ЙЕГОВӔ ХУЦАУ киристӕнтти разӕнгард кӕнуй, цӕмӕй сӕ астӕу фарнӕ уа ӕма еци фарнӕ гъӕуай кӕнунбӕл зӕрдиагӕй архайонцӕ. Уотӕ ке кӕнунцӕ, уой фӕрци киристон ӕмбурди ес фарнӕ. Хъӕбӕр берӕ адӕн ӕмбурдмӕ еци фарни хицӕй ӕрбацӕунцӕ.

Мадагаскари еу дӕсни лӕг хъӕбӕр дес кодта, Йегови Ӕвдесӕнти астӕу ци фарнӕ ес, уобӕл ӕма загъта: «Ескӕд ести дин райсун ку исфӕндӕ кӕнон, уӕд е ӕрмӕстдӕр Йегови Ӕвдесӕнти дин уодзӕй». Ӕма ӕцӕгӕйдӕр, фӕстӕдӕр еци лӕг ӕ дӕсний куст ниууагъта, ӕ бийнонти царди дӕр ӕййивддзийнӕдтӕ искодта ӕма Йеговӕн, фарни Хуцауӕн, лӕггадӕ кӕнун райдӕдта.

Абони дӕр мингай адӕн еци лӕги хузӕн Хуцауи организацимӕ ӕрбацӕунцӕ ӕма си иссерунцӕ, сӕ зӕрдӕ рагӕй дӕр кӕмӕ бӕлдтӕй, еци фарнӕ. Фал Библи куд зӕгъуй, уомӕ гӕсгӕ ӕмбурди соцъа ӕма хилтӕн бунат ку уа, уӕд е хуарзӕй нецӕмӕ ӕркӕндзӕй ӕма кӕрӕдзей хӕццӕ лимӕнӕй цӕрун ӕнцон нӕ уодзӕй (Иак. 3:14–16). Библий хуарз унаффитӕ ес, нӕ бон куд ӕй уӕхӕн гъуддӕгтӕй нӕхе хезун ӕма нӕ медастӕу ци фарнӕ ес, уой гъӕуай кӕнун. Мадта ӕркӕсӕн, еци унаффитӕ еуӕй-еуетӕн куд банхус кодтонцӕ, уомӕ.

«Ке хӕццӕ кустон, еци ӕнсувӕри хӕццӕ нӕ федудтан. Еухатт ба кӕрӕдзебӕл гъӕр кӕнун райдӕдтан ӕма уотемӕй дууӕ адӕймаги фӕммедӕг ӕнцӕ ӕма нин нӕ хъӕлӕба фӕууидтонцӕ» (КРИС).

«Арӕх ке хӕццӕ лӕггадӕ кодтон, еци хуӕрӕ ӕвваст цидӕр кодта ӕма мӕ хӕццӕ игъосун кӕнунмӕ нӕбал цудӕй. Уой фӕсте ба мӕмӕ дзоргӕ дӕр нӕбал кодта. Ци кодта, уой нӕ лӕдӕрдтӕн» (ДЖАНЕТ).

«Еухатт телефонӕй дзурдтон дууӕ адӕймагей хӕццӕ. Мӕ зӕрдтӕй си сӕ еу трубкӕ ниввардта ӕма иннемӕн ӕ фудкой ракодтон. Фал куд разиндтӕй, уотемӕй мӕ е дӕр игъуста» (МАЙКЛ).

«Не ’мбурди дууӕ пионери кӕрӕдзей хӕццӕ ӕппундӕр нӕ федудтонцӕ. Еу си алкӕддӕр иннемӕн естӕй туххӕй хилӕ кӕнидӕ. Сӕ хилтӕмӕ син еугурӕйдӕр хъӕбӕр тухстӕнцӕ» (ГАРИ).

Кадӕр зӕгъдзӕй, аци хабӕрттӕ уӕхӕн дессаг дӕр нӕ ’нцӕ, зӕгъгӕ. Фал уӕхӕн хабӕртти туххӕй, гӕнӕн ес, ӕма ӕмбурди фарнӕ дӕр фехӕла кенӕ адӕймаг дзӕвгарӕ рӕстӕг маст кӕна. Еци хуӕртӕ ӕма ӕнсувӕртӕ Библий унаффитӕй испайда кодтонцӕ ӕма кӕрӕдзей хӕццӕ бафедудтонцӕ. Цума син цӕхуӕн унаффитӕ банхус кодтонцӕ?

