ӘԜ ГЬЛИ Даԝьд готә ԝе жьньке йа кӧ рʹасти ԝи һат. Наве ԝе Абигаил бу. Ле гәло чь Даԝьд һелан кьр кӧ пʹайе ԝе бьдә, у чь дәрсе әм дькарьн жь ԝе һин бьн?

Чахе Даԝьд рʹасти Абигаиле һат, һьнге әԝ жь Шаԝул пʹадша дьрʹәвийа. Мере Абигаиле һәбу, наве кʹижани Набал бу. Әԝ мәрьвәки дәԝләти бу у гәләк кәрийед пәзе ԝи һәбун. Даԝьд у әскәред ԝи, шьванед Набал у кәрийед пәзед ԝи хԝәй дькьрьн. Ԝәʹдә шунда, Даԝьд мәрьвед хԝә шандә щәм Набал, у һиви кьр ԝәки Набал чьԛас дькарә хԝарьне бьдә ԝан (1 Сам. 25:8, 15, 16). Әԝ хԝәстьна мәзьн нибу, чьмки Даԝьд у әскәред ԝи Набалрʹа ԛәнщийа мәзьн кьрьбун.

Ле Набал, наве кʹижани те һʹәсабе «Берʹәʹм», йан жи «Бефәʹм», рʹасти жи йәки ӧса бу. Әԝи хԝәстьна Даԝьд пьшт гӧһе хԝәва авит, у сәрда жи Даԝьд беһӧрмәт кьр у сәр ԝи гьлийед хьраб гот. Һерса Даԝьд рʹабу сәр Набал у әԝи хԝәст ԝи щәза бькә, чьмки әԝи Даԝьд беһӧрмәт кьр. Набал у малбәта ԝи гәрәке бона сәрһʹьшкийа ԝи һәԛе хԝә бьстандана (1 Сам. 25:2-13, 21, 22).

Абигаиле фәʹм кьр ԝәки һʹал хьраб ә, у әԝе сафи кьр әви шьхӧли һьлдә дәсте хԝә. Әԝе бь ԛәдьр тʹәви Даԝьд хәбәр да, йе кӧ паше гәрәке бьбуйа пʹадша, у жь ԝи лава кьр кӧ сәва ве нәһәԛийе, һәләԛәтийа хԝә тʹәви Йаһоԝа ӧнда нәкә. Әԝе ӧса жи Даԝьд у әскәред ԝирʹа гәләк хԝарьн ани. Даԝьд фәʹм кьр ԝәки Йаһоԝа бь сайа Абигаел ԝи жь гӧне мәзьн хԝәй кьр. Даԝьд готә ԝе: «Бьра фәʹмкʹарийа тә пироз бә у тӧ пироз бә; жь рʹьжандьна хуне . . . тә мьн сәкьнанд!» (1 Сам. 25:18, 19, 23-35)

Жь ве сәрһатийе әм хԝәрʹа дькарьн дәрсе һин бьн. Тʹӧ кәс жь мә нахԝазә мина Набал бә, чьмки әԝ бешекьр бу у бәр тьштәки һʹәсаб нәкьр ԛәнщийа кӧ жерʹа һатә кьрьне. Һьн жи, чахе әм тедәрдьхьн кӧ проблемәк пешда те, ԝе баш бә чь дәсте мә те бькьн, сәва әве проблеме сафи кьн. У әм жи мина зәбурбеж дькарьн жь Хԝәде һиви кьн: «Занәбун, сәрԝахтийа ԛәнщ мьн һин кә» (Зәб. 119:66).

Мәрьв дькарьн пе кьред мә бьвиньн, ԝәки сәрԝахти, демәк фәʹмкʹарийа мә һәйә. Дьбәкә әԝана әве йәке мәрʹа рʹастә-рʹаст нәбежьн, ле мина Даԝьд бьфькьрьн, кʹижани гот: «Бьра фәʹмкʹарийа тә пироз бә».