JEHOFA MODIMO o kgothaletša Bakriste gore ba dule ba na le khutšo le go dula ba phedišana le ba bangwe ka khutšo. Ge yo mongwe le yo mongwe wa rena a rata khutšo, re tla ba le khutšo le badumedigotee le rena. Se se tla dira gore batho ba lefase bao ba tsomago khutšo ba tle ka phuthegong.

Ka mohlala, ngaka e tsebegago kudu ya ditaola ya kua Madagascar e ile ya lemoga gore Dihlatse tša Jehofa di na le botee. E ile ya ipotša gore: ‘Mohlang ke nyaka go tsena kereke, ke tlo ya kerekeng ye.’ Ge nako e dutše e eya, o ile a tlogela go ba ngaka, a fetša dikgwedi tše mmalwa a lokiša lenyalo la gagwe gore le dumelelane le seo Mangwalo a se bolelago gomme a fetoga morapedi wa Jehofa, yena Modimo wa khutšo.

Go swana le monna yoo, ngwaga o mongwe le o mongwe batho ba diketekete ba tla ka phuthegong ya Bokriste gomme ba hwetša khutšo yeo e bego e le kgale ba e nyaka. Eupša Beibele e bolela ka mo go kwagalago gore ge ka phuthegong go na le “lehufa le le galakago le tshele,” go ba le mathata gomme ditho tša phuthego tša se sa kwana. (Jak. 3:14-16) Eupša se se kgahlišago ke gore Beibele e re nea keletšo e šomago ya kamoo re ka phemago mathata a bjalo gomme ra dira gore go dule go na le khutšo. E le gore re bone kamoo re ka dirago seo, anke re boleleng ka a mangwe a maemo ao a diregago bophelong.

“Ke be ke sa kwane le ngwanabo rena yo ke bego ke šoma le yena. Ka letšatši le lengwe ge re be re fošana ka noga e phela, go ile gwa tšwelela batho ba babedi gomme ba re hwetša re sa ngangišana.”—CHRIS.

“Ke ile ka makala kgaetšedi yo ke bego ke tlwaetše go šoma tšhemo le yena a se sa nyaka go ya le nna tšhemong. Ka morago ga moo, o ile a se sa mpolediša. Ke be ke sa tsebe lebaka.”—JANET.

“Ka letšatši le lengwe, ke ile ka boledišana le bana babo rena ba babedi ka nako e tee founong. Ke moka yo mongwe wa bana babo rena bao o ile a laela, gomme nna ka ipotša gore o šetše a beile founo fase. Ke moka ke ile ka thoma go bolela gampe ka yena ke na le ngwanabo rena yola yo mongwe, kgane ngwanabo rena yoo ga se a hlwa a bea founo fase.”—MICHAEL.

“Ka phuthegong ya rena, babulamadibogo ba bangwe ba babedi ba ile ba thoma go se sa kwana. Yo mongwe o ile a omanya o mongwe. Ngangišano yeo ya bona e ile ya nyamiša ditho tše dingwe tša phuthego.”—GARY.

O ka nagana gore mathata ao go boletšwego ka wona mo ga se selo. Eupša bjo bongwe le bjo bongwe bja ona bo ka gobatša yo mongwe wa batho bao maikwelong le moyeng. Lega go le bjalo, o tla thabišwa ke go tseba gore bana babo rena bao le dikgaetšedi ba ile ba diriša Beibele go lokiša mathata  a bona gomme ba boela ba phedišana ka khutšo. O nagana gore ba dirišitše melao efe ya motheo go dira khutšo?

“Le se ke la galefelana mo tseleng.” (Gen. 45:24) Josefa o ile a nea bana babo keletšo yeo ge ba be ba boela go tatago bona ba etšwa Egipita. Ruri mantšu ao a gagwe ke a bohlale! Ge motho a sa laole maikwelo a gagwe gomme a galefa ka pela, a ka galefiša le ba bangwe. Chris o ile a lemoga gore mafokodi a gagwe e be e le boikgogomošo le go diega go amogela tlhahlo. Ka ge a be a nyaka go fetoga, o ile a kgopela tshwarelo go ngwanabo rena yo a bego a ngangišane le yena gomme a šoma ka thata gore a laole maikwelo a gagwe. Ge ngwanabo rena yola a bego a šoma le Chris a lemoga gore Chris o katanela go fetoga, le yena o ile a dira diphetogo. Ga bjale ba thabela go hlankela Jehofa mmogo.

“Maano a a fela ge batho ba sa ntšhetšane sa mafahleng.” (Die. 15:22) Janet o ile a bona gore o swanetše go diriša keletšo ye. O ile a boledišana le kgaetšedi yoo gomme ba ‘ntšhetšana sa mafahleng.’ Ge ba dutše ba boledišana, ka bohlale Janet o ile a dira gore kgaetšedi yoo a bolele seo se mo kgopišitšego. Mathomong ba be ba sa boledišane gabotse, eupša dilo di ile tša kaonefala ge ba dutše ba boledišana ka tsela e botho. Kgaetšedi yoo o ile a lemoga gore o be a kwetše taba thoko le gore dilo tšeo a bego a di nagana ka Janet ga di bjalo. Ka gona, o ile a kgopela tshwarelo gomme ga bjale ba boetše ba hlankela Jehofa ba le gotee.

