PEICHA David heʼi vaʼekue oguerohorýrõ guare peteĩ kuña héravape Abigail. ¿Mbaʼépa omomýi chupe heʼi hag̃ua upéva, ha mbaʼéichapa ideprovécho ñandéve pe kuña ehémplo?

David oikuaa Abigaílpe rréi Saúl opersegi tiémpope chupe. Abigail ména ningo Nabal, peteĩ kuimbaʼe irríkova ijovecha retáva oĩva montañaháre sur gotyo Judápe. David ha umi hendive oĩva haʼete voi ku “murálla” umi pastorkuéra ha pe ovecha atýpe g̃uarã. Upéi, David omondo mensahéro Nabal rendápe ojerure hag̃ua chupe “oimeraẽ mbaʼe hembýva” hoʼumi hag̃ua hikuái (1 Sam. 25:8, 15, 16, TNM). David ndojeruréi peteĩ mbaʼe tuichaitereíva jarahárõ enkuénta haʼe ha umi omoirũva chupe oñatende porã hague Nabal animalkuérare.

Nabal noipytyvõi Davídpe, upéva rangue iñeʼẽ arhél ha otrata vai imensaherokuérape. Jaʼekuaa opyta porãha hese héra, heʼiséva “itavýa” térã “estúpido”. Upévare David ojeprepara oñorairõ hag̃uáicha Nabal ndive. Nabal itavy rupi mombyry operdéta kuri, pórke ojeperhudikáta haʼe ha oĩva guive hógape (1 Sam. 25:2-13, 21, 22).

Péro Abigail ohechakuaa David orreaksiona vaitaha, ha tuichaiterei operhudikataha chupekuéra. Upémarõ ipyʼaguasu ha oñehaʼã ojoko la oikótava. Haʼe heʼi Davídpe opensa porã hag̃ua la ojaposévare, ha imanduʼa chupe Jehováre. Avei, Abigail oraha heta hiʼupy Davídpe, haʼétava hína rréi de Israel ha iñirũnguérape. David katu ohechakuaa Jehová ojevale hague Abigail rehe ani hag̃ua ojapo peteĩ mbaʼe ivaietereíva. Upévare heʼi chupe: “Ñandejára tanevendesi neakãguapy haguére, ha tanevendesi chejoko haguére koestedía pono añevenga ha ajuka hénte inoséntepe” (1 Sam. 25:18, 19, 23-35, TNM).

Ndahasýi ningo ñañemeʼẽ hag̃ua enkuénta ndovaleiha ñanemalagradesído Nabal ojapo haguéicha. Upéicha avei, oimérõ jahechakuaa ojejapotaha peteĩ mbaʼe noĩporãiva, ani japyta jajekuʼako síno jajapo ikatúva guive ani hag̃ua oiko upéva. Añetehápe ikatu jajerure pe salmísta ojerure haguéicha Ñandejárape, haʼe heʼi: “Chemboʼéna roikuaa porã hag̃ua ha cheentendído hag̃ua” (Sal. 119:66, TNM).

Umi hénte ningo ikatu opensa ñanearandu ha jajapoha heta mbaʼe hekopete. Péro heʼíramo jepe upéva térã nahániri, posívlemente opensáta David heʼi haguéicha: “Ñandejára tanevendesi neakãguapy haguére”.