JEHOVA KARUNGA kukorangeda Vakriste va kondjere mbili. Nsene tu kara nombili ngayi tu retera ruhafo. Eyi kukoka vantu ava vana hara kukara nombili va ya lipakerere nose mombungakriste.

Pasihonena, nganga zimwe za divikwa moMadagascar kwa dimbwilire asi Nombangi daJehova kwa kara mouumwe. Yipo ga tente asi: ‘Moukareli ou yimo nina hara kukakara ezuva limwe.’ Mwaza siruwo, age kwa hagekere sirugana sendi sounganga, nokuwapukurura ukaro wononkwara dendi, konyima ta ya kara mukareli gwaJehova, Karunga gombili.

Ngwendi mugara gwina, vantu wovanzi nkenye mvhura kuyagwana mombungakriste mbili ezi ava papara. Nampili ngoso, Bibeli kulikida nawa-nawa asi nsene mombungakriste mu kara ‘mfudu zondigu nomakoto goumbudi’ kuvhura kuzonagura po ukaume nokureta maudigu. (Jak. 3:14-16) Bibeli kugava hena mavyukiso gomawa omu natu nyokera po maudigu ogo nomu natu kondjera mbili. Mokuyirugana oyo, tu konakoneni yihonena yimwe eyi ya horoka.

Chris kwa tanta asi: “Ame kapi ngani lizuvhu namunazinyetu ogu ngani rugana nage. Sikando simwe apa twa litangwisire, vagara vavali kwa tu tarerere ngomu twa litangwisire.”

Janet kwa tanta asi: “Munazinyetukadi ogu ngani zuvhisa nage nkenye apa, hararasi ta hageke kuza name mokuzuvhisa. Konyima ta hageke kuuyungisa nge. Kapi na yi kwete egano.”

Michael kwa tanta asi: “Ame kwa uyungire kotelefona novakwetu vavali, ano gumwe ta uyunga asi mbaa! Makura ame tani gazara asi ana dimisa, yipo na tamekere kuuyunga yoyidona kumuhamena nani nye kapi ana dimisa.”

Gary kwa tanta asi: “Vazuvhisi wokukarerera vavali womombungakriste zetu kapi ngava lizuvhu. Gumwe nga swaura mukwawo. Nkareso zawo kwa dompesere wopeke.”

Ove nampo kuna kulizuvha asi ogo kwa kere maudigu gomanunu. Nye, ngano kapi va ga kohwenene po ayo ngano ya kundamene momudona ava va hamenene mo. Vanavazinyetu ava va tulisire po mbili pokuruganesa mavyukiso gomoBibeli. Mavyukiso musinke gomoBibeli ono kugazara va ruganesere?

“Nokulitangwisa si monzira.” (Gen. 45:24) Josefa kwa geve epukururo eli kovakuru vendi apa va tengwire kwaguhyawo. Alyo  kwa kere epukururo lyewa! Nsene muntu a dira kupangera malizuvho gendi nokuhanduka usimbu, ayo kuninkisa wopeke va handuke. Chris ga ya dimbwilire asi age nga linenepeke ntani kapi nga tambura mapukururo. Morwa ga here kulitjindja, age kwa hundilire egusiropo kwamunazinyetu ogu va litangwisire nage ntani nga kondjo yipo a pangere ehandu lyendi. Elituromo lyaChris lya ninkisire mukwawo a ture po marunduruko. Ngesi awo kuna kukarera Jehova mouumwe.

‘Tambura mapukururo nsene kapisi yimo to hudipara.’ (Yis. 15:22) Janet ga yi dimbwilire asi ga hepa kutura epukururo eli pasirugana. Yipo ga tokwere kukazogera namunazinyetukadi ogu nga dili kumuuyungisa. Monzogera zawo, Janet yipo ga pere mpito mukwawo a uyunge eyi ya mu handukisire. Pomuhowo kapi ya kere ureru, nye ukaro wa rundurukire ngomu va zogerere maudigu gawo monkedi zombili. Munazinyetu ogu ga handukire kwa ya dimbwilire asi age kwa gazararere Janet yininke yepuko eyi ga dilire kurugana. Yipo ga hundilire egusiropo, ano ngesi awo kuna kukarera Jehova mouumwe.

