KUI én jebi kisichjén David, je rey xi tsʼe Israel, nga tsakʼasjengʼa jngo chjoón xi Abigail tsakʼin. Ánni nga kʼoasʼin tsakʼasjengʼani. Jméni xi bakóyaná je choa̱ xi tsakʼéjna Abigail.

Je David kʼiaa tsabexkon je Abigail kʼianga títokajchingale je rey Saúl. Je xʼinle, jé xi Nabal tsakʼin, jngo chjota xi nyiná koan, xi ya kisikuinda barréle ya jngo jko̱nindo xi tíjna Judá. Je David kao chjotale tsakinyakao nga kisikuinda je barréle Nabal. Nga koanskanni, je David kisikasén chjotale nga kisíjéle Nabal je tsojmi xi ma chine (1 Sam. 25:8, 15, 16). Kuinga tsojmi xi ma chine kisijénile nga̱ kisikuindakao je cho̱ntjele.

Je jaʼaínle Nabal, chjotachini sʼin tsoyanile, kʼoa kʼoakoankjoan josʼin tsoyanile je jaʼaínle. Kʼianga tjín xi kichosíjéle David, to éntsʼen kinchja̱ kʼoa chʼaosʼin kisikʼaxki̱. Kʼoa David tsakʼejnandaa nga koaisíkʼien je Nabal. Nga tsín koanle nda kisʼin je Nabal, nʼio tse kjoa kuichomani nga̱ nikʼien je kʼoa kao xi ya tjíokao (1 Sam. 25:2-13, 21, 22).

Kʼianga tsabe je Abigail nga tsín ndatjín jmeni xi sʼin je David, nʼiojin koan kʼoa tsakʼéchjoale. Kui kisikjaʼaitsjenjinle je kjoamiyo xi tjínle xi kao Jeobá. Xi ijngosani, je Abigail nʼio nkjín tsojmi xi ma chine kikaole je David kao chjotale, je xi rey koan nga koanskanni ya naxinandá Israel. Je David koanjinle nga je Niná kisichjén Abigail nga tsakʼéchjoale nga tsínkui kʼoasʼin xi chʼaotjín. I kitsole: “¡Jótondani nga kʼoasʼin nkjín tokuin! Kʼoa jótondani nga kabatechjoanái nichxin jebi nga tsín njín kabʼejten” (1 Sam. 25:18, 19, 23-35).

Alikui koa̱n nga kʼoasʼiaan jokisʼin je Nabal. Xi ijngosani, kʼiatsa ʼyaa nga tsín nda kuichomani jngo kjoa, ndi̱to̱n kʼoéndajiaan. Kʼoati sʼiaan jokisʼin je salmista nga kui kisijéle Niná je kjoachjine kao kjoankjíntokon (Sal. 119:66).

Tsakui nichxin je xi ngikʼa kʼoakuitso nga maná nikjaʼaitsjeen kʼoa nga ninkjínlee tokoán jonʼia, ni kʼoakuitso kʼoa ninga mai, tsakui nichxin kʼoasʼin sikjaʼaitsjen jokitso je David nga i kitso: “Jótondani nga kʼoasʼin nkjín tokuin”.