay Jehova.

“Gani, kon nagadala ka sang imo dulot sa halaran kag madumduman mo nga ang imo utod may malain nga buot sa imo, ibilin ang imo dulot sa atubangan sang halaran, kag maglakat ka. Makighidait ka anay sa imo utod.” (Mat. 5:23, 24) Lakip ini sa ginsiling ni Jesus sa iya Sermon sa Bukid. Naglalain gid si Michael bangod sang mga ginhambal niya nga indi maayo parte sa isa ka utod. Gani nagdesisyon sia nga makighidait. Nagpaubos sia kag personal nga nangayo sing pasaylo sa utod. Ano ang resulta? Si Michael nagsiling, “Ginpatawad ako sang akon utod.” Nangin mag-abyan sila liwat.

“Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa.” (Col. 3:12-14) Ano ang natabo sa duha ka madugay na nga payunir nga naglainay sing buot? Mainayuhon nga ginbuligan sila sang isa ka gulang nga mahangpan nga ang ila ginahimo nagapasandad sa iban. Ginpahanumdom niya sila nga dapat sila mangin mapinasensiahon para indi madula ang paghidait sa kongregasyon. Gin-aplikar nila ang laygay sang gulang. Subong, maayo ang ila pagtamdanay samtang nagabantala sing maayong balita.

Ang laygay sa Colosas 3:12-14 makabulig man kon naglain ang imo buot sa iban. Ang pagpaubos nakabulig sa madamo nga  magpatawad kag kalimtan ang sala. Pero ano abi kon daw indi naton mapatawad ang nakasala sa aton? Makabulig bala ang prinsipio sa Mateo 18:15? Ginapatuhuyan diri ni Jesus ang dapat himuon kon ang isa ka utod nakahimo sing serioso nga sala sa isa pa ka utod. Pero, maaplikar mo gihapon ini nga prinsipio. Kadtui ang imo utod kag mangin mapainubuson kag mainayuhon sa pagpakig-istorya para mahusay ang problema.

May iban pa nga praktikal nga laygay ang Biblia. Para masunod mo ini, dapat mo ipakita “ang mga kinaiya nga ginapatubas sang espiritu [nga] gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.” (Gal. 5:22, 23) Pareho sang asayte nga nagabulig nga mangin maayo ang andar sang makina, ining diosnon nga mga kinaiya nagabulig nga mangin mas mahapos ang pagpakighidait.

Sarisari ang aton personalidad, kag nagaresulta ini sa malipayon nga pag-abyanay. Pero, mahimo man ini bangdan sang mga problema. Ang isa ka madugay na nga gulang naghatag sini nga halimbawa: “Ang isa nga mahuluy-on mahimo mabudlayan kon upod niya ang isa nga masinadyahon kag mainabyanon. Ini nga kinatuhayan sa personalidad daw indi man salapakon; pero, mahimo ini bangdan sang serioso nga mga problema.” Indi gid man bala magsahuay ang mga tawo nga indi pareho sing personalidad? Binagbinaga ang halimbawa sang duha ka apostoles. Ano ang personalidad ni Pedro? Mahimo nga prangka sia kag padasudaso. Ano naman ang personalidad ni Juan? Mahimo nga mahigugmaon sia kag ginapamensaran niya anay sing maayo ang iya ginahambal kag ginahimo. Mahimo nga may basihan man kon ngaa amo sini ang pagkilala naton sa sining duha ka apostoles.  Indi pareho ang ila personalidad, pero nagbuligay sila. (Binu. 8:14; Gal. 2:9) Gani, posible man nga magbuligay ang mga Cristiano subong nga indi pareho ang personalidad.

Mahimo nga may utod sa inyo kongregasyon nga may ginhambal kag ginhimo nga nagpalain sang imo buot. Pero, nahibaluan mo nga napatay man ang Cristo para sa iya kag dapat mo sia higugmaon. (Juan 13:34, 35; Roma 5:6-8) Gani, sa baylo nga likawan sia ukon indi magpakig-abyan sa iya, pamangkuta ang imo kaugalingon: ‘May ginahimo bala ang akon utod nga ginapakamalaut sang Kasulatan? Ginahungod gid bala niya nga masakitan ako? Ukon basi indi lang pareho ang amon personalidad?’ Maayo man nga mamangkot: ‘Ano ang maayo niya nga kinaiya nga gusto ko ilugon?’

