ẸMWẸ na ẹre Devid ya tian okhuo ọkpa na tiẹre Abigẹl. Vbọ ya Devid tian rẹn? De emwi ne ima gha miẹn ruẹ vbe igiemwi ọghe okhuo na?

Vbe Devid lẹ khian ne obọ Ọba e Sọl ghẹ vba re, ẹre ọ na dekun okhuo na. E Nabal ẹre ọ ghaa ọdafẹn Abigẹl. Ọ wa fe ẹsẹsẹmwẹse. Ọ ghaa mwẹ ohuan nibun vbe odẹ ahọ vbe ẹvbo oke ọghe Juda. E Devid kevbe ivbiyokuo ọghẹe keghi “tan ifuẹn gue” avbe ọsuohuan kevbe ohuan ọghe Nabal. E Devid keghi gie uhunmwu gie Nabal nọ ye evbare ‘ne obọ re gba re’ ya ru iyobọ. (1 Sam. 25:8, 15, 16) E Devid ma te ru emwi dan nọ na gie uhunmwu vberriọ rhunmwuda ọ ru iyobọ nọ khẹke ne Nabal.

Emwi na ye Nabal kha ọre “ẹwobi ra akpa.” Uyinmwẹ ẹwobi ẹre ọ gele wa gha yin. E Nabal ma viọ evbare rhọkpa gie Devid, ọ na vbe rhovbiẹ ivbiyokuo e Devid kevbe Devid tobọre. Ohu keghi mu e Devid, ẹre ọ na muegbe nọ ya rri e Nabal oya, sokpan e Nabal vbe igiowa re ẹre ọ gha te ya uhunmwu khiẹ ọre.—1 Sam. 25:2-13, 21, 22.

Abigẹl ghi bẹghe ẹbe nọ dee, ọ na zẹgiẹ zẹ emwi ru. Ọ keghi ya eni e Jehova rinmwian e Devid. Ọ na kun evbare nibun gie Devid kevbe ivbiyokuo ọghẹe. E Devid tobọre na vbe bẹghe ẹre wẹẹ, e Jehova ẹre ọ gie Abigẹl bu irẹn gha dee ne irẹn ghẹ mieke na sọtẹ daa Osanobua. Ọ keghi tama Abigẹl wẹẹ: “Kpọnmwẹ Osanobua ye ẹwaẹn esi ruẹ kevbe emwi nu ru vbe ẹrẹna nu ma na gu mwẹ dizigha.”—1 Sam. 25:18, 19, 23-35.

Ma bẹghe ẹre nia wẹẹ, ọ ma zẹdẹ khẹke ne ima ya egbe tae Nabal ne ọmwa ẹse oghodan. Te ọ vbe khẹke ne ima gha mwẹ azamemwi nọ gha ru iyobọ ne ima ya zẹ emwi ru, ne ugbe ne ima bẹghe ighẹ ọ dee ghẹ rhu ima aro. Vbe odẹ vberriọ, te ima ya egbe taa Ọsihuan nọ tama Osanobua wẹẹ: “Rhie ẹwaẹn kevbe irẹnmwi mẹ.”—Psm. 119:66.

Emwa ọvbehe sẹtin bẹghe odẹ ne ima ya ye ẹwaẹn ru emwi. A sẹtin miẹn wẹẹ iran ma ya unu kaan rẹn, eso vbọ sẹtin tian ima vbene Devid ya tian Abigẹl vbe ọ khare wẹẹ: “Kpọnmwẹ Osanobua ye ẹwaẹn esi ruẹ!”