DEPIT, mehn Israel en mahs, kapingahki lih emen me e tuhwongada lokaia pwukat me kileldi powe. Eden liho Apikail. Dahme kamwakid Depit en kapinga ih, oh ia duwen atail kak paiekihda ahn Apikail mehn kahlemeng?

Depit tuhwongada lih pwopwoud menet ni ahnsou me e wie tangatangasang Nanmwarki Sohl. Apikail pwoudiki Napal, ohl kepwehpwe men me naineki pelinmen tohto ni nahna kan ni palieir en Suda. Depit oh nah ohl ako kin “apwahpwalih” nein Napal sounsilepen sihpw ko oh pil pelinmen ko. Mwuhr Depit kadarala meninkeder kei rehn Napal pwehn peki en “kupwurei” irail oh kihong irail kanarail mwenge. (1 Sam. 25:8, 15, 16) Pekipek wet sohte apwal en kapwaiada pwehki Depit oh nah ohl ako kin apwalih oh pere soahng kan me Napal ahneki.

Ahpw Napal warohng edeo, me wehwehki “Pweipwei.” E sapeng Depit ni lemei, kauwe, oh sohte kapwaiada ahn Depit pekipeko. Eri Depit kaunopada pwehn kaloke Napal pwehki eh wia met. Napal oh tohn imweo pahn lokolongki eh pweipwei.​—1 Sam. 25:2-13, 21, 22.

Apikail ese me pilahn me Depit mwadangete wiahdao pahn imwila suwed, eri ni eimah e kauhdi Depit. E kasalehda wahu ni eh peki rehn Depit en wekidala eh madamadau pwehki met kakete kauwehla eh nanpwungmwahu rehn Siohwa. Oh Apikail kihong Depit, me pahn wiahla nanmwarki, oh pil nah ohl ako, diren mwenge. Depit ese me Siohwa ketin doadoahngki Apikail en kauhdi ih sang eh pahn wiahda mehkot me pahn kahrehiong ih en dipada mwohn Koht. Depit ndaiong Apikail: “Kalahngan en Koht pwehki omwi kupwuramwahu oh dahme komw wiadahr rahnwet pwe I en dehr wiahda sapwung laud en kemehla aramas.”​—1 Sam. 25:18, 19, 23-35.

Kitail sohte douluhl men duwehte Napal oh sohte kin kalahnganki soahng mwahu kan me wiawihong kitail. Patehng met, ni atail tehkada me mie mehkot sapwung pahn wiawi, kitail kin wia dahme kitail kak pwehn kauhdi. Ei, kitail kak alasang dahme sounmelkahkao patohwanohng Koht: “Komw ketikihong ie loalokong oh erpit.”​—Mel. 119:66.

Ele meteikan kin tehk duwen atail wiewiahn erpit de loalokong. Mehnda ma re ndahla de soh, ele re ahneki soangen pepehmohte me Depit ahneki ni eh nda: “Kalahngan en Koht pwehki omwi kupwuramwahu!”