IMBAGA iratan nen David nensaman pian irayew so biin nabet tod dalan. Say ngaran to et Abigail. Akin et inrayew nen David si Abigail, tan antoy naaralan tayo ed alimbawa na sayan bii?

Akabat nen David iyan biin walaay asawa nen sikatoy manaamot-amot lapud si Arin Saul. Say asawa nen Abigail et si Nabal, a mayaman ya too a diad mapalandey a rehyon ed abalaten na Juda so pangipapastolan na ayayep to. Si David tan saray lalakin kakaiba to et “singa ra akapaliber a padir a manproprotekta” ed saray managpastol tan ayayep nen Nabal. Aminsan, wala ray imbaki nen David ed si Nabal pian onkerew na ‘antokaman a nayarian ton iter’ ya naakan. (1 Sam. 25:8, 15, 16) Agmet mairap ya iter so kerew nen David, lalo la ta prinotektaan to tan na kakaiba to iray kayarian nen Nabal.

Balet si Nabal et inanga-angay toy kabaliksan na ngaran to ya “Andiay kalakal” o “Makulangkulang.” Ansakit tan makapainsulto iray imbaga to tan agto labay ya iter so kekerewen nen David. Lapud satan, namparaan si David pian dusaen si Nabal ed ansakit tan agmakatunongan iran imbaga to. Anien nen Nabal tan say sankaabungan to so bunga na inkamakulangkulang to.—1 Sam. 25:2-13, 21, 22.

Lapud atebek nen Abigail so mauges a resulta na pabigla-biglan plano nen David, makpel ya nanggaway paraan si Abigail pian pigilan itan. Marespeton akitongtong si Abigail ed si David tan impanonot toy relasyon nen David ed si Jehova. Tan angawit si Abigail na dakdakel ya naakan parad si David, say onsublay ya ari, tan parad saray lalakin kaiba to. Lapud satan et binidbir nen David ya inusar nen Jehova si Abigail pian agmakapanggawa na sakey a kasalanan ed Dios. Imbaga nen David ed si Abigail: “Nirayew komon so maong a pakatebek mo! Nabendisyonan ka komon ta diad sayan agew et inamper mo ak a mankasalanan ed dala.”—1 Sam. 25:18, 19, 23-35.

Anggapoy malabay ed sikatayon aligen si Nabal, ya agmaapresya ed maong iran gagawaen na arum. Sakey ni, no naimano tayon walay posiblin mauges a nagawa, manggawa tayoy paraan pian pigilan itan. On, nalikna tayo met so alikna na salmista ya imbaga tod Dios: “Bangatan mo ak pa na maong a pakatebek tan kakabatan.”—Sal. 119:66.

Nayarin naimano na arum ya marunong itayo odino maong so pakatebek tayo base ed saray gagawaen tayo. Ibabalikas da man itan o andi, nayarin nalilikna da met so singa alikna nen David nen imbaga to: “Nirayew komon so maong a pakatebek mo!”