JEHOVAQA munan tukuywan allinta kausakuyta maskʼananchejta. Chayta ruwanapaj kallpachakojtinchejqa tukuywan allinta kausakusunchej. Ashkha runasqa, allinta kausakusqanchejta rikuspa Jehovaj testigosninman tukunku.

Uj yatiri runamanta parlarina. Payqa Madagascar suyupi may rejsisqa karqa. Rikorqataj Jehovaj testigosnin allinta kausakusqankuta. Nerqataj: “Maykʼajllapis uj iglesiaman yaykupusaj chayqa, Jehovaj testigosninman yaykupusaj”, nispa. Tiemponmanqa layqa ruwanasninta saqeporqa, killastataj kallpachakorqa qhariwarmi kausaynin Bibliaj nisqanman jina kananpaj. Chantá Jehovaj testigonman tukorqa, Jehovata yupaychananpaj. Pichus allinta kausakunanchejta munan.

Chay yatiri runa jina, sapa wata ashkha runasqa, Jehovaj testigosninman tukunku, congregacionpitaj tukuywan allinta kausakunku. Jinapis Biblia nin, congregacionpi pillawanpis envidianakojtinchej chayri siminakojtinchej, phiñanakuy kananta (Sant. 3:14-16). Yuyaychawanchejtaj mana phiñanakusta rikhurichinapaj, tukuywantaj allinta kausakunapaj imatachus ruwananchejta. Qhawarinachej imaynatachus wakin hermanos chay yuyaychaykunaman jina ruwasqankuta.

Chris nin: “Uj hermanowan trabajaj kani, manataj allintachu apanakoj kayku. Uj kuteqa, siminakushajta iskay runas taripawarqayku”, nispa.

Janet nin: “Piwanchus predicajpuni kani chay hermanaqa, jinallamanta manaña noqawan predicayta munarqachu, niña parlapayawarqapischu. Imajtinchus uj jinayasqanta mana yacharqanichu”, nispa.

Michael nin: “Uj kuti iskay hermanoswan ujllapi telefononejta parlarisharqani. Ujnin hermanoqa, tinkunakama nispa niwarqayku, colgamunchá nerqani. Chantá paypaj rimarqani. Jinapis chay hermanoqa, mana colgamusqachu ari. Tukuy ima nisqaytataj uyarisqa”, nispa.

Gary nin: “Iskay precursoras mana allintachu apanakusharqanku. Ujnenqa imitallamantapis chay ujta kʼamerqollaj. Wakintaj phiñanakusqankuta rikuspa llakikoj kanku”, nispa.

Chay problemasqa ichapis mana imapischu kasqanta yuyasunman. Jinapis manachus chay problemasninkuta allinchankuman karqa chayqa, sonqosninkuta astawanchá nanachinakunkuman karqa. Congregacionpi hermanostataj tʼaqanachinkuman karqa. Walejtachá paykuna Bibliaj yuyaychasqanman jina  ruwarqanku, ajinamantataj allinyakorqanku. Ima yuyaychaykunachus paykunata yanapasqanta qhawarina.

“Pajtataj ñampi phiñanakuspa maqanakushawajchej” (Gén. 45:24). Chaytaqa, José hermanosninman yuyaycharqa, tatankupaman kutinanku kashajtinku. Chay yuyaychayqa may sumajpuni. Phiñakuyninchejta mana ñitʼiykukuyta yachanchejchu chayqa, imitallamantapis phiñarpakusunchej, wajkunatapis phiñarpachillasunmantaj. Chrisqa reparakorqa, orgulloso kasqanrayku mana yuyaychanankuta munasqanta. Chaywanpis cambiayta munarqa. Chayrayku piwanchus phiñanakorqa chay hermanomanta perdonta mañakorqa. Maytataj kallpachakorqa phiñakuyninta ñitʼiykukunanpaj. Chay hermanotaj Chris cambiananpaj mayta kallpachakusqanta reparaytawan, paypis kikinta ruwarqa. Kunantaj iskayninku kusisqa kanku, Jehovatataj khuska sirvishanku.

“Mana yuyaychachikuspa, ima ruwanatapis wakichikusqaqa mana allinchu rin” (Pro. 15:22). Janetqa reparakorqa chay yuyaychayman jina ruwanan kasqanta, chayrayku paypaj phiñasqa kasharqa chay hermanawan parlarerqa. Tapurerqataj imaraykuchus phiñakusqanta. Qallariypi mana atillarqankuchu kʼachamanta parlapayanakuyta. Jinapis parlarisqankuman jina kʼachallamantaña parlarinakorqanku. Chay hermanaqa, repararqa phiñakusqanmanta mana Janet juchayojchu kasqanta. Chayrayku Janetmanta perdonta mañakorqa. Kunanqa watejmanta ujchasqa Jehovata sirvishanku.

