JEHOVÁ lakaskin pi kskujnin lhuwa xtapalh na li’akxilhaw takaksni chu naliskujaw xlakata na’anan uma. Akxni chuna natlawayaw xaxlikana kstalaninanin Cristo lipaxuwayaw lhuwa takaksni. Uma takaksni tlawa pi lhuwa latamanin naminkgo kkintamakxtumitkan.

Akgtum li’akxilhtit, chatum skuwana xalak Madagascar kaks lilakawa takaksni nema kgalhikgo xtatayananin Jehová. Lakpuwa: «Komo namin kilhtamaku xaklaksakli akgtum takanajla, wa uma naklaksaka». Titaxtulh kilhtamaku, makgxtakgli taskuwan, akglhuwa papa’ tapaxuwan tawilalh kxtamakgaxtokgat chuna la wan Biblia chu alistalh xtatayana Jehová litaxtulh.

Chuna la uma skuwana, lhuwa mil latamanin akgatunu kata tekgskgo kcongregación xla kstalaninanin Cristo takaksni nema lakaskinkgo. Biblia liwana wan pi lalakgsitsinikan chu latalatlawakan kcongregación tlawa pi nialhla nalatalalinkan chu wili lhuwa ta’akglhuwit (Sant. 3:14-16). Biblia nakinkamaxkiyan lakwan tastakyaw xlakata nakinkamakgtayayan ni nakgalhiyaw uma ta’akglhuwit chu nakgalhiyaw takaksni. Ka’akxilhwi la tlawakgonit makgapitsi uma tastakyaw.

«Nitlan xaktalalin chatum tala tiku akxtum xaktaskuja. Akgtum kilhtamaku, akxni xaklakilhnimaw, chatiy latamanin tanukgolh chu kinka’akxilhkgon la xaklamakglhuwimaw» (CHRIS).

«Chatum tala tiku ankgalhin akxtum xaktalichuwinan Dios kaj xalan nialh tsukulh kinta’an, chu asta nialh kixakgatli. Akit ni xakkatsi tuku xlakata» (JANET).

«Kinkgalhtutukan xaklatachuwinamaw ktelefono. Chatum wa pi aya x’ama, chu klakpuwa pi colgarlilh. Wa xlakata nitlan ktsukulh klichuwinan. Pero xla nitu xcolgarlinit chu kgaxmatli putum tuku kwa» (MICHAEL).

«Chatiy precursoras xalak congregación xkgalhikgo ta’akglhuwit. Chatum tsukulh kilhni a chatum. Chu xtakglhuwitkan xkamaxlajwani amakgapitsin» (GARY).

Umakgolh ta’akglhuwit max tasiya pi nitu wamputun. Pero nitlan x’ama kamamakgkatsini tiku x’akxilhmakgolh, chu x’ama laktlawa takaksni kcongregación. Pero lu tlan xlakata putum umakgolh natalan tlawakgolh tastakyaw xalak Biblia chu tawilapa takaksni. ¿Tuku tastakyaw xalak Biblia kamakgtayalh?

«Ni nalamakgasitsitayayatit minchatunukan ktiji» (Gén. 45:24). José kamaxkilh uma tastakyaw xnatalan akxni nina xlakgtaspitkgo xtlatkan. ¡Lu laktlan tachuwin! Komo chatum lataman nila machokgo xtasitsi, max natlawa pi amakgapitsin  nasitsikgo. Chris katsilh pi tlankajwa xwanit chu tuwa xmakgkatsi natlawa tuku xwanikgo amakgapitsin. Xlakata xlakgpaliputun xtayat, wanilh tala tiku xtata’akglhuwinit pi xtapatilh chu liskujli xlakata nalakgpali nitlan xtayat. Akxni tala akxilhli pi Chris xliskujma xlakata nalakgpali xtayat, xla nachuna tlawalh. La uku, lu paxuwakgo chu akxtum skujnanikgo Jehová.

«Nitlan kitaxtu tuku tlawaputunkan komo ni pulana liwana chuwinankan» (Prov. 15:22). Janet lakpuwa pi xlikgalhakgaxmatat xwanit uma tastakyaw, wa xlakata tachuwinalh tala. Akxni xtachuwinama, Janet kgalhskilh tala tuku xlakata xsitsinit. Xapulana, maski kgalhchuwinankgolh ni lu tlan kitaxtulh, pero uma tatlanilh akxni lakatitum lichuwinankgolh uma ta’akglhuwit. Tala katsilh pi ni chuna x’akgatekgsnit tuku xkgaxmatnit nema nipara tsinu xkatsi Janet, wa xlakata skinilh pi xtapatilh. Chu amakgtum akxtum skujnanikgo Jehová.

