IKA yejuin tlajtoltin kuajli otlajto David, akin onen yeuejkaui ipan Israel, itech se siuatl itoka Abigail. ¿Tleka okiueyiteneuj? ¿Tlenon tomachtiaj itech ineskayo?

David okixmat Abigail ijkuak tekiuaj Saúl kitlaueltokaya. Abigail yononamiktijka iuan Nabal, se tlakatl akin kinpiaya miyek iyolkauan tlen tlakuajkuayaj ipan tepemej itech sur de Judea. David niman akin iuan kistinemiyaj yokinpaleuijkaj itlajpixkauan Nabal niman iyolkauan. Sakin David okintitlan sekimej makitlajtlanilitij Nabal makinmaka san tlenon tlen ueliskia kikuaskej (1 Sam. 25:8, 15, 16). Kinamikiya tlen kitlajtlaniliayaj, pampa yokitlajpixkaj tlen iyaxka Nabal.

San ika, Nabal okichiuj ijkon ken kijtosneki itoka “xtlamachilise” noso “xkipiya itsontekon”. Yejua ika tlauejli niman xika tlasojtlalistli okinnankili akin kitlajtlaniliayaj tlen David okijto. Kuakon David opeuj noyektlalia niman ijkon kontlajyouiltis Nabal pampa xkuajli otlanankili niman ika tlauejli. Nabal niman akin nemiyaj ipan ichan melak ueyi kitlaxtlauaskiaj pampa yejua xtlamachilise (1 Sam. 25:2-13, 21, 22).

Ijkuak okitak ika itech tlen kichiuaskia David ueliskia panos tlen melak xkuajli, Abigail onoyolchikauj niman okichiuj itlaj. Yejua ika tlakaitalistli okitlajtlanili David matlanemili itech ken nouika iuan Jehová. Noijki okimakak miyek tlakuajli, akin sakin yeskia tekiuaj ipan Israel, niman akin iuan nemiyaj. David okasikamat ika toTajtsin okichiuj ika itech yejon siuatl maka makichiua itlaj tlen melak xkuajli ixpan. David okijli Abigail: “Niman, ¡manoueyiteneua kuajli motlamachilis! Mamitsueyiteneuakan tejua pampa otinechtelti yejuin tonajli itech nitlajtlakos ika inyesyo oksekimej niman ika nomauan nitetlatlakuepiltis” (1 Sam. 25:18, 19, 23-35).

Uelis nimantsin tikasikamatiskej ika xnoneki tochiuaskej ken Nabal akin xtlaj okitlasojkamat. Noijki, ijkuak tikitaskej ika inochiujtika itlaj tlen xkuajli, matikchiuakan nochi tlen tiueliskej niman ijkon tikyektlaliskej. Matiktlajtlanilikan toTajtsin tlen salmista okitlajtlanili: “Xnechmachti kuajli tlamachilistli niman tlaixmatilistli” (Sal. 119:66).

Kanaj oksekimej uelis kitaskej ika tikteititiaj tlamachilistli itech tlen tikchiuaj. San ika, maski tla kijtouaj noso ka, kanaj uelis tlanemiliskej ijkon David ijkuak okijto: “¡Manoueyiteneua kuajli motlamachilis!”.