“Altarman jaywanaykita apashaspachus yuyarikuwaj wawqeyki qampaj phiñasqa kasqanta chayqa, altarpa ñawpaqenman jaywanaykita saqey. Ñawpajta wawqeykiwanraj allinyakamuy” (Mat. 5:23, 24). Jesusqa chayta yuyaycharqa, uj orqopi runasman yachachishajtin. Michaelqa pesachikorqa chay ujnin hermanopaj mana allintachu parlasqanmanta. Chayraykutaj allinyakuyta munarqa. Llampʼu sonqowantaj chay hermanomanta perdonta mañakorqa. Chantá, ¿imataj karqa? Michael nin: “Hermanoyqa tukuy sonqo perdonawarqa”, nispa. Iskayninkutaj allinyakorqanku.

“Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej” (Col. 3:12-14). Iskay precursoras phiñanakusqankumanta parlarerqanchej, ¿icharí? Uj ancianoqa paykunata reparacherqa phiñanasqa kashasqankoqa, wajkunata pantachishasqanta. Chantapis nerqa: “¿Nipunichu paciencianakuwajchej? Paciencianakunkichej chayqa congregacionpi allin kausay kananpaj yanapakunkichej”, nispa. Paykunaqa, chay yuyaychayman jina ruwarqanku. Kunantaj allinta apanakunku, khuskataj Diosmanta willashallankupuni.

 Colosenses 3:12-14 versiculosqa noqanchejtapis yanapallawasunmantaj, pillapis sonqonchejta nanachiwajtinchej. Ashkha hermanosqa reparanku, llampʼu sonqo kaspa perdonayta atillasqankuta, wajkunaj pantasqasninkutapis qonqapuyta. Ajinata mana ruwayta atispaqa, Mateo 18:15 versiculoman jina ruwasunman. Chay versiculopi Jesusqa, pillapis contranchejpi jatun juchata ruwajtin, imatachus ruwananchejmanta parlasharqa. Jinapis chay yuyaychayqa, yanapallawasunmantaj pí hermanollawanpis problemanchej kajtin. Arí, pillawanpis allinyakunapajqa, llampʼu sonqo kana, kʼachamantataj parlarina.

Bibliapeqa, yanapanawanchejpaj jina waj yuyaychaykunatapis tarisunman. Chayman jina ruwanapajtaj kaykuna yanapawasunman: “Munakuyniyoj kay, kusikuyniyoj kay, sonqo tiyaykusqa kay, pacienciayoj kay, kʼacha sonqoyoj kay, kʼacha kay, creeyniyoj kay, llampʼu sonqoyoj kay, munayninchejwan mana atipachikoj kay ima” (Gál. 5:22, 23). Chaykunaqa yanapawasunchej allinta kausakunapaj, imaynatachus aceite uj maquinata yanapan allinta purinanpaj, ajinata.

Tukuypis mana kikinchu kanchej. Wakenqa aswan kʼacha kanchej, wakintaj aswan yuyayniyoj. Chantá ni pí kikintachu yuyanchej, nitaj kikintachu parlanchej. Chayrayku ichá wakinwan allinta kausakusunman, wakinwantaj mana. Uj hermano unaytaña anciano jina sirvej, nin: “Uj manchalitu runaqa, ichá mana atillanmanchu anchata parlaj runawan allinta kausakuyta. Chayraykutaj phiñanarqokunkuman”, nispa. Iskay runas mana kikintachu yuyajtinkupis allinta apanakunkuman. Apóstol Pedromantawan Juanmantawan parlarina. Bibliapi reparanchej, Pedroqa mana yuyaychakuspalla imatapis parlarparillasqanta. Juantaj allinta yuyaychakuspa imatapis parlasqanta. Paykuna mana kikinchu kajtinkupis, uj runa jinalla Diospaj sumajta llankʼarqanku (Hech. 8:14; Gál. 2:9). Chaymanta yachakunchej, wakin hermanoswan mana kikintachu  yuyajtinchejpis, paykunawan ujchasqa Jehovata sirviyta atisqanchejta.

