ATZUN qe tbʼanel yol lu xi tqʼamaʼn David, jun xjal te ojtxe tnam Israel, te jun xuʼj Abigail tbʼi. ¿Tiquʼn xi tqʼamaʼn? ¿Tiʼ xnaqʼtzbʼil jaku tzʼel qiʼn tiʼj techel kyaj tqʼoʼn Abigail?

Ok tojtzqiʼn David twitz Abigail tej in jyontoq Saúl tiʼj. Mejebʼni Abigail tukʼil Nabal, jun xjal qʼinun at nim talun in che waʼn kʼul atz twi witz te jawni te tnam Judá. Otoq tzʼok David ex qe t-xjalil te kolil kyiʼj qe xqʼuqil t-ẍneʼl Nabal, ax ikx e xqʼuqin kyiʼj talun. Tuʼntzunju, xi tsamaʼn David qe t-xjalil tuʼntzun ttzaj tsamaʼn Nabal noq tiʼxku te kywa (1 Sam. 25:8, 15, 16). Bʼant jlu tuʼn David ex qe t-xjalil tuʼnju otoq che xqʼuqin kyiʼj talun Nabal.

Ok tqʼoʼn Nabal toklen tbʼi, aju t-xilen tbʼi, «mintiʼ tnabʼl». Xi ttzaqʼweʼn Nabal kyukʼil nya bʼaʼn yol aju otoq txi tqanin David te. Tuʼnju otoq kubʼ tyekʼun Nabal nya bʼaʼn tmod, bʼaj tbʼinchaʼn David tten tuʼn tkubʼ tqʼoʼn tkastiw. Tuʼn ttzaj nim nya bʼaʼn tiʼj Nabal ex kyiʼj toj tja tuʼnju mintiʼ ten tnabʼil (1 Sam. 25:2-13, 21, 22).

Tej tel tnikʼ Abigail tiʼj nya bʼaʼn jakutoq tzaj tuʼnju tzaj naʼj tqʼoj David, mintiʼ tzaj xobʼ ex kubʼ t-ximen tuʼn tonin. Tukʼil tbʼanel yol xi tqʼamaʼn te David tuʼn tok ten ximel tiʼj tamiwbʼil attoq tukʼil Jehová. Nya oʼkxju, ax ikx xi tqʼoʼn Abigail nim wabʼj teju kʼokil te juntl aj kawil toj tnam Israel ex kye t-xjalil. Atzunte David el tnikʼ tiʼj qa otoq tzʼajbʼen Abigail tuʼn Jehová tuʼn miʼn tkubʼ tbʼinchaʼn jun nya bʼaʼn twitz. Tqʼama David jlu te Abigail: «Kyʼiwlaʼnxwita tuʼnju tzʼaqlxix qe tyola, ex tuʼnju ma chin ok tmayoʼna tuʼn miʼn nxiʼye bʼyol kye qe xjal» (1 Sam. 25:18, 19, 23-35).

Nya kwest tuʼn tel qnikʼ tiʼj qa nya bʼaʼn qa mintiʼ in qo qʼon chjonte ik tzeʼn bʼant tuʼn Nabal. Nya oʼkxju, aj tok qqʼoʼn qwitz tiʼj qa chʼix ttzaj jun nya bʼaʼn, tzʼok tilil quʼn tuʼn t-xi bʼinchet naj tiʼj. Qqaninx te Jehová ik tzeʼn xi tqanin jun aj bʼitzil: «Chin t-xnaqʼtzantza tuʼn tten nnabʼle ex wojtzqibʼle» (Sal. 119:66).

Jakulo kubʼ kyximen txqantl qa otoq ten qnabʼil ex tbʼanel qximbʼetz. Qa ma tzaj kyqʼamaʼn moqa miʼn, jaku ten kyximbʼetz ik tzeʼn tqʼama David: «Kyʼiwlaʼnxwita tuʼnju tzʼaqlxix qe tyola».