“Nsene o reta sigava sonzambo kosizambero, nye ove o diworoke asi pweli mukweni ogu ono kudira kuzora nendi, siga tanko nzambo zoge posizambero, o ka lipe mbili namukweni.” (Mat. 5:23, 24) Jesus kwa geve epukururo eli pEudiso lyendi lyopoNdundu. Michael kwa lizuvhire udona apa ga dimbwilire asi eyi ga rugene epuko. Yipo ga tokomenene kutulisa po mbili. Age kwa zire kwamunazinyetu ogu ga uyungire momudona a ka mu hundire egusiropo. Yitundwamo? Michael kwa tanta asi: “Munazinyetu kwa gusilire nge po.” Ngesi vana kara hena vakaume.

“Omu lididimike-didimikire, tomu ligusa-gusire po, nsene muna lizono namukweni.” (Koros. 3:12-14) Vanavazinyetu vavali wovazuvhisi wokukarerera, mukuronambunga kwa va vaterere pokuvapura mapuro ngaaga asi: ‘Mouvali wetu twa kara nononkondo dokuguvisa wopeke morwa madiro kulizuvha gana kara pokatji ketu ndi? Twa kara sili nokonda zeyi natu dilira kuligusira po ntani tu twikire kukarera Jehova ndi?’ Awo kwa tambwire epukururo lyomukuronambunga nokulitura pasirugana. Awo ngesi kuna kuhafera kuzuvhisa kumwe mbudi zongwa.

Nsene gumwe ana ku koresa, ayo ya wapa kutura pasirugana epukururo lyomoBibeli moVakorosi 3:12-14. Wovanzi va yi dimburura asi nsene tu linunupika kuvhura tu gusire po vakwetu nokudivara mapuko gawo. Nye nsene madiro kulizuvha kuna kutwikira  simpe, ya wapa kutura pasirugana epukururo lyomwaMateusa 18:15. Epukururo eli lyaJesus kwa tamba eyi nava rugana nsene vantu vavali vana lizonene nzo zonene. Nose kuvhura kutura pasirugana epukururo eli nampili momaukaro gamwe. Hedera mukweni nombili ntani nelinunupiko yipo mu zogere udigu nokuukohonona po.

Yosili, Bibeli kugava magano gamwe hena gomawa. Pokugasikisa mo, ove wa hepa kulikida “yiyimwa yompepo . . . eharo nehafo nombili nedidimiko nonkenda nouwa nepuro, nougomoki ntani elipangero.” (Gar. 5:22, 23, NW) Ngwendi magadi aga ava tura mehina yipo li rugane nawa, yiyimwa oyo yompepo kuretesa po mbili.

Yikara yokulisiga-siga eyi ga kara nayo nkenye gumwe gwetu, kuvhura kunkondopeka ukaume. Ntani kuvhura hena kuretesa po madiro kulizuvha. Mukuronambunga ga kura pampepo kwa geve sihonena esi asi: “Muntu gonomuga kuvhura kumudigopera kukara nomuntu ogu a uyunga unene. Elisigo olyo kuvhura li moneke ngwendi kwato mulyo; nye kuvhura kutwaredesa komaudigu gomanene.” Ove kulizuvha asi vantu ava va lisiga moyikara kuvhura kukara nomaudigu ndi? Koneka sihonena sovapositoli vavali. Yikara musinke ga kere nayo Peturusa? Ose kwa mu diva asi muntu ogu ga mangurukire kuuyunga nokupwagesa usimbu malizuvho gendi. Ngapi kuhamena Johanesa? Ose kwa mu diva asi muntu gomuwa geharo ogu nga gazadara ko komeho a uyunge. Pwa kara magano gamwe hena kuhamena vapositoli owo vavali. Ayo kumoneka asi awo kwa lisigire moyikara. Nye simpe ngava ruganene kumwe. (Yirug. 8:14; Gar. 2:9) Nampili naina, Vakriste ava va lisiga moyikara kuvhura kuruganena kumwe.

