A CAVUTA na vosa qori o Tevita e Isireli makawa ena nona vakacaucautaki Apikali, e dua na marama erau a sota. Na cava e uqeti Tevita me vakacaucautaki koya? Cava eda na vulica vei Apikali?

A sotavi Apikali o Tevita ena gauna e dro voli kina vei Tui Saula. E wati Apikali o Nepali na turaga vutuniyau qai vakani ira tu nona qelenisipi ena veiulunivanua ena ceva kei Juta. Ratou vaka na “bai” o Tevita kei ratou nona tamata ni ratou ‘taqomaka’ na qelenisipi i Nepali vaka kina o ratou na ivakatawa. E muri e tala o Tevita nona mata vei Nepali, e kerea na kakana ‘ga e tu vua.’ (1 Sam. 25:8, 15, 16) E veiganiti vinaka qori ni vakasamataki na ka e cakava o Tevita kei ira nona tamata ni ratou taqomaka voli na ka e taukena o Nepali.

Na yaca Nepali e kena ibalebale “Lialia,” qai donu vinaka na kena vakatokayacataki vua. E kaukaua qai mosimosi na itautau ni nona vosa, e sega ni rogoca na kerekere i Tevita. E vakavakarau sara o Tevita me totogitaki Nepali ena nona viavialevu kei na nona tawaveinanumi. Sa na tau vei Nepali kei na nona vuvale na ca ni nona vosa vakalialia.—1 Sam. 25:2-13, 21, 22.

Ni kila o Apikali na ka sa na vakarau yaco, e yaloqaqa me cakava kina e dua na ka. Ena veidokai e vakamasuti Tevita me nanuma na nona veiwekani kei Jiova. E vakarautaka tale ga na kakana vei Tevita, o koya ena veiliutaki vakatui, vaka kina o ira nona tamata. E vakadinata o Tevita ni o Jiova e vakayagataki Apikali me kua ni caka cala vua na Kalou. E mani kaya vei Apikali: “Me vakavinavinakataki nomu yalomatua! Mo vakalougatataki mada ga ni o tarovi au meu kua ni vakadavedra ena siga qo.”—1 Sam. 25:18, 19, 23-35.

Eda na sega ni via vakataki Nepali, meda sega ni vakavinavinakataka na ka e caka ena vukuda. Kena ikuri, ke da raica ni vakarau caka e dua na ka ca, meda saga ena noda vinaka kece meda vakamalumutaka kina na ituvaki qori. Io, eda rawa ni duavata kei na daunisame ni tukuna vua na Kalou: “Ni vakavulici au ena lewamatau kei na kilaka.”—Same 119:66.

De dua era na raica eso tale na vinaka ni noda lewamatau. Ke ra mani tukuna kina e dua na ka se sega, era na rairai vakataki Tevita ni a kaya: “Me vakavinavinakataki nomu yalomatua!”