JIOVA kineki maj itekitikauan kipiakan yolseuilis, maj kitemokan kuali mouikaskej iniuan oksekin. Keman kichiuaj nejon, kipiaj yolseuilis, tein kichiua maj miakej taltikpakneminij motokikan itech nechikol.

Kemej neskayot, se naual akin kitelixmatiaj ompa Madagascar kiitak ke itaixpantijkauan Jiova kuali mouikaj uan kinemilij: “Komo se tonal monekiskia nikixpejpenas se taneltokalis, yeskia nejin”. Satepan, kikauak naualot, kichiuak tein Biblia kinnauatia namikuanij uan peuak kiueyichiua Jiova, Dios akin temaka yolseuilis.

Ijkon kemej nejon takat, xijxiujtika miakej taltikpakneminij peua pouij itech nechikol uan kiajsij yolseuilis tein semi kitemouayaj. Sayoj ke, Biblia kijtoua ke nexikolot uan tajtolteuilis itech nechikol uelis kichiuas maj amo kuali mouikakanok akin katkaj tasojiknimej uan maj onka okachi kuejmolmej (Sant. 3:14-16). Biblia no techmaka kuali tayolmajxitilis tein techpaleuia maj amo tikpiakan nejon kuejmolmej uan maj tiktemokan kuali timouikaskej iniuan tokniuan. Maj tikitakan keniuj kinpaleuiani seki taltikpakneminij.

“Amo kuali nimouikaya iuan se tokniuj akin nouan tekitia. Se tonal, keman timotsatsajtsilijtoyaj, ome taltikpakneminij kalakkej uan techitakej.” (CHRIS)

“Se tokniuj siuat akin miakpa iuan nitanojnotsaya peuak amo nouanok tanojnotsa, uan hasta amo nechnotsayaok. Nejua amo nikmatia keyej.” (JANET)

“Timonojnotstoyaj tieyin ika teléfono. Kemej semej monauatij, niknemilij ke amo techkaktoyaok. Ompa peuak amo kuali ika nitajtoua. Sayoj ke ompa kisentokaya, uan kikakik nochi tein nikijtoj.” (MICHAEL)

“Itech tonechikol, ome precursoras peuak kipiaj kuejmolmej. Se kitelajuaya okse. Kemej nochipa motajtolteuiayaj, oksekin amo kuali momachiliayaj.” (GARY)

Nochi nejin kuejmolmej uelis moitas ke amo uejueyi. Sayoj ke ueliskia kintelyolxokolis nejin tokniuan uan kichiuas maj nochin itech nechikol moxexelokan. Techyolpaktia tikmatiskej ke yejuan kichiujkej tein Biblia tayolmajxitia uan uelik oksepa kuali mouikakej. ¿Toni tayolmajxitilis kinpaleuij?

“Amo ximokualantikan se iuan okse itech ojti.” (Gén. 45:24.) José ika tamatilis kinyolmajxitij iikniuan nejin achto ke mokepaskiaj ininchan. Komo aksa niman kualani,  uelis kichiuas maj oksekin no kualanikan. Chris kiitak ke moueyinekia uan ke ouij kikisaya kichiuas tein oksekin kinauatiayaj. Kemej kinekia mopatas, kiluij tokniuj akin iuan motajtolteuijka maj kitapojpoluiani uan mochikauak amo yeski tel tauel. Keman tokniuj kiitak ke Chris mochikaujtoya mopatas, yejua no ijkon kichiuak. Axkan, yolpakij uan kisentekitiliaj Jiova.

“Amo kuali kisa tein moixtalia mochiuas keman amo moteixejekoltia teisa.” (Prov. 15:22.) Janet kiajsikamatik ke monekia kichiuas nejin, yejua ika iuan tajtoj tokniuj siuat akin kualanik. Keman tajtojtoyaj, Janet kitajtanij keyej kualantoya. Yekinika, tepitsin motauelnankiliayaj, sayoj ke okachi kuali momachilijkej keman tajtojkej ika nejmachkayot. Tokniuj kiitak ke amo kiyekajsikamatik se taman tein panoka uan ke Janet amo teyi kichiujka. Yejua ika kiluij maj kitapojpoluiani. Axkan oksepa kuali mouikaj uan kisentekitiliaj Jiova.

