NA DAVID fu owruten Israel ben taki den wortu disi fu prèise wan uma di a ben miti. Na uma disi ben nen Abigayil. Fu san ede David ben prèise na uma disi, èn san wi kan leri fu en?

David miti na uma disi na a ten di a ben e lowe gi Kownu Saul. Abigayil ben trow nanga Nabal, wan gudu man di ben abi bigi ipi skapu di ben e nyan grasi na ini a bergikontren na a zuidsei fu Yuda. David nanga den man fu en ben de „leki wan skotu” gi den skapuman nanga den skapu fu Nabal. Wan leisi, David seni boskopuman go na Nabal fu aksi en fu gi en pikinso nyanyan, ’awinsi san a ben abi’ (1 Sam. 25:8, 15, 16). Te yu e luku a bun di David nanga den man fu en ben du gi Nabal, dan David no ben aksi Nabal wan bigi sani.

Ma a no fu soso Nabal en nen wani taki „Don”, fu di a sani di a du ben don trutru. A kosi David èn a weigri fu gi en san a ben aksi en. Dati meki David sreka ensrefi fu go strafu Nabal fu di a ben piki en na so wan fasi. Nabal nanga den sma fu na oso fu en ben o pai gi a don sani di a ben du.​—1 Sam. 25:2-13, 21, 22.

Abigayil ben frustan sortu takru bakapisi a ben o abi efu David ben o du sani nanga atibron. Dati meki a teki deki-ati èn a go na David. A taki na wan lespeki fasi nanga David di ben o tron kownu, fu sori en taki a ben musu hori a matifasi fu en nanga Yehovah na prakseri. A gi David nanga den man fu en bogobogo nyanyan. Na so David kon si taki Yehovah gebroiki na uma disi fu tapu en fu du wan sani di Gado no feni bun. David taigi Abigayil: „Blesi fu yu, fu di yu na wan uma di de nanga krin frustan. Na yu meki taki mi no poti misrefi na brudu-paiman tide.”​—1 Sam. 25:18, 19, 23-35.

A no de fu taki dati wi no ben o wani de leki Nabal. Ala ten wi wani sori warderi gi den bun sani di trawan e du gi wi. Boiti dati, te wi si taki wan sani o tyari problema kon, dan wi musu du san wi man fu sorgu taki dati no pasa. Iya, wi e firi neleki a psalm skrifiman di ben taigi Gado: „Leri mi fa fu du bun, fa fu gebroiki mi frustan èn fa fu waka nanga koni.”​—Ps. 119:66.

Te wi e tyari wisrefi na a fasi dati, dan trawan o man si taki wi koni, noso taki wi e gebroiki wi frustan. Awansi den no e taigi wi, toku a kan taki den e firi leki David di ben taki: ’Blesi fu yu, fu di yu na wan sma di de nanga krin frustan.’