JIHOVA ỌGHẸNẸ guọnọre nẹ Inenikristi vwẹ ẹro ọghanghanre vwo ni ufuoma. Ọ guọnọre nẹ ufuoma dia ẹbẹre ọvo kiriguo rẹ akpeyeren avwanre. Avwanre da dia ihwo rẹ ufuoma, kọ sa nẹrhẹ ufuoma dia evunrẹ ukoko na. Ọnana ko se si ihwo re guọnọ ufuoma rhe ukoko na.

Kerẹ udje, ọboepha ọvo ra nabọ riẹn vwẹ Madagascar vwo oniso rẹ oyerinkugbe rọhẹ uvwre rẹ Iseri rẹ Jihova. Ọ da ta vwẹ ẹwẹn rọyen, ‘Me da guọnọ kpo ẹga, ọnana yen me cha ra.’ Ọke vwọ yanran na, o de siobọnu ephaẹbọ rọyen, ọ da ghwọrọ emeranvwe evo vwo ru orọnvwe rọyen nene oborẹ Baibol na tare, ọ da rhe dia odibo rẹ Jihova, Ọghẹnẹ rẹ ufuoma na.

Kerẹ ọshare yena, kukpe kukpe yen ihwo buebun vwọ mrẹ nẹ ukoko na vwo ufuoma rẹ ayen guọnọ. Ẹkẹvuọvo, Baibol na tarọ phephẹn nẹ “omẹriọ” vẹ “ohẹriẹ” sa guọghọ ufuoma rọhẹ ukoko na je so okpetu vwẹ evun rọyen. (Jems 3:14-16) Ọ vwerhoma nẹ Baibol na je kẹ avwanre uchebro kpahen obo ra sa vwọ kẹnoma kẹ ebẹnbẹn tiọyen rere a sa vwọ sẹro rẹ ufuoma na. A sa vwọ nabọ dje fiotọ, e jẹ a fuẹrẹn ikuegbe evo rẹ oborerhiẹromrẹ dẹn.

“Kọke kọke yen me vẹ oniọvo ọvo ro nenuvwe ruiruo vwo vwo ẹghwọ. O vwo ẹdẹ ọvo rẹ avwanre vwọ van kuẹ ohwohwo, ihwo ivẹ da ro ọfisi na ayen da mrẹ avwanre re kunu.”—CHRIS.

“Oniọvo aye ọvo rẹ me vẹ ọyen kpo aghwoghwo ọkieje, da dobọ rẹ ọrhuẹrẹphiyotọ na ji kpregede. Ọ rha je ta ọta kẹ vwẹ-ẹ. Jẹ me riẹn oboresorọ-ọ.”—JANET.

“Avwanre ihwo erha vwọ ta ota vwẹ ifonu ẹdẹ ọvo, ọvo usun rẹ avwanre da tanẹ ovwan todẹ, mi de roro nẹ o fun ifonu rọyen re. Ke me ta erharhe eta kpahọn kẹ ohwo rivẹ na, jẹ me riẹnre nẹ ohwo rẹsosuọ na je kerhọ-ọ kidie o ji rhi fun ifonu rọye-en.”—MICHAEL.

“Vwẹ ukoko avwanre, o vwo ekobaro ivẹ ri rhi vwo ẹghwọ. Ọvo kọ hanrhe ọ ro chekọ. Oma vwerhen ihwo efa kpahen unuẹkọ rayen na-a.”—GARY.

Wo se no nẹ enana ẹghwọ itete. Ẹkẹvuọvo, ẹdia sansan nana sa so ebẹnbẹn rode kẹ ihwo ro djobọte na, e je sa dia imuoshọ kẹ oyerinkugbe rayen vẹ Jihova. Oma cha vwerhen owẹ vwọ riẹn nẹ iniọvo eshare vẹ eya nana rhuẹrẹ ẹghwọ rayen phiyọ, ayen  eje reyọ iji rẹ Baibol na vwo ruiruo. Iji vọ vwẹ Baibol na yen wo rorori nẹ ayen vwo ruiruo rọ nabọ wian kẹ ayen?

