DAVID ro rhiẹ onyẹ Israel ọke ahwanren, yọ tẹmro erana ọke ro jiri ọmase owu. Odẹ ọmase na Abigail. Me yọ lẹrhẹ i David jiri ọmase na? Marhẹ ene ru mẹrẹn erere nẹ udje ọmase na?

David ọ mẹrẹn ọmase ọnana rọ rọnmọ ne na, ọke rọ zẹ fọkiẹ Orodje Saul rọ guọlọ kpe yi. Ọdafe owu rẹ odẹ ye orhiẹ Nabal, yẹ esa Abigail, ọye ọ ghẹrẹ isurhe enẹyen uvuẹn oberun ugbenu i Judah. David ọrhẹ idibo yi, i sẹrorẹ igegede i Nabal ọrhẹ ihworho re sun aye. Ọke oru, David no dje idibo yi vwe Nabal taghene ọ yẹ aye emaren. (1 Sam. 25:8, 15, 16) O fori nẹ Nabal ọ yẹ aye emaren, ra mẹriẹn taghene i David ọ hẹrote oborẹ i Nabal o vwori.

Ọrẹn, rẹ odẹ ye o mevirhọ akpa yanghene idjigbo na, o ru lele odẹ ye. Nọ kpaherhọ rẹn idibo i David hwainhwain jeghwai phien aye, o kwe yẹ aye emru owuorowu-u. Omarana, David no mwuegbe rọ nọ ha oja riẹ Nabal fọkiẹ uruemru ro djephia na. Nabal ọrhẹ ekrun ọnẹyen ina rioja fọkiẹ uruemru idjigbo ro djephia na.—1 Sam. 25:2-13, 21, 22.

Abigail nọ kpare idjaghwẹ ogege, nime o rheri taghene ukpokpogho ọnọ homaphia fọkiẹ oborẹ esa ye o ruru na. Nọ homariotọre rẹ i David taghene ọ kpare iroro vrẹn fọkiẹ i Jehova. Abigail ọ ji kpare emaren buebun vwe i David ọrhẹ idibo yi. David nọ mẹrẹnvwrurhe taghene i Jehova yọ ha ọmase na ruiruo neneyo ọye o jo rho ru ọdandan obaro Osolobrugwẹ. David nọ ta rẹn Abigail: “Ebrurhọ o rhirhiẹ ye wẹn fọkiẹ obọdẹn ẹghwanren wu vwori! Jenẹ ebrurhọ o rhirhiẹ ye wẹn, nime wu lẹrhere mẹ je biomu ọbara inyenana.”—1 Sam. 25:18, 19, 23-35.

O vwo ẹfro-o, o vwo ohworho rọ guọlọ hẹrokele uruemru Nabal ro vwo dje ọdaremẹro phia fọkiẹ emru orhorhomu re ru riẹ-ẹn. Habaye, arha mẹrẹnvwrurhe taghene okpetu ọ guọlọ homaphia, o fori na kpare idjaghwẹ ogege ne ru ekwakwa serhọ. Itiọrurhomẹmro, ana sabu vwo aruo ẹhẹn i David o vwori ọke rọ ta rẹn Osolobrugwẹ: “Yoni mẹ obọdẹn ẹghwanren ọrhẹ irherhe.”—Ps. 119:66.

Awọrọ ina sabu mẹrẹn obọdẹn ẹghwanren yanghene ọhọ re vwori uvuẹn irueruo ọwan. Aye ina sabu ta ye phia jerẹ i David ọke rọ ta: “Ebrurhọ o rhirhiẹ ye wẹn fọkiẹ obọdẹn ẹghwanren wu vwori!”