AWA mazu ayihosheli kudi Davidi wamuIsarela yakushankulu hakumushimeka mumbanda wabulakeniyi. Ijina dindi diyi Abigayili. Chumanyi chaletesheli Davidi yamushimeki, nawa tunateli kudizila kwodi kuchuma cheleliyi?

Davidi wamubulakeni iwu mumbanda wasumbuka hampinji yatemukileñayi Mwanta Sawulu. Abigayili wadiña ñoda Nabali, muntu waheta wadiña nakudishila nyikanka yanyikoku yadiña kumpidi yaYuda kukabeta kambwela. Davidi niantu jindi “adiñi mpwembu” yawatubiña ninyikoku yaNabali. Nkumininaku Davidi watemesheli antemesha kudi Nabali nakumulomba ‘chuma chidi chejima’ kutalisha kuyakuda. (1 Sam. 25:8, 15, 16) Welili chiwahi hakumulomba, muloña Davidi niantu jindi akiñili maheta aNabali.

Ilaña Nabali, wukweti ijina daya mukwila nawu “Kubula Maana” hela “Kusupa,” welili kwesekeja namwatalisha ijina dindi. Wakwili nakuhila nawa nakasawuntu, wakaanini kumwinka Davidi yuma yalombeliyi. Dichi Davidi wadiloñesheli kulonda yamubeshi Nabali nachamwakwiliyi nakasawuntu. Nabali niamwitala dindi ejima adi kuyibabesha muloña wawusupi windi.—1 Sam. 25:2-13, 21, 22.

Abigayili chatoñojokeliyi nindi akufwa, wahamukili nakumukañesha. Wamulembeleli Davidi nakalemesha kushindamena hawubwambu windi naYehova. Nawa waloñesheli yakuda yayivulu yakwinka Davidi, wadi kwikala mwanta wawantu ejima. Davidi welukili nindi Yehova wamuzatishili iwu mumbanda kulonda yabuli kwila chuma chadi kumuletesha kwikala namuloña kumesu aNzambi. Davidi wamulejeli Abigayili nindi: “Maana eyi ayikiswili nkisu, nineyi aweni akukiswili nkisu, yeyi wunanlekeshi nikumwaña mashi lelu.”—1 Sam. 25:18, 19, 23-35.

Tunadizi netu bayi twikala neyi Nabali wabulili muchima wakusakili neyi anatwilili yuma yayiwahi. Kubombelahu, neyi tumona yuma yatama yinakukeña kumwekana twatela kumona njila yakutondolwelamu. Mwamweni, tunateli kwila neyi cheliliyi ñimbi yamasamu wamulejeleli Nzambi nindi: “Nleji niwuñaji wawuwahi nimaana.”—Mas. 119:66.

Antu amakwawu anateli kumona yuma yitunakwila nawu mudi maana. Chili akuhosha hela nehi, anateli kutiya neyi chatiyiliyi Davidi wahosheli nindi: “Maana eyi ayikiswili nkisu.”