DAVID emi ekedide edidem ke Israel eset eketịn̄ ikọ emi ke ini enye okotorode n̄wan kiet emi ekekerede Abigail. Nso ikanam David otoro enye, ndien didie ke ikeme ndikpebe n̄wan emi?

David okokụt n̄wan emi ke ini enye ekefehede mbak Edidem Saul idiwot enye. Abigail ekedi n̄wan Nabal. Nabal ekedi imọ owo; enye ekesibọk ufene esie ke edem usụk Judah emi eketiede obot obot. David ye n̄kparawa esie ẹma ẹkpeme mme ufene ye mme ekpemerọn̄ Nabal. David ama ọdọn̄ n̄kparawa esie ẹkeben̄e Nabal udia. (1 Sam. 25:8, 15, 16) Akpakakam enenem Nabal ndinọ se mmọ ẹkeben̄ede sia David ye n̄kparawa esie ẹma ẹkpeme ufene ye mme ekpemerọn̄ esie.

Edi Nabal emi enyịn̄ esie ọwọrọde “Ndisịme” ama onyụn̄ anam n̄kpọ nte ndisịme akpanamde. Enye ama ayat esịt osụn̄i David, inyụn̄ inọhọ se David ekeben̄ede. Ntre David ama eben̄e idem ndika n̄kekpep Nabal n̄kpọ ke ntak usọn̄enyịn ye ibụk esie. Nabal ye ufọk esie ẹkpekekpan̄a ke ntak ndisịme ido esie.​—1 Sam. 25:2-13, 21, 22.

Edi Abigail ama ọsọsọp ada okụt se ikemede nditịbe edieke David ayatde esịt anam se enye aduakde. Ntre enye ama anam n̄kpọ uko uko. Enye ama ada enyịn̄ Abasi ekpe David ubọk sia enye ama ọdiọn̄ọ ke David edi owo Abasi. Enye ama onyụn̄ ada ata ediwak udia ọsọk David emi edidade itie Saul, ada ọsọk n̄kparawa esie n̄ko. David ama ọdọhọ Abigail ke Jehovah okosio enye ọdọn̄ edisobo ye imọ mbak imọ ididue Abasi. Enye ọkọdọhọ Abigail ete: “Yak . . . ẹkọm fi ke eti ibuot fo, ẹnyụn̄ ẹkọm fi emi akpande mi ndinyene ubiomikpe iyịp mfịn emi.”​—1 Sam. 25:18, 19, 23-35.

Ẹyak nnyịn ikûtie nte Nabal emi mîkadarake nti n̄kpọ oro ẹkenamde ẹnọ enye. Utu ke oro, ẹyak itie nte Abigail. Ke ini ikụtde n̄kpọ emi ekemede ndida mfịna ndi, ẹyak isọsọp inam se ikemede mbak oro iditịbe. Ukem nte andiwet psalm, imekeme ndidọhọ Jehovah ite: “Kpep mi [nnyene] eti ibuot ye ifiọk.”​—Ps. 119:66.

Nte inamde n̄kpọ ke mme owo ẹdida idiọn̄ọ ke imenyene eti ibuot. Edide mmọ ẹtoro nnyịn ke ntak emi m̀mê itoroke, ekeme nditie mmọ ke idem nte eketiede David ke ini enye ọkọdọhọde ete: “Yak . . . ẹkọm fi ke eti ibuot fo.”