UNA hereva na David ese hahine ta enai e gwauraia. Una hahine ladana na Abigail. Dahaka dainai David ese e hanamoa, bona Abigail ena haheitalai amo dahaka ta dibamu?

David na King Saulo ena amo e heau neganai, una hahine e hedavari henia. Abigail adavana na Nabala, ia na taḡa tauna bona ena mamoe serina na Iuda ena saut kahana ororodia ai e naridiava. Nabala ena mamoe ireḡuna taudia bona ena mamoe ediai David bona ena orea taudia na idia igimadia ‘maḡuna na heto.’ Gabeai, David ese gwaukau taudia e siaidia Nabala bae noia ‘dekena ai mimia ḡaudia,’ heḡereḡere aniani, baine henidia. (1 Sam. 25:8, 15, 16) David unu e noinoi toma na maoro, badina ia bona ena orea taudia ese Nabala ena kohu e gimadiava.

Nabala anina na “kava tauna,” bona ia na una lada anina heḡereḡerena e kara. Ia na mai baduna ida e hereva bona David ena noinoi na se abia dae. Una dainai David na e ura Nabala ena kara davana baine heni. Nabala ena kavakava karana dainai mai ena ruma bese ida do bae mase.​—1 Sam. 25:2-13, 21, 22.

Abigail na David ese baine karaia ḡauna e diba neganai, ia na se gari to David dekena ela. Abigail na mai hematauraina ida David e noia ena hetura karana Iehova ida baine laloa. Bona ia ese David, pavapava ai bainela tauna, bona ena orea taudia na aniani e henidia. Gabeai, David na e laloparara Iehova ese Abigail e ḡaukaralaia ia baine koua, unu amo Dirava vairanai kara kererena ta basine karaia. David ese Abigail e hamaoroa, eto: “Oiemu lalo-maoro na hanamoamu, bona oi danu na hanamomumu, badina be hari dina ai oi ese rara ihahebubuna . . . amo vada o gwaugu tao.”​—1 Sam. 25:18, 19, 23-35.

Una sivarai amo ta dibamu, ita na asita uramu Nabala heḡereḡerena, haida ese ita daidiai e karamu kara namodia basita lalodia bada. Danu, bema ta dibamu hekwakwanai ta na be varamu, namona na dala baita tahu una baita hamaoromaoroa totona. Oibe, namona na salamo itorena tauna ese Dirava e hamaoroa heḡereḡerena, baita gwa: “Lalo-parara bona aonega ba henigu.”​—Sal. 119:66.

Ma haida ese eda kara amo eda aonega bona lalo maoromaoro karana bae itaia. Ena be ihanamoda herevadia be gwaurai hedinaraimu o lasi, to idia na David heḡereḡerena be gwaumu: “Oiemu lalo-maoro na hanamoamu.”