“Ka gona, ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge. Thoma ka go dira khutšo le ngwaneno.” (Mat. 5:23, 24) Mohlomongwe o ka ba o gopola keletšo ye yeo Jesu a e neilego Thutong ya Thabeng. Michael o ile a nyama kudu ge a be a lemoga gore o kgopišitše ngwanabo rena yoo. O ile a phetha ka gore a lokiše ditaba gomme a dire khutšo le yena. O ile a ikokobetša gomme a kgopela tshwarelo go ngwanabo rena yoo ba lebantše difahlego. Mafelelo e bile afe? Michael o re: “Ngwanešo o ile a ntebalela go tšwa pelong.” Michael le ngwanabo rena yoo e ile ya boela ya ba bagwera.

“Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.” (Bakol. 3:12-14) Ge re etla tabeng ya dikgaetšedi tšela tše pedi tšeo di nago le mengwaga e mentši e le babulamadibogo, mogolo yo lerato o ile a di thuša go naganišiša ka dipotšišo tša go swana le tše: ‘Na re na le tshwanelo ya go kgopiša ba bangwe ka boitshwaro bja rena? Ke ka baka la’ng re sa fo lebalelana gomme ra tšwela pele re hlankela Jehofa ka khutšo?’ Dikgaetšedi tšeo di ile tša amogela keletšo ya mogolo yoo gomme tša e diriša. Ga bjale ke bagwera ba bagolo gomme ba bolela ditaba tše dibotse ka khutšo.

 Go diriša keletšo ya Beibele yeo re sa tšwago go bolela ka yona, yeo e lego go Bakolose 3:12-14, e ka ba mogato wa mathomo wa go lokiša ditaba ge e ba motho yo mongwe a go kgopišitše. Batho ba bantši ba hweditše gore boikokobetšo bo ba thuša go lebalela ba bangwe le go se ba sware ka pelo. Eupša a re re o lekile gantši go lebalela motho yoo le go se mo sware ka pelo eupša go no pala. Ge e ba go le bjalo, go ka nyakega gore o diriše keletšo ya Jesu yeo e lego go Mateo 18:15. Ke therešo gore keletšo yeo ya Jesu e šupa tabeng ya ge motho yo mongwe a diretše yo mongwe sebe se segolo. Eupša go ka nyakega gore o diriše molao woo wa motheo le maemong ao o lego go wona. Eya go ngwaneno goba kgaetšedi gomme ka botho le ka boikokobetšo le leke go boledišana ka bothata bjo le nago le bjona gomme le bo rarolle.

Beibele e re nea ditšhišinyo tše dingwe tšeo di ka re thušago. Tše dintši tša ditšhišinyo tšeo di akaretša taba ya gore re bonagatše “dika tšeo di enywago ke moya . . . [e lego] lerato, lethabo, khutšo, go se fele pelo, botho, toko, tumelo, boleta le boitshwaro.” (Bagal. 5:22, 23) Ge re bonagatša dika tše tša Modimo, re tla kgona go rarolla diphapano ka khutšo, go no swana le oli yeo e dirago gore motšhene o šome gabotse.

Semelo, e lego dika tša moswananoši tšeo yo mongwe le yo mongwe wa rena a nago le tšona—se ka dira gore re thabele segwera. Eupša go se swane ka dimelo gape go ka dira gore go be le dikgohlano. Mogolo yo a nago le phihlelo o nea mohlala o latelago, o re: “Motho yo a nago le dihlong a ka thatafalelwa ke go dula le motho wa go bolela kudu goba wa mašata. Ba bangwe ba ka bona seo e se bothata; eupša se ka baka mathata a magolo.” Na wena o nagana gore batho bao ba nago le dimelo tše di sa swanego ba ka se tsoge ba šomišane gabotse? Ge e ba o nagana bjalo, gona ela hloko baapostola ba babedi e lego Petro le Johane. Petro e be e le motho wa mohuta mang? Mohlomongwe o ka ba o nagana gore e be e le motho wa go bolela kudu le wa go dira dilo ka lepotlapotla. Go thwe’ng ka Johane? Re  ka nagana ka yena e le motho yo lerato, yo a sa bolelego kudu le yo a iketlago ge a dira dilo. Ka gona, gaešita le ge go bonagala banna ba ba be ba sa swane ka dimelo, ba ile ba kgona go šoma gotee. (Dit. 8:14; Bagal. 2:9) Ka go re’alo, le lehono go a kgonega gore Bakriste bao ba nago le dimelo tše di sa swanego ba šome gotee.