“Wa ghwọ vwẹ idjerhe rẹ.” (Jẹn. 45:24) Ọnana uchebro rẹ Josẹf vwọ kẹ iniọvo rọyen ọke rẹ ayen vwo rhivwin kpo. Eta yena vọnre vẹ aghwanre mamọ! Ohwo rọ fobọ muophu ro se sun ophu rọye-en, sa nẹrhẹ ivun miovwo ihwo re riarierẹ. Chris da rhe mrẹvughe nẹ ebẹnbẹn ro vwori yehẹ omaephuo kugbe ra vwọ sen odjekẹ. O de rhi yovwunu kẹ oniọvo rọ vẹ ọyen gba kunu ọkeneje na, ọ da je davwẹngba ro vwo sun ophu rọyen kidie ọ guọnọ ru ewene. Oniọvo na je vwọ mrẹ ẹgbaẹdavwọn rẹ Chris, o de ji ru ewene komobọ. Asaọkiephana, ayen ga Jihova kuẹgbe sasasa.

“Ọvwiroro rha hẹ asa-an emu ejobi ko she chọ.” (Isẹ 15:22) Janet de brorhiẹn nẹ ofori nẹ ọ reyọ uyota na vwo te ubiudu. O de bru oniọvo ochekọ na ra rere ayen ta ota na. Ọke rẹ ayen vwọ ta ota, Janet da vuẹ oniọvo na nẹ o rhievun vuẹ ọyen kpahen obo ri miovwo ivun na. Ẹsosuọ ota rayen na fi unuẹkọ, ẹkẹvuọvo ayen da rhe vwẹ unu kpotọ ta ota na. Oniọvo na da rhe mrẹvughe nẹ ọyen vwo ororochọ kpahen ota rọ tobọ te Janet kakaka-a. O de rhi yovwunu kẹ, ayen da rhoma rhe wian kugbe vwẹ ẹga rẹ Jihova.

“Wo de ze izobo wẹn vwẹ enu rẹ agbada, wọ da karohọ nẹ wọ vẹ omoni wẹ vwo ota, yan jẹ izobo wẹn vwo vwẹ enu rẹ agbada na, rere wọ yanran, re wọ vẹ omoni wẹ na rhuẹrẹ kugbe tavwe rere wo ki rhi ze izobo wẹn.” (Mat. 5:23, 24) Jesu vwẹ uchebro yena vwọphia vwẹ Ota rọ tare vwẹ enu rẹ Ugbenu. Ọ da Michael mamọ ọke ro vwo roro kpahen eta ebrabra rọ ta kpahen oniọvo na. O de brorhiẹn nẹ ọyen cha rhuẹrẹ ẹdia na phiyọ. O de bru oniọvo na ra re yovwunu kẹ. Die kọyen phiare? Michael da ta: “Oniọvo na de vwo ghovwo uvwe.” Ayen da rhoma rhe dia igbeyan.

“Ohwohwo chirako kẹ ohwohwo, fobọ si ophu nẹ evun rere ohwohwo vwo ghovwo ohwohwo nẹ otọ rẹ evun rhe.” (Kọl. 3:12-14) Ọkpako ọvo da vwẹ ukẹcha kẹ ekobaro ivẹ na, ọ vuẹ ayen nẹ ayen roro kpahen enọ nana: ‘Ofori nẹ avwanre so ọmiaovwẹ kẹ ihwo efa fikirẹ ẹghwọ rẹ avwanre? O vwo oboresorọ avwanre vwo jẹ ohwohwo evwoghovwo rere a ga Jihova kugbe vwọrẹ ufuoma?’ Ayen reyọ uchebro rẹ ọkpako na vwo ruiruo. Asaọkiephana, ayen nabọ mrẹ omavwerhovwẹn vwẹ iruo aghwoghwo rayen.

 Ohwo de gbe we ku, odjekẹ rọhẹ Kọlose 3:12-14 na sa chọn wẹ uko. Ihwo buebun mrẹvughe nẹ omaevwokpotọ sa nẹrhẹ ayen vwo ghovwo oniọvo rayen je kpairoro vrẹ obo re phiare. Wọ sa reyọ uchebro rọhẹ Matiu 18:15 vwo ruiruo siẹrẹ ẹgbaẹdavwọn ẹsosuọ na rha wia-an? Iji rẹ Jesu yena shekpahen obo re ru siẹrẹ ohwo de ru umwemwu ọgangan vwọso oniọvo rọyen. Ẹkẹvuọvo, a je sa reyọ vwo ruiruo siẹrẹ ẹghwọ da vwomaphia. Bru oniọvo wẹn ra vwọrẹ omaevwokpotọ rere ovwan rhuẹrẹ ota na phiyọ.

