NDAVICHI ikiye ahanjikile awa mazu hakusangejeka pwevo umwe uze ejile kuli ikiye. Ou pwevo ikiye Avingayile. Mwomwo ika Ndavichi amusangejekelele, kaha natulinangula vyuma muka kuchakutalilaho chayou pwevo?

Ndavichi aliwanyine nayou pwevo halwola apwile nakuchina Mwangana Saulu. Avingayile apwile pwevo lyaNavale, lunga muka-luheto ukwechi vimuna jenyi vaze vapwile nakulila kungalila yajipili muYuta. Ndavichi navatu jenyi “vapwile kwijiva nge hikembwe” kuli tufunga twaNavale navimuna javo. Mukuhita chalwola, Ndavichi atumine vatu jenyi kuli Navale vakamulombe ‘vyeshovyo asakile kuvahana’ chikumanyi vyakulya. (Samwe. 1, 25:8, 15, 16) Chapwile chakutamo Ndavichi kulomba vyuma kana kuli Navale mwomwo azakamine tufunga navimuna jenyi.

Oloze Navale ukwechi lijina lyenyi lyalumbununa ngwavo “Wakuhona Mangana” chipwe “Chileya,” avatukanyine nakuvahanga, kaha kavahanyine vyuma alombele Ndavichiko. Shikaho Ndavichi asakile kuya akazangamise Navale hakasautu kenyi. Echi kachi chahichikishilemo Navale navakuzuvo yenyi vosena.—Samwe. 1, 25:2-13, 21, 22.

Omu Avingayile ejivile ukalu uze watelele kuvawana, ahamukile nakulingako vyuma vimwe. Alembelelele Ndavichi ahone kulinga chuma chize chatelele kujiha usoko wenyi naYehova. Kaha ahanyine Ndavichi navatu jenyi vyakulya vyavivulu. Ndavichi amwene jino ngwenyi Yehova ikiye atumine Avingayile nakumukanda kulinga chuma chachipi kumeso aKalunga. Ngocho alwezele Avingayile ngwenyi: “Vakukisulenga hamangana ove. Vakukisulenga hakungukinga kumulonga wamanyinga likumbi lyalelo.”—Samwe. 1, 25:18, 19, 23-35.

Katweshi kusaka kupwa ngana mwaNavale uze kapwile namuchima wakusakwilila havyuma vyamwaza vamulingililileko. Nge tunamono ngwetu ukalu uli nakusaka kusoloka, kaha twatela kwanguhwa kulingako vyuma vimwe kuchina ukalu kana nausoloka. Ngocho twatela kulomba Kalunga ngana muze alombele muka-kwimba jisamu ngwenyi: “Ngunangule mangana amwenemwene nachinyingi.”—Samu 119:66.

Vatu vamwe vanahase kumona vilinga vyetu vize navitusolola nge twatwama namangana. Vanahase kutusangejeka chipwe pimbi, oloze vanahase kwivwa ngana muze evwile Ndavichi numba ahanjike ngwenyi: “Vakukisulenga hamangana ove.”