 Nampo mombungakriste zeni mweli munazinyetu ogu a ku handukisa mombuuyungiso zendi nomoyirugana yendi. Nye, wa yi dimburura asi Kristusa kwa fira muntu ogo ntani nove wa hepa kumuhara. (Joh. 13:34, 35; Rom. 5:6-8) Mevango lyokuhagekesa po ukaume namunazinyetu ogo ndi o mu hendauke, lipura asi: ‘Age kurugana eyi ya lilimba noMatjangwa ndi? Age kuyiruganena mowina yipo a korese nge ndi? Ndi ose kwa lisiga tupu moyikara?’ Epuro lyomulyo kulipura lyeli asi: ‘Yikara musinke yoyiwa eyi ga kara nayo nani gwanena mo uwa?’

Epuro olyo lyokuhulilira mulyo. Nsene muntu ogo ga manguruka kuuyunga nye ove kapi wa manguruka, gazara omu ayi mu tompoka kutameka nzogera mokuzuvhisa. Kuvhura mu rugane kumwe nomuntu ogo mokuzuvhisa yipo o lirongere ko kwendi. Nsene age ga kara nosikara sokugava kwava wopeke, nye ove kwato, koneka ruhafo oru aru tundu mokugava kovakurupe ndi kovaveli ndi kwava vana hepa yuma. Nampili mu lisige moyikara, kuvhura mu kare vakaume pokudemenena koyikara yoyiwa. Kurugana ngoso, nampo kapi ngayi mu vatera mu kare vakaume wovanene nye, kuvhura kukara nombili nokureta uumwe mombungakriste.

Ewodiya naSintike nampo kwa lisigire moyikara ndi omu ngava rugana yininke. Nye mupositoli Paurusa kwa va korangedere asi va ‘lize mutjima gumwe mwaHompa.’ (Fil. 4:2) Nove kuvhura o sikise mo sitambo oso ntani nokukara nombili ndi?

Ngwendi wayi ou au kuru mokatji konombya, malizuvho gomadona kwava wopeke kuvhura kukura unene, ano pokugagusa mo ntudi twa hepa kukondja. Nsene ehandu li kura momutjima gomuntu, kuvhura  kukundama momudona mbungakriste. Nsene tu hara Jehova novanavazinyetu, ose ngatu kondja unene yipo yikara yetu yokulisiga yi dire kudonganesa mbili zovantu vaKarunga.

Apa atu kohonona po madiro kulizuvha ndi maudigu nositambo sokutulisa po mbili, yitundwamo kukara yoyiwa. Koneka sihorokwa samunazinyetu gumwe: “Ame kwa lizuvhire asi munazinyetu gumwe nga tekura nge ngwendi munona. Eyi ngayi handukisa nge. Ngomu ehandu lya ya kulire, na tamekere kumulimburura monkedi zondona. Ame kwa gazarere asi: ‘Ya mu fira kumulimburura monkedi zondona morwa kapi nga fumadeke nge.’”

Munazinyetu ogo kwa ya tamekere kugazadara kuhamena nkareso zendi. Age kwa tanta asi: “Ame na tamekere kudimburura yikara yange yoyidona, ayo kwa ninkisire nge ni lizuvhe udona. Tani ya dimburura asi na hepa kurundurura magazaro gange. Konyima zokukanderera kwaJehova kuhamena udigu owo, yipo na randerere munazinyetu ogo uhwi nokumutjangera sikarata ni hundire egusiropo konkareso zange zondona. Yipo twa lidingilire mawoko nokutokora kudivara udigu owo. Ose ngesi kuna kulizuvha.”

Vantu kwa hara mbili. Nampili ngoso, morwa kulinenepeka, wovanzi kuyakara nonkareso zonyanya. Eyi kuhoroka kovantu ava ava dili kukarera Jehova, nye kwava ava mu karere, va hepa kukondjera mbili nouumwe. Paurusa kwa tjanga asi: “Tani mu korangeda, . . . mu kare moyikara yokuliza nezigido eli ga mu zigidira Karunga. Omu kare valinunupiki novanambili, oku tomu lididimike-didimike meharo. Omu kondjere uumwe ou za mu pa Mpepo mu kare nombili novakweneni.” (Efe. 4:1-3) Kukara “nombili” mulyo unene. Tu kondjereni mbili nokutokomena kukohonona po madiro kulizuvha aga aga horoka mokatji ketu.