TOGO yee coyiˈrinohu biˈre Israeelete moohinohu Daawiti mitte manchonni doogote xaadi yannaraati. Manchote suˈmi Abigiyati. Daawiti ise galatanno gede assinori maati? Ninke ise lawishshinni maa ronseemmo?

Daawiti tenne galte afidhino manchonni xaadinohu Moote Saaooli shaannosikki gede xooqanni noo yannaraati. Abigiya Yihudaho aliyyeenni ilaalaamu qooxeessiˈra heeˈrannohu saada afiˈrinohu dureessu manchi Naabaalira assidhino. Daawitinna mannisi, Naabaali hoshshanna allaalaasinesi ‘huxximma gaangeessite agartinonsa.’ Yannate gedensaanni Daawiti sagale hoogi yannara, Naabaali dandaannore asse kaaˈlannosi gede mannasi isiwa soyino. (1 Sam. 25:8, 15, 16) Daawitinna mannisi Naabaalira assitinore hendiro, Daawiti xaˈmiˈrinori assate qarrisannore diˈˈikkino.

“Gowwa” yitanno tiro afiˈrino suˈmi noosihu Naabaali kayinni gowwimmate looso loosino. Isi kaajjishenna saalfachishannore coyiˈre Daawiti xaˈmiˈrinore hoˈlino. Konnira Daawiti, Naabaali bushare coyiˈrinoteranna afiˈre heeˈrenni hoˈlinositera iso qorichishate kai. Naabaali gowwimmatenni assinori isiranna minisi manni baalaho goofo abbannoho.—1 Sam. 25:2-13, 21, 22.

Abigiya tenne huwattinohura rakke mitore assate kaˈu. Ise Daawiti Yihowa ledo noosi jaalooma hunannore assannokki gede kulte ayirrinyunni huuccitino. Hattono, aane moote ikkannohura Daawitiranna mannisira lowo sagale massitino. Daawiti cubbo ikkinore assannokki gede Yihowa ise widoonni kaaˈlinosita coyiˈrino. Daawiti Abigiyara togo yiino: “Mannu mundee duneemmokki gede . . . assattaera tenne hayyo uyinohe Magani galatamo; aterano Maganu ikkohe.”—1 Sam. 25:18, 19, 23-35.

Ninke baalunku assinoonninkehu danchu coyiˈra galatiweelo ikkine Naabaali gedeere ikka horo dihasiˈneemmo. Qoleno, bushu coyi ikkara noota anfummoro, hakko coye hayyotenni tira hasiissannonke. Togoo yannara faarsaasinchu gede, Yihowa “ogimmanna [woy wodanchanna] hayyo uyie” yine huucciˈra dandiineemmo.—Far. 119:66.

Mannu assineemmo coye lae hayyo woy wodancha noonketa afa dandaanno. Daawiti gede insa afuunni coyiˈre woy wodaninsanni, ‘Hayyokkira Maganu maassiˈrohe!’ yaannoha ikkara dandaanno.