Mohlomongwe ka phuthegong ya gabo lena go na le ngwanabo rena goba kgaetšedi yoo dipolelo tša gagwe goba ditiro tša gagwe di go tenago. Go dutše go le bjalo, o a lemoga gore motho yoo le yena Kriste o mo hwetše le gore o swanetše go mo rata. (Joh. 13:34, 35; Baroma 5:6-8) Ka gona, go e na le gore o kgaotše go gwerana le yena goba go mmethiša ka moya, ipotšiše gore: ‘Na ngwanabo rena yo o dira selo seo go lego molaleng gore se fošagetše go ya ka Mangwalo? Na dilo tše a di dirago o di dira ka boomo? Goba na re no ba re se na dimelo tša go swana?’ Le gona potšišo e bohlokwa go di feta ka moka ke ye: ‘O na le seka sefe se sebotse seo ke se ratago?’

Potšišo ye ya mafelelo e bohlokwa. Ge e ba motho yo a itšego a rata go bolela gomme wena o homotše, go ra gore ga a be le bothata bja go thoma poledišano le batho tšhemong. Mohlomongwe o ka mo kgopela gore le šome tšhemo mmogo e le gore o bone seo o ka ithutago sona go yena. Ge e ba o lemogile gore motho yoo o rata go thuša batho ba bangwe mola wena o sa kgone go dira bjalo, gore’ng o sa leke go bona lethabo leo a le hwetšago ge a thuša batšofadi, balwetši le badiidi? Ntlha ke ye: Gaešita le ge dimelo tša lena di sa swane, o ka kgona go phedišana gabotse le ngwaneno yoo ge e ba o šetša dilo tše dibotse tšeo a di dirago. Gaešita le ge go dira bjalo go ka se le dire bagwera, seo se ka le thuša gore le phedišane ka khutšo, ka go re’alo la hola phuthego.

Go ka direga gore Ebodia le Sintike ba be ba na le dimelo tše di sa swanego. Lega go le bjalo, moapostola Paulo o ile a ba kgothaletša gore “e be ba monagano o tee Moreneng.” (Bafil. 4:2) Na le wena o tla šomela ntlheng yeo le go katanela go phedišana ka khutšo le ba bangwe?

Go swana le ngwang woo o golago ka serapaneng sa matšoba, tsela yeo re ikwago ka yona ka batho  ba bangwe e tla gakala ge e ba re sa e tumole. Ge motho a ka dula a galefile, seo se ka senya le phuthego. Ge e ba re rata Jehofa le bana babo rena, re tla dira sohle seo re ka se kgonago gore re se ke ra dumelela diphapano tša rena di kgopiša ba bangwe goba di senya khutšo yeo batho ba Modimo ba nago le yona.

Ge re rarolla diphapano goba go se kwešišane ka maikemišetšo a go dira khutšo, re ka makatšwa ke mafelelo a mabotse ao a ka bago gona. Ela hloko mohlala wa kgaetšedi yo mongwe. O itše: “Ke be ke ikwa okare kgaetšedi yo mongwe o ntshwara bjalo ka ngwana. Seo se be se ntena. Ge kgalefo ya ka e dutše e gola, re ile ra se sa boledišana gabotse. Ge a mpolediša, nna ke be ke no mo fotlela. Ke be ke ipotša gore: ‘Ka ge a sa ntlhomphe, le nna nka se mo hlomphe.’”

Ge nako e dutše e eya, kgaetšedi yo o ile a thoma go naganišiša ka ditiro tša gagwe. O re: “Ke ile ka thoma go bona mafokodi a ka, gomme seo sa nnyamiša kudu. Ke ile ka lemoga gore ke swanetše go lokiša tsela yeo ke naganago ka yona. Ka morago ga go rapela Jehofa gore a nthuše, ke ile ka rekela kgaetšedi yoo mpho e nyenyane gomme ka mo ngwalela karata ya go kgopela tshwarelo. Re ile ra gokarelana gomme ra lebalelana. Go tloga ka nako yeo, re ile ra phedišana ka khutšo.”

Batho ba tloga ba nyaka khutšo. Lega go le bjalo, ge motho yo mongwe a leka go ba amoga seriti le go ba nyatša, ba bantši ba thoma go ferekana. Seo se bjalo go batho ba bantši bao ba sa hlankelego Jehofa, eupša bao ba mo hlankelago ba swanetše go dula ba na le khutšo le botee. Jehofa o ile a laela Paulo go ngwala gore: “Ke le lopa gore le sepele ka mo go swanelago pitšo yeo le biditšwego ka yona, le sepele ka boikokobetšo bjo bo feletšego le boleta, ka go se fele pelo, ka go kgotlelelana ka lerato, le leka ka matla go boloka botee bja moya setlemong se se tlemaganyago sa khutšo.” (Baef. 4:1-3) “Khutšo” e bohlokwa kudu, gomme ga e rekwe ka tšhelete. Ka gona, anke re se ke ra e senya gomme re ikemišetše go rarolla go se kwešišane le ge e le gofe moo go ka bago gona gare ga rena.