GINHAMBAL ini sadto ni David nga Israelinhon sa isa ka babayi nga si Abigail. Ngaa gindayaw sia ni David, kag ano ang matun-an naton sa halimbawa ni Abigail?

Nakilala ni David ini nga babayi sang tion nga nagapalagyo sia kay Hari Saul. Ang bana ni Abigail amo ang manggaranon nga si Nabal nga nagapahalab sang iya madamo nga kasapatan sa kabukiran sang nabagatnan nga Juda. Si David kag ang iya mga tinawo “daw mga pader” nga nagaamlig sa mga manugbantay kag kasapatan ni Nabal. Sang ulihi, nagpadala si David sing mensahe kay Nabal nga nagapangabay “sang bisan ano nga mahatag” niya nga pagkaon. (1 Sam. 25:8, 15, 16) Makatarunganon ini nga pangabay, kay nagabenepisyo man si Nabal sa ginhimo nanday David kag sang iya mga tinawo.

Ang ngalan ni Nabal nagakahulugan sing “Buangbuang,” kag amo gid sia sini. Matigdas kag makapainsulto ang iya sabat kay David. Gani naghanda si David para silutan si Nabal sa iya masakit kag indi makatarunganon nga sabat. Manabat si Nabal kag ang iya panimalay bangod sang iya kabuangan.—1 Sam. 25:2-13, 21, 22.

Bangod nahantop ni Abigail nga malain ang mangin resulta sang padasudaso nga plano ni David, maisog sia nga nagpatunga. Matinahuron nga nagpakitluoy sia kay David kag ginpahanumdom niya ang kaangtanan ni David kay Jehova. Nahibaluan niya nga si David amo ang masunod nga hari, kag ginhatagan niya sia sing madamo nga pagkaon pati ang iya mga tinawo. Nahantop ni David nga gingamit ni Jehova si Abigail para punggan sia nga makasala sa Dios. Nagsiling si David kay Abigail: “Kabay pa nga pakamaayuhon ang imo pagkamaalamon! Kabay pa nga pakamaayuhon ka nga nagpugong sa akon subong nga adlaw sa pagtimalos kag sa pagpatay.”—1 Sam. 25:18, 19, 23-35.

Indi gid naton luyag pag-ilugon si Nabal nga wala nagapasalamat sa maayo nga mga ginhimo sa iya. Dugang pa, kon natalupangdan naton nga posible may malain nga matabo, dapat naton himuon ang tanan para mapunggan ini. Huo, mapangabay man naton sa Dios ang ginpangabay sang salmista: “Tudlui ako sing maayo nga paghangop kag ihibalo.”—Sal. 119:66.

Mahimo matalupangdan sang iban ang aton pagkamaalamon sa aton mga ginahimo. Dayawon man kita ukon indi, mahimo nga pareho ni David, makasiling man sila: “Kabay pa nga pakamaayuhon ang imo pagkamaalamon!”