«Pus chuna, wa mpala pi xlita milikaxtlawan nkaltar, na anta xlakapastakti mintala mpi talamakasitsiya, anta nkamakgaxtakgti milikaxtlawan kxlakatin altar, kapit, na pulanaj kamakgapaxuwa mintala lantla sitsinit» (Mat. 5:23, 24). Max lakapastakaw uma tastakyaw tuku mastalh Jesús kTa’akgchuwin xalak Sipi. Michael nitlan limakgkatsilh akxni katsilh pi nitlan xlikatsininit xtala. Pero xlakpuwanit naliskuja xlakata nakgalhiparakgo takaksni. Tataktujulh chu tachuwinalh tala pi lu nitlan xlimakgkatsi. ¿Tuku kitaxtulh? Michael wan: «Kintala xliputum xnaku kintapatilh». Tlan latalalimparakgolh.

«Kalapaxuwanalipinitit, chu na nalamatsankgananiyatit nchatunu amakgapitsin lapi wi ntilamakgasitsiyatit» (Col. 3:12-14). ¿Lakapastaka chatiy precursores tiku xlamakglhuwikgo akxni xlichuwinankgo Dios? Chatum kgolotsin kamakgtayalh na’akxilhkgo pi nitlan xkamamakgkatsinimakgolh amakgapitsin. Kakgalhskilh komo nila xlatapatikgo xchatunukan chu chuna tlan xmakgtayanankgolh xlakata x’analh takaksni kcongregación. Natalan makgamakglhtinankgolh xtastakyaw kgolotsin. Xchatiykan lu tlan latalalin chu chuntiya lakxtum lichuwinankgo xalakwan tamakatsin.

Tastakyaw xla Colosenses 3:12-14, nema aku likgalhtawakgaw, tlan nakinkamakgtayayan komo wi tiku nitlan tuku nakinkatlawaniyan. Lhuwa latamanin akxilhkgonit pi komo nataktujukgo tlan natapatinankgo chu napatsankgakgo. Pero komo na’akxilhaw pi nila tlawayaw uma, tlan nastalaniyaw xtastakyaw Mateo 18:15. Maski Jesús xlichuwinama tuku kilitlawatkan akxni wi tiku tlawa lanka talakgalhin, uma tastakyaw na nakinkamakgtayayan akxni takgalhiyaw  ta’akglhuwit chatum kintalakan. Wa xlakata, kataktujuw chu tlan kakalikatsiniw amakgapitsin chu katachuwinaw kintalakan xlakata nalakkaxtlawayaw ta’akglhuwit.

Biblia lhuwa atanu tastakyaw limin nema nakinkamakgtayayan. Pero xlakata nakinkamakgtayayan kilimasiyatkan tayat tuku masta espíritu santo: «ntapaxkin, chu ntapaxuwan, chu ntatanksni, chu ntapaxuwanaliyan, chu ntakgayajni, chu litlan, chu ntakanajla. Chu ntasmalhwan, chu xatalhkan kmilatamatkan; wa xpalakata yuma nkatuwaj, ni anan limapakgsin mpala ni natlawayatit» (Gál. 5:22, 23). Xtachuna la aceite tlawa pi akgtum máquina liwana naskuja, umakgolh lakwan tayat tlawa pi tlan nalatalalinkan.

Kinchatunukan tanu tanu la likatsiyaw. Kimputumkan tanu tanu tayat kgalhiyaw, la lakapastakaw chu la chuwinanaw. Uma tlawa pi tlan nakatalalinaw amakgapitsin. Pero chuna la tanu tanu likatsiyaw max nawili ta’akglhuwit. Chatum kgolotsin tiku lhuwata kata la skujnanima Dios, wan: «Chatum lataman tiku xamaxana max ni lu tlan katimakgkatsilh akxtum natatawila tiku ni maxanan. Maski max uma natasiya pi ni lu xlakaskinka, max nawili lhuwa ta’akglhuwit». Wa xlakata, ¿wamputun uma pi chatiy lataman tiku ni lakxtum xtayatkan nila katilatalalilh? Kalilakpuwaw chatiy apóstoles: Pedro chu Juan. Chuna la wan Biblia, lakpuwanaw pi Pedro lakapala tuku xwan chu lakapala ksitsi. Chu xpalakata Juan, min kkintalakapastaknikan chatum chixku tiku xapaxkina chu ni kaj akglakgwa tuku xmasiya. Umakgolh apóstoles ni lakxtum xlikatsikgo, pero lu tlan akxtum kskujkgo (Hech. 8:14; Gál. 2:9). Xli’akxilhtitkan masiya pi kstalaninanin Cristo xala uku tlan akxtum naskujaw, maski tanu tanu la likatsiyaw.

Max wi kcongregación tiku wan o tlawa tuku  ni lakgatiyaw. Maski chuna, katsiyaw pi Cristo nilh xpalakata uma tala chu kilipaxkitkan (Juan 13:34, 35; Rom. 5:6-8). Xlakata ni nalakgmakganaw o nalakpuwanaw pi nila x’amigo katilitaxtuw, kakinkakgalhskinkan: «¿Tlawama tala tuku lakatsala Biblia? ¿Kintlawaniputun tuku nitlan? O ¿kaj xlakata tanu tanu tayat kkgalhiyaw? Nachuna, ¿tuku tlan nakkatsini xlakata xalakwan xtayat?».

