LAMAVI langenhla akhulunywa nguDavide waka-Israyeli wasendvulo advumisa umfati lake wahlangana naye. Libito lakhe bekungu-Abigayili. Yini leyenta Davide wadvumisa lomfati, futsi yini lesiyizuzako esibonelweni salomfati?

Davide wahlangana nalomfati lobekashadile ngesikhatsi abalekela iNkhosi Sawula. Abigayili bekashade Nabali, indvodza lebeyinjingile, lebeyidlisa umhlambi wayo lomkhulu esigodzini lebesinetintsaba, lesiseningizimu nelive lakaJuda. Davide nemadvodza lebekanawo bebafana ‘nelutsango lobelutungelete’ belusi kanye nemhlambi waNabali. Kamuva Davide watfumela titfunywa kuNabali kutsi tiyocela ‘loko lebekangahle abaphe kona’ kute batewukudla. (1 Sam. 25:8, 15, 16) Lesi bekungasiso sicelo lesilukhuni nasicabanga ngendlela Davide kanye nemadvodza lebekanawo labavikela ngayo belusi kanye nemhlambi waNabali.

Noma kunjalo, Nabali walilandzela ligama lakhe lelisho “Longenangcondvo” nobe “Silima.” Waphendvula Davide kabi futsi wametfuka, wala kumentela loko lebekakucelile. Ngako-ke Davide wancuma kumjezisa Nabali ngenca yekutsi umetfukile futsi umphendvule ngendlela lengenangcondvo. Nabali nendlu yakhe bebatawulutfota lolumanti ngenca yesento sakhe lesibulima.​—1 Sam. 25:2-13, 21, 22.

Acabanga ngemiphumela lemibi lebeyitawuba khona kuloko lobekuhlelwa nguDavide, ngesibindzi Abigayili wangenela. Wakhuluma ngenhlonipho naDavide futsi wamenta kutsi acabange ngebuhlobo bakhe naJehova. Ngako-ke, waniketa Davide lobekatawuba yinkhosi, kudla lokwenele yena kanye nemadvodza lebekanawo. Ngako-ke, Davide wadvumisa Jehova ngekutsi usebentise lomfati kute amvikele ekwenteni intfo lebeyitamenta angemukeleki kuNkulunkulu. Davide watsi ku-Abigayili: “Shangatsi ungabusiswa ngalomcondvo wakho lokhaliphile, nekutsi ungivimbe ngingayicitsi ingati lamuhla.”​—1 Sam. 25:18, 19, 23-35.

Kusebaleni kutsi ngeke sesitsandze kuba njengaNabali, ngekutsi singabongi lapho sentelwa tintfo letinhle. Ngetulu kwaloko, nangabe sibona intfo lembi icala kwenteka, sitawube senta kahle nangabe senta konkhe lokusemandleni etfu kute siyivimbele kutsi ingenteki. Singavumelana nemavi lahlakaniphile emhlabeleli lowatsi kuNkulunkulu: “Ngifundzise umcondvo lomuhle nekwati.”​—Hla. 119:66.

Labanye bangabona kutsi sihlakaniphile nobe sinengcondvo endleleni lesenta ngayo. Kungaba kutsi bayakhuluma ngako nobe abakhulumi, kodvwa bangativa njenga-Davide lowatsi: “Shangatsi ungabusiswa ngalomcondvo wakho lokhaliphile.”