DAVID, katli uejkajkia itstoya ipan altepetl Israel, kiiljuik ni tlajtoli se siuatl tlen motokaxtiyaya Abigail. ¿Kenke kiampa kiiljuik? ¿Tlake techmachtia tlen kichijki Abigail?

David kiixmatki Abigail kema cholouayaya pampa tlanauatijketl Saúl kinekiyaya kimiktis. Abigail monamiktijtoya iuaya Nabal, se tlakatl katli tlatominpiayaya uan katli kinpixtoya miakej pilborregojtsitsij ipan tlali Judá ika sur. David uan itlateuijkauaj kejuak kinmokuitlauijtoyaj Nabal itekipanojkauaj uan iborregojuaj. Uajka David kintitlanki se keskij itekipanojkauaj ma kitlajtlanitij Nabal ma kinmaka se achi tlakualistli (1 Sam. 25:8, 15, 16). David kiampa kichijki pampa ya uan itekipanojkauaj kimokuitlauijtoyaj tlen eliyaya iaxka Nabal.

Nabal kinextik amo tlalnamikiyaya. Itoka kiijtosneki “uiuitik” o “amo tlalnamiki”. Kema kikajki tlen David itekipanojkauaj kiiljuijkej, kinajuak uan kintlaijiljuik. Kema inijuantij kiiljuitoj David kenijkatsa kinnankilik Nabal, nimantsi kinsentilik itlateuijkauaj pampa kinekiyaya kimiktiti. Nabal uan itekipanojkauaj kinpanoskia tlen amo kuali san pampa kinextijtoya amo tlalnamikiyaya (1 Sam. 25:2-13, 21, 22).

Kema Abigail kimatki tlen David kinekiyaya kichiuas pampa kualantoya, kinextik amo majmauiyaya uan yajki kinamiki. Ika miak tlatlepanitakayotl kitlalnamiktik uan kiiljuik Jehová kiteochiuaskia tlaj kichiuaskia tlen kuali. Nojkia, kinmakak David uan itlateuijkauaj miak tlakualistli. David kikuamachilik Jehová kititlantoya nopa siuatl pampa amo kinekiyaya ma kichiua se tlajtlakoli. Yeka kiiljuik Abigail: “Ma toTeko mitsteochiua pampa nelia titlalnamiki. Uan tinechtsakuilik para [amo] ma nijchiuati tlen fiero uan para [ma] axnitemikti” (1 Sam. 25:18, 19, 23-35).

Ni techmachtia nochipa moneki tikintlaskamatilisej sekinok uan amo tijchiuasej kej Nabal. Uan kema tikitasej se akajya ueliskia mokuapolos o tlaixpanos, moneki nimantsi tijpaleuisej amo ma kichiua tlen amo kuali. Ma tikiljuikaj toTeotsij kej katli kiijkuilok Salmo 119:66: “[Xijchiua] ma nijmachili tlen kuali uan xinechmaka tlalnamikilistli”.

Uelis sekinok moiljuisej tijnextijtokej tlalnamikilistli o kuali tijtlapejpenijtokej tlen tijchiuasej. Maske techiljuisej o amo, uelis kiyolmatij kej David kema kiijtok: “Ma toTeko mitsteochiua pampa nelia titlalnamiki”.