DAVID bi̱ nixtáa náa Israel, ndiʼyamajkuu mbáa a̱ʼgu̱ bi̱ nigumbiʼyuu Abigail. Náa numuu niʼni rígi̱ xá. Ndiéjunʼ ejmañuluʼ ga̱jma̱a̱ numuu Abigail rá.

David nininiʼ Abigail índo̱ rey Saúl xtáa rayáa mu maxíyáa. Abigail ndiyáa Nabal, mbáa xa̱bu̱ bi̱ gíʼdoo bi̱ xtáa náa kúbá dí rígá xígií náa sur ndrígóo Judá. David gajmíi̱n xa̱bi̱i̱ ninindxu̱ún xó mbá “xtátsí” bi̱ nañewu̱u̱n báxtúu ndrígóo Nabal ga̱jma̱a̱ xúgínʼ xujkiúu. Ikhú, David nikuʼmiin xa̱bu̱ mu mangúún ku̱ñu̱u̱n ajngáa mu munda̱ʼa̱a̱ ganitsu (1 Sam. 25:8, 15, 16). Na̱nguá nindxu̱u̱ mbá dí ra̱májánʼ rí kuwa runi, numuu rí ikhiin niñewa̱a̱n xúgíʼ dí gíʼdoo Nabal.

Mú Nabal nindxu̱u̱ xóo má nindoo gáʼthúu̱n mbiʼyuu bi̱ “tsendxaʼóo edxu̱u̱” o “skáguinʼ”. Ikhaa niriʼña̱a̱ David ga̱jma̱a̱ ajngáa gakhi̱i̱. Ikha jngó David niʼnirataminaʼ mu maxnúu castigo numuu dí raʼkhí niriʼña̱a̱. Numuu rí skáguinʼ Nabal maʼni rí mamínuʼ ikhaa gajmíi̱n bi̱ kuwa náa goʼwóo (1 Sam. 25:2-13, 21, 22).

Índo̱ ndiʼyoo Abigail ndiéjunʼ gáʼni David ga̱jma̱a̱ numuu rígi̱, ikhaa niyambáá mu xárígá rúʼko̱. Niʼthúu̱n ga̱jma̱a̱ gamajkhu ga̱jma̱a̱ niʼni mandxaʼwáminaʼ rí xóo ikhaa nambáxu̱u̱ ga̱jma̱a̱ Jeobá. Ma̱ngaa nixnúu mbaʼa ganitsu David bi̱ mani̱ndxu̱u̱ rey náa Israel gajmíi̱n xa̱bi̱i̱. Ikhú David ndiʼyoo rí Dios nijmiuu mu marikhoo rí xáʼni mbá dí ra̱májánʼ náa inuu ikhaa. Niʼthúu̱n: “Gaguma tsajkurámáánʼ ikháánʼ numuu rí natatsaʼwáá májánʼ edxa̱ʼ, ma̱ngaa rí nitani̱ rí xáxidíí eʼdi” (1 Sam. 25:18, 19, 23-35).

Ra̱mingíjyúuʼ mbuʼyáá dí gíʼmaa muxnáa núma̱aʼ, xúʼni̱ xóo niʼni Nabal. Ma̱ngaa gíʼdoo numuu rí mundxaʼwáá edxu̱lúʼ índo̱ gúʼyáá rí marigá mbá dí ra̱májánʼ ga̱jma̱a̱ mbuʼyááʼ rí muʼni mu xárígá. Mangáanʼ ma̱ndoo muʼtháán Dios xó má niʼthí salmista: “Arasngóʼ [...] rí mandxa̱ʼo̱o̱ májánʼ edxu̱ʼ ga̱jma̱a̱ ku̱ma̱” (Sal. 119:66).

Eʼwíínʼ mbuyáá rí májánʼ rí niraʼwíí muʼni. Á mu nuthi o na̱nguá, mbáa mundxa̱ʼwa̱a̱ edxu̱ún xóo niʼthí David: “Gaguma tsajkurámáánʼ numuu rí natatsaʼwáá májánʼ edxa̱ʼ”.