Ichapis congregacionmanta uj hermano imastachus ruwasqan chayri imaynatachus parlasqan phiñachiwasunman. Ajina kajtin yuyarikuna Jesús tukuyninchejrayku wañusqanta, chayrayku chay hermanota munakuna kasqanta (Juan 13:34, 35; Rom. 5:6-8). Niraj chay hermanomanta karunchakushaspa chayri ni jaykʼaj amigonchej kananta nishaspa, kayta tapurikunachej: “¿Chay hermano imaynallamantapis Bibliaj yachachisqanwan churanakushanchu? ¿Sonqoyta nanachiytapunichu munashan? Chayri, ¿mana kikinta yuyasqayraykullachu paymanta mana allinta yuyashani? ¿Manachu imallatapis paymanta yachakuyman?”, nispa.

Hermanosmantaqa, imallatapis yachakusunmanpuni. Ichá uj hermano anchata parlanman. Chayrayku predicacionpi pillawanpis parlariyta atillanman. Paymanta yachakunapaj, paywan predicaj llojsisunman. Chantapis ichá uj hermano aswan kʼacha kanman, yanapananpajtaj churasqa kanman. Pay jinallataj noqanchejpis, abuelitosta, onqosqasta, pisichikojkunatapis yanaparisunman. Arí, wakin hermanoswan mana kikinchu kajtinchejpis, paykunamanta allin imasta yachakusunman, aswan ujchasqataj paykunawan kasunman. Mana amigosninchejmanpunichu tukojtinkupis, paykunawan allinta kausakuyta atisunchej, sonqo tiyasqataj kasunchej.

Evodiamanta, Sintiquemantawan parlarina. Paykunaqa, ñaupa tiempopi kausakorqanku. Ichapis mana kikintapunichu yuyaj kanku. Chayrayku apóstol Pabloqa paykunata nerqa “Señorpi uj yuyaylla kanankuta” (Fili. 4:2). Noqanchejpis apóstol Pablo nisqanman jina ruwana, congregacionpi tukuywan allinta kausakunapaj.

Wajkunapaj phiñasqa kasqanchejqa, uj huertapi qhora jina kanman. Chay qhorata mana tʼirarqojtinchejqa, wiñallanqapuni. Jinallataj sonqonchejmanta phiñanakuyta mana tʼirasunchu chayqa, congregacionpi  tʼaqanakuy kanqa. Jehová Diosta, hermanosninchejtapis munakunchej chayqa, congregacionpi tukuywan allinta kausakunapaj mayta kallpachakusunchej, wakinkuna jina mana yuyajtinchejpis.

Wajkunawan allinta kausakunapaj kallpachakusun chayqa, allinpuni riwasunchej. Uj hermana nerqa: “Uj hermanaqa, wawitata jina parlapayawaj, chaytaj mana gustawajchu. Sapa kuti wawata jina parlapayawasqanrayku phiñasqa parlapayaj kani. Yuyajtaj kani: ‘Payqa mana respetawanchu, noqapis nillataj respetasajchu’”, nispa.

Chaymantaraj reparakorqa, mana allintachu ruwashasqanta, nerqataj: “Pantashasqayta reparakorqani, noqallapajtaj phiñakorqani. Mana allintachu yuyasharqani, chaytataj cambianay karqa. Chaypajtaj Jehovamanta yanapata mañakorqani. Chantá hermanitapaj uj regalitota rantiporqani, uj cartitapitaj ‘perdonawayʼ nispa nerqani. Abrazanakorqayku phiñanakusqaykutataj qonqaporqayku. Chaymantaqa manaña ujtawan phiñanakorqaykuchu”, nispa.

Mundontinpi runasqa, tukuywan allinta kausakuyta munanku. Jinapis wakenqa, jatunchakusqankurayku chayri manaña pipis respetanankuta yuyasqankurayku, runa masinkuwan mana allinta apanakuyta atinkuchu. Jehovaj llajtanpirí mana chayta ruwanchejchu. Apóstol Pabloqa, Dios yuyaychasqanman jina kayta qhelqarqa: “Mañakuykichej imapajchus wajyasqa kasqaykichejman jina kausanaykichejta. Arí, kʼumuykukuywanpuni, llampʼu sonqowantaj kausaychej. Jinallataj pacienciayoj kaychej, purajmantataj munakuywan aguantanakuychej. Chantapis qankunapura allinta kausakuychej. Ujchasqallapuni kanaykichejpajtaj mayta kallpachakuychej. Imaraykuchus Diospa atiyninnejta ajina ujchasqa kashankichej”, nispa (Efe. 4:1-3). Ujchasqa kasqanchejqa may sumajpuni. Chayrayku ujchasqallapuni kananchejpaj pí hermanollawanpis problemanchej kajtin, allinyakuyta maskʼanapacha.