TOTAJTSIN JEHOVÁ kineki ika itekipanojkauan makitlasojkaitakan yolseuilistli niman manochikauakan kipiyaskej. Ijkuak ijkon kichiuaj, akin melauak kiueyichiuaj toTajtsin nemij ika paktli niman yolseuilistli. Yejuin kichiua ika oksekimej makinekikan uajlaskej ipan ikalpan Jehová.

Se neskayotl, se tlakatl akin kichiuaya naualyotl akin melak kixmatiyaj ipan Madagascar okitak ika iteixpantijkauan Jehová kipiayaj yolseuilistli. Yejua okinemili: “Tla se tonajli nonekis niktlapejpenis se tlaneltokijli, yejuin yes”. Sakin okikauj naualyotl tlen kichiuaya, opanok miyek metstin ika okiyektlali inamiktilis ijkon ken kijtoua Biblia niman onochiuj iteixpantijkauj Jehová, toTajtsin akin kipiya yolseuilistli.

Ken yejon tlakatl, nochi xiujtin melak miyekej tlaltikpakchanejkej kinextiaj yolseuilistli tlen kinpoloua ipan ikalpan toTajtsin. San ika, Biblia kuajli kijtoua ika tlauejli niman nexikojli uelis kichiuas matlami ken nouikaj niman maonia tlaueltin ipan tlanechikojli (Sant. 3:14-16). Biblia noijki techmaka tlajtolpaleuilistin tlen techpaleuiyaj maka maonia tlauejli niman matiktejtemokan yolseuilistli. Matikitakan kenon sekimej yokichiujkej yejon tlajtolpaleuilistin.

“Xkuajli ninouikaya iuan se tokniuj akin iuan nitekitiya. Se tonajli, ijkuak tokualanijtoyaj, oksekimej okalajkej niman otechitakej” (CHRIS).

“Se tokniuj akin iuan miyekpa nitenojnotsaya san totoka okikajkauj ika nouan kisas. Hasta okikajkauj ika nechnotsa. Niman nion achijtsin xnikmatiya tleka” (JANET).

“Titlajtotoyaj yeyimej ipan teléfono. Se okijto ika iyaskia, niman ika yejon oniknemili ika xok touan nonotstoya. Kuakon opeuj xkuajli nitlajtoua itech. San ika, yejua xiyaya niman okikak nochi tlen onikijto itech” (MICHAEL).

“Omemej precursoras ipan tlanechikojli kipiayaj tlaueltin. Se opeuj kajua okse miyekpa. Pampa nokualaniayaj kichiuaya ika oksekimej maka ok matlaneltokakan intech” (GARY).

Yejuin tlaueltin ueli nesis ika nion xuejueyimej. San ika, ijkuak panoua itlaj ken yejon uelis kinyolkokos akin inpan nochiua niman kipopoloua yolseuilistli ipan tlanechikojli. Melak kuajli ika yejon tokniuan onoyekankej ika tlen kijtoua Biblia niman oksejpa nemij ika yolseuilistli. ¿Tlenon tlajtolpaleuilistin itech Biblia okinpaleuijkej?

 “Maka xmokualanikan semej iuan oksekimej ipan ojtli” (Gén. 45:24). José okinmakak yejuin tlajtolpaleuilistli ikniuan ijkuak nokuepaskiaj kampa nemiya intaj. ¡Melak tepaleuiyaj yejuin tlajtoltin! Tla se xueli kiteltia tlen kimachilia niman totoka kualani, uelis kichiuas ika oksekimej makualanikan. Chris okitak ika noueyimatiya niman ika ouijtika kitaya kichiuas tlen kinauatiayaj oksekimej. Pampa kinekiya nopatlas, okitlajtlanili tokniuj akin iuan onokualanijka makitlapopolui niman melak onochikauj kiteltis ken kualaniya. Ijkuak tokniuj okitak ika Chris melak nochikaujtoya ika nopatlas, yejua noijki ijkon okichiuj. Aman, melak pakij niman san sekan kitekichiuiliaj Jehová.

“Xkuajli onkisa tlen nonemilia nochiuas ijkuak xnojnotsaj” (Prov. 15:22). Janet okasikamat ika nonekiya kichiuas yejuin tlajtolpaleuilistli. Ika yejon okinemili tlajtos iuan tokniuj. Ijkuak iuan nonotstoyaj, Janet okitlajtolti tokniuj tleka yokualanka. Ijkuak opeujkej tlajtouaj, xika inyojlo nemiyaj, san ika, sakin opeuj kuajli nomachilia pampa yemanki nonotsayaj. Tokniuj okitak ika xkuajli ken okasikamat itlaj kampa Janet nion xtlaj okichiujka, ika yejon okitlajtlanili makitlapopolui. Aman oksejpa san sekan kitekichiuiliaj Jehová.

