NDAVITI wa Kaisalele ikeye wendekele awa majwi ali helu mu kushaka kushangathzala munakathzi umo yaliwanene nendi. Owo munakathzi wapwile Avingaile. Vika vyalingithile ngwavo Ndaviti ashangathzale uje munakathzi, cho vika vitulilongetha ku mwanja wa Avingaile?

Ndaviti waliwanene nowu munakathzi wa kushomboka ha thimbu yakele na kutewa kuli mwene Saulu. Munalume wa Avingaile wapwile Navale, cho wapwile wa kufuka manene. Wakele na vimuna vavangi ku mbwela ya lifuti lya Yunda. Ndaviti na vanu vendi ‘vanyungile’ matanga a vimanga na tunyungi va Navale. Kutundoho, Ndaviti watumine vanu kuli Navale kukalombako ‘vyoshe vyoshe vyakele navyo,’ maneneni vyakulya. (1 Samwe. 25:8, 15, 16) Vyuma vyalombele Ndaviti kuli Navale vyapwile vyavindondo kuvyetheketha na chipangi chalingile cha kunyunga vyuma vya Navale.

Navale wayoyele kwetheketha na lithzina lyendi lije lilumbununa ngwavo “Chilema.” Wakumbulwile mwamuvi na kuvyana kwana Ndaviti vyakulya. Majwi a Navale athzivithile Ndaviti kuvavala ku mbunge, ngechi wayongwele kukathsiya Navale. Ndaviti washakele kunyongetha Navale na nanga yendi yoshe mwafwa ya vulema vwendi.—1 Samwe. 25:2-13, 21, 22.

Omwo Avingaile wathzivukile viyongola vya Ndaviti, wathimpile na kulingako vimo mu vwathi vwathi. Walikehethele na kulambelela Ndaviti atengulule vithinganyeka vyendi mangana vuthamba vwa Ndaviti na Yehova vutwaleleleho. Wanene Ndaviti na vanu vendi vyakulya, te kanda apwe mwene. Ndaviti nendi wanangukile ngwendi Yehova wapangethele Avingaile mukumunyungilila ku kulinga vuvi. Ndaviti wendekele kuli Avingaile ngwendi: ‘Kandelela kuli Njambi omwo ya mana ove, na evi unalingi ku litangwa lya lelo, na kunjinyunga ku mulonga wa kuthsiya.’—1 Samwe. 25:18, 19, 23-35.

Naumo wahi ashaka kutembwinina Navale mu kujeneka kumwetha kukandelela ha vyuma vyavivwa vivanamulingila. Ngechi, nga tunanguka ngwetu kuli vukalu vushaka kutwithzila, tunapande kuwana vingila mwakuvumanethela. Netu tunatha kulithziva ngwe mwalithzivilile muka-kwimba uje walekele Njambi ngwendi: “Njilongethe mana na kuthzivithitha.”—Myatho 119:66.

Vakwetu vatha kumona mana etu ku vyuma vije tulinga. Nameme vendeka nambe kuvendeka, vanatha kulithziva ngwe Ndaviti uje wendekele ngwendi: ‘Kandelela kuli Njambi omwo ya mana ove.’