Uma xa’awatiya takgalhskinin lu xlakaskinka. Komo tiku lu lakgati chuwinan, chu akinin ni lu chuwinanaw, kalilakpuwaw la ni tuwa matsuki takgalhchuwin akxni lichuwinan Dios. Max tlan nawaniyaw pi lakxtum xtalichuwinaw Dios chu na’akxilhaw tuku max tlan namakglhkatiyaw. Komo tala lu xalakgalhamana nixawa akinin, ¿tlan nakatsiniyaw xtayat chu namakgkatsiyaw tapaxuwan nema limin akxni wi tuku nakamaxkiyaw tiku linkgoya kata, tatatlanin o tiku wi tuku lakaskinkgo? Tuku tlakg xlakaskinka wa: pi maski tanu tanu la likatsiyaw, tlan natalalinaw kintalakan komo wa na’akxilhaw tuku tlan tayat kgalhi. Maski ni lu ki’amigojkan nawan, uma nakinkamakgtayayan tlakg tlan natalalinaw, nakgalhiyaw takaksni kinchatunukan chu nalipaxuwayaw takaksni kcongregación.

Evodia chu Síntique chatiy kstalaninanin Cristo tiku latamakgolh kxapulana siglo. Max tanu tanu la xlikatsikgo. Maski chuna, apóstol Pablo kamakgpuwantinilh pi «kapaxuwanatawilakgolh mpi makxtum tapakgsinikgoy nkimPuchinakan» (Filip. 4:2). ¿Akinin nachuna tlawayaw xlakata natawila takaksni kcongregación?

Nitlan lakpuwankan xpalakata amakgapitsin, tatalakxtumi ni xatlan tuwan k’akgtum jardín, nema chuntiya nastaka komo ni napulhuya. Xtachuna akxni nixatlan tapuwan tsuku staka kxnaku chatum lataman, putum congregación lipatinan. Pero komo paxkiyaw Jehová chu kinatalankan,  naliskujaw xlakata natawila takaksni kcongregación maski tanu tanu la likatsiyaw.

Komo naliskujaw xlakata kintayatkan ni nalaktlawa takaksni, max kaks nalilakawanaw la nakitaxtu. Kalilakpuwaw tuku titaxtulh uma tala: «Kmakgkatsilh pi chatum tala xkilikatsinima la komo chatum aktsu tsumat, chu uma nitlan xkimamakgkatsini. Komo tlakg tsukulh kimakgasitsi, nitlan tsukulh klikatsini. Klakpuwa: “Xla ni kimaxki kakni chuna la xlilat, wa xlakata akit nani ktimaxkilh kakni”».

Alistalh uma tala tsukulh lilakpuwan xtayat: «Ktsukulh k’akxilha tuku nixatlan kintayat chu uma lu nitlan kimamakgkatsinilh. Ka’akxilhli pi kililakgpalit xwanit kintalakapastakni. Ktlawanilh oración Jehová xlakata uma. Alistalh, ktamawanilh akgtum aktsu tamaskiwin tala chu ktsokgnilh akgtum nota, niku kwanilh pi xkintapatilh xlakata nixatlan kintayat. Klakgpixtiw o klasnatwi chu kpatsankgaw tuku nitlan xlanit. Asta uku nialh kgalhinitaw ta’akglhuwit».

Latamanin lu lakaskinkgo takaksni. Pero, xlakata laktlankajwa o max makgkatsikgo pi kalipekua wilakgo, lhuwa talatlawanankgo. Uma tayat litalakgapasa kakilhtamaku, pero kxkachikin Jehová, xliʼanat takaksni chu akxtum xlitawilat. Jehová malakpuwanilh Pablo xlakata xtsokgli: «Kkaskiniyan litlan mpi xtachuna nalatapayatit wa lantlata xlilat wa ntu nkalitasanikanitantit xlakgskgatan Dios nawanatit. Luwa anan ntataktujun, chu ntasmalhwan, chu ntapaxuwanaliyan ntu nalakgalhiniyatit nchatunu amakgapitsin lantla lapaxkiyatit. Kana wixin, kuentaj kakatlawakantit mpi nitu nakalaktlawaniyan wa ntu makxtum kalitlawanitan spiritu, xali’ankgalhin katapinitit ni namakgaxtakgatit ntatanksni wa ntu makxtum kinkatlawanitan» (Efes. 4:1-3). Uma tuku «makxtum kinkatlawanitan» lu lanka xtapalh. Wa xlakata, aktanks kalilakpuwaw namatliwakglhaw uma tayat akxni nalakkaxtlawayaw tuku ta’akglhuwit nakatakgalhiyaw kinatalankan.