AYA e mashiwi Davidi umwina Israele alandile pa kutasha umwanakashi uo akumenye. Ishina lyakwe ni Abigaili. Cinshi calengele Davidi atashe Abigaili, kabili finshi twingasambilila ku fyo Abigaili acitile?

Davidi akumene no uyu mwanakashi ilyo alefulumuka Imfumu Shauli. Abigaili aupilwe kuli Nabali uwali umukankaala, uwakwete inama ishingi ishaleliila mu calo ca mpili ku kapinda ka ku kulyo aka Yuda. Davidi na baume bakwe “bali kwati lilinga” kuli bakacema ba kwa Nabali na ku mukuni wakwe. Pa numa Davidi atumine abaume bakwe kuli Nabali, alombele ukuti amupeeleko ica kulya icili conse ico engakwata. (1 Sam. 25:8, 15, 16) Ifi Davidi alombele tafyacilile mu cipimo, pantu ena na baume bakwe balibombeshe ukucingilila icuma ca kwa Nabali.

Nomba ifyo Nabali acitile, e fyo ne shina lyakwe lipilibula ukuti “icipumbu” nelyo “icinangwa.” Nabali tayaswike bwino kabili alisaalwile abo Davidi atumine, alikeene no kubapeela ifyo Davidi alombele. E ico Davidi alipekenye ukuyakanda Nabali pa fyo acitile. Nabali no lupwa lwakwe bali no kubakanda pa bupumbu bwakwe.—1 Sam. 25:2-13, 21, 22.

Ilyo Abigaili alwike ifyabipa ifyali no kufuma mu fyo umwina mwakwe acitile, alicilepo fimo. Alombele Davidi ukukacita ifyali no kulenga bucibusa bwakwe na Yehova ukupwa. Kabili alipeele Davidi uwali no kuba Imfumu mu Israele na baume bakwe ifya kulya ifingi nga nshi. Pa numa Davidi alisumine ukuti Yehova abomfeshe Abigaili ku kumulesha ukucita ifyali no kulenga aba no mulandu kuli Lesa. Davidi aebele Abigaili ati: “Yabe ayapaalwa amano yobe, kabili ube uwapaalwa we wandesha lelo ukusumya umulopa no kuilandwila ku minwe yandi.”—1 Sam. 25:18, 19, 23-35.

Ukwabula no kutwishika te kuti tufwaye ukuba abantu abashitasha pa fisuma ifyo bambi batucitila nga filya Nabali ali. Na kabili nga twamona ifyabipa fyatendeka ukucitika tulingile ukucitapo cimo pa kuti tuficincintile. Kanshi kuti twalanda amashiwi uwaimbile amalumbo alandile ilyo aebele Lesa ati: “Nsambilisheni ubusuma, amano no kwishiba.”—Amalu. 119:66.

Abantu kuti bamona ukuti tuli ba mano nga bamona ifyo tucita. Nampo nga kuti batweba nelyo iyo, nalimo kuti baumfwa nga filya Davidi aumfwile uwatile: “Yabe ayapaalwa amano yobe!”