MANTŠU ao a lego ka mo godimo a boletšwe ke Dafida wa Isiraeleng ya bogologolo ge a be a reta mosadi yo a ilego a gahlana le yena tseleng. Leina la mosadi yoo e be e le Abigaile. Ke’ng seo se tutueleditšego Dafida gore a rete Abigaile, gona re ka holwa bjang ke mohlala wa mosadi yo?

Dafida o gahlane le mosadi yo nakong ya ge a be a tšhaba Kgoši Saulo. Abigaile o be a nyetšwe ke Nabala, e lego monna wa mohumi yo a bego a na le diruiwa tše dintši tšeo di bego di fula dithabeng tša seleteng sa ka borwa bja Juda. Dafida le banna ba gagwe ba ile ba šireletša badiši ba Nabala le diruiwa tša gagwe, ba ba “dikologile bjalo ka morako.” Ka morago ga nako e itšego, Dafida o ile a roma baromiwa go Nabala gore ba yo kgopela “selo le ge e le sefe seo se lego seatleng sa [gagwe],” e lego dijo. (1 Sam. 25:8, 15, 16) Ge re nagana ka tsela yeo Dafida le banna ba gagwe ba thušitšego Nabala ka gona, go be go ka se be boima gore Nabala a ba nee dijo tšeo.

Eupša Nabala, yoo leina la gagwe le bolelago gore ‘motho yo a hlokago tlhaologanyo,’ goba “Setlaela,” o ile a dira dilo ka go dumelelana le leina leo la gagwe. O ile a araba baromiwa ba Dafida ka bogale le ka lenyatšo gomme a gana go nea Dafida dijo. Ka gona Dafida o ile a itokišeletša go yo otla Nabala ka baka la lenyatšo la gagwe le tsela e sehlogo yeo a mo arabilego ka yona. Nabala le lapa la gagwe ka moka ba be ba tlo welwa ke ditlamorago tše bohloko ka baka la botlaela bja gagwe.—1 Sam. 25:2-13, 21, 22.

Ka morago ga gore Abigaile a lemoge gore phetho yeo Dafida a e dirilego ka lepotlapotla e tla ba le ditlamorago tše kotsi kudu, o ile a tsena ditaba gare ka sebete. O ile a kgopela Dafida ka tlhompho gore a naganišiše ka tswalano ya gagwe le Jehofa. Le gona Abigaile o ile a nea kgoši ye e latelago ya Isiraele le banna ba yona dijo tše dintši. Ka morago ga moo, Dafida o ile a dumela gore Jehofa ke yena a dirišitšego Abigaile go mo thibela go dira selo seo se bego se tla dira gore a be le molato pele ga Modimo. Dafida o ile a re go Abigaile: “A go retwe tlhaologanyo ya gago, go retwe le wena ka ge lehono o nthibetše gore ke se ke ka oba molato wa madi.”—1 Sam. 25:18, 19, 23-35.

Le ka mohla ga re nyake go swana le Nabala ka go se leboge dilo tše dibotse tšeo ba bangwe ba re direlago tšona. Go oketša moo, ge re bona dilo di thoma go tšwa tseleng, re swanetše go gata mogato wa go di lokiša. Ee, le rena re ka bolela mantšu a go swana le a mopsalme yo a boditšego Modimo gore: “Nthute go loka, go ba le tlhaologanyo le tsebo.”—Ps. 119:66.

Batho ba bangwe ba ka bona gore re dira dilo ka bohlale goba ka tlhaologanyo. Go sa šetšwe gore ba re botša seo goba go se bjalo, ba ka ikwa go swana le Dafida ka rena, yoo a itšego: “A go retwe tlhaologanyo ya gago.”