«Надбӕл кӕрӕдзей хӕццӕ ма хилӕ кӕнтӕ» (Райд. 45:24). Аци унаффӕ Иосиф равардта е ’нсувӕртӕн, фӕстӕмӕ сӕ фиди хӕдзарӕмӕ ку ӕздахтӕнцӕ, уӕд. Адӕймаг ӕхебӕл хуӕцун ку нӕ зона, уӕд хъӕбӕр ӕнцонтӕй рафицуй ӕма уавӕр фӕффуддӕр кӕнуй. Крис балӕдӕрдтӕй,  сӕрниллӕгдзийнадӕ ин ке нӕ хъӕртуй, удта ’й разамундмӕ игъосун дӕр ке нӕ фӕффӕндуй. Ӕма еци гъуддӕгти ӕхебӕл архайун райдӕдта. Крис бацудӕй, ке хӕццӕ рабуцӕу ӕй, еци ӕнсувӕрмӕ ӕма си хатир ракурдта. Иннӕ ӕнсувӕр дӕр Крисмӕ гӕсгӕ ӕййевун райдӕдта. Нур еци дууӕ ӕнсувӕрей астӕу ес фарнӕ ӕма еумӕ Йеговӕн лӕггадӕ кӕнунцӕ.

«Ӕргом дзурд кӕми нӕ уа, уоми фӕндтӕ фехӕлдзӕнцӕ» (Ӕмб. 15:22). Джанетӕн е ’мбал ӕ хӕццӕ ку нӕбал дзурдта, уӕд исфӕндӕ кодта, аци унаффӕй испайда кӕнун. Ӕма еци хуӕри хӕццӕ радзурдта. Уӕзданӕй ӕй бафарста, дӕ зӕрдихудти дин кӕми бацудтӕн, зӕгъгӕ. Фиццаг сӕ дууемӕн дӕр зин дзорӕн адтӕй. Фал уӕддӕр радзубанди кодтонцӕ ӕма кӕрӕдзей балӕдӕрдтӕнцӕ. Куд разиндтӕй, уотемӕй еци хуӕрӕ цидӕр раст нӕ балӕдӕрдтӕй ӕма Джанет ӕппундӕр неци фудгин адтӕй. Хуӕрӕ Джанетӕй хатир ракурдта ӕма нур нӕугӕй еумӕ Йеговӕн лӕггадӕ кӕнунцӕ.

«Дӕ ковӕггаги хӕццӕ нивондхӕссӕнмӕ ку ’рбацӕуай ӕма уоми дӕ зӕрдӕбӕл ку ’рлӕууа, де ’нсувӕр дӕмӕ цӕбӕлдӕр хӕран ке ӕй, е, уӕд дӕ ковӕггаг уоми нивондхӕссӕни рази ниууадзӕ ӕма цо, де ’нсувӕри хӕццӕ бал бафедауӕ» (Матф. 5:23, 24). Аци дзурдтӕ Йесо загъта, адӕни хонхбӕл ку ахур кодта, уӕд. Майкл ӕхецӕй хъӕбӕр фефсӕрми ӕй, ӕхе куд фудконд бадардта, уой ку балӕдӕрдтӕй, уӕд. Ӕма уой фӕсте хъӕбӕр байархайдта, цӕмӕй еци ӕнсувӕри хӕццӕ бафедудтайдӕ. Ӕ хӕццӕ фембалдӕй ӕма си сӕрниллӕгӕй хатир ракурдта. Цума гъуддаг цӕбӕл ниллух ӕй? Майкл зӕгъуй: «Ме ’нсувӕр мин зӕрдиагӕй ниххатир кодта». Еци дууӕ ӕнсувӕри ӕмбӕлттӕй байзадӕнцӕ.

«Еске уин естӕмӕй уӕ зӕрдӕ ку фӕхходун кӕна, уӕддӕр кӕрӕдземӕн бухсетӕ ӕма зӕрдӕй хатир кӕнтӕ» (Кол. 3:12–14). Гъуди ма кӕнис, ӕппундӕр ка нӕ федудта, еци дууӕ пионерей? Еу хестӕр нӕлгоймаг син фӕлмӕнӕй балӕдӕрун кодта, сӕ хилтӕй иннетӕн дӕр зин ке кӕнунцӕ. Сӕ зӕрдӕбӕл син ӕрлӕуун кодта, киристӕнттӕ кӕрӕдземӕн бухсун ке гъӕуама зононцӕ ӕма ӕмбурди фарнӕ ке гъӕуама гъӕуай кӕнонцӕ. Еци дууӕ пионери ин ӕ унаффӕмӕ байгъустонцӕ ӕма нур идарддӕр зӕрдӕрохсӕй еумӕ хуарз хабар игъосун кӕнунцӕ.

