LIAFUAN sira-neʼe David husi Izraél antigu mak koʼalia atu gaba feto ida neʼebé nia hasoru. Feto neʼe nia naran mak Abigail. Tanbasá mak David gaba nia? No saida mak ita bele aprende husi Abigail nia ezemplu?

David hasoru Abigail iha tempu neʼebé nia halai hela husi Liurai Saul. Abigail mak Nabal nia feen. Nabal mak ema riku ida, no nia iha bibi-lubun barak iha área foho nian iha Judá nia parte súl. David no ninia ema sira sai “hanesan moru neʼebé haleʼu hodi proteje” Nabal nia bibi no bibi-atan sira. David haruka ninia mane balu atu bá husu ai-han husi Nabal. (1 Samuel 25:8, 15, 16) Buat neʼebé David husu neʼe laʼós demais, tanba durante neʼe David no ninia ema sira ajuda Nabal.

Nabal nia naran iha arti katak “Beik-teen”,[transpose?] no ninia hahalok tuir duni ninia naran. Nabal lakohi fó buat neʼebé David husu. Nia hatán ho siʼak no hatún David. Tan neʼe, David prepara an atu fó kastigu ba Nabal no ninia umakain tanba ninia ulun-toos no hahalok beik.​—1 Samuel 25:2-13, 21, 22.

Abigail bele haree rezultadu aat neʼebé sei mosu tanba David nia planu neʼe. Tan neʼe, ho aten-brani, nia deside atu halo buat ruma. Nia koʼalia ba David no halo nia hanoin kona-ba ninia relasaun ho Jeová. Nia mós fó ai-han barak ba David no ninia ema sira. David, neʼebé Jeová hili ona atu sai liurai tuirmai, rekoñese katak Jeová uza Abigail atu hanetik nia hodi la halo sala hasoru Maromak. David hatete ba Abigail: “Maromak sei haraik bensaun ba ó-nia matenek! No Maromak sei haraik bensaun ba ó tanba ohin ó hanetik haʼu atu la simu sala kona-ba raan.”​—1 Samuel 25:18, 19, 23-35.

Ita lakohi duni atu sai hanesan Nabal neʼebé la iha agradese ba buat diʼak neʼebé ema halo. No se ita mak haree situasaun ladiʼak ruma atu mosu, diʼak atu halo buat ruma hodi hapara problema neʼe la bele mosu. Ita bele sai hanesan ema neʼebé hakerek salmu ida, nia hatete ba Maromak: “Hanorin haʼu matenek no koñesimentu.”​—Salmo (Mazmur) 119:66.

Se ita halo hanesan neʼe, karik ema seluk sei haree ita-nia hahalok neʼebé hatudu matenek. No maski sira koʼalia sai ba ita ka lae, maibé sira sei sente hanesan David neʼebé hatete: “Maromak sei haraik bensaun ba ó-nia matenek!”