Importante ang katapusan nga pamangkot. Kon ini nga utod palaistorya pero ikaw hipuson, hunahunaa kon daw ano kahapos sa iya nga mag-umpisa sang pag-istoryahanay kon nagabantala. Mahimo mo sia updan sa ministeryo kag magtuon sa iya pamaagi. Ukon ano abi kon mas maalwan sia sangsa imo? Indi bala nga malipayon ang maalwan sa mga tigulang, nagamasakit, kag mga nagakinahanglan? Ang punto amo ini: Bisan pa indi pareho ang inyo personalidad, magpokus sa iya maayo nga mga kinaiya. Bisan pa indi kamo mangin suod gid, puede gihapon kamo mangin mag-abyan. Makabulig ini para may paghidait sa inyo nga duha kag sa kongregasyon.

Mahimo nga indi pareho ang personalidad nanday Eudias kag Sintique. Pero, ginpalig-on sila ni apostol Pablo nga “mangin isa sing panghunahuna may kaangtanan sa Ginuo.” (Fil. 4:2) Himuon mo man bala ini para indi madula ang paghidait?

Pareho sang hilamon sa hardin sang mga bulak, ang aton kalain sing buot sa iban mahimo mangin problema kon indi ini pagkuhaon.  Kon madaug kita sang paghinakit, maapektuhan sini ang kongregasyon. Pero, kon ginahigugma naton si Jehova kag ang mga kauturan, indi gid naton pagtugutan ang bisan ano nga indi paghangpanay nga magdula sang paghidait sa kongregasyon.

Kon ginahusay naton ang mga indi paghangpanay kay gusto naton ang paghidait, mahimo nga makibot kita sa maayo nga mga resulta. Binagbinaga ang eksperiensia sang isa ka Saksi: “Pamatyag ko daw bata ang pagtan-aw sa akon sang isa ka sister. Naugot gid ako. Bangod naglain ang akon buot, ginasupladahan ko sia. Naghunahuna ako, ‘Wala niya gani ako ginataha, indi kon man sia pagtahaon.’”

Ginpamensar sini nga Saksi ang iya ginhimo. “Nakita ko ang akon indi maayo nga kinaiya, kag nasubuan gid ako. Narealisar ko nga dapat ko ini bag-uhon. Ginpangamuyo ko kay Jehova ang sitwasyon, dayon ginhatagan ko sing regalo ang sister kag nagsulat ako sing kard nga nagapangayo sing pasaylo sa akon indi maayo nga pagtratar sa iya. Naghaksanay kami kag nagdesisyon nga kalimtan na ang natabo. Sugod sadto, wala na kami sing nangin problema.”

Gusto gid sang mga tawo ang paghidait. Pero, kon kuestyunon gani ang ila awtoridad ukon matandog ang ila bugal, madamo ang nagakalipat sa importansia sang paghidait. Matuod ini sa madamo nga wala nagasimba kay Jehova. Pero sa iya mga sumilimba, dapat mangibabaw ang paghidait kag paghiusa. Gintuytuyan niya si Pablo nga magsulat: “Nagahingyo [ako] sa inyo nga magkabuhi sing takus sa pagtawag nga inyo nabaton, nga may bug-os nga pagpaubos kag kalulo, pagkamapinasensiahon, nagabatas sa isa kag isa sa gugma, nagapakighidait sa isa kag isa, kag nagatinguha nga tipigan ang paghiusa nga nabaton ninyo paagi sa balaan nga espiritu.” (Efe. 4:1-3) Importante gid nga “tipigan ang paghiusa.” Pabaloran gid naton ini kag mangin determinado nga husayon ang mga indi paghangpanay.