O NANO sowal ni Tafiti kora ifafekangay a sowal, mipahemek to cecay ci Apikail hananay a fafahiyan. Hano pahemeken ni Tafiti cingra hani? O manan ko mamananam ita i cingranan hani?

Tiya malafel ci Tafiti a milimek to sapipatayaw ni Sawlo i, malitemohay ci Apikail. O fafahi ni Napal ya cihafayay tamdaw, adihayay ko siri ningra i kakatimolan no Yutaya a lotolotokan. Cecay laliyadan, ci Tafiti ato matayalay mato o ˈadipel a midipot to pakaenay ni Napal ato siri ningra. Ikor, ocoran ni Tafiti ko matayalay tayra miˈaraw ci Napalan, misaali to kakaenen, todong to sapalifon cangranan. (1 Samuil 25:8, 15, 16) Oni saali cowa ko pakinaliay, samanen ci Tafiti ato matayalay ningra miceriday a mipadang ci Napalan, misimaw to hafay ningra.

Ci Napal tatodong noni ngangan o “mafolaay” sanay. Mahecaday ora ngangan ningra a mafola ci Napal. Milokesay a micoli to saali ni Tafiti, matengil ni Tafiti i, misaˈosiay to sakatayraaw a mirikec cingranan. Ora noka fola ni Napal, o papaira to pades no paro no lomaˈ.​—1 Samuil 25:2-13, 21, 22.

Mafanaˈay ci Apikail ˈamelas ko demak ni Tafiti pairaay to karetengay teloc, satimolo sa cingra miconged. Misakaretengay ci Apikail ci Tafitian, papiharatengan koni mamala hongti a tamdaw, to mamafiyor koni demak to kalalaˈed ningra aci Yihofa. Pafelian ningra to adihayay kakaenen ci Tafiti. Ikor, mahapinangay ni Tafiti, mipakaynian ni Yihofa ci Apikailan a miconged cingranan a midemak to mararaway a demak, saan pasowal ci Apikailan: ‘Nanay pahemeken no tamdaw kiso to nika citanengay kiso, nanay mapalemed kiso, tona mitakeran iso kako to sakacirarawaw ako to mipatayay to tamdaw.’​—1 Samuil 25:18, 19, 23-35.

Ci Napal cowa piakoˈikoˈid to nano demak no tao i cingranan, aka matira kita cingranan. Kawra, ngaˈayay todongen ita ci Apikail, ano mahapinang ko manan demak to papaira to pasangar, kalikien a midemak, misaysay to katalawan. Todongen ita ko mitiliday to ˈOlic a tamdaw, mingitangit to Kawas, “pafelien kako to taneng ato fanaˈ.”​—ˈOlic 119:66.

Alatek mahapinang no tao to citanengay, o mafanaˈay ko demak a tamdaw kita. Soˈlin ano caka pasowal cangra, latek mamatira ci Tafitian ko harateng nangra: ‘Nanay pahemeken no tamdaw kiso to nika citanengay kiso!’