“Kuak tikuikas ne motetayokolil [...] uan santajma tikelnamikis ke mokniu mitsyolkualantia, ijkuakon xikaua ompa ten tikuiyak [...], xiyo achto xikitati ne mokniu uan xikiliti ma mitstapojpolui.” (Mat. 5:23, 24.) Jesús tayolmajxitij nejin keman tamachtij itech se tepet. Michael tel amo kuali momachilij keman kiitak ke amo kuali kichiujka keman amo kuali ika tajtoj tokniuj. Sayoj ke mochikauak kiyektalis nejon kuejmol. Yejua ika kiitato tokniuj uan kiluij maj kitapojpoluiani. ¿Toni panok? Michael kijtoua: “Nokniuj yekmelauj nechtapojpoluij”. Yejuan oksepa kuali mouikaj.

“Ximoijyouilijtiyakan se uan okse in tataman de namotamachilisuan. Uan no ximotapojpoluijtiyakan se uan okse.” (Col. 3:12-14.) ¿Tikonelnamiki ome precursoras akin motajtolteuiayaj? Se tayekankej kinpaleuij maj kiitanij ke kichiujtoyaj maj okseki tokniuan mokuejmolouanij. Kinelnamiktij ke monekia motapojpoluiskej uan kitemoskej maj nochin kuali mouikanij itech nechikol. Yejuan kichiujkej tein tokniuj kinyolmajxitij. Axkan oksepa kuali mouikaj uan kisentokaj sentanojnotsaj.

Tein tayolmajxitia Colosenses 3:12-14 uelis techpaleuis maj tiyolyemankej uan maj titetapojpoluikan komo techyolxokoliaj uan maj tikelkauakan tein panok. Sayoj ke komo tikitaj ke amo ueli tikchiuaj nejon, uelis tikchiuaskej tein tayolmajxitia Mateo 18:15. Maski Jesús ika tajtojtoya tein moneki se kichiuas keman aksa kichiuak se ueyi tajtakol tein kijtakoj se tokniuj, nejin tayolmajxitilis no techpaleuis keman tikpiaskej se kuejmol  iuan se tokniuj. Sayoj moneki tiyeskij tiyolyemankej uan tikualtakamej, uan maj titajtokan iuan tokniuj.

Itech Biblia moajsij okseki tayolmajxitilismej. Sayoj ke uelis techpaleuiskej komo tiknextiaj itakilo espíritu, tein kipia nejin kualneskayomej: “Ma se tetasojtatinemi; uan ma se yolpaktinemi; uan ma se yolseukanentinemi; uan ma se kipixtinemi paciencia; uan ma se teyoliknelijtinemi; uan ma se kichiutinemi ten kuali; uan ma se takuautamakatagat; uan ma se yolyemankanemi; uan ma se moyekantinemi ika nejmach” (Gál. 5:22, 23). Ijkon kemej aceite tapaleuia maj se tepos kuali tekiti, nejin kualneskayomej tein ualeuaj itech Jiova tapaleuiaj maj kuali timouikakan.

Tinochin tikpiaj tataman kualneskayomej uan tataman kemej titanemiliaj uan titajtouaj. Nejin kichiua maj tikuelitakan iniuan timouikaskej oksekin. Sayoj ke no uelis kichiuas maj onka kuejmolmej. Se tayekankej akin uejkaujya kitekitilijtok Jiova kijtoua: “Aksa akin amo semi tajtoua uelis amo kuali momachilis iuan aksa akin kiteluelita tajtos. Maski uelis moitas ke nejon amo motelneki, uelis kichiuas maj onka uejueyi kuejmolmej”. Komo ijkon, ¿amo uelis kuali mouikaskej omen akin semi tatamamej? Maj titanemilikan itech ome tatitanilmej: Pedro uan Juan. Ika tein tikixtajtoltiaj itech Biblia, tiknemiliaj ke Pedro nochipa kijtouaya tein kinemiliaya, uan ke Juan katka tetasojtakej akin kuali kinemiliaya tein kijtouaya uan tein kichiuaya. Pedro uan Juan semi tatamamej katkaj, sayoj ke kuali sentekitiaj (Hech. 8:14; Gál. 2:9). Ininneskayo kinextia ke tiitekitikauan Dios axkan no uelis tisentekitiskej, maski semi titatamamej.

