BINENWA bidi kūlu’bi byānenenwe na Davida mwine Isalela wa kala pa kutendela mwana-mukaji umo wāetene nandi. Dijina dyandi i Abikele. I kika kyālengeje Davida amutendele, ne i bika byotubwanya kwifunda ku kimfwa kya uno mwana-mukaji?

Davida wētene na uno mwana-mukaji musongwe kitatyi kyaādi unyema Mulopwe Solo. Abikele wādi mukaja Nabalu, mpeta wādi umunine luombe lukatampe mu ntanda ya ngulu ya kunshi kwa Yuda. Davida ne bantu bandi “bādi bwa lubumbu” ku bakumbi ba Nabalu ne luombe lwandi. Mwenda mafuku Davida wātumine bantu kudi Nabalu ebape’ko ‘kyonso kiya ku kuboko kwandi’ amba bamone’ko byakudya. (1 Samwele 25:8, 15, 16) Kukwatañana na muswelo wākingile Davida ne bantu bandi bintu bya Nabalu, kumulomba byakudya kewādipo mwanda mubi.

Inoko dijina Nabalu byodishintulula’mba “Mulembakane” nansha “Kivila,” wālongele mungya dijina dyandi. Wālondolwele bya kafutululo ne bya kipuni, wāpela kupa Davida byaāmulombele. O mwanda Davida wēteakenye mwanda wa kupa Nabalu mfuto pa kumulondolola bya kipuni. Nabalu ne ba mu njibo yandi yonso bādi bakwipaibwa pa mwanda wa bulembakane bwandi.​—1 Samwele 25:2-13, 21, 22.

Abikele pa kujingulula bintu bibi byādi bya kwibafikila mu kitulumukila, wālonga’po kintu na bukankamane. Wāendele kudi Davida na bulēme pa mwanda wa kipwano kya Davida na Yehova. Kadi wāletēle Davida, mwine wādi wa kwikala mulopwe ne bandi bantu bidibwa biyampe bivule. Davida nandi wāyukile amba i Yehova wāmwingidije mwanda wa kumukankaja kulonga bintu bya kumupija mambo ku meso a Leza. Davida wānenene Abikele amba: “Yeselwe dyese ñeni yobe, weselwe dyese ne abe mwine wakunkankaja dyalelo dino’di ku kupya mambo a mashi.”​—1 Samwele 25:18, 19, 23-35.

Ketusakengapo nansha dimo kwikala bwa Nabalu na kubulwa mutyima wa kufwija’ko pa biyampe byobetulongela. Kadi, shi tubamone amba kudi mwanda mubi ukimba kulongeka, tulongei byonso byotubwanya mwanda wa kwiupwija. Bine, tubwanya kwiivwana pamo bwa mulembi wa Ñimbo ya Mitōto wāsapwidile Yehova amba: “Nombole ñeni ya kutyiba-mambo kulumbuluke ne ya kuyūkidila.”​—Ñimbo ya Mitōto 119:66.

Bantu bakwabo babwanya kumona tunangu, nansha ñeni kupityila ku bilongwa byetu. Ekale banene nansha kunena’kyo mpika, babwanya kwiivwana pamo bwa Davida wānenene amba: “Yeselwe dyese ñeni yobe!”