Дӕ зӕрдихудти еске ку бацӕуа, уӕд дин Колоссӕгтӕмӕ 3:12–14 финст дзурдтӕ банхус кӕндзӕнцӕ, цӕмӕй ин сӕрниллӕгӕй ниххатир кӕнай ӕма дӕ зӕрдӕбӕл маст ма дарай. Фал дин ниххатир кӕнун уотӕ ӕнцон ку нӕ уа, удта? Уӕхӕн уавӕри ба дин банхус кӕндзӕй Матфеййи 18:15 финст унаффӕ. Ами Йесо дзурдта, еу адӕймаг инней нихмӕ ести уӕззау тӕрегъӕд ку искӕна, уой туххӕй. Фал аци унаффӕй мах бон дӕр ӕй нӕхе уавӕри испайда кӕнун. Еци хуӕрӕ кенӕ ӕнсувӕрмӕ бацо ӕма байархайӕ ӕ хӕццӕ фӕлмӕнӕй ӕма сӕрниллӕгӕй радзорун, цӕмӕй уӕ кӕрӕдзей балӕдӕрайтӕ.

 Ке зӕгъун ӕй гъӕуй, Библий ма берӕ дзӕбӕх унаффитӕ ес. Цӕмӕй нӕ бон уа, еци унаффитӕй пайда кӕнун, уой туххӕй нӕмӕ гъӕуама уонцӕ, сугъдӕг хъаурӕй ка цӕуй, еци менеугутӕ. Уонӕмӕ хаунцӕ «уарзондзийнадӕ, цийнӕ, фарнӕ, берӕфӕразондзийнадӕ, хӕларзӕрдӕдзийнадӕ, хуарздзийнадӕ, ӕууӕндундзийнадӕ, фӕлмӕн уодигъӕдӕ, хебӕл хуӕцун» (Гал. 5:22, 23). Машини маслӕ ӕнӕмӕнгӕ куд гъӕуй, цӕмӕй рӕстмӕ коса, уотӕ нин аци менеугутӕ дӕр ӕнӕмӕнгӕ ’нцӕ, цӕмӕй ести буцӕутӕ ку рауайа, уӕд кӕрӕдзей хӕццӕ тагъддӕр бафедауӕн.

Еугурӕйдӕр фӕйнӕхузи ан. Ӕма уотӕ ке ӕй, уой фӕрци еске хӕццӕ лимӕн кӕнун нӕ зӕрдӕмӕ хъӕбӕрдӕр фӕццӕуй. Фал еуӕй-еухатт еци гъуддаги туххӕй нӕ астӕу буцӕутӕ дӕр рауайуй. Еу фӕлтӕрдгун хестӕр нӕлгоймаг уӕхӕн цӕветтон ӕрхаста: «Ӕфсӕрмигӕнагӕ адӕймагӕн, удта еске хӕццӕ исдзорун ӕнцон кӕмӕн ӕй, уӕхӕн дзорагӕ адӕймагӕн кӕрдзей хӕццӕ федаун зин фӕууй. Кадӕр зӕгъдзӕй, цанӕбӕрӕг фӕйнӕхузи ’нцӕ зӕгъгӕ, фал уӕхӕн цидӕртӕ хатгай устур зиндзийнӕдтӕмӕ дӕр ӕркӕнунцӕ». Цума е уобӕл дзорӕг ӕй, ӕма дууӕ фӕйнӕхузи адӕймаги кӕрӕдзей некӕд балӕдӕрдзӕнцӕ? Ӕргъуди кӕнӕн дууӕ апостолей, Петур ӕма Иоанни. Петур цӕхуӕн адӕймаг адтӕй? Ӕвӕдзи зӕгъдзӕнӕ, карз ӕма ӕ гъудитӕ ӕргом ка дзоруй, уӕхӕн адӕймаг. Иоанн ба? Е ба фӕлмӕн ӕма ести зӕгъунмӕ кенӕ ракӕнунмӕ тагъд ка нӕ кӕнуй, уӕхӕн адӕймаг. Уотӕ сӕбӕл хумӕтӕги нӕ сагъӕс кӕнӕн, уомӕн ӕма ӕцӕгӕйдӕр хъӕбӕр фӕйнӕхузи адтӕнцӕ. Фал сӕ е ӕмгуст кӕнунмӕ ӕппундӕр нӕ хъор кодта (Гъуд. 8:14; Гал. 2:9). Мадта бӕрӕг ӕй, фӕйнӕхузи киристӕнттӕн дӕр сӕ бон ке ӕй кӕрӕдзей лӕдӕрун.

