DAVIDI u ken Iserael u sha ayange a tsuaa la, yange ôr mkaanem ma ma lu sha heen ne, sha u wuese kwase ugen u ve zua sha gbenda yô. I yilan kwase ne ér Abigail. Lu nyi i na ve Davidi wuese kwase shono, man ikyav na la ia fatyô u wasen se nena?

Davidi yange za zua a kwase u er nom ne sha gbenda, shighe u Davidi lu yevese Tor Saulu la. Abigail lu kwase u Nabal, ornyar u lu a ilev kpishi, u ilev nav mbin mbi za yaan toho ken tar u iwoogh, vegher u imbusutariyan i Yuda la. Davidi man ior nav yange ve ‘hingir gilgar’ u mbakuranilev mba Nabal man ilev nav kpaa. Shighe kar yô, Davidi tindi ior nav hen Nabal ér a na ve ‘kwagh u a nenge i doo un’ ken kwaghyan u lu a mi kpishi la yô. (1 Sam. 25:8, 15, 16) Aluer u time sha gbenda u Davidi man ior nav nenge sha ilev man mbakuranilev mba Nabal la yô, kwagh u Davidi sôn la, lu kwagh u ma taver Nabal u eren ga.

Nahan kpa, Nabal u inja i iti na i lu “ibumegh” la, er kwagh zua sha iti na vough. Yange ôr kwagh sha tswam man sha ilyahan, shi venda u nan Davidi kwagh u sôn la kpaa. Nahan Davidi wa agoyol sha u za tsahan Nabal sha iliam na i dang kua kwaghyan u nyume un la. Lu u a tim Nabal a ya na cii sha ci u ibumegh nagh kira.—1 Sam. 25:2-13, 21, 22.

Er Abigail nenge a akaa a vihin tsung a a va due ken kwagh u Davidi hen sha mi ga tsô, soo u eren la yô, Abigail taver ishima za yange un. Yange lam a Davidi sha icivir shi wase un u henen sha mlu na a Yehova la. Maa na Davidi u lu u una hingir tor la vea ior nav kwaghyan kpishi. Davidi kpa wuese Abigail sha ci u Yehova er tom a na u yangen un u eren kwagh u una na una lu a ibo awambe sha ishigh ki Aôndo yô. Davidi kaa a Abigail ér: “I̱ Wuese Kwaghfan Wou shi i̱ wuese we iyol you kpaa; we u u yangem ikye i awambe nyian” ne!—1 Sam. 25:18, 19, 23-35.

Sha kwagh u se er sha heen ne yô, mayange se soo u lun er Nabal nahan ga cii. Aluer mbagenev er akaa a dedoo a vese yô, gba u se lu a iwuese sha mi. Heela tseegh ga, shighe u se nenge kwaghbo a lu nôngo u eren yô, doo u se er kwagh u se fetyô la sha er se yange un yô. Se fatyô u kimbir mkaanem ma orpasalmi u kaa a Aôndo ér: “Tesem mkav u dedoo man kwaghfan” la.—Ps. 119:66.

Aluer se er nahan yô, se tese mbagenev sha aeren ase ser, se mba a kwaghfan shin mfe u injaa la. Vea kaa sha zwa shin vea kaa ga kpa, alaghga a lu ve ken ishima er Davidi, u kaa ér: “I̱ wuese kwaghfan wou” la nahan!