Vwọrẹ uyota, Baibol na kẹ avwanre owọẹjẹ evo. Owọẹjẹ nana sa vwọ wian kẹ avwanre, ofori nẹ e dje “omamọ rẹ [“ẹwẹn,” NW ] na” phia ro churobọ si “ẹguọnọ, aghọghọ, ufuoma, ako echiro, ufuefu, uyoyovwi, esegbuyota, dẹndẹn, oma echiro.” (Gal. 5:22, 23) Kirobo ra vwẹ evwri ghworo ijini rere ọ vwọ riẹn wian, ọtiọyen iruemu nana toroba oyerinkugbe rẹ ufuoma.

Dede nẹ uruemu sansan rẹ avwanre ohwo vuọvo vwori se toroba uvi oyerinkugbe vwẹ ukoko na, ọ je sa so ebẹnbẹn. Ọkpako ọvo ro tedje da ta: “Ọ sa dia bẹnbẹn kẹ ohwo rẹ oma vua ro vwo mu ugbeyan vẹ ohwo rẹ oma vua-a. Dede nẹ e se ni ofẹnẹ rọhẹ uvwre rayen na kuẹrofia, ọ sa so ebẹnbẹn.” Wo rorori nẹ ẹghwọ sa vwomaphia vwẹ uvwre rẹ ihwo rẹ uruemu rayen fẹnẹre? E jẹ a fuẹrẹn ikuegbe rẹ iyinkọn ivẹ. Oka rẹ ohwo vọ yen Pita hepha? Wọ sa tanẹ Pita ohwo vẹ uduoyivwin, ro brokpakpa ruẹ kemu kemu. Kẹ Jọn vwo? Wọ sa tanẹ Jọn, ọyen ohwo ro vwo ẹguọnọ, rọ je nabọ jomaotọ ta ota. Ọyena sa ghene dia uyota kpahen iyinkọn ivẹ nana. Ọ họhọre nẹ uruemu rayen ghene fẹnẹ.  Dedena, ayen wian kugbe. (Iruo 8:14; Gal. 2:9) Ọtiọyena, iniọvo ri vwo uruemu re fẹnẹre nonẹna je sa wian kugbe.

Ọ sa dianẹ oniọvo ọvo hẹ ukoko wẹn rẹ eta yẹrẹ uruemu rọyen ghwe je we-e. Wọ vwọ riẹn nẹ Kristi ji ghwu kẹ na, ko fori nẹ wo dje ẹguọnọ kẹ. (Jọn 13:34, 35; Rom 5:6-8) Ukperẹ wo vwo chukokuo, nọ oma wẹn: ‘Oniọvo mẹ na ghini ruẹ oborẹ Baibol na vwọso? Arogba yen o vwo gbe vwe kuẹ na? Gbanẹ uruemu avwanre yen de fẹnẹ?’ O ji fo nẹ wo roro kpahen onọ nana: ‘Ọvọ usun rẹ omamọ uruemu ro vwori yen je vwe?’

Onọ rọ koba na fo obo re roro kpahen. Ohwo na da dia ọgbota jẹ wẹwẹ ohwo ofuefu, roro kpahen obo rọ sa vwẹ ota rọyen na vwọ ro ihwo vwẹ aghwoghwo. Wo se vwo ọrhuẹrẹphiyotọ wẹ vẹ ọyen vwọ wian vwẹ aghwoghwo rere wo yono mie. Ọ da dianẹ o ruẹse kẹ ihwo mamọ jẹ wẹwẹ ohwo rọ kẹkẹ obọ, ofori nẹ wo vwo oniso rẹ aghọghọ rọ mrẹ fikirẹ ukẹcha rọ vwọ kẹ ihwo re kpakore, e re muọga kugbe i ri ghwe vwo igho-o. Obo ra ta na ke ọna, ọ da tobọ dianẹ ovwan vwo iruemu re fẹnẹre, wọ vẹ oniọvo wẹn tẹnrovi erhuvwu rọhẹ oma rẹ ovwan rere o si ovwan kẹrẹ ohwohwo. Ọ dia ọnana cha ghwa nẹrhẹ ovwan dia uvi rẹ igbeya-an, jẹ o che si ovwan kẹrẹ ohwohwo ji toroba ufuoma rẹ ovwan vẹ ukoko na.