Xa moajsi se tokniuj itech nechikol akin kijtoua oso kichiua seki taman tein techkualantia.  Maski ijkon, tikmatij ke Cristo ika momikilij uan ke moneki tiktasojtaskej (Juan 13:34, 35; Rom. 5:6-8). Yejua ika, maj amo tiktemokan amo iuan titajtoskej oso maj amo tiknemilikan ke amo keman uelis kuali timouikaskej iuan. Okachi kuali maj timotajtanikan: “¿Kichiujtok nejon tokniuj teisa tein kitapanauilia itanauatil Jiova? ¿Kitemoua nechyolxokolis? ¿Oso panoua nejon sayoj porin titatamamej? Uan tein okachi moneki, ¿kipia kualneskayomej tein no nikuelitaskia niknextis?”.

Kemej neskayot, komo kiteluelita tajtos, sayoj ke tejuan amo, xa uelis tikiluiskej maj touan tanojnotsati uan tikitaskej keniuj no uelis tikchiuaskej kemej yejua. Komo okachi kualtakat ke tejuan, ¿uelis tikchiuaskej kemej yejua uan tikmachiliskej yolpakilis tein teualkuilia se kinpaleuis akin xiuejkejya, akin mokokouaj uan akin kipanouaj tatasojtilis? Nejin techmachtia ke maski titatamamej, uelis kuali timouikaskej iuan tokniuj komo tikitaj tein kuali tein kichiua. Xa amo keman yeski akin okachi kuali totasojikniuj, sayoj ke nejin uelis techpaleuis maj okachi kuali iuan timouikakan, maj kuali timomachilikan uan maj tinochin kuali timouikakan itech nechikol.

Evodia uan Síntique xa semi tatamamej katkaj. Maski ijkon, tatitanil Pablo kinyolchikauak maj kipianij sayoj se tanemilil (Filip. 4:2). ¿No tikchiuaskej nejon uan ijkon tiktemoskej kuali timouikaskej itech nechikol?

Keman amo tikinyekitaj oksekin uelis tamatis kemej ijkuak moskaltia amo kuali xiuit kampa toktokej xochimej, tein kisentokas moskaltis komo amo tikuiuitaj. No ijkon, keman aksa kisentoka amo kiyekita se tokniuj, uelis kichiuas maj onka kuejmolmej itech nechikol. Sayoj ke, komo tiktasojtaj Jiova uan  tokniuan, timochikauaskej kuali timouikaskej iniuan nochin tokniuan maski semi titatamamej.

Keman tiktemouaj tikyektaliskej kuejmolmej iniuan oksekin, xa tikmoujkaitaskej tein kuali tein kiualkui nejon. Se tokniuj siuat kijtoj: “Nikmachilij ke se tokniuj siuat nechitaya kemej niyeskia se nisiuapiltsin, uan nejon nechtelkualantiaya. Kemej okachi nikualania, peuak nikchiuilia tein amo kuali. Niknemilij: ‘Yejua amo nechpoujkaita kemej nechnamiki, yejua ika nejua amo no nikpoujkaitas’”.

Satepan, nejin tokniuj siuat peuak kinemilia tein kichiujtoya. Yejua kijtoj: “Peuak nikita nonepololuan, uan amo nechyolpaktij tein nikchiujtoya. Nikitak ke monekia nikpatas notanemilil. Niktataujtij Jiova. Satepan, nikouilij tokniuj se tsikitsin netetayokolil uan nikijkuilouilij se amatsin kampa nikiluiaya maj nechtapojpolui porin nikchiuilijka tein amo kuali. Timonauajkej uan tikixtalijkej tikelkauaskej tein panok. Amo tikpianijok kuejmolmej”.

Tinochin moneki tikpiaskej yolseuilis. Sayoj ke, miakej amo kitemouaj kuali mouikaskej iniuan oksekin, uelis yeski porin moueyinekij oso porin amo kinekij maj kinijtakokan. Sayoj ke, itech ixolal Jiova moneki nochin kuali mouikaskej. Jiova kichiuak maj Pablo kinijkuilouiliani tokniuan maj neminij “keme kinnamiki ma chipaukanemikan nekes ten Totajtsin Dios kinnotsak ya ma kitoktilikan [...] ika ne yolyemanalis” uan maj amo yolijsiuinij. No kiniluij: “Ximoxikouilijtiyakan ne yolxokolilis ten namechiuiliaj oksekin. Uan ximofuerzajuikan de ke nachipa ximouikatinemikan se uan okse ika sanse san yoltamachilis. Uan no [...] xikpixtinemikan ne yolseuilis se uan okse” (Efes. 4:1-3). Motelneki maj tiktemokan kuali timouikaskej iniuan oksekin keman tikyektaliskej tein yeski kuejmol tein tikpiaskej iniuan tokniuan.