Ӕвӕдзи, дӕу ӕмбурди дӕр ес, ӕ дзурдтӕ кенӕ ӕ миути туххӕй кӕмӕ фӕммӕстгун кӕнис, уӕхӕн ӕнсувӕр. Фал ди иронх ма уӕд, Киристе ӕ цард еци адӕймаги туххӕй дӕр равардта,  ӕма ’й гъӕуама уарзай (Иоан. 13:34, 35; Ром. 5:6–8). Раст н’ адтайдӕ уотӕ сагъӕс кӕнун, ӕма некӕд балимӕн уодзиайтӕ кенӕ си еувӕрсти цӕун. Уой бӕсти дӕхе бафӕрсӕ: «Еци адӕймаг уӕхӕнӕй ести кӕнуй, цӕмӕй ӕй Хуцауи закъонихалӕг исхонӕн уа? Уотӕ зӕгъӕн ес, ӕма мӕ барӕй къахуй? Ӕви си, фӕйнӕхузи ке ан, уомӕй ӕндӕр неци ес?» Кенӕ ма дӕ бон ӕй еу хуарз фарстабӕл расагъӕс кӕнун: «Еци адӕймагмӕ цӕхуӕн хуарз менеугутӕ уинун ӕма си цӕбӕл ахур кӕнун?»

Зӕгъӕн, адӕймаг дзорагӕ ӕй, ду ба арӕхдӕр гъосӕй фӕллӕууис. Уӕд еци адӕймаги хӕццӕ игъосун кӕнунмӕ фӕццо ӕма ӕркӕсӕ, адӕни хӕццӕ дзубанди уотӕ ӕнцонтӕй цӕй фӕрци райдайуй, уомӕ ӕма си, ка ’й зонуй, ду дӕр естӕбӕл исахур уодзӕнӕ. Кенӕ, зӕгъӕн, адӕймаг хъӕбӕр рӕдау ӕй, ду ба еци гъуддаги уотӕ ӕнтӕстгун нӕ дӕ. Уӕд дӕ бон ӕй расагъӕс кӕнун, еци адӕймаг каргунтӕн, ӕнхусгъӕуагӕ ка ӕй, уонӕн, удта сӕйгитӕн ке ӕнхус кӕнуй, е ин ци цийнӕдзийнадӕ хӕссуй, уобӕл. Кӕд де ’нсувӕри хӕццӕ хъӕбӕр фӕйнӕхузи айтӕ, уӕддӕр ин дӕ бон ӕй, фулдӕр ӕ хуарз менеугутӕмӕ кӕсун. Ка ’й зонуй, хуӕздӕр ӕмбӕлттӕ не ’суодзиайтӕ, фал уӕддӕр кӕрӕдзей хӕццӕ фӕрнӕй цӕрдзиайтӕ. Ӕма е пайда ӕрхӕсдзӕй уӕхецӕн дӕр ӕма ӕмбурдӕн дӕр.

Фиццаг ӕноси ка цардӕй, еци дууӕ хуӕри, Еводи ӕма Синтихи дӕр, ӕвӕдзи, хъӕбӕр фӕйнӕхузи адтӕнцӕ. Фал сӕ уӕддӕр апостол Павел разӕнгард кодта, цӕмӕй «нӕ Хецауи хӕццӕ еудзийнади ке ӕнцӕ, уомӕ гӕсгӕ ӕмхузӕн... гъуди кӕнонцӕ» (Фил. 4:2). Мах ба архайӕн ӕмбурди уӕхӕн еудзийнадӕ ӕма фарнӕбӕл?