“Ijkon, tej, tla ijkuak tiktemaka mouen ne tlaixpan tikelnamiki ika okse itlaj ika motech kualani, xkaua mouen ne ipan on tlaixpan niman xuiya itech on tlakatl. Achtopa iuan xmoyoltlaliti” (Mat. 5:23, 24). Kanaj uelis tikilnamikiskej yejuin tlajtolpaleuilistli tlen okitemakak Jesucristo ipan Tlamachtijli ipan Tepetl. Michael melak xkuajli onomachili ijkuak okitak ika xokitlakaitak niman xkuajli otlajto itech tokniuj. San ika, kuajli yokinemilijka ika nochikauas kichiuas oksejpa maonia yolseuilistli. Onoyolyemanili niman otlajto iuan tokniuj niman okijli ika makitlapopolui. ¿Tlenon opanok? Michael kijtoua: “Nokniuj onechtlapopolui ika nochi iyojlo”. Kuakon oksejpa melak kuajli nouikaj.

“Xpiakan ijyouilistli iuan oksekimej, niman xmotlapojpoluikan tla yakaj mechtlauelkuitia” (Col. 3:12-14). Itech ome precursoras akin kipiayaj tlauejli, se tokniuj tlayekanketl okinpaleui makitakan ika kichiujtoya xkuajli manomachilikan oksekimej. Okintlajtolti tla yemelak xueliskiaj noijyouiskej niman ijkon maonia yolseuilistli ipan tlanechikojli. Yejon tokniuan okiselijkej tlajtolpaleuilistli niman okichiujkej. Aman yejuamej kuajli nouikaj niman san sekan tenojnotsaj.

 Tlajtolpaleuilistli tlen kipiya Colosenses 3:12-14, tlen kemach otikteneujkej, uelis techpaleuis ijkuak yakaj techyolkokos. Miyekej yokitakej ika tla yolyemankej ueli tetlapopoluiyaj niman kilkaua tlen kinchiuiliaj. San ika, tla tikitaj ika xtiuelij tikchiuaj yejon, uelis tikchiuaskej tlen kijtoua Mateo 18:15. Maski Jesús tlajtotoya itech tlen noneki nochiuas ijkuak yakaj yokichiuj se ueyi tlajtlakojli itechkopa okse, yejuin tlajtolpaleuilistli noijki techpaleuiya ijkuak tikpiyaj se tlauejli iuan se tokniuj. San noneki ika yolyemanilistli niman tetlasojtlalistli matikyejyekokan titlajtoskej iuan tokniuj niman matikyektlalikan tlauejli.

Kema, Biblia temaka okseki tlajtolpaleuilistin. San ika, san techpaleuiskej tla tikteititiaj “itlakilyo espíritu santo: tlasojtlalistli, pakilistli, yolseuilistli, ijyouilistli, iknelilistli, yolkuajlilistli, tlaneltokijli, yolyemanilistli, noteltia iselti” (Gál. 5:22, 23, TNM). Ijkon ken chiauak kichiua se máquina kuajli matekiti, yejon kualneskayomej kichiuaj kuajli matouikakan iuan oksekimej.

Tinochimej tikpiyaj ken titlanemiliaj. Xakaj nemij akin sa noijki kualneskayomej makinpiya, matlanemili noso matlajto. Niman yejuin kichiuaj kuajli matouikakan. San ika, pampa xsan noijki titlanemiliaj noijki uelis kichiuas matikpiyakan tlauejli. Se tokniuj tlayekanketl akin youejkauj kijtoua: “Se akin nomojtia tlajtos uelis melak xkuajli nomachilis itech yakaj akin nimantsin tlajtoua. Maski yejuin nesi xueyi kijtosneki, uelis kichiuas maonia tlauejli”. Kuakon, ¿xuelis nouikaskej akin xsan noijki tlanemiliaj? Matitlanemilikan itech ome itlatitlankauan Cristo: Pedro niman Juan. Ijkuak tikpouaj Biblia, kanaj tiknemiliaj itech Pedro ken yakaj akin nimantsin tlajtoua niman melajkatlajtoua. Niman ijkuak titlanemiliaj itech Juan, tiknemiliaj itech yakaj akin tetlasojtla niman xnimantsin kijtoua tlen kinemilia. Yejuin omemej xsan noijki katkaj, san ika, kuajli tekitiyaj san sekan (Hech. 8:14; Gál. 2:9). Inneskayo  teititia ika tejuamej noijki uelis titekitiskej san sekan maski xsan noijki titlanemiliaj.

Kanaj se tokniuj ipan tlanechikojli uelis kijtos noso kichiuas itlaj tlen techyolkokos. Maski ijkon, tikmatij ika Cristo omik ipampa niman ika noneki tiktlapopoluiskej (Juan 13:34, 35; Rom. 5:6-8). Kuakon, matikselikan niman maka matiknemilikan ika xkeman uelis iuan touikaskej, matotlajtoltikan: “¿Kichiujtika tokniuj itlaj tlen kixnamiki itech tlen kijtoua Biblia? ¿Kineki nechijtlakos? ¿Noso san pampa yejua tlanemilia xijkon ken nejua? Niman xsan yejon, ¿tlenon uelis ninomachtis itech ikualneskayouan?”.

