GIN-AAGHAT ni Jehova nga Dios an mga Kristiano nga pabilhan an kamurayawan, ngan magin importante ito nga bahin han aton kinabuhi. Tungod han aton pagin mamurayawon, nagpapahimulos hin hura nga kamurayawan an tinuod nga mga magsiringba. Nabulig ini nga madani ha Kristiano nga kongregasyon adton mga naghihingyap hin kamurayawan.

Pananglitan, naobserbaran han usa nga kilala nga tambalan ha Madagascar an pagkaurosa han mga Saksi ni Jehova. Nagsiring hiya ha iya kalugaringon, ‘Kon karuyag ko magin membro hin usa nga relihiyon, ini an akon pipilion.’ Paglabay han panahon, ginbayaan niya an iya espiritistiko nga mga buhat, gin-asikaso niya ha sulod hin pipira ka bulan an iya diri Kasuratanhon nga pag-asawa, ngan nagin magsiringba ni Jehova, an Dios han kamurayawan.

Pariho hito nga tawo, kada tuig, nabibilngan han yinukot nga indibiduwal an kamurayawan nga ira gud ginhihingyap dida ha Kristiano nga kongregasyon. Pero iginpapatin-aw han Biblia nga an “pangabugho” ngan ‘araway’ ha kongregasyon mahimo makadaot ha pagkamagsarangkay ngan magresulta hin kasamok. (San. 3:14-16) Mapasalamaton kita nga an Biblia naghahatag liwat hin maaramon nga giya kon paonan-o malilikyan an sugad nga mga problema ngan matitipigan an kamurayawan. Pero antes naton ito paghisgotan, tagdon anay naton an pipira nga kahimtang nga tinuod nga nahitatabo.

“Nakukurian ako pakig-upod ha usa nga bugto nga akon katrabaho. Han nagsinggitay kami, may dumaop nga duha nga tawo ngan nakita nira an amon paglantugi.”​—CHRIS.

“Tigda la nga waray na makig-upod ha akon ha pagministeryo an sister nga kasagaran ko nga nakakaupod ha pagsangyaw. Ngan waray na niya ako kaistoryaha. Diri ako maaram kon kay ano.”​—JANET.

“Tulo kami nga nag-iistorya ha telepono. An usa nagsiring nga ibubutang na niya an telepono, ngan kahuna ko nga waray na hiya. Katapos, nagyakan ako hin negatibo mahitungod ha iya ha usa pa nga akon kaistorya, pero waray pa ngay-an niya ibutang an telepono.”​—MICHAEL.

“Ha amon kongregasyon, may duha nga payunir nga nagkaada diri pagsinabtanay. Naglantugi hira, ngan an ira paglantugi nakapaluya ha iba.”​—GARY.

Bangin hunahunaon mo nga diri man sugad kaseryoso ito nga mga sitwasyon. Pero mahimo ito magkaada nagpapadayon nga maraot nga epekto ha emosyon ngan espirituwalidad han mga nahidadabi. Kondi malilipay ka ha paghibaro nga naibalik hini nga kabugtoan an kamurayawan kay gin-aplikar nira an giya han Biblia. Ano daw la nga mga prinsipyo ha Biblia an nakabulig ha ira?

“Ayaw kamo pag-aruaraway dida han dalan.” (Gen. 45:24, Maupay nga Sumat) Ito an iginsagdon  ni Jose ha iya kabugtoan nga tibalik na ha ira tatay. Maaramon gud ito nga iya sagdon! Kon diri ginkukontrol han usa an iya inaabat ngan madali hiya masina, mahimo niya maaghat an iba nga masina liwat. Nasantop ni Chris nga kaluyahan niya an pagin mapahitas-on ngan diri pagkarawat hin sagdon. Tungod kay karuyag niya magbag-o, nangaro hiya hin pasaylo ha bugto nga iya nakalantugi. Katapos, nangalimbasog liwat hiya nga kontrolon an iya kasina. Han nakita han katrabaho ni Chris an iya paningkamot, naghimo liwat an iya katrabaho hin mga pagbag-o. Yana, malipayon hira nga magkaupod ha pag-alagad kan Jehova.

“Kon hain an waray kasaragdonan, an mga tinguha napapakyas.” (Prob. 15:22) Nasantop ni Janet nga kinahanglan gud niya iaplikar ini nga kamatuoran. Nagdesisyon hiya nga kaistoryahon an sister. Ha ira pag-istorya, mataktika nga gin-aghat niya an sister nga mag-istorya mahitungod han iya nasisinahan. Ha tinikangan han ira pag-istorya, pariho hira nag-aalang, pero nagtikaopay ito samtang gin-iistoryahan nira an ira problema ha kalmado nga paagi. Nasabtan han sister nga sayop an iya paghunahuna han usa nga butang nga waray ngani kalabotan hi Janet. Nangaro an sister hin pasaylo kan Janet, ngan magkaupod na liwat hira ha pag-alagad kan Jehova.

