“Pék yoñ i ba nsaibak!”
DAVID, kiñe i Lôk Israél, nyen a bi pot bibuk bini inyu bégés muda nu a bi boma njel. Jôl li muda nu li bé le Abigail. Ndi kii i bi tinde David i bégés nye? Bimbe biniigana di nla ôt mu ndémbél i Abigail?
David a bi boma Abigail i ngéda a bé kenek Kiñe Saulô ngwéé. Abigail a bé nwaa Nabal, ngwañ mut kiyaga u u bééna bémba keñi, i i bé jél bikai i ngii dikôa di nwelmbok u nkoñ u Yuda. David ni bôt bé ba bé kiki “libap” inyu sôñ bémba ni batééda bémba ba Nabal. Jon David a bi om boñge ba wanda yak Nabal inyu bat nye ‘to imbe yom a yé le a bana i woo wé’ kiki bijek. (1 Samuel 25:8, 15, 16) Ngéda di mbéñge lelaa David ni bôt bé ba bi sôñ nkus u Nabal, ba bé ba kôli yaga bat nye mahôla.
Ndi Nabal nu jôl jé li nkobla le “yoma mut” tole “jôñ mut,” a bi unda yaga le a yé toi kiki jôl jé li nkal. A bi timbhe bo ni bibuk bibe, ni bisol, a tjél ômle David bijek. Inyu hala nyen David a bi kôôba le a kogse Nabal inyu bisol gwé ni béba yé ndimbhe. Nabal ni ndap yé lihaa ba bé lama kôs kogse inyu bisambô gwé.—1 Samuel 25:2-13, 21, 22.
Kiki Abigail a bé yi le jam libe li yé bebee ni kwél bo, a yoñ bitelbene ni makénd. A ke i boma David, a ti nye lipém, a kal nye le a nwéhél bo inyu tééda maada mé malam ni Yéhôva. A ti ki ngandak bijek inyu David, nu a bé lama ba kiñe i mbus, ni inyu bôt bé. Yak David, i yé pes, a neebe le Yéhôva nyen a ngwélél Abigail inyu boñ le a begee bañ pil matjél i bisu bi Yéhôva. Jon David a bi kal Abigail le: “Pék yoñ i ba nsaibak! Wemede ki u ba nsaibak la kii u nkéñ me i len ini, le me yoñ bañ libua.”—1 Samuel 25:18, 19, 23-35.
Ibabé pééna, Nabal a ta yaga bé loñge ndémbél inyu yés, di ta bé ba ba nyi bé ti mayéga inyu mam malam ba mbôñôl bo. Jam lipe li yé le di nlama pala yoñ bitelbene i kodol mam ngéda di nôgda le béba jam i nsômbôl bôña. Ñ, yak bés di nla bana minlélém mi mahoñol kiki ntôptjémbi, nu a kal Djob le: “Niiga me bañga pék ni yi.”—Tjémbi 119:66.
Bôt bape ba nla yimbe pék mu maboñok més. To ba nkal bés hala, to ba nkal bé bés, ba nla nôgda kiki David nu a kal le: “Pék yoñ i ba nsaibak!”
Yak ini i nla lémél we
NI KÔNA HÉMLE YAP
Abigail—A bi boñ mam ni pék
Bimbe biniigana di nla ôt mu mandutu Abigail a mboma ikété libii jé?