Yejuin sa ika nochi tlajtoltilistli melak ueyi kijtosneki. Tla yakaj melak kuelita tlajtos, niman tejuamej xmelak titlajtouaj, matiknemilikan kenon yejua xouijtika peuas tenojnotsas. Kanaj uelis tikijliskej touan mauiya ijkuak titenojnotsaj niman tikitaskej tlenon uelis tomachtiskej itech. Tla tokniuj kuelita tetlayokolis xijkon ken tejuamej, ¿ueliskia tomachtiskej itech niman tikmachiliskej pakilistli ijkuak tikintlayokoliaj akin iuejueyimej, akin kualoj noso kinpolojtika itlaj? Yejuin tlen noneki: maski xsan noijki titlanemiliaj ken tokniuj, uelis san sekan tinemiskej tla tikitaj itech san tlen tepaleui. Kanaj xkeman melak kuajli iuan touikaskej, san ika, yejuin uelis techpaleuis kuajli matouikakan, matikpiyakan yolseuilistli niman onias yolseuilistli ipan tlanechikojli.

Evodia niman Síntique onenkej ipan kachtopa siglo. Kanaj melak xsan noijki tlanemiliayaj. Maski ijkon, Pablo, itlatitlankauj Cristo, okinyolchikauj ika “ma kipiakan san se inyojlo ken ikniutin itech toTeko” (Filip. 4:2). ¿Noijki tejuamej tikchiuaskej yejon niman ijkon tiktejtemoskej maonia yolseuilistli ipan tlanechikojli?

Tlen tikmachiliaj intech oksekimej uelis yes ijkon ken xkuajli xiujtli kampa notokaj xochimej, tlen nochipa noskaltis tla xtijkixtiaj. Noijki ijkon, ijkuak se tokniuj ipan iyojlo kimachilia tlen xkuajli, nochi tlanechikojli uelis ijtlakauis. San ika, tla tiktlasojtlaj Jehová  niman tokniuan, tikchiuaskej nochi tlen tiuelij niman ijkon maski xtitlanemiliaj ijkon ken oksekimej uelis onias yolseuilistli ipan tlanechikojli.

Tla tikyejyekouaj tikyektlaliskej tlaueltin niman ijkon maonia yolseuilistli, melak kuajli tlen onkisas. Matitlanemilikan itech tlen ipan onochiuj yejuin tokniuj: “Nikmachiliaya ika se tokniuj nechitayaj kentla niichpochkonetl, niman yejuin melak nechkualaniayaj. Pampa yejuin kichiuaya ok melak manikualani, opeuj chikauak niknotsa. Oniknemili: ‘Yejua xnechtlakaita ijkon ken nechmelaua, kuakon nejua noijki xniktlakaitas’”.

Sakin, yejuin tokniuj opeuj tlanemilia itech tlen kichiujtoya: “Opeuj nikita, itech tlenon noijki ninopopoloua niman yejon onechajman. Onikasikamat ika nonekiya ninopatlas. Kuakon onikchiuili teoyotl Jehová itech yejuin. Sakin, onijkouili se pitentsin tetlayokolijli tokniuj niman onikijkuilouili se amatlajkuilojli kampa onikijli manechtlapopolui itech ken xkuajli nikchiuiliaya. Otonapalojkej niman otikijtokej tikilkauaskej tlen opanok. Niman aman xok tikpiyaj tlauejli”.

Tlaltikpakchanejkej melak kimpoloua kipiyaskej yolseuilistli. San ika, kanaj pampa noueyimatij noso pampa kimachiliaj ika xkintlakaitaj, miyekej xkiteititiaj yolseuilistli. Melak miyekej ijkon kichiuaj, san ika, ipan ikalpan Jehová onka yolseuilistli niman san sekan nemij. Jehová ika iespíritu santo okichiuj ika Pablo makijkuilo: “Ma ka xmoueyimatikan, yej xmonotsakan ikan yolyemanalistli. Xkimijyouikan semej iuan oksekimej niman xkimpaleuikan  ika on tetlajsojtlalistli yejuan nenkipiaj. Xchiuakan kanika [...] ken aman san sekan nennemij itechkopa on Espíritu. Niman xkauilikan on Espíritu ma mechmaka yolseuilistli yejuan mechsentlalia semej iuan oksekimej” (Efes. 4:1-3). “Yolseuilistli yejuan [te]sentlalia” melak notlasojkaita. Ika yejon, kuajli yotiknemilijkej tikyektlaliskej maski san katlejua tlauejli tlen tikpiyaskej.