Лӕгъуз сагъӕстӕ ӕнгъезуй рабарун, дидингути астӕу ка иссӕуй, уӕхӕн хъамилти хӕццӕ. Уӕхӕн сагъӕстӕ ӕд бундзарӕ ку не ’стонӕн, уӕд фулдӕрӕй-фулдӕр кӕндзӕнцӕ. Адӕймаги зӕрди маст ку ниббада, уӕд е еугур ӕмбурдбӕл дӕр бӕрӕг кӕндзӕй. Фал Йегови ӕма не ’нсувӕрти ку уарзӕн, уӕд не ’гас хъауритӕй  архайдзиан, цӕмӕй не ’мбурди фарнӕ багъӕуай кӕнӕн.

Иннети хӕццӕ фӕрнӕй цӕрунбӕл ку архайӕн, уӕд е цӕхуӕн гъуддӕгтӕмӕ ӕркӕндзӕй, е нӕхемӕ дӕр дессаг фӕккӕсдзӕй. Еу хуӕрӕ уой ӕхебӕл бавзурста ӕма загъта: «Уотӕ мӕмӕ кастӕй, ӕма еу хуӕрӕ мӕ хӕццӕ уотӕ дзоруй, цума сувӕллон дӕн. Хъӕбӕр имӕ мӕстгун кодтон. Гъема мӕ маст фулдӕрӕй-фулдӕр кодта ӕма имӕ еуӕй-еухатт карзӕй дӕр исдзоринӕ. Уотӕ сагъӕс кодтон: „Кӕд мӕ е нӕ нимайуй, уӕд ӕй ӕз дӕр нӕ нимайдзӕн“».

Уой фӕсте еци хуӕрӕ ӕхебӕл дӕр сагъӕс кӕнун райдӕдта ӕма загъта: «Ба ’й лӕдӕрдтӕн, мӕхемӕ дӕр берӕ гъӕндзийнӕдтӕ ке ес, уой ӕма мӕхебӕл ӕрхудтӕн. Гъӕуама мӕ зундахаст раййивтайнӕ. Ӕз дӕр Йеговӕмӕ ракувтон ӕма ин мӕ сагъӕстӕ радзурдтон. Уой фӕсте еци хуӕрӕн минкъий лӕвар открытки хӕццӕ искодтон ӕма си рафинстон, мӕхе уотӕ ке дардтон, уобӕл хъӕбӕр ке фӕсмон кӕнун. Кӕрӕдземӕн рахъури кодтан, ӕма гъеууойадӕбӕл еци гъуддаг ниллух ӕй. Уой фӕсте нӕ астӕу уӕхӕн хабӕрттӕ некӕдбал адтӕй».

Фӕрнӕй цӕрун берети фӕндуй. Фал сӕрбӕрзонд ӕма сӕ бунатӕн ка фӕттӕрсуй, уӕхӕн адӕн ба еци фарнӕ хъӕбӕр ӕнцонтӕй фехалунцӕ, сӕ зӕрдӕмӕ ести ку нӕ фӕццӕуй, уӕд. Етӕ ӕнцӕ, Йеговӕн ка нӕ лӕггадӕ кӕнуй, уӕхӕн адӕн. Фал Хуцауи ном ка хӕссуй, уони астӕу ба гъӕуама алкӕддӕр уа фарнӕ ӕма еудзийнадӕ. Апостол Павел Хуцауи сугъдӕг хъаури разамундӕй финста: «Лигъстӕ [уин] кӕнун: цӕретӕ, ци цардмӕ хунд ӕрцудайтӕ, уомӕн аккагӕй ӕма алкӕддӕр уотӕ сӕрниллӕг, фӕлмӕн, берӕфӕразон, уарзондзийнади фӕрци кӕрӕдземӕн бухсетӕ, зӕрдиагӕй архайетӕ, Хуцауи сугъдӕг хъаурӕ ке дӕттуй, еци еудзийнади цӕрунбӕл ӕма кӕрӕдзебӕл баст уотӕ фарни тӕгтӕй» (Еф. 4:1–3). Еци «фарни тӕгтӕн» аргъ дӕр нӕййес. Мадта ни алкедӕр, ӕ бон ци ӕй, уой кӕнӕд, цӕмӕй еци тӕгтӕ фадардӕр кӕнонцӕ ӕма нин хуӕртӕй ма ӕнсувӕртӕй еске хӕццӕ ести зӕрдихудтӕ ку рауайа, уӕд кӕрӕдзей балӕдӕрунбӕл байархайӕн.