Ọ sa dianẹ Eyudia vẹ Sintiki vwo iruemu re fẹnẹre. Ẹkẹvuọvo, ọyinkọn Pọl vuẹ ayen nẹ ayen “ku evun gbe vwẹ odẹ rẹ Ọrovwohwo.” (Fil. 4:2) Wo ji che nene uchebro nana je davwẹngba wẹn eje vwọ sẹro ufuoma?

Kerẹ odi rọ djẹ vwẹ ogba rẹ idodo, orharhe ẹwẹn re vwo kpahen ihwo efa sa tan awọ muotọ vwẹ ẹwẹn avwanre siẹrẹ  e rhe ghwie no-o. Ẹwẹn rẹ utuoma da hẹ evunrẹ ubiudu rẹ ohwo, o se djobọte ufuoma rẹ ukoko na. Ẹguọnọ re vwo kpahen Jihova vẹ iniọvo na che mu avwanre vwọ davwẹngba eje rere a kẹnoma kẹ ẹghwọ ro se gbowọphiyọ ufuoma rẹ ihwo rẹ Ọghẹnẹ.

A da rhuẹrẹ ẹghwọ phiyọ vẹ ẹwẹn rẹ ufuoma, erere ro che norhe se gbewunu. Roro kpahen udje rẹ oniọvo ọvo, ọ tare nẹ, “Mi no nẹ oniọvo aye ọvo vwẹ ẹro rẹ ọmọboba vwo ni vwe. Ọnana kpokpo uvwe ẹwẹn mamọ. Ke me kpahen eta kẹ kprekpre, kidie ivun rọyen miovwo uvwe gangan. Ki mi roro, ‘O rhe muọghọ kẹ vwẹ na-a, mi ji che muọghọ kẹ-ẹ.’”

Oniọvo nana de rhi brevun kpo iroro. “Me da rhe mrẹ ẹdia mi de ji shekpotọ, ọ da vwẹ mamọ. Me rhe mrẹvughe nẹ ofori nẹ mi wene iroro mẹ. Me vwọ nẹrhovwo kẹ Jihova nu, me da dẹ orọnvwọn ọvo kẹ oniọvo aye na, ji si imileta nene okẹ na rẹ mi vwo yovwunu kẹ fikirẹ uruemu mẹ. Avwanre da gbanọ ohwohwo ji brorhiẹn ra vwọ kpairoro vrẹ obo re phiare na. Avwanre ji rhi vwo ẹghwọ ọfa nẹ ọke yena rhe-e.”

Ihwo guọnọ ufuoma mamọ. Ẹkẹvuọvo, ayen de hirharoku obo ri se djobọte ẹdia vẹ ọrho rayen, kẹ ayen rhoma ruẹ obo re sa so ẹghwọ. Ọtiọyen ọ hepha kẹ ihwo buebun re ga Jihova-a, ẹkẹvuọvo ofori nẹ ufuoma vẹ oyerinkugbe dia uvwre rẹ idibo rẹ Ọghẹnẹ. Ẹwẹn ọfuanfon na de mu Pọl vwo si: “Mẹvwẹ . . . nabọ rẹ ovwan rere ovwan yere eyere ro fori kẹ use nana re se ovwan phihọ na vẹ omaevwokpotọ kugbe edẹndẹn, vẹ akoechiro, ohwohwo chirako rẹ ohwohwo vwẹ evun rẹ ẹguọnọ, pharhe ra vwọ yọnre okugbe rẹ [“ẹwẹn,” NW ] na vwẹ ẹguọnọ rẹ ufuoma.” (Ẹfe. 4:1-3) “Ufuoma” nana pha ghanghanre mamọ. E jẹ a sẹro rọyen, ji muegbe ra vwọ rhuẹrẹ ebẹnbẹn eje re vwo vwomaphia.