“Kon maghahalad ka ngan nahinumdoman mo nga an imo bugto may reklamo ha imo, bayai an imo halad ha halaran ngan kadtoa an imo bugto. Pakigtuhay anay ha iya.” (Mat. 5:23, 24) Bangin mahinumdoman mo nga ito nga sagdon iginhatag ni Jesus ha iya Sermon ha Bukid. Nasubo gud hi Michael han nasantop niya nga waray hiya magpakita hin konsiderasyon ngan maopay nga panggawi. Determinado hiya nga maibalik an kamurayawan. Personal niya nga ginkaistorya an bugto nga iya napasubo ngan mapainubsanon nga nangaro hin pasaylo. Ano an nagin resulta? Hi Michael nagsiring, “Kinasingkasing nga ginpasaylo ako han akon bugto.” Nahibalik an ira pagkamagsangkay.

“Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba.” (Col. 3:12-14) May kalabotan han duha nga mag-iha na nga payunir, ginbuligan hira han usa nga mahigugmaon nga tigurang nga pamalandungon ini nga mga pakiana: ‘May katungod ba kita nga duha nga mapasubo an iba tungod han aton diri pagsinabtanay? May makatadunganon ba kita nga rason nga diri magpasaylo ha kada tagsa ngan padayon nga mag-alagad kan Jehova nga mamurayawon?’ Ginkarawat nira an sagdon han tigurang ngan igin-aplikar ito. Yana, malipayon na hira nga magkaupod ha pagsangyaw han maopay nga sumat.

An pag-aplikar han gin-unabi pa la nga sagdon ha Colosas 3:12-14, bangin amo an siyahan nga maopay nga sundon kon may nakapasubo ha imo.  Napamatud-an han damu nga an pagin mapainubsanon nabulig nga magin masayon an pagpasaylo ngan paglimot ha problema. Kondi anoman kon nangalimbasog na kita nga pasayloon hiya pero baga hin nagpapadayon pa gihapon an problema? Mahimo ba naton iaplikar an prinsipyo ha Mateo 18:15? Ini nga sagdon ni Jesus naghihisgot han pitad nga hihimoon han usa kon nakabuhat hiya hin seryoso nga sala ha iba. Pero an prinsipyo hito bangin amo an kinahanglan mo sundon. Pakig-istorya ha imo bugto; hisguti an problema ngan sulbara ito ha buotan ngan mapainubsanon nga paagi.

An Biblia nagtatagana hin iba pa nga praktikal nga giya. Basi magin epektibo ini nga mga giya, kinahanglan mo ipakita “an bunga han espiritu” nga “amo an gugma, kalipay, kamurayawan, hilawig nga pagpailob, pagkabuotan, pagkamaopay, pagtoo, pagkamalumo, ngan pagpugong ha kalugaringon.” (Gal. 5:22, 23) Pariho hin asyete nga nagpapaopay han andar han usa nga makina, ito nga mag-opay nga kalidad nabulig nga magin mas masayon an pakigmurayaw.

An personalidad​—mga kalidad han kada tagsa nga nagpapaiba han kada indibiduwal—​makakabulig nga magkaada maopay nga pagkamagsangkay. Pero an pagkaiba-iba han personalidad mahimo liwat magin hinungdan han diri pagsinabtanay. Usa nga eksperyensyado nga tigurang an naghatag hini nga ehemplo: “An usa nga awdanon bangin makurian pakig-upod ha usa nga maistoryahon ngan makisangkayon. Ito nga kaibahan baga hin diri daku nga isyu; kondi mahimo ito magin hinungdan hin seryoso nga mga problema.” Pero ginhuhunahuna mo ba nga an mga tawo nga magkaiba an personalidad diri gud magkakauyon? Tagda an duha han mga apostol. Ano an personalidad ni Pedro? Bangin mahanduraw mo nga prangka hiya ngan diri naghuhunahuna anay han iya ginyayakan. Kumusta man hi Juan? Bangin mahanduraw mo nga mahigugmaon hiya ngan kasagaran na nga ginhuhunahuna anay an iya ginyayakan ngan ginbubuhat. Bangin may basihan kita nga maghunahuna hin sugad hito mahitungod hinin duha nga apostol. Baga hin magkaiba  an ira personalidad, pero nagkakauyon gud hira ha mga buruhaton ha pag-alagad. (Buh. 8:14; Gal. 2:9) Ha pariho nga paagi, bisan kon magkaiba-iba an personalidad han mga Kristiano, posible hira nga magkaurosa ha pag-alagad yana.

Bangin may kakongregasyon ka nga nakakapasina ha imo tungod han iya ginyayakan o ginbubuhat. Pero maaram ka nga an Kristo namatay para hito nga indibiduwal ngan kinahanglan mo hiya higugmaon. (Juan 13:34, 35; Roma 5:6-8) Salit imbes nga utdon an iyo pagkamagsangkay o likyan hiya, pakianhi an imo kalugaringon: ‘Ini ba nga akon bugto nagbubuhat hin diri uyon ha Kasuratan? Gintutuyo ba niya nga masina ako? O magkaiba la an amon personalidad?’ Ngan usa pa nga importante gud nga pakiana: ‘Ano an iya maopay nga mga kalidad nga mahimo makabulig ha akon?’

Importante gud nga tagdon ito nga kataposan nga pakiana. Kon maistoryahon an usa ngan ikaw diri, hunahunaa kon ano kasayon para ha iya nga makagtikang hin pakiistorya ha ministeryo. Mahimo ka maghangyo nga umupod ha iya ha ministeryo basi makita kon ano an imo mahibabaroan ha iya. Kon mahinatagon hiya ngan ikaw diri sugad kamahinatagon, kay ano nga diri obserbaran an iya kalipay ha paghatag ha mga lagas, may sakit, o ha mga nanginginahanglan? An punto amo ini: Bisan kon magkaiba an iyo personalidad, mahimo la gihapon kamo magin magsangkay pinaagi ha pagpokus ha maopay nga mga kalidad. Diri man kamo magin duok nga magsangkay, pero an pagbuhat hito makakabulig nga magin duok kamo ha kada tagsa ngan magpaparig-on ito han kamurayawan​—ha iyo nga duha ngan ha kongregasyon ha kabug-osan.

Hi Euodia ngan Sintike posible nga magkaiba gud an panhunahuna ngan personalidad. Pero gin-aghat hira ni apostol Pablo nga “magkahiusa ha hunahuna ha pag-alagad ha Ginoo.” (Fil. 4:2) Mangangalimbasog ka ba liwat nga magkaada sugad nga panhunahuna ngan determinasyon nga tipigan an kamurayawan?

Pariho hin banwa nga madagmit nga nanunubo ha garden hin mga bukad, an aton negatibo nga  panhunahuna ha iba posible gud nga magtikaduro kon diri naton ito gagabuton. Kon madaog an usa han iya kasina, mahimo ito makaapekto ha pagkaurosa han kongregasyon. Kon hinigugma naton hi Jehova ngan an aton kabugtoan, bubuhaton naton an ngatanan basi diri madaot o mawara an kamurayawan han katawohan han Dios tungod han diri pagsinabtanay.

Kon ginsusulbad naton an diri pagsinabtanay basi magkaada kamurayawan, bangin mahipausa kita ha mag-opay gud nga resulta hito. Tagda an eksperyensya han usa nga Saksi: “Inabat ko nga sugad hin bata an pagtratar ha akon han usa nga sister. Waray ako malipay hito. Samtang nagtitikaduro an akon kasina, nawawarayan na ako respeto ha iya. Naghunahuna ako, ‘Diri niya ako ginrirespeto, diri ko liwat hiya rirespetuhon.’”

Katapos hito, ginhunahuna hini nga Saksi an iya mga ginbubuhat. “Nakita ko an akon mga kaluyahan, ngan nasina gud ako ha akon kalugaringon. Nasantop ko nga kinahanglan ko bag-uhon an akon panhunahuna. Katapos ko ig-ampo kan Jehova an problema, pinalit ako hin simple nga regalo para hini nga sister ngan naghimo ako hin kard basi mangaro hin pasaylo tungod han akon maraot nga panggawi. Naghangkopay kami ngan nagkauyon nga kalimtan na an nahitabo. Tikang hadto, waray na kami magkaproblema.”

Ginhihingyap gud han mga tawo an kamurayawan. Pero kon inaabat nira nga ginmiminos ngan napapaawod hira, damu an nagios ha paagi nga diri mamurayawon. Ito an ginbubuhat han damu nga diri nag-aalagad kan Jehova, pero ha katawohan han Dios, sadang gud makita an kamurayawan ngan pagkaurosa. Gin-giyahan han Dios hi Pablo ha pagsurat: “Nakikimalooy [ako] ha iyo nga magkinabuhi kamo uyon ha iyo pagin tinawag, nga may bug-os nga pagpaubos ngan pagkamalumo, pasensyoso, mahigugmaon nga nagpapailob ha kada tagsa, ngan nangangalimbasog gud nga matipigan an pagkaurosa ha espiritu pinaagi han kamurayawan nga nagbubugkos ha iyo.” (Efe. 4:1-3) Importante gud ito nga “kamurayawan nga nagbubugkos” ha aton. Salit parig-unon naton ito ngan magin determinado ha pagsulbad han mga diri pagsinabtanay nga mahimo